ଲୋକପ୍ରିୟ ମେସେଜିଂ ଆପ୍ ହ୍ୱାଟସ୍ଆପ୍ (WhatsApp) ର ଆଗାମୀ ‘ୟୁଜରନେମ୍’ (Username) ଫିଚରର ସୁରକ୍ଷା ଓ ଗୋପନୀୟତାକୁ ନେଇ କେନ୍ଦ୍ର ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି । ଭାରତରେ ଏହି ଫିଚରର ରୋଲ୍-ଆଉଟ୍ (ଉନ୍ମୋଚନ) ଉପରେ କେନ୍ଦ୍ର ସରକାର ସାମୟିକ ଭାବେ ରୋକ୍ ଲଗାଇଛନ୍ତି । ଏଥିସହିତ ହ୍ୱାଟସ୍ଆପ୍ର ମାତୃ ସଂସ୍ଥା ‘ମେଟା’ (Meta) କୁ ଏକ କାରଣ ଦର୍ଶାଅ ନୋଟିସ୍ ଜାରି କରାଯାଇଛି । ସରକାରଙ୍କ ସନ୍ତୋଷଜନକ ଆଲୋଚନା ଶେଷ ନହେବା ପର୍ଯ୍ୟନ୍ତ ଭାରତରେ ଏହି ସେବା ଉପଲବ୍ଧ କରାଯାଇପାରିବ ନାହିଁ ବୋଲି ସ୍ପଷ୍ଟ ନିର୍ଦ୍ଦେଶ ଦିଆଯିବା ସହ ଆଗାମୀ ୩ ଦିନ ମଧ୍ୟରେ ଏହାର ବିସ୍ତୃତ କାର୍ଯ୍ୟକାରିତା ସମ୍ପର୍କରେ ଜବାବ ରଖିବାକୁ କୁହାଯାଇଛି ।
ସାଇବର ଫ୍ରର୍ଡ ବଢ଼ିବା ନେଇ ଆଶଙ୍କା
କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ (MeITY) ଦ୍ୱାରା ଜାରି କରାଯାଇଥିବା ନୋଟିସ୍ ଅନୁଯାୟୀ, ନୂତନ ୟୁଜରନେମ୍ ଫିଚର ଯୋଗୁଁ ଦେଶରେ ଅନଲାଇନ୍ ସ୍କାମ୍, ଫିସିଂ ଏବଂ ‘ଡିଜିଟାଲ୍ ଆରେଷ୍ଟ’ ଭଳି ଗମ୍ଭୀର ସାଇବର ଅପରାଧ ମାମଲା ବହୁ ପରିମାଣରେ ବୃଦ୍ଧି ପାଇପାରେ । ଏହି ଫିଚର ଆସିବା ପରେ ଜଣେ ବ୍ୟକ୍ତି ନିଜର ମୋବାଇଲ୍ ନମ୍ବର ସେୟାର ନକରି କେବଳ ୟୁଜରନେମ୍ (@Name123) ମାଧ୍ୟମରେ ଅନ୍ୟମାନଙ୍କ ସହ ଚାଟ୍ କରିପାରିବେ । ଏହାର ସୁଯୋଗ ନେଇ ସାଇବର ଅପରାଧୀମାନେ ସରକାରୀ ଅଧିକାରୀ, ବ୍ୟାଙ୍କ, ସେଲିବ୍ରିଟି କିମ୍ବା କୌଣସି ଜଣାଶୁଣା ସଂସ୍ଥାର ନକଲି ୟୁଜରନେମ୍ ତିଆରି କରି ସାଧାରଣ ଜନତାଙ୍କୁ ସହଜରେ ପ୍ରତାରିତ କରିବାର ଆଶଙ୍କା ରହିଛି ।
ସରକାର ଆଇଟି ଆକ୍ଟ, ୨୦୦୦ ଏବଂ ଆଇଟି ରୁଲ୍ସ, ୨୦୨୧ ର ଦୁଇ ପ୍ରମୁଖ ନିୟମ ଆଧାରରେ ମେଟାକୁ ପ୍ରଶ୍ନ କରିଛନ୍ତି ଯେ, ଏଭଳି ସାଇବର ଅପରାଧ ବଢ଼ାଉଥିବା ଫିଚର ପାଇଁ କାହିଁକି ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ?
ହ୍ୱାଟସ୍ଆପ୍ର ସଫେଇ
ଅନ୍ୟପକ୍ଷରେ, ସରକାରଙ୍କ ନୋଟିସ୍ ପରେ ହ୍ୱାଟସ୍ଆପ୍ ପ୍ରବକ୍ତାଙ୍କ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି । କମ୍ପାନୀ କହିଛି ଯେ ଏହି ଫିଚର ଏପର୍ଯ୍ୟନ୍ତ ଭାରତରେ ଲାଇଭ୍ ହୋଇନାହିଁ ଏବଂ ଏହାକୁ ଚଳିତ ବର୍ଷ ଶେଷ ଆଡ଼କୁ ଧୀରେ ଧୀରେ ଉନ୍ମୋଚନ କରାଯିବ । ସୁରକ୍ଷା ପାଇଁ କମ୍ପାନୀ ଅନେକ ସେଫଗାର୍ଡ ବ୍ୟବସ୍ଥା କରିଛି । ସରକାରୀ ସଂସ୍ଥା, ବଡ଼ ବ୍ୟବସାୟୀ ଏବଂ ଜନ ପ୍ରତିନିଧିମାନଙ୍କ ୟୁଜରନେମ୍କୁ ଆଗୁଆ ସଂରକ୍ଷିତ ରଖାଯାଇଛି, ଯେପରି କେହି ନକଲି ଆଇଡି ବନାଇ ପାରିବେ ନାହିଁ । ଏହା ସହ କୌଣସି ନୂଆ ବ୍ୟକ୍ତି ମେସେଜ୍ କଲେ ତାଙ୍କର ଆକାଉଣ୍ଟ କେତେ ପୁରୁଣା ଓ ସେ କେଉଁ ଦେଶର, ତାର ସୂଚନା ମଧ୍ୟ ସ୍କ୍ରିନ୍ରେ ଦେଖାଯିବ । ବର୍ତ୍ତମାନ ଏହି ପ୍ରସଙ୍ଗରେ କେନ୍ଦ୍ର ସରକାର ଏବଂ ମେଟା ମଧ୍ୟରେ ଉଚ୍ଚସ୍ତରୀୟ ଆଲୋଚନା ଚାଲିଛି ।
