ଜାତୀୟ ତଦନ୍ତକାରୀ ସଂସ୍ଥା ଜାମ୍ମୁ-କାଶ୍ମୀରରେ ଆତଙ୍କବାଦ ଏବଂ ବିଚ୍ଛିନ୍ନତାବାଦୀ କାର୍ଯ୍ୟକଳାପ ବିରୋଧରେ ଏକ ବଡ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଶ୍ରୀନଗରରେ ଘଟିଥିବା ଏକ ଭୟଙ୍କର ଜନଗହଳି ହିଂସାକାଣ୍ଡ ଏବଂ ପୋଲିସ କର୍ମଚାରୀଙ୍କ ଉପରେ ଆକ୍ରମଣ ମାମଲାରେ ଏନଆଇଏ ଶୁକ୍ରବାର ଦିନ ଜେଲରେ ଥିବା ବିଚ୍ଛିନ୍ନତାବାଦୀ ନେତା ତଥା ଡେମୋକ୍ରାଟିକ ଫ୍ରିଡମ ପାର୍ଟିର ମୁଖ୍ୟ ଶବ୍ବୀର ଅହମ୍ମଦ ଶାହାଙ୍କ ସମେତ ୬ ଜଣ ବରିଷ୍ଠ ହୁରିୟତ କନଫରେନ୍ସ ନେତାଙ୍କ ବିରୋଧରେ ଏକ ବ୍ୟାପକ ଚାର୍ଜସିଟ୍ ଦାଖଲ କରିଛି। ଆତଙ୍କବାଦୀର ଶବଯାତ୍ରାକୁ ମାଧ୍ୟମ କରି ସାଧାରଣ ଲୋକଙ୍କୁ ଉସୁକାଇବା ଏବଂ ସେନା ତଥା ପୋଲିସ ଉପରେ ସୁଚିନ୍ତିତ ଭାବେ ଗୁଳିଚାଳନା ଓ ପଥରମାଡ଼ କରିବା ଭଳି ସଙ୍ଗୀନ ଅଭିଯୋଗ ଏହି ନେତାମାନଙ୍କ ବିରୋଧରେ ଅଣାଯାଇଛି।
ଜାମ୍ମୁରେ ଅବସ୍ଥିତ ସ୍ୱତନ୍ତ୍ର ଏନଆଇଏ ଅଦାଲତରେ ଏହି ଚାର୍ଜସିଟ୍ ଦାଖଲ କରାଯାଇଛି। ଚାର୍ଜସିଟ୍ରେ ନାମିତ ୬ ଜଣ ହୁରିୟତ ନେତାଙ୍କ ମଧ୍ୟରୁ ୩ ଜଣଙ୍କର ପୂର୍ବରୁ ମୃତ୍ୟୁ ହୋଇସାରିଥିଲେ ହେଁ, ଏହି ବଡ଼ ବିଚ୍ଛିନ୍ନତାବାଦୀ ଷଡ଼ଯନ୍ତ୍ରର ରହସ୍ୟ ଉନ୍ମୋଚନ କରିବା ପାଇଁ ସେମାନଙ୍କର ଅପରାଧିକ ସମ୍ପୃକ୍ତି ଓ ପ୍ରମାଣକୁ ଏନଆଇଏ କୋର୍ଟରେ ଉପସ୍ଥାପନ କରିଛି।
ଚାର୍ଜସିଟ୍ରେ ଥିବା ପ୍ରମୁଖ ନେତାଙ୍କ ନାମ
ଏନଆଇଏ ଦ୍ୱାରା ଦାଖଲ କରାଯାଇଥିବା ଏହି ଚାର୍ଜସିଟ୍ରେ ବିଚ୍ଛିନ୍ନତାବାଦୀ ନେତା ଶବ୍ବୀର ଅହମ୍ମଦ ଶାହାଙ୍କ ବ୍ୟତୀତ ସେହି ସମୟର ପ୍ରମୁଖ ହୁରିୟତ ଚେହେରା ଯଥା ; ସୈୟଦ ଅଲୀ ଶାହା ଗିଲାନୀ, ଅବଦୁଲ ଗନି ଲୋନ, ମହମ୍ମଦ ୟାକୁବ ୱାକିଲ, ଜାଭେଦ ଅହମ୍ମଦ ମୀର ଏବଂ ଶକିଲ ଅହମ୍ମଦ ବକ୍ସିଙ୍କ ନାମ ସାମିଲ ରହିଛି।
