ସାମରିକ ରଣନୀତି ଏବଂ ଦେଶର ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ ଓ ଆଧୁନିକ କରିବା ଦିଗରେ ଭାରତୀୟ ସେନା ଏକ ବଡ଼ ଐତିହାସିକ ପଦକ୍ଷେପ ଗ୍ରହଣ କରିଛି। ଭାରତର ନୂତନ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ଏନ.ଏସ. ରାଜା ସୁବ୍ରମଣି ଦାୟିତ୍ୱ ଗ୍ରହଣ କରିବା ସହିତ ଦେଶର ପ୍ରତିରକ୍ଷା ବ୍ୟବସ୍ଥାରେ ସବୁଠାରୁ ବଡ଼ ସଂସ୍କାର କୁହାଯାଉଥିବା ‘ଥିଏଟର କମାଣ୍ଡ’ ପ୍ରକ୍ରିୟାକୁ ଆଧିକାରିକ ଭାବେ ଆରମ୍ଭ କରିଛନ୍ତି। ଭାରତୀୟ ସ୍ଥଳସେନା, ବାୟୁସେନା ଏବଂ ନୌସେନାର ସମନ୍ୱୟରେ ଗଠିତ ହେବାକୁ ଥିବା ଏହି ସମନ୍ୱିତ ପ୍ରତିରକ୍ଷା ପ୍ରଣାଳୀ କାର୍ଯ୍ୟକ୍ଷମ ହେବା ପରେ ବିଶ୍ୱର ସେହି ସୀମିତ ୫ଟି ଶକ୍ତିଶାଳୀ ଦେଶ ମଧ୍ୟରେ ଭାରତ ସାମିଲ ହେବ, ଯେଉଁମାନଙ୍କ ପାଖରେ ଏଭଳି ଅତ୍ୟାଧୁନିକ ମିଳିତ ସାମରିକ କମାଣ୍ଡ ବ୍ୟବସ୍ଥା ରହିଛି।
ଜେନେରାଲ ଏନ.ଏସ. ରାଜା ସୁବ୍ରମଣି ସେନା ମୁଖ୍ୟାଳୟରେ ତିନି ସେନାର ବରିଷ୍ଠ କମାଣ୍ଡରମାନଙ୍କ ସହ ଏକ ଉଚ୍ଚସ୍ତରୀୟ ବୈଠକ କରି ଏହି ମେଗା ଯୋଜନାର ରୋଡମ୍ୟାପ୍ ପ୍ରସ୍ତୁତ କରିଛନ୍ତି। ସେ କହିଛନ୍ତି ଯେ, ଆଧୁନିକ ଯୁଦ୍ଧ କୌଶଳ ବଦଳିବାରେ ଲାଗିଛି। ବର୍ତ୍ତମାନ ପୃଥକ ଭାବେ ଲଢ଼ିବା ଅପେକ୍ଷା ତିନି ସେନାର ମିଳିତ ଶକ୍ତିର ଉପଯୋଗ କରିବା ଶତ୍ରୁ ପାଇଁ ସବୁଠାରୁ ବଡ଼ ପ୍ରତିବନ୍ଧକ ସାଜିବ। ଏହି କ୍ରମରେ ଭାରତୀୟ ପ୍ରତିରକ୍ଷା ବାହିନୀକୁ ୩ଟି ରୁ ୫ଟି ସମନ୍ୱିତ ଥିଏଟର କମାଣ୍ଡରେ ବିଭକ୍ତ କରାଯିବ। ବିଶେଷ କରି ଚୀନ୍ ସୀମା ପାଇଁ ଏକ ସ୍ୱତନ୍ତ୍ର ନର୍ଦ୍ଦେଶାଳୟ, ପାକିସ୍ତାନ ସୀମା ପାଇଁ ପଶ୍ଚିମାଞ୍ଚଳ କମାଣ୍ଡ ଏବଂ ସମୁଦ୍ର ସୁରକ୍ଷା ପାଇଁ ଏକ ମ୍ୟାରିଟାଇମ୍ ଥିଏଟର କମାଣ୍ଡ ଗଠନ କରାଯିବା ନେଇ ବୈଠକରେ ଚୂଡ଼ାନ୍ତ ଆଲୋଚନା ହୋଇଛି।
କାହିଁକି ଆବଶ୍ୟକ ଏହି ‘ଥିଏଟର କମାଣ୍ଡ’ ଏବଂ କିଭଳି ବଦଳିବ ସେନାର ଶକ୍ତି ?
