ରାଜ୍ୟ ସରକାରଙ୍କ ଦ୍ୱାରା ପ୍ରକାଶିତ ପ୍ରଥମରୁ ଅଷ୍ଟମ ଶ୍ରେଣୀର ନୂତନ ପାଠ୍ୟପୁସ୍ତକରେ ବ୍ୟାପକ ଏବଂ ସାଂଘାତିକ ତ୍ରୁଟି ପରିଲକ୍ଷିତ ହେବା ଘଟଣା ଏବେ ରାଜ୍ୟ ରାଜନୀତିରେ ହଲଚଲ ସୃଷ୍ଟି କରିଛି। ଏହା କେବଳ ଏକ ସାଧାରଣ ଅବହେଳା ନୁହେଁ, ବରଂ ଏହା ପଛରେ ଏକ ବଡ଼ ‘ଷଡ଼ଯନ୍ତ୍ର’ ଥାଇପାରେ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଶଙ୍କା ବ୍ୟକ୍ତ କରିଛନ୍ତି। ପିଲାମାନଙ୍କୁ ଭୁଲ୍ ତଥ୍ୟ ପଢ଼ାଇ ସେମାନଙ୍କ ଭବିଷ୍ୟତ ନଷ୍ଟ କରିବା ପାଇଁ ଏହା ଏକ ସୁଚିନ୍ତିତ ଚକ୍ରାନ୍ତ ହୋଇଥାଇପାରେ ବୋଲି ଗଣମାଧ୍ୟମ ଆଗରେ ଦେଇଛନ୍ତି ବଡ଼ ବୟାନ । ଏଥି ସହିତ ସମସ୍ତ ତ୍ରୁଟିପୂର୍ଣ୍ଣ କପି ପ୍ରତ୍ୟାହାର କରି ନୂତନ ମୁଦ୍ରିତ କପି ସହିତ ବଦଳାଯିବାକୁ ନିଷ୍ପତ୍ତି ନେଇଛନ୍ତି।
ଏହି ସମ୍ବେଦନଶୀଳ ପ୍ରସଙ୍ଗକୁ ଗମ୍ଭୀରତାର ସହ ନେଇ ମୁଖ୍ୟମନ୍ତ୍ରୀ ତୁରନ୍ତ ଏକ ୩ ଜଣିଆ ଉଚ୍ଚସ୍ତରୀୟ ତଦନ୍ତ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି। ଉନ୍ନୟନ କମିଶନର ଦେଓ ରଞ୍ଜନ କୁମାର ସିଂହଙ୍କ ଅଧ୍ୟକ୍ଷତାରେ ଗଠିତ ଏହି କମିଟିକୁ ଆସନ୍ତା ୭ ଦିନ ମଧ୍ୟରେ ସମ୍ପୂର୍ଣ୍ଣ ରିପୋର୍ଟ ଦାଖଲ କରିବାକୁ କୁହାଯାଇଛି। ରିପୋର୍ଟ ଆସିବା ମାତ୍ରେ ହିଁ ଦୋଷୀ ଅଧିକାରୀ କିମ୍ବା ସଂସ୍ଥା ବିରୋଧରେ କଠୋର ଓ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଚେତାବନୀ ଦେଇଛନ୍ତି।
ଲୋକସେବା ଭବନରେ ଜରୁରୀ ସମୀକ୍ଷା
ଏହା ପୂର୍ବରୁ ଲୋକସେବା ଭବନରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକରେ ମୁଖ୍ୟମନ୍ତ୍ରୀ ନିଜେ ସେହି ପାଠ୍ୟପୁସ୍ତକଗୁଡ଼ିକୁ ମଗାଇ ଯାଞ୍ଚ କରିଥିଲେ ଏବଂ ଅଧିକାରୀମାନଙ୍କର ଏଭଳି ଦାୟିତ୍ୱହୀନ ମନୋଭାବକୁ ନେଇ ପ୍ରବଳ ଅସନ୍ତୋଷ ପ୍ରକାଶ କରିଥିଲେ। ଏହି ବୈଠକରେ ଭିଡିଓ କନଫରେନ୍ସିଂ ଜରିଆରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ମୁଖ୍ୟ ଶାସନ ସଚିବ ଅନୁ ଗର୍ଗ ଏବଂ ଅନ୍ୟାନ୍ୟ ବରିଷ୍ଠ ପଦାଧିକାରୀମାନେ ଉପସ୍ଥିତ ଥିଲେ। ପୂର୍ବ ସରକାରଙ୍କ ସମୟରେ ପାଠ୍ୟପୁସ୍ତକ ପ୍ରସ୍ତୁତି ଓ ମୁଦ୍ରଣରେ ବ୍ୟାପକ ଅନିୟମିତତା ହୋଇଥିବା ନେଇ ବୈଠକରେ ସନ୍ଦେହ ପ୍ରକାଶ ପାଇଛି।
ବହିରେ ରହିଛି ୧୬୦୦ରୁ ଅଧିକ ଭୁଲ୍
