ପ୍ରତ୍ୟେକ ଘରୋଇ ରୋଷେଇ ଘରର ଅପରିହାର୍ଯ୍ୟ ମସଲା ତଥା ଔଷଧୀୟ ଗୁଣରେ ଭରପୂର ‘ହଳଦୀ’କୁ ନେଇ ଏକ ଚିନ୍ତାଜନକ ତଥ୍ୟ ସାମ୍ନାକୁ ଆସିଛି। କ୍ଷେତରେ ଉତ୍ପାଦିତ ସଜ ଓ କଞ୍ଚା ହଳଦୀ ସମ୍ପୂର୍ଣ୍ଣ ନିରାପଦ ଥିବା ବେଳେ ବଜାରରେ ମିଳୁଥିବା ହଳଦୀ ଗୁଣ୍ଡରେ ମାରାତ୍ମକ ‘ସୀସା’ ବିଷର ମାତ୍ରା ଅତ୍ୟଧିକ ବୃଦ୍ଧି ପାଉଛି। ପରିବେଶ ଓ ସ୍ୱାସ୍ଥ୍ୟ ସମ୍ବନ୍ଧୀୟ ଚିନ୍ତନ ପ୍ରତିଷ୍ଠାନ ‘ଟକ୍ସିକ୍ସ ଲିଙ୍କ୍’ ର ନୂତନ ଅଧ୍ୟୟନ ‘ଲିଡ୍ ଇନ୍ ଟରମେରିକ୍’ରୁ ଏହି ଚାଞ୍ଚଲ୍ୟକର ଖୁଲାସା ହୋଇଛି।
କ୍ଷେତରେ ସୁରକ୍ଷିତ, ବଜାରରେ ବିଷାକ୍ତ
ଅଧ୍ୟୟନ ଅନୁସାରେ, ସିଧାସଳଖ କ୍ଷେତରୁ ସଂଗୃହିତ କଞ୍ଚା ହଳଦୀ ନମୁନାରେ ସୀସାର ପରିମାଣ ପ୍ରତି କିଲୋଗ୍ରାମରେ ୦.୦୫ ରୁ ୧.୮୭ ମିଲିଗ୍ରାମ ମଧ୍ୟରେ ରହିଛି। ଏହା ଖାଦ୍ୟ ନିୟାମକ ସଂସ୍ଥା (FSSAI) ଦ୍ୱାରା ସ୍ଥିରୀକୃତ ସର୍ବାଧିକ ସୁରକ୍ଷିତ ସୀମା (୧୦ ମିଲିଗ୍ରାମ/କିଲୋ) ଠାରୁ ଯଥେଷ୍ଟ କମ୍। ମାତ୍ର ପୂର୍ବରୁ ବଜାରରେ ବିକ୍ରି ହେଉଥିବା ହଳଦୀ ଗୁଣ୍ଡର ପରୀକ୍ଷଣରୁ ପ୍ରତି କିଲୋଗ୍ରାମରେ ୧୨୭ ରୁ ୧୨୪୫ ମିଲିଗ୍ରାମ ପର୍ଯ୍ୟନ୍ତ ସୀସା ମିଳିଥିବା ନେଇ ରିପୋର୍ଟ ପ୍ରକାଶ ପାଇଥିଲା।
କେଉଁଠାରୁ ଆସୁଛି ଏହି ସୀସା?
‘ଟକ୍ସିକ୍ସ ଲିଙ୍କ୍’ର ବରିଷ୍ଠ ପ୍ରୋଗ୍ରାମ୍ କୋଅର୍ଡିନେଟର ପୀୟୂଷ ମହାପାତ୍ରଙ୍କ କହିବା ଅନୁଯାୟୀ, ମାଟି କିମ୍ବା ଚାଷ ପ୍ରକ୍ରିୟାରୁ ହଳଦୀରେ ସୀସା ମିଶୁନାହିଁ। ବରଂ କ୍ଷେତରୁ ଅମଳ ହେବା ପରେ ପ୍ରକ୍ରିୟାକରଣ, ପ୍ୟାକେଜିଂ, ପରିବହନ କିମ୍ବା ବ୍ୟବସାୟିକ ସ୍ୱାର୍ଥ ପାଇଁ କରାଯାଉଥିବା ଜାଣିଶୁଣି ଭେଜାଲ ଯୋଗୁଁ ହଳଦୀରେ ସୀସାର ମାତ୍ରା ବୃଦ୍ଧି ପାଉଛି। ହଳଦୀକୁ ଅଧିକ ଉଜ୍ଜ୍ୱଳ, ଆକର୍ଷଣୀୟ ଓ ଗାଢ଼ ହଳଦିଆ ଦେଖାଇବା ପାଇଁ ଅସାଧୁ ବ୍ୟବସାୟୀମାନେ ‘ଲେଡ୍ କ୍ରୋମେଟ୍’ ଭଳି ବିଷାକ୍ତ ରାସାୟନିକ ପଦାର୍ଥ ମିଶାଉଥିବା ସନ୍ଦେହ କରାଯାଉଛି।
ସ୍ୱାସ୍ଥ୍ୟ ପ୍ରତି ଗୁରୁତର ବିପଦ
ସୀସା ଏକ ଅତ୍ୟନ୍ତ ବିପଜ୍ଜନକ ‘ନ୍ୟୁରୋଟକ୍ସିନ୍’ (ସ୍ନାୟୁ ବିଷ), ଯାହା ମାନବ ଶରୀରର ପ୍ରତ୍ୟେକ ଅଙ୍ଗପ୍ରତ୍ୟଙ୍ଗ ଉପରେ କୁପ୍ରଭାବ ପକାଇଥାଏ।
- ଶିଶୁଙ୍କ ଉପରେ ପ୍ରଭାବ : ଶିଶୁମାନଙ୍କ ମସ୍ତିଷ୍କ ବିକାଶରେ ବାଧା ସୃଷ୍ଟି କରିବା ସହ ସେମାନଙ୍କ ବୁଦ୍ଧିମତ୍ତା ହ୍ରାସ କରିଥାଏ।
- ଗର୍ଭବତୀ ମହିଳା : ଗର୍ଭବତୀ ମହିଳା ଓ ସେମାନଙ୍କ ଗର୍ଭସ୍ଥ ଶିଶୁର ସ୍ୱାସ୍ଥ୍ୟ ପାଇଁ ଏହା ଅତ୍ୟନ୍ତ ମାରାତ୍ମକ ସାବ୍ୟସ୍ତ ହୋଇପାରେ।
ଏହି ନୂତନ ଗବେଷଣା ରିପୋର୍ଟ ପରେ ଖାଦ୍ୟ ସୁରକ୍ଷା ବିଭାଗ ଓ ପ୍ରଶାସନ ବଜାରରେ ମିଳୁଥିବା ହଳଦୀ ଗୁଣ୍ଡର କଡ଼ା ତପାସ କରିବା ସହ ଭେଜାଲ କାରବାରରେ ଲିପ୍ତ ଅସାଧୁ ବ୍ୟବସାୟୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
