ଷ୍ଟକ୍ ବ୍ରୋକରରୁ ଭାରତୀୟ ରାଜନୀତିର “ଚାଣକ୍ୟ” — କିପରି ଗଢ଼ିଉଠିଲେ ଅମିତ ଶାହ
ଭାରତୀୟ ରାଜନୀତିରେ କେତେକ ନେତା ମଞ୍ଚରେ ଦେଖାଯାନ୍ତି, ଆଉ କେତେକ ନେତା ପରଦା ପଛରୁ ସମଗ୍ର ରାଜନୈତିକ ଖେଳକୁ ନିୟନ୍ତ୍ରଣ କରନ୍ତି। ଭାରତୀୟ ଜନତା ପାର୍ଟିର ବରିଷ୍ଠ ନେତା ଓ କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହଙ୍କୁ ଏହି ଦ୍ୱିତୀୟ ଶ୍ରେଣୀର ନେତା ଭାବେ ଦେଖାଯାଏ। ରାଜନୀତିକ ମହଳରେ ତାଙ୍କୁ “ରାଜନୀତିର ଚାଣକ୍ୟ” ବୋଲି ମଧ୍ୟ କୁହାଯାଏ।
ବର୍ଷ ପରେ ବର୍ଷ ଶକ୍ତିଶାଳୀ ଥିବା ରାଜନୈତିକ ଗଡ଼ ହଠାତ୍ ଭାଙ୍ଗିପଡ଼ିବା, ନିର୍ବାଚନୀ ସମୀକରଣ ରାତାରାତି ବଦଳିଯିବା ଓ ବିରୋଧୀଙ୍କୁ ଅପ୍ରସ୍ତୁତ କରିଦେବା ଭଳି ଘଟଣା ସହ ଅମିତ ଶାହଙ୍କ ନାଁ ପ୍ରାୟତଃ ଯୋଡ଼ାଯାଏ।
ମାନସାରୁ ଦିଲ୍ଲୀ ପର୍ଯ୍ୟନ୍ତ ଯାତ୍ରା
୧୯୬୪ ଅକ୍ଟୋବର ୨୨ରେ ଗୁଜରାଟର ମାନସାରେ ଏକ ସମ୍ପନ୍ନ ପରିବାରରେ ଅମିତ ଶାହଙ୍କ ଜନ୍ମ ହୋଇଥିଲା। ତାଙ୍କ ପିତା ଜଣେ ସଫଳ ବ୍ୟବସାୟୀ ଥିଲେ। ପରିବାରରେ ଶୃଙ୍ଖଳା, ସରଳତା ଓ ଗାନ୍ଧୀବାଦୀ ଚିନ୍ତାଧାରାର ପ୍ରଭାବ ଥିବା କୁହାଯାଏ।
ରାଜନୀତି ପ୍ରତି ତାଙ୍କ ଆଗ୍ରହ କମ୍ ବୟସରୁ ଆରମ୍ଭ ହୋଇଥିଲା। କୁହାଯାଏ ଯେ, ମାତ୍ର ୧୩ ବର୍ଷ ବୟସରେ ସେ ପ୍ରଥମଥର ପାଇଁ ନିର୍ବାଚନୀ ପୋଷ୍ଟର ଲଗାଇଥିଲେ। ପରେ ସେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP) ସହ ଯୋଡ଼ି ହୋଇ ସଂଗଠନ ଓ କର୍ମୀ ପରିଚାଳନାର ରାଜନୀତି ଶିଖିଥିଲେ।
ପରିବାର ସହ ମତଭେଦ ଓ ରାଜନୀତିରେ ପ୍ରବେଶ
ପରିବାର ଚାହୁଁଥିଲା ଯେ ଅମିତ ଶାହ ବ୍ୟବସାୟ ସମ୍ଭାଳନ୍ତୁ। ତାଙ୍କ ପିତା ରାଜନୀତିରେ ଯିବାକୁ ବିରୋଧ କରୁଥିଲେ। କିନ୍ତୁ ଅମିତ ଶାହ ରାଜନୀତିକୁ ନିଜ ଲକ୍ଷ୍ୟ ଭାବେ ବାଛିଥିଲେ।
ରାଜନୀତିକ ପର୍ଯ୍ୟବେକ୍ଷକମାନଙ୍କ ମତରେ, ଏହି ସମୟରୁ ତାଙ୍କ ବ୍ୟକ୍ତିତ୍ୱରେ କଠୋରତା ଓ ଦୃଢ଼ତା ଆସିଥିଲା।
ମୋଦୀ-ଶାହ ଯୋଡ଼ିର ଆରମ୍ଭ
୧୯୮୨ରେ ଅମିତ ଶାହଙ୍କ ସହ ନରେନ୍ଦ୍ର ମୋଦୀଙ୍କ ପ୍ରଥମ ସାକ୍ଷାତ୍ ହୋଇଥିଲା। ସେତେବେଳେ କେହି ଭାବିନଥିଲେ ଯେ ଏହି ଯୋଡ଼ି ଆଗାମୀ ଦିନରେ ଭାରତୀୟ ରାଜନୀତିର ସବୁଠୁ ପ୍ରଭାବଶାଳୀ ଯୁଗଳ ହେବ।