ଏହି ପ୍ରସଙ୍ଗରେ NIAର ସରକାରୀ ପ୍ରବକ୍ତା ଜଣାଇଛନ୍ତି ଯେ, ସୈୟଦ ଅଲୀ ଶାହା ଗିଲାନୀ, ଅବଦୁଲ ଗନି ଲୋନ ଏବଂ ମହମ୍ମଦ ୟାକୁବ ୱାକିଲଙ୍କର ମାମଲାର ବିଚାର ଚାଲିଥିବା ସମୟରେ ମୃତ୍ୟୁ ହୋଇସାରିଥିବାରୁ ସେମାନଙ୍କ ବିରୋଧରେ ଆଇନଗତ ପ୍ରକ୍ରିୟା ବନ୍ଦ ହୋଇଯାଇଛି। ମାତ୍ର ତଦନ୍ତ ସମୟରେ ସଂଗୃହିତ ହୋଇଥିବା ବିଭିନ୍ନ ଡକ୍ୟୁମେଣ୍ଟ ଓ ସାକ୍ଷ୍ୟ ପ୍ରମାଣରୁ ଏହା ସ୍ପଷ୍ଟ ହୋଇଛି ଯେ, ଏହି ସମସ୍ତ ନେତା ମିଳିତ ଭାବେ ଭାରତ ବିରୋଧୀ ଷଡ଼ଯନ୍ତ୍ରର ମୁଖ୍ୟ ସୂତ୍ରଧର ଥିଲେ। ବର୍ତ୍ତମାନ ବଞ୍ଚିଥିବା ଦୁଇ ଅଭିଯୁକ୍ତ ଜାଭେଦ ଅହମ୍ମଦ ମୀର ଓ ଶକିଲ ଅହମ୍ମଦ ବକ୍ସି ଶ୍ରୀନଗରରେ ଅଛନ୍ତି ଏବଂ ଶବ୍ବୀର ଶାହା ଦିଲ୍ଲୀର ତିହାର ଜେଲରେ ବନ୍ଦୀ ଅଛନ୍ତି।
କ’ଣ ଥିଲା ସେହି ଭୟଙ୍କର ହିଂସାକାଣ୍ଡ?
ଏନଆଇଏର ଅନୁସନ୍ଧାନ ମୁତାବକ, ଏହି ଘଟଣାଟି ୧୯୯୬ ମସିହା ଜୁଲାଇ ୧୭ ତାରିଖରେ ଶ୍ରୀନଗରର ନାଜ୍ କ୍ରସିଂ ନିକଟରେ ଘଟିଥିଲା। ସେହି ସମୟରେ ସେନା ଗୁଳିରେ ନିହତ ହୋଇଥିବା ଜଣେ କୁଖ୍ୟାତ ଆତଙ୍କବାଦୀ ହିଲାଲ ଅହମ୍ମଦ ବେଗ୍ର ମୃତଦେହକୁ ନେଇ ହୁରିୟତ ନେତାମାନଙ୍କ ନେତୃତ୍ୱରେ ଏକ ବିଶାଳ ଶବଯାତ୍ରା ବା ଶୋଭାଯାତ୍ରା ବାହାର କରାଯାଇଥିଲା। ଏହି ୬ ଜଣ ନେତା ବେଆଇନ ଜନସମାବେଶର ନେତୃତ୍ୱ ନେବା ସହ ସେଠାରେ ଉପସ୍ଥିତ ହଜାର ହଜାର ଲୋକଙ୍କୁ ଭାରତ ସରକାର ଓ ପ୍ରଶାସନ ବିରୋଧରେ କଡ଼ା ଭାଷାରେ ଉସୁକାଇଥିଲେ।
ଏହି ସମୟରେ ଶବଯାତ୍ରାର ଆଢ଼ୁଆଳରେ ଅନେକ ସଶସ୍ତ୍ର ଆତଙ୍କବାଦୀ ସାଧାରଣ ଜନତାଙ୍କ ମଧ୍ୟରେ ମିଶି ରହିଥିଲେ। ହୁରିୟତ ନେତାମାନଙ୍କର ଉତ୍ତେଜନାପୂର୍ଣ୍ଣ ଭାଷଣ ପରେ ଭିଡ଼ ହିଂସ୍ର ରୂପ ଧାରଣ କରିଥିଲା ଏବଂ ଜନଗହଳି ମଧ୍ୟରେ ଲୁଚିଥିବା ଆତଙ୍କବାଦୀମାନେ ସେଠାରେ ମୁତୟନ ଥିବା ପୋଲିସ ବାହିନୀ ଉପରେ ଆଖିବୁଜା ଗୁଳିଚାଳନା ଆରମ୍ଭ କରିଦେଇଥିଲେ। ଏହି ଆକ୍ରମଣରେ ଅନେକ ପୋଲିସ କର୍ମଚାରୀ ଗମ୍ଭୀର ଭାବେ ଆହତ ହୋଇଥିବା ବେଳେ ପ୍ରବଳ ପଥରମାଡ଼ ଯୋଗୁଁ ବହୁ ସରକାରୀ ଗାଡ଼ି ଓ ସମ୍ପତ୍ତି ନଷ୍ଟ ହୋଇଯାଇଥିଲା।
ଆକସ୍ମିକ ନୁହେଁ, ବରଂ ପୂର୍ବ ପ୍ରସ୍ତୁତ ଷଡ଼ଯନ୍ତ୍ର