ବର୍ତ୍ତମାନ ଭାରତୀୟ ସ୍ଥଳସେନା, ବାୟୁସେନା ଏବଂ ନୌସେନାର ନିଜସ୍ୱ ପୃଥକ ପୃଥକ ପ୍ରାୟ ୧୭ଟି କମାଣ୍ଡ ରହିଛି। ଯୁଦ୍ଧ କିମ୍ବା ଜରୁରୀକାଳୀନ ସ୍ଥିତିରେ ଏହି ସମସ୍ତ କମାଣ୍ଡ ମଧ୍ୟରେ ତୁରନ୍ତ ସମନ୍ୱୟ ରକ୍ଷା କରିବା ଏବଂ ଗୁପ୍ତ ସୂଚନା ଆଦାନପ୍ରଦାନ କରିବାରେ ଅନେକ ସମୟରେ ପ୍ରଶାସନିକ କାଳବିଳମ୍ବ ହୋଇଥାଏ। ‘ଥିଏଟର କମାଣ୍ଡ’ ଲାଗୁ ହେବା ପରେ ଜଣେ ସାମରିକ କମାଣ୍ଡରଙ୍କ ଅଧୀନରେ ହିଁ ତିନି ସେନାର ଯବାନ, ଯୁଦ୍ଧବିମାନ, ମିସାଇଲ୍ ଏବଂ ଯୁଦ୍ଧପୋତ ମୁତୟନ ରହିବେ। ଏହା ଦ୍ୱାରା ଶତ୍ରୁପକ୍ଷ ଉପରେ ଯଥେଷ୍ଟ କମ୍ ସମୟ ମଧ୍ୟରେ ତିନି ଦିଗରୁ ଭୟଙ୍କର ଆକ୍ରମଣ କରାଯାଇପାରିବ।
ପ୍ରତିରକ୍ଷା ବିଶେଷଜ୍ଞଙ୍କ ଅନୁଯାୟୀ, ଆମେରିକା, ଋଷିଆ, ଚୀନ୍ ଏବଂ ବ୍ରିଟେନ୍ ଭଳି ପ୍ରମୁଖ ସାମରିକ ମହାଶକ୍ତିମାନେ ବହୁ ପୂର୍ବରୁ ଏହି ବ୍ୟବସ୍ଥା ଆପଣାଇ ସାରିଛନ୍ତି। ଭାରତରେ ପୂର୍ବତନ ସିଡିଏସ୍ ଜେନେରାଲ ବିପିନ ରାୱତଙ୍କ ସମୟରୁ ଏହି ଯୋଜନା ଉପରେ କାମ ଆରମ୍ଭ ହୋଇଥିଲେ ମଧ୍ୟ ସେନାର ଆଭ୍ୟନ୍ତରୀଣ ମତଭେଦ ଯୋଗୁଁ ଏହା ସମ୍ପୂର୍ଣ୍ଣ ହୋଇପାରିନଥିଲା। ବର୍ତ୍ତମାନର ସିଡିଏସ୍ ଜେନେରାଲ ରାଜା ସୁବ୍ରମଣି ସମସ୍ତ ବୈଷୟିକ ଏବଂ କାର୍ଯ୍ୟକ୍ଷମ ପ୍ରତିବନ୍ଧକକୁ ଦୂର କରି ଆସନ୍ତା ଦୁଇ ବର୍ଷ ମଧ୍ୟରେ ଏହି ବ୍ୟବସ୍ଥାକୁ ସମ୍ପୂର୍ଣ୍ଣ ରୂପେ ଭୂମିପ୍ରତିଷ୍ଠା କରିବାକୁ ଲକ୍ଷ୍ୟ ରଖିଛନ୍ତି।
ଆଗାମୀ ଯୁଦ୍ଧ ପାଇଁ ପ୍ରସ୍ତୁତ ହେଉଛି ଭାରତ
ଏହି ନୂତନ ସାମରିକ ଗଠନ ପ୍ରକ୍ରିୟାରେ ଚୀନ୍ ଏବଂ ପାକିସ୍ତାନର ମିଳିତ ବିପଦ ବା ‘ଟୁ-ଫ୍ରଣ୍ଟ ୱାର’କୁ ସର୍ବାଧିକ ପ୍ରାଧାନ୍ୟ ଦିଆଯାଇଛି। ସୀମାରେ ଯୁଦ୍ଧ ସ୍ଥିତି ଉପୁଜିଲେ ବାୟୁସେନାର ବିମାନ ଉଡ଼ିବା ପାଇଁ ସ୍ଥଳସେନାର ଅନୁମତି କିମ୍ବା କେନ୍ଦ୍ରୀୟ ଆଦେଶକୁ ଅପେକ୍ଷା କରିବାକୁ ପଡ଼ିବ ନାହିଁ। ଥିଏଟର କମାଣ୍ଡର ନିଜ ନିଷ୍ପତ୍ତି ଅନୁଯାୟୀ ତୁରନ୍ତ ସେନା ପରିଚାଳନା କରିପାରିବେ। ଏହି ସଂସ୍କାର କେବଳ ଭାରତୀୟ ସେନାର ଶକ୍ତିକୁ ଆଧୁନିକ କରିବ ନାହିଁ, ବରଂ ପ୍ରତିରକ୍ଷା ବଜେଟ୍ର ଅଯଥା ଖର୍ଚ୍ଚ କମାଇବାରେ ମଧ୍ୟ ବହୁତ ସହାୟକ ହେବ। ସିଡିଏସ୍ଙ୍କ ଏହି ଦୃଢ଼ ପଦକ୍ଷେପ ଭାରତୀୟ ସେନା ଇତିହାସରେ ଏକ ନୂତନ ଗୌରବମୟ ଅଧ୍ୟାୟ ସୃଷ୍ଟି କରିବାକୁ ଯାଉଛି।
Also read : https://purvapaksa.com/farmers-in-13-states-including-uttar-pradesh-face-challenges-over-monsoon/
