ମହିଳାମାନଙ୍କ ଜୀବନରେ ମେନୋପଜ୍ ବା ଋତୁବନ୍ଦ ଏକ ସ୍ୱାଭାବିକ ଶାରୀରିକ ପ୍ରକ୍ରିୟା ହୋଇଥିଲେ ମଧ୍ୟ ଏହା ଶରୀରରେ ଅନେକ ବଡ଼ ପରିବର୍ତ୍ତନ ଆଣିଥାଏ। ସାମ୍ପ୍ରତିକ ସ୍ୱାସ୍ଥ୍ୟ ଗବେଷଣା ଅନୁଯାୟୀ, ମେନୋପଜ୍ ପରେ ମହିଳାମାନଙ୍କ ଶରୀରରେ ହଠାତ୍ ରକ୍ତରେ ଶର୍କରା ବା ବ୍ଲଡ୍ ସୁଗାରର ମାତ୍ରା ବୃଦ୍ଧି ପାଇବାର ଆଶଙ୍କା ଯଥେଷ୍ଟ ବଢ଼ିଯାଇଥାଏ। ଏଭଳି ସ୍ଥିତିରେ ସଠିକ୍ ସମୟରେ ଏହାର ପରିଚାଳନା ନକଲେ ଏହା ଟାଇପ୍-୨ ମଧୁମେହ ର ରୂପ ନେଇଥାଏ।
କାହିଁକି ବଢ଼ିଥାଏ ବ୍ଲଡ୍ ସୁଗାର ?
ମେନୋପଜ୍ ସମୟରେ ମହିଳାଙ୍କ ଶରୀରରେ ଇଷ୍ଟ୍ରୋଜେନ୍ ଏବଂ ପ୍ରୋଜେଷ୍ଟେରୋନ୍ ହରମୋନ୍ର ସ୍ତରରେ ବ୍ୟାପକ ହ୍ରାସ ଘଟିଥାଏ। ଏହି ହରମୋନ୍ଗୁଡ଼ିକ ଶରୀରରେ ଇନସୁଲିନ୍ର କାର୍ଯ୍ୟକାରିତାକୁ ନିୟନ୍ତ୍ରଣ କରିବାରେ ସାହାଯ୍ୟ କରନ୍ତି। ହରମୋନ୍ର ସନ୍ତୁଳନ ବିଗିଡ଼ିବା ଦ୍ୱାରା ଶରୀରରେ ‘ଇନସୁଲିନ୍ ପ୍ରତିରୋଧ’ ସୃଷ୍ଟି ହୁଏ, ଯାହା ଫଳରେ ରକ୍ତରେ ସୁଗାରର ମାତ୍ରା ହଠାତ୍ ବୃଦ୍ଧି ପାଇଥାଏ। ଏହା ବ୍ୟତୀତ ଏହି ବୟସରେ ଓଜନ ବୃଦ୍ଧି ଏବଂ ଶୋଇବାରେ ସମସ୍ୟା ମଧ୍ୟ ମଧୁମେହର ଅନ୍ୟତମ କାରଣ ସାଜିଥାଏ।
ଏଭଳି କରନ୍ତୁ ସୁଗାରର ସଠିକ୍ ନିୟନ୍ତ୍ରଣ
- ଖାଦ୍ୟପେୟରେ ପରିବର୍ତ୍ତନ : ଖାଦ୍ୟରେ କାର୍ବୋହାଇଡ୍ରେଟ୍ ଏବଂ ମିଠାର ମାତ୍ରା କମ୍ କରନ୍ତୁ। ଦୈନନ୍ଦିନ ଆହାରରେ ସବୁଜ ପନିପରିବା, ଫାଇବରଯୁକ୍ତ ଖାଦ୍ୟ ଏବଂ ଶସ୍ୟ ଜାତୀୟ ଖାଦ୍ୟ ସାମିଲ କରନ୍ତୁ।
- ନିୟମିତ ବ୍ୟାୟାମ : ଦୈନିକ ଅତିକମରେ ୩୦ ମିନିଟ୍ ଚାଲିବା, ଯୋଗ କିମ୍ବା ହାଲୁକା ବ୍ୟାୟାମ କରିବା ଦ୍ୱାରା ଶରୀରରେ ଇନସୁଲିନ୍ର ସକ୍ରିୟତା ବୃଦ୍ଧି ପାଇଥାଏ ଏବଂ ଓଜନ ନିୟନ୍ତ୍ରଣରେ ରହେ।
- ନିୟମିତ ଯାଞ୍ଚ : ମେନୋପଜ୍ ଅବସ୍ଥା ଦେଇ ଗତି କରୁଥିବା ମହିଳାମାନେ ପ୍ରତି ୩ ମାସରେ ଅନ୍ତତଃ ଥରେ ନିଜର ବ୍ଲଡ୍ ସୁଗାର ସ୍ତର (Fasting ଓ PP) କିମ୍ବା HbA1c ପରୀକ୍ଷା କରାଇବା ଉଚିତ।
- ପର୍ଯ୍ୟାପ୍ତ ନିଦ୍ରା ଓ ଚିନ୍ତାମୁକ୍ତ ଜୀବନ : ମେନୋପଜ୍ ସମୟରେ ମାନସିକ ଚାପ ବା ଷ୍ଟ୍ରେସ୍ ହେବା ସ୍ୱାଭାବିକ। ଏଥିପାଇଁ ଧ୍ୟାନ କରନ୍ତୁ ଏବଂ ଦୈନିକ ୭ ରୁ ୮ ଘଣ୍ଟା ଶୋଇବା ନିଶ୍ଚିତ କରନ୍ତୁ, ଯାହା ଦ୍ୱାରା ହରମୋନ୍ ନିୟନ୍ତ୍ରିତ ରହିବ।
ସାମାନ୍ୟ ସତର୍କତା ଏବଂ ସନ୍ତୁଳିତ ଜୀବନଶୈଳୀ ଆପଣାଇ ମେନୋପଜ୍ ପରବର୍ତ୍ତୀ ମଧୁମେହ ଜନିତ ସମସ୍ୟାରୁ ସହଜରେ ମୁକ୍ତି ମିଳିପାରିବ ବୋଲି ମତ ଦେଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ।
Also read : https://purvapaksa.com/indias-first-freight-emu-to-run-even-faster-than-bande-india-trial-successful/
