ପ୍ରାକୃତିକ ବିପର୍ଯ୍ୟୟ ସମୟରେ ଲୋକଙ୍କ ଜୀବନ ରକ୍ଷା ପାଇଁ ଆରମ୍ଭ ହୋଇଥିବା ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (NDMA) ର ମୋବାଇଲ୍ ଫୋନ୍ ଆଲର୍ଟ ବ୍ରଡକାଷ୍ଟ ସେବାକୁ ଦେଶରେ କିଛି ଦିନ ପାଇଁ ସ୍ଥଗିତ ରଖାଯାଇଥିଲେ ମଧ୍ୟ, ଆସନ୍ତା ଜୁଲାଇ ୩ ତାରିଖରୁ ଆରମ୍ଭ ହେବାକୁ ଥିବା ପବିତ୍ର ଅମରନାଥ ଯାତ୍ରା ସମୟରେ ଏହାକୁ ବିଶେଷ ଭାବେ କାର୍ଯ୍ୟକ୍ଷମ କରାଯିବ।
ଯାତ୍ରା ମାର୍ଗରେ ଉପଲବ୍ଧ ହେବ ସୁବିଧା
ଏହି ଜରୁରୀକାଳୀନ ଆଲର୍ଟ ସେବା ଅମରନାଥ ଯାତ୍ରା ରୁଟ୍ ଏବଂ ଏହାର ଆଖପାଖ ୧୦ କିଲୋମିଟର ପର୍ଯ୍ୟନ୍ତ ଅଞ୍ଚଳରେ ସକ୍ରିୟ ରହିବ। ଏହା ସହିତ ଉତ୍ତରାଖଣ୍ଡର ଛୋଟ ଚାରିଧାମ ଯାତ୍ରା କରୁଥିବା ଶ୍ରଦ୍ଧାଳୁମାନଙ୍କ ପାଇଁ ମଧ୍ୟ ଏହି ସେବା ନିରନ୍ତର ଜାରି ରହିବ ବୋଲି ସୂଚନା ମିଳିଛି।
ବ୍ୟବସ୍ଥାକୁ କରାଯାଉଛି ଅଧିକ ଆଧୁନିକ
NDMA ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବର୍ତ୍ତମାନ ଏହି ମୋବାଇଲ୍ ବ୍ରଡକାଷ୍ଟ ଆଲର୍ଟ ସେବାକୁ ଅଧିକ ଅପଡେଟ୍ ଏବଂ ସ୍ଥାନ ଅନୁସାରେ ସଠିକ୍ କରିବା ପାଇଁ ସାମୟିକ ଭାବେ ବନ୍ଦ କରାଯାଇଛି। ଯେପରିକି ଉପଭୋକ୍ତାମାନଙ୍କ ପାଖକୁ ଯାଉଥିବା ସୂଚନା ସମ୍ପୂର୍ଣ୍ଣ ସଠିକ୍ ହେବ ଏବଂ ଲୋକମାନେ ତାହାକୁ ପଢ଼ି ସତର୍କ ହୋଇପାରିବେ।
IMD ସହ ମିଶି ଚାଲିଛି କାମ
ଭାରତୀୟ ପାଣିପାଗ ବିଭାଗ (IMD) ସହ ମିଶି ଏହି ସିଷ୍ଟମକୁ ଅଧିକ ସୁଦୃଢ଼ ଓ ସଠିକ୍ କରାଯାଉଛି। ତେବେ ଜୁଲାଇ ୩ ରୁ ଅମରନାଥ ଯାତ୍ରା ଆରମ୍ଭ ହେଉଥିବାରୁ, ଜମ୍ମୁ-କାଶ୍ମୀର ଏବଂ ସମ୍ପୃକ୍ତ ଯାତ୍ରା ମାର୍ଗରେ ଏହାକୁ ପ୍ରଥମେ ଚାଲୁ କରାଯିବ। ପାଣିପାଗ ବିଭାଗ କିମ୍ବା ଅନ୍ୟ କୌଣସି ସଂସ୍ଥାରୁ ପ୍ରାକୃତିକ ବିପର୍ଯ୍ୟୟ ନେଇ ସାମାନ୍ୟ ସୂଚନା ମିଳିଲେ ମଧ୍ୟ, NDMA ର ଏହି ସେଲ୍ ବ୍ରଡକାଷ୍ଟ ଜରୁରୀକାଳୀନ ଆଲର୍ଟ ସିଷ୍ଟମ ଜରିଆରେ ତୁରନ୍ତ ଶ୍ରଦ୍ଧାଳୁମାନଙ୍କୁ ବାର୍ତ୍ତା ପଠାଇ ସେମାନଙ୍କ ଜୀବନ ରକ୍ଷା କରାଯାଇପାରିବ।
