‘ବିକଶିତ ଭାରତ-୨୦୪୭’ର ସଂକଳ୍ପକୁ ସାକାର କରିବା ଦିଗରେ ଦେଶର ଯୁବ ପ୍ରଶାସକମାନଙ୍କର ଭୂମିକା ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରକାଶ କରିଛନ୍ତି। ନୂଆଦିଲ୍ଲୀଠାରେ ବିଭିନ୍ନ ମନ୍ତ୍ରଣାଳୟ ଓ ବିଭାଗରେ ସହକାରୀ ସଚିବ (Assistant Secretaries) ଭାବେ କାର୍ଯ୍ୟରତ ୨୦୨୪ ବ୍ୟାଚ୍ର ୧୮୩ ଜଣ ଆଇଏଏସ୍ (IAS) ପ୍ରଶିକ୍ଷାର୍ଥୀ ଅଧିକାରୀଙ୍କ ସହ ଆଲୋଚନା କରି ସେ ପ୍ରଶାସନିକ ସେବା କ୍ଷେତ୍ରରେ ସଂସ୍କାର ଆଣିବାକୁ ଆହ୍ୱାନ ଦେଇଛନ୍ତି। ପ୍ରଧାନମନ୍ତ୍ରୀ ଯୁବ ଅଧିକାରୀମାନଙ୍କୁ ସତର୍କ କରାଇ କହିଛନ୍ତି ଯେ, “କାର୍ଯ୍ୟାଳୟର ପ୍ରତିଟି ସରକାରୀ ଫାଇଲ୍ କେବଳ କାଗଜର ଏକ ପୋଥା ନୁହେଁ, ବରଂ ଏହା ପଛରେ ଦେଶର କୋଟି କୋଟି ଜନସାଧାରଣଙ୍କ ଆଶା, ଆକାଂକ୍ଷା, ସମସ୍ୟା ଏବଂ ସେମାନଙ୍କର ଜୀବନ ଯୋଡ଼ି ହୋଇ ରହିଛି।” ତେଣୁ ସେମାନେ ଯେପରି କୌଣସି ବି ନିଷ୍ପତ୍ତି ନେବା ସମୟରେ ଏହାର ମାନବୀୟ ପ୍ରଭାବକୁ କଦାପି ନ ଭୁଲନ୍ତି।
ପ୍ରଧାନମନ୍ତ୍ରୀ ‘ନାଗରିକ ଦେବୋ ଭବ’ର ମନ୍ତ୍ର ଦେଇ କହିଛନ୍ତି ଯେ, ପ୍ରଶାସନର କେନ୍ଦ୍ରବିନ୍ଦୁରେ ସବୁବେଳେ ସାଧାରଣ ଜନତା ରହିବା ଉଚିତ। ସରକାରୀ ବ୍ୟବସ୍ଥା ଯେପରି ଅଧିକ ସଂବେଦନଶୀଳ, ଉତ୍ତରଦାୟୀ ଏବଂ ସମସ୍ତଙ୍କ ପାଇଁ ସହଜ ହୋଇପାରିବ, ସେଥିପାଇଁ ନୂତନ ଚିନ୍ତାଧାରା ଓ ଉଦ୍ଭାବନ (Innovation) ର ବ୍ୟବହାର କରିବାକୁ ସେ ପରାମର୍ଶ ଦେଇଛନ୍ତି।
AI ଏବଂ ଡାଟା-ଡ୍ରିଭେନ୍ ଗଭର୍ଣ୍ଣାନ୍ସ ଉପରେ ଗୁରୁତ୍ୱ
ବଦଳୁଥିବା ସମୟ ସହିତ ଟେକ୍ନୋଲୋଜିର ଉପଯୋଗ ଉପରେ ଜୋର ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ, ବିଗତ ଏକ ଦଶନ୍ଧି ମଧ୍ୟରେ ଭାରତର ପ୍ରଶାସନିକ ଶୈଳୀ ପ୍ରକ୍ରିୟା-କୈନ୍ଦ୍ରିକ (Process-centric) ରୁ ପରିଣାମ-କୈନ୍ଦ୍ରିକ (Result-oriented) କୁ ପରିବର୍ତ୍ତିତ ହୋଇଛି। ଏହି ପରିପ୍ରେକ୍ଷୀରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI), ଡିଜିଟାଲ୍ ଗଭର୍ଣ୍ଣାନ୍ସ ଏବଂ ସୂଚନା ପ୍ରଯୁକ୍ତିବିଦ୍ୟାର ବହୁଳ ବ୍ୟବହାର ସରକାରୀ ସେବାକୁ ଅଧିକ ସ୍ୱଚ୍ଛ ଓ ସହଜ କରିପାରିଛି। ସରକାରୀ ତଥ୍ୟ ବା ‘ଡାଟା’ (Data) କୁ କେବଳ କିଛି ସଂଖ୍ୟା ଭାବେ ନଦେଖି, ସେଗୁଡ଼ିକୁ ସାଧାରଣ ଲୋକଙ୍କ ସମସ୍ୟା ଓ ଆବଶ୍ୟକତାର ପ୍ରତିଫଳନ ଭାବେ ଗ୍ରହଣ କରିବା ଉଚିତ। ଏହି ଡାଟା ସହାୟତାରେ ଜନକଲ୍ୟାଣକାରୀ ଯୋଜନାଗୁଡ଼ିକ କିଭଳି ତୃଣମୂଳ ସ୍ତରରେ ସଫଳତାର ସହ କାର୍ଯ୍ୟକାରୀ ହୋଇପାରୁଛି, ତାହା ଯାଞ୍ଚ କରିବା ପ୍ରଶାସକଙ୍କ ଦାୟିତ୍ୱ।