ରାଜନୀତିକ ବିଶ୍ଳେଷକମାନେ କହନ୍ତି, ମୋଦୀ ଯେଉଁଠାରେ ଜନସମ୍ମୁଖରେ ଆକର୍ଷଣୀୟ ଭାଷଣ ଓ ନେତୃତ୍ୱର ପ୍ରତୀକ ଥିଲେ, ସେଠାରେ ଅମିତ ଶାହ ସଂଗଠନ ଓ ନିର୍ବାଚନୀ ଗଣିତର ମାଷ୍ଟରମାଇଣ୍ଡ୍ ଭାବେ ଉଭୁଇଁଥିଲେ।
BJP ଭିତରେ ଏହି ଯୋଡ଼ିର ସବୁଠାରୁ ବଡ଼ ଶକ୍ତି ଭାବେ “ପରସ୍ପର ବିଶ୍ୱାସ” କୁ ଦେଖାଯାଏ।
ବିବାଦ, ଗିରଫ ଓ ରାଜନୈତିକ ପୁନରାଗମନ
୨୦୧୦ରେ ସୋହରାବୁଦ୍ଦିନ ମାମଲାରେ ଅମିତ ଶାହଙ୍କ ଗିରଫ ତାଙ୍କ ରାଜନୀତିକ ଜୀବନର ସବୁଠୁ ବଡ଼ ଝଟକା ଭାବେ ଦେଖାଯାଇଥିଲା। ସେ ଜେଲ୍ ଯାଇଥିଲେ ଏବଂ ପରେ କୋର୍ଟଙ୍କ ନିର୍ଦ୍ଦେଶରେ ଗୁଜରାଟରୁ ବାହାରେ ରହିବାକୁ ପଡ଼ିଥିଲା।
ସେତେବେଳେ ବିରୋଧୀ ଦଳମାନେ ତାଙ୍କ ରାଜନୀତିକ ଭବିଷ୍ୟତ୍ ଶେଷ ବୋଲି ଧାରଣା କରିଥିଲେ। କିନ୍ତୁ ରାଜନୀତିକ ବିଶ୍ଳେଷକମାନଙ୍କ ମତରେ, ସେହି ସମୟରେ ଅମିତ ଶାହ ନିଜକୁ ଆଉ ଶକ୍ତିଶାଳୀ ଭାବରେ ପ୍ରସ୍ତୁତ କରିଥିଲେ।
ଜେଲରେ ଥିବା ସମୟରେ ସେ ଚାଣକ୍ୟ, ଶିବାଜୀ ଓ ରଣନୀତି ସମ୍ପର୍କିତ ପୁସ୍ତକ ପଢ଼ୁଥିବା କୁହାଯାଏ।
ବ୍ୟକ୍ତିଗତ ଆଘାତ ଓ ନୂଆ ଲକ୍ଷ୍ୟ
ସେହି ସମୟରେ ତାଙ୍କ ମାଆଙ୍କ ଦେହାନ୍ତ ମଧ୍ୟ ହୋଇଥିଲା। ରାଜନୀତିକ ପର୍ଯ୍ୟବେକ୍ଷକମାନେ ମନେ କରନ୍ତି ଯେ, ଏହି ଘଟଣା ତାଙ୍କ ଚିନ୍ତାଧାରା ଓ ରାଜନୀତିକ ଆଭିମୁଖ୍ୟକୁ ଆହୁରି ପରିବର୍ତ୍ତନ କରିଥିଲା।
ଜେଲରୁ ବାହାରିବା ପରେ ସେ ଜାତୀୟ ରାଜନୀତିରେ ବଡ଼ ଭୂମିକା ପାଇଁ ପ୍ରସ୍ତୁତି ଆରମ୍ଭ କରିଥିଲେ ବୋଲି କୁହାଯାଏ।
୨୦୧୪ ଓ ଉତ୍ତର ପ୍ରଦେଶର ମାଷ୍ଟରପ୍ଲାନ
୨୦୧୪ ଲୋକସଭା ନିର୍ବାଚନ ଅମିତ ଶାହଙ୍କ ରାଜନୀତିକ ଜୀବନର turning point ଭାବେ ଦେଖାଯାଏ।
ଉତ୍ତର ପ୍ରଦେଶରେ BJPର ଐତିହାସିକ ସଫଳତା ପଛରେ ତାଙ୍କ ରଣନୀତିକୁ ମୁଖ୍ୟ କାରଣ ଭାବେ ଗଣାଯାଏ। “ପନ୍ନା ପ୍ରମୁଖ” ମଡେଲ୍, ବୁଥ୍ ମ୍ୟାନେଜମେଣ୍ଟ ଓ micro-planning ତାଙ୍କ ନିର୍ବାଚନୀ ଶୈଳୀକୁ ଅଲଗା ପରିଚୟ ଦେଇଥିଲା।