ଏନଆଇଏ ନିଜ ଚାର୍ଜସିଟ୍ରେ ସ୍ପଷ୍ଟ ଭାବେ ଉଲ୍ଲେଖ କରିଛି ଯେ, ଶ୍ରୀନଗରର ସେହି ହିଂସାକାଣ୍ଡ କୌଣସି ଆକସ୍ମିକ ଉତ୍ତେଜନାର ଫଳ ନଥିଲା। ଏହା ହୁରିୟତ ନେତୃତ୍ୱର ଏକ ବଡ଼ ଏବଂ ପୂର୍ବ ପ୍ରସ୍ତୁତ ଅପରାଧିକ ଷଡ଼ଯନ୍ତ୍ର ଥିଲା। ସେମାନେ ଜଣେ ଆତଙ୍କବାଦୀର ଶବଯାତ୍ରାକୁ ଏକ ରାଜନୈତିକ ପ୍ଲାଟଫର୍ମ ଭାବେ ବ୍ୟବହାର କରି କାଶ୍ମୀରର ସାଧାରଣ ଜନତାଙ୍କ ମଧ୍ୟରେ ବିଚ୍ଛିନ୍ନତାବାଦୀ ଚିନ୍ତାଧାରା ବିସ୍ତାର କରିବା, ଭାରତ ବିରୋଧୀ ଓ ପାକିସ୍ତାନ ସପକ୍ଷବାଦୀ ସ୍ଲୋଗାନ ଦେଇ ସଶସ୍ତ୍ର ସଂଗ୍ରାମକୁ ପ୍ରୋତ୍ସାହିତ କରିବା ଏବଂ କାଶ୍ମୀର ଉପତ୍ୟକାରେ ନିଜର ଆଧିପତ୍ୟ ଜାହିର କରିବା ପାଇଁ ଏଭଳି କାଣ୍ଡ ଘଟାଇଥିଲେ।
ଉକ୍ତ ଦିନ ଶ୍ରୀନଗରର ଶେରଗଢ଼ି ପୋଲିସ ଷ୍ଟେସନରେ ଏକ ମାମଲାରୁଜୁ ହୋଇଥିଲା। ଦୀର୍ଘ ବର୍ଷ ଧରି ଏହି ମାମଲାଟି ଶୀତଳ ଭଣ୍ଡାରରେ ପଡ଼ି ରହିଥିବା ବେଳେ ଗୃହ ମନ୍ତ୍ରଣାଳୟର ସ୍ୱତନ୍ତ୍ର ନିର୍ଦ୍ଦେଶକ୍ରମେ ଚଳିତ ୨୦୨୬ ମସିହା ଏପ୍ରିଲ ମାସରେ ଏନଆଇଏ ଏହି ମାମଲାର ସମ୍ପୂର୍ଣ୍ଣ ଦାୟିତ୍ୱ ନିଜ ହାତକୁ ନେଇଥିଲା ଏବଂ ମାତ୍ର କେଇ ମାସ ମଧ୍ୟରେ ଏହାର ଚାର୍ଜସିଟ୍ ଦାଖଲ କରିଛି।
ଆଇନର କଠୋର ଧାରା ଏବଂ ଭବିଷ୍ୟତ
ଏହି ସମସ୍ତ ଅଭିଯୁକ୍ତଙ୍କ ବିରୋଧରେ ରଣବୀର ପେନାଲ କୋଡ୍ , ୧୯୮୯ ର ବିଭିନ୍ନ ଧାରା ଅଧୀନରେ ଅପରାଧିକ ଷଡ଼ଯନ୍ତ୍ର, ହତ୍ୟା ଉଦ୍ୟମ, ଦଙ୍ଗା ସୃଷ୍ଟି କରିବା ଏବଂ ସରକାରୀ କର୍ମଚାରୀଙ୍କୁ ଆକ୍ରମଣ କରିବା ସହ ବେଆଇନ କାର୍ଯ୍ୟକଳାପ ନିରୋଧୀ ଆଇନ ର ଧାରା ୧୩ ଅଧୀନରେ ଦଫା ଲଗାଯାଇଛି। ୭୨ ବର୍ଷୀୟ ଶବ୍ବୀର ଶାହା ଅନ୍ୟ ଏକ ଟେରର ଫଣ୍ଡିଂ ମାମଲାରେ ସୁପ୍ରିମକୋର୍ଟରୁ ଜାମିନ ପାଇବାର ମାତ୍ର କେଇ ସପ୍ତାହ ମଧ୍ୟରେ ଏହି ପୁରୁଣା ମାମଲାରେ ପୁଣି ଗିରଫ ହୋଇଥିଲେ। ଏନଆଇଏ ପ୍ରକାଶ କରିଛି ଯେ, ଏହି ମାମଲାରେ ସଂପୃକ୍ତ ଥିବା ଅନ୍ୟ ସହ-ଷଡ଼ଯନ୍ତ୍ରକାରୀ ଓ ଆତଙ୍କବାଦୀ ସହାୟକମାନଙ୍କୁ ଚିହ୍ନଟ କରିବା ପାଇଁ ଆଗକୁ ମଧ୍ୟ ତଦନ୍ତ ଜାରି ରହିବ ଏବଂ ଦୋଷୀମାନଙ୍କୁ କଠୋର ଦଣ୍ଡ ମିଳିବା ନିଶ୍ଚିତ କରାଯିବ।