ବିଭାଗୀୟ ପ୍ରାଚୀର ଭାଙ୍ଗି ଏକତ୍ର କାର୍ଯ୍ୟ କରିବାକୁ ଆହ୍ୱାନ
ବଡ଼ ବଡ଼ ବିକାଶମୂଳକ ଆହ୍ୱାନଗୁଡ଼ିକର ସମାଧାନ କେବେ ହେଲେ କୌଣସି ଗୋଟିଏ ବିଭାଗ ନିଜ ପରିସର ମଧ୍ୟରେ ସୀମିତ ରହି କରିପାରିବ ନାହିଁ। ଏଥିପାଇଁ ବିଭିନ୍ନ ସରକାରୀ ମନ୍ତ୍ରଣାଳୟ ଏବଂ ବିଭାଗ ମଧ୍ୟରେ ଥିବା ପାରମ୍ପରିକ ପ୍ରାଚୀର କିମ୍ବା ଦୂରତା କୁ ଭାଙ୍ଗିବାକୁ ପଡ଼ିବ। ‘ହୋଲ୍-ଅଫ୍-ଗଭର୍ଣ୍ଣମେଣ୍ଟ’ ଆଭିମୁଖ୍ୟ ଗ୍ରହଣ କରି ସମସ୍ତ ବିଭାଗ ମିଳିତ ଭାବେ କାର୍ଯ୍ୟ କଲେ ହିଁ ସ୍ଥାୟୀ ଏବଂ ସକାରାତ୍ମକ ପରିଣାମ ମିଳିପାରିବ। ସେହିପରି ଦେଶର ଆଗାମୀ ଦଶନ୍ଧିଗୁଡ଼ିକର ସମସ୍ତ ପ୍ରଶାସନିକ ନୀତି ଆତ୍ମନିର୍ଭର ଭାବତ, ମେକ୍ ଇନ୍ ଇଣ୍ଡିଆ, ଶକ୍ତି ସୁରକ୍ଷା ଏବଂ ଯୁବପିଢ଼ିଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ଭଳି ଜାତୀୟ ପ୍ରାଥମିକତା ସହିତ ସମାନତା ରକ୍ଷା କରିବା ଆବଶ୍ୟକ।
ପ୍ରଶାସନରେ ବଢୁଛି ମହିଳା ଶକ୍ତିର ପ୍ରଭାବ
ଚଳିତ ଆଇଏଏସ୍ ବ୍ୟାଚ୍ର ସଂରଚନାକୁ ନେଇ ସନ୍ତୋଷ ବ୍ୟକ୍ତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଚଳିତ ବର୍ଷର ଏହି ପ୍ରଶିକ୍ଷାର୍ଥୀ ବ୍ୟାଚ୍ ମଧ୍ୟରେ ୪୦% ରୁ ଅଧିକ ମହିଳା ଅଧିକାରୀ ରହିଛନ୍ତି। ଏହା ଦେଶର ରାଷ୍ଟ୍ର ନିର୍ମାଣ ପ୍ରକ୍ରିୟାରେ ନାରୀ ଶକ୍ତିର ବଢୁଥିବା ଭାଗିଦାରୀ ଏବଂ ପ୍ରଭାବକୁ ସ୍ପଷ୍ଟ କରୁଛି। ଯୁବ ଅଧିକାରୀମାନେ ନିଜର ପଦବୀ କିମ୍ବା କ୍ଷମତାକୁ ନେଇ ନୁହେଁ, ବରଂ ନିଜ କାର୍ଯ୍ୟ ଦ୍ୱାରା ଜନସାଧାରଣଙ୍କ ଜୀବନରେ ଆସିଥିବା ସକାରାତ୍ମକ ପରିବର୍ତ୍ତନରୁ ହିଁ ପ୍ରକୃତ ଆତ୍ମସନ୍ତୋଷ ଲାଭ କରିବା ଉଚିତ ବୋଲି ଶ୍ରୀ ମୋଦୀ ପ୍ରକାଶ କରିଛନ୍ତି। ଏହି କାର୍ଯ୍ୟକ୍ରମରେ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂହ ଏବଂ ଅନ୍ୟାନ୍ୟ ବରିଷ୍ଠ ସରକାରୀ ଅଧିକାରୀମାନେ ଉପସ୍ଥିତ ଥିଲେ।
Also read : https://purvapaksa.com/in-a-changing-world-public-trust-in-the-courts-is-rising-what-did-cji-surya-kant-say/