୮୦ଟି ଆସନ ମଧ୍ୟରୁ NDAର ୭୩ଟି ଆସନ ଜିତିବା ପରେ ଅମିତ ଶାହଙ୍କୁ ଦେଶର ସବୁଠୁ ପ୍ରଭାବଶାଳୀ ନିର୍ବାଚନୀ ରଣନୀତିକାର ଭାବେ ଦେଖାଯିବା ଆରମ୍ଭ ହୋଇଥିଲା।
ଧାରା ୩୭୦ ହଟାଇବାରେ ମୁଖ୍ୟ ଭୂମିକା
ଜମ୍ମୁ-କାଶ୍ମୀରରୁ ଧାରା ୩୭୦ ହଟାଇବାକୁ ମୋଦୀ ସରକାରର ସବୁଠୁ ବଡ଼ ଓ ଐତିହାସିକ ନିଷ୍ପତ୍ତି ଭାବେ ଦେଖାଯାଏ। ସେହି ନିଷ୍ପତ୍ତିର ମୁଖ୍ୟ ରାଜନୀତିକ ଚେହେରା ଥିଲେ ଅମିତ ଶାହ।
ସଂସଦରେ ତାଙ୍କ ଆକ୍ରମକ ଭାଷଣ ଓ ଆତ୍ମବିଶ୍ୱାସ ତାଙ୍କୁ ଜାତୀୟ ସ୍ତରରେ ଆହୁରି ଶକ୍ତିଶାଳୀ ନେତା ଭାବେ ପ୍ରତିଷ୍ଠିତ କରିଥିଲା।
ସମାଲୋଚନା ଓ ବିବାଦ
ଅମିତ ଶାହଙ୍କ ସହ ସମାଲୋଚନା ଓ ବିବାଦ ମଧ୍ୟ ସଦା ଯୋଡ଼ି ରହିଛି। ବିରୋଧୀ ଦଳମାନେ କେନ୍ଦ୍ରୀୟ ଏଜେନ୍ସି ED ଓ CBIର ଦୁରୁପଯୋଗ ନେଇ ଅଭିଯୋଗ କରନ୍ତି।
କେତେକ ବିରୋଧୀ ତାଙ୍କୁ “ୱାଶିଂ ମେସିନ୍ ପଲିଟିକ୍ସ” ର ମାଷ୍ଟରମାଇଣ୍ଡ୍ ବୋଲି କୁହନ୍ତି। ତେବେ BJP ଏହି ସମସ୍ତ ଅଭିଯୋଗକୁ ରାଜନୀତିକ ପ୍ରଚାର ବୋଲି ଖଣ୍ଡନ କରିଆସୁଛି।
ପୂର୍ବ ଭାରତରେ BJP ବିସ୍ତାର
ଅମିତ ଶାହଙ୍କ ରଣନୀତିରେ BJP କେବଳ ହିନ୍ଦୀ ହାର୍ଟଲ୍ୟାଣ୍ଡରେ ନୁହେଁ, ପୂର୍ବୋତ୍ତର ଭାରତ ଓ ପଶ୍ଚିମବଙ୍ଗରେ ମଧ୍ୟ ନିଜ ପ୍ରଭାବ ବଢ଼ାଇଥିଲା।
ରାଜନୀତିକ ମହଳରେ ଚର୍ଚ୍ଚା ହେଉଛି ଯେ, ପଶ୍ଚିମବଙ୍ଗରେ BJPର ବୃଦ୍ଧି ପଛରେ ଶାହଙ୍କ ରଣନୀତି ମୁଖ୍ୟ ଭୂମିକା ନେଇଥିଲା।
୨୦୨୯ ପରେ କ’ଣ?
ଏବେ ରାଜନୀତିକ ମହଳରେ ସବୁଠାରୁ ବଡ଼ ପ୍ରଶ୍ନ ହେଉଛି — ୨୦୨୯ ପରେ ଭାରତୀୟ ରାଜନୀତିରେ ଅମିତ ଶାହଙ୍କ ଭୂମିକା କ’ଣ ହେବ?
ସେ କେବଳ BJPର ମୁଖ୍ୟ ରଣନୀତିକାର ଭାବେ ରହିବେ କି, ନା ଦେଶର ସବୁଠୁ ବଡ଼ ଶକ୍ତିକେନ୍ଦ୍ର ଭାବେ ଉଭୁଇଁବେ — ଏହା ଆଗାମୀ ରାଜନୀତିକ ପରିସ୍ଥିତି ନିର୍ଣ୍ଣୟ କରିବ।
ତେବେ ଏକ କଥା ସ୍ପଷ୍ଟ — ମାନସାର ସେହି ଯୁବକ, ଯିଏ କେବେ ପୋଷ୍ଟର ଲଗାଇ ରାଜନୀତି ଆରମ୍ଭ କରିଥିଲେ, ସେ ଆଜି ଭାରତୀୟ ରାଜନୀତିର ସବୁଠୁ ପ୍ରଭାବଶାଳୀ ନେତାମାନଙ୍କ ମଧ୍ୟରେ ଗଣାଯାଉଛନ୍ତି।
AlsoRead; https://purvapaksa.com/railways-requests-extension-of-bhubaneswar-dhanbad-express-to-berhampur/