ପ୍ରାଥମିକ ଶିକ୍ଷକ ସଂଘ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଜାତୀୟ ଶିକ୍ଷା ନୀତି (NEP 2020) ଆଧାରରେ SCERT ଦ୍ୱାରା ପ୍ରସ୍ତୁତ ଏହି ନୂଆ ବହିଗୁଡ଼ିକରେ ପ୍ରାୟ ୧,୬୦୦ରୁ ଅଧିକ ମୁଦ୍ରଣ, ବ୍ୟାକରଣଗତ ଏବଂ ତଥ୍ୟଗତ ଭୁଲ୍ ରହିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, କେବଳ ଅଷ୍ଟମ ଶ୍ରେଣୀ ବହିରେ ହିଁ ସର୍ବାଧିକ ୭୦୫ଟି ତ୍ରୁଟି ଚିହ୍ନଟ ହୋଇଛି। ଏହି ସବୁ ଭୁଲ୍ ଓଡ଼ିଶାର ଗୌରବ ଓ ଅସ୍ମିତା ଉପରେ ସିଧାସଳଖ ଆଘାତ କରିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି।
ପାଠ୍ୟପୁସ୍ତକରେ ଥିବା କେତେକ ସାଂଘାତିକ ତ୍ରୁଟି
ନ୍ୟୁଟନ ସାଜିଲେ ପାଇଲଟ୍ : ବିଜ୍ଞାନ ବହିରେ ମହାନ ବୈଜ୍ଞାନିକ ସାର୍ ଆଇଜାକ୍ ନ୍ୟୁଟନଙ୍କୁ ଜଣେ ‘ବୈଜ୍ଞାନିକ’ ବଦଳରେ ‘ସବୁଠାରୁ ବଡ଼ ପାଇଲଟ୍’ ବୋଲି ଲେଖାଯାଇଛି।
ଓଡ଼ିଶା ବଦଳରେ କର୍ଣ୍ଣାଟକ ଚିତ୍ର : ଓଡ଼ିଶା ବିଧାନସଭା ବଦଳରେ କର୍ଣ୍ଣାଟକ ବିଧାନସଭାର ଚିତ୍ର ଛପାଯାଇଛି। ସେହିପରି କର୍ଣ୍ଣାଟକର ପ୍ରସିଦ୍ଧ ‘ହାମ୍ପି’ ଐତିହ୍ୟ ଚିତ୍ର ତଳେ ଓଡ଼ିଶାର ‘କୋଣାର୍କ ମନ୍ଦିର’ ବୋଲି ଉଲ୍ଲେଖ କରାଯାଇଛି।
ଝାଡ଼ଖଣ୍ଡରେ ନିୟମଗିରି : ଓଡ଼ିଶାର ଗର୍ବ ନିୟମଗିରି ପାହାଡ଼କୁ ପଡ଼ୋଶୀ ଝାଡ଼ଖଣ୍ଡ ରାଜ୍ୟରେ ଅବସ୍ଥିତ ବୋଲି ଦର୍ଶାଯାଇଛି।
ବ୍ରହ୍ମପୁର ପାଲଟିଲା ଜିଲ୍ଲା : ଗଞ୍ଜାମ ଜିଲ୍ଲାର ପ୍ରମୁଖ ସହର ବ୍ରହ୍ମପୁରକୁ ଏକ ସହର ପରିବର୍ତ୍ତେ ସ୍ୱତନ୍ତ୍ର ଜିଲ୍ଲା ଭାବେ ବର୍ଣ୍ଣନା କରାଯାଇଛି।
ଶ୍ରେଣୀଗୃହରେ ତୁରନ୍ତ ସଂଶୋଧନ ପାଇଁ ପଦକ୍ଷେପ
ବର୍ତ୍ତମାନ ସ୍କୁଲ୍ ଖୋଲି ସାରିଥିବାରୁ ଏବଂ ପିଲାମାନେ ବହି ପଢ଼ୁଥିବାରୁ, ବିଦ୍ୟାଳୟ ଓ ଗଣଶିକ୍ଷା ବିଭାଗକୁ ତୁରନ୍ତ ସତର୍କତାମୂଳକ ପଦକ୍ଷେପ ନେବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ପିଲାମାନେ ଯେପରି ଭୁଲ୍ ତଥ୍ୟ ନପଢ଼ନ୍ତି, ସେଥିପାଇଁ ବହିଗୁଡ଼ିକରେ ଥିବା ସମସ୍ତ ଭୁଲ୍ ତଥ୍ୟକୁ ଚିହ୍ନଟ କରାଯାଇ ଶିକ୍ଷକମାନଙ୍କ ଜରିଆରେ ଶ୍ରେଣୀଗୃହରେ ହିଁ ସଠିକ୍ ତଥ୍ୟ ସଂଶୋଧନ କରି ପଢ଼ାଇବାକୁ କୁହାଯାଇଛି। ଅପରପକ୍ଷରେ, ଏହି ସମ୍ବେଦନଶୀଳ ପ୍ରସଙ୍ଗକୁ ନେଇ ବିରୋଧୀ ବିଜେଡି ଏବଂ କଂଗ୍ରେସ ଦଳ ସରକାରଙ୍କୁ ତୀବ୍ର ସମାଲୋଚନା କରିବା ସହ ଦୋଷୀଙ୍କ ବିରୋଧରେ କଠୋର ଦଣ୍ଡାଦେଶ ଦାବି କରିଛନ୍ତି। ଆଗାମୀ କିଛି ଦିନ ମଧ୍ୟରେ ରିପୋର୍ଟ ଆସିବା ପରେ ଶିକ୍ଷା ବିଭାଗରେ ଏକ ବଡ଼ଧରଣର କାର୍ଯ୍ୟାନୁଷ୍ଠାନ ହେବାର ସମ୍ଭାବନା ରହିଛି।
