ତାମିଲନାଡୁ ରାଜନୀତି କ୍ଷେତ୍ରରେ, ଅଭିନେତା ବିଜୟଙ୍କ ଦଳ ତାମିଜାଗା ଭେଟ୍ରି କାଝାଗମ (ଟିଭିକେ) – କଂଗ୍ରେସ ଦଳ ସହିତ ଏହାର ସମ୍ପର୍କକୁ ଆହୁରି ମଜବୁତ କରିବା ପାଇଁ ମଞ୍ଚ ପ୍ରସ୍ତୁତ କରିଛି । ଜୁନରେ ହେବାକୁ ଥିବା ରାଜ୍ୟସଭା ନିର୍ବାଚନରେ ଟିଭିକେ କଂଗ୍ରେସକୁ ଗୋଟିଏ ଆସନ ଆବଣ୍ଟନ କରିବାକୁ ପ୍ରସ୍ତୁତ । ଏହା ସହିତ, ପ୍ରସ୍ତାବିତ କ୍ୟାବିନେଟ ବିସ୍ତାର ସମୟରେ କଂଗ୍ରେସକୁ ଦୁଇଟି ମନ୍ତ୍ରୀପଦ ପ୍ରଦାନ କରିବା ପାଇଁ ଏକ ପ୍ରସ୍ତାବ ଦିଆଯାଇଛି । ସୂତ୍ରରୁ ଜଣାପଡିଛି ଯେ, ଏହାର ସହଯୋଗୀମାନଙ୍କ ସହିତ ଆଲୋଚନା ସମୟରେ, ଟିଭିକେ ନେତୃତ୍ୱ ଜାତୀୟ ସ୍ତରରେ ବିରୋଧୀ ମେଣ୍ଟ ସହିତ ସମ୍ପର୍କକୁ ମଜବୁତ କରିବା ପାଇଁ ଏହାର ଉଦ୍ଦେଶ୍ୟକୁ ସଙ୍କେତ ଦେଇଥିଲେ ।
ଏହି ରଣନୀତିକ ଆଭିମୁଖ୍ୟ ସହିତ ସମନ୍ୱୟ ରଖି କଂଗ୍ରେସକୁ ରାଜ୍ୟସଭା ଆସନ ପ୍ରଦାନ କରିବାର ନିଷ୍ପତ୍ତି ନିଆଯାଇଛି । ଯଦି ଏହି ଚୁକ୍ତିନାମା ଚୂଡ଼ାନ୍ତ ହୁଏ, ତେବେ ଏହାକୁ ତାମିଲନାଡୁ ରାଜନୀତିରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଭାବରେ ବିବେଚନା କରାଯିବ । କାରଣ ବିଜୟଙ୍କ ଦଳ ପ୍ରଥମ ଥର ପାଇଁ ଏକ ଜାତୀୟ ରାଜନୈତିକ ଦଳ ସହିତ ଏତେ ପରିମାଣର କ୍ଷମତା-ବଣ୍ଟନ ଏବଂ ସଂସଦୀୟ ସହଭାଗୀତାରେ ସାମିଲ ହେବାର ଦେଖାଯିବ ।
ରାଜ୍ୟସଭା ନିର୍ବାଚନରେ କଂଗ୍ରେସକୁ ସମର୍ଥନ କରିବା ନେଇ ପ୍ରସ୍ତୁତି
ତାମିଲନାଡୁରେ AIADMK ସାଂସଦ ସି.ଭି. ଶାନମୁଗମଙ୍କ ଇସ୍ତଫା ପରେ ରାଜ୍ୟସଭାରେ ଏକ ଆସନ ଖାଲି ପଡ଼ିଛି। ଜୁନ୍ ମାସରେ ଏହି ଆସନ ପାଇଁ ଏକ ଉପନିର୍ବାଚନ ଅନୁଷ୍ଠିତ ହେବାର ଆଶା କରାଯାଉଛି । ବିଧାନସଭାର ବର୍ତ୍ତମାନର ସଂଖ୍ୟାଗତ ଶକ୍ତିକୁ ଦୃଷ୍ଟିରେ ରଖି, ଟିଭିକେ-ସମର୍ଥିତ ପ୍ରାର୍ଥୀଙ୍କ ବିଜୟ ପ୍ରାୟତଃ ନିଶ୍ଚିତ ବୋଲି ବିବେଚନା କରାଯାଉଛି । ସୂତ୍ର ଅନୁସାରେ, ଟିଭିକେ ଏହି ଆସନ ପାଇଁ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ ଦେଇପାରେ । ଯଦି ଏହା ବାସ୍ତବରେ ପରିଣତ ହୁଏ, ତେବେ କଂଗ୍ରେସ ମାତ୍ର କିଛି ମାସ ମଧ୍ୟରେ ତାମିଲନାଡୁରୁ ଦ୍ୱିତୀୟ ଅତିରିକ୍ତ ରାଜ୍ୟସଭା ଆସନ ପାଇବ ।
ସଂସଦରେ କଂଗ୍ରେସର ହାତକୁ ମଜବୁତ କରିବ ଟିଭିକେ !
ଏହା ପୂର୍ବରୁ, ମାର୍ଚ୍ଚ ମାସରେ ଅନୁଷ୍ଠିତ ରାଜ୍ୟସଭା ନିର୍ବାଚନ ସମୟରେ, କଂଗ୍ରେସ ନେତା କ୍ରିଷ୍ଟୋଫର ତିଲକ DMK ସମର୍ଥନରେ ଉଚ୍ଚ ସଦନରେ ପ୍ରବେଶ କରିଥିଲେ । ଏବେ, ଆଉ ଏକ ଆସନ ପାଇବାର ସମ୍ଭାବନା ଏଥର ଟିଭିକେ ସୌଜନ୍ୟରୁ ଦଳର ସଂସଦୀୟ ଶକ୍ତିର ସମ୍ଭାବ୍ୟ ବୃଦ୍ଧିର ସଙ୍କେତ ଦିଏ । ସୂତ୍ର ଅନୁଯାୟୀ, କଂଗ୍ରେସ ବ୍ୟତୀତ, ଟିଭିକେ ଏହାର ସହଯୋଗୀ ଦଳ : ବିଦୁଥଲାଇ ଚିରୁଥୈଗଲ କାଚି (ଭିସିକେ) ଏବଂ ଇଣ୍ଡିଆନ ୟୁନିଅନ ମୁସଲିମ ଲିଗ୍ (ଆଇୟୁଏମଏଲ) କୁ ଗୋଟିଏ ଲେଖାଏଁ ମନ୍ତ୍ରୀ ପଦ ପ୍ରଦାନ କରିବାକୁ ପ୍ରସ୍ତାବ ଦେଇଛି । ତଥାପି, ଅଲ୍ ଇଣ୍ଡିଆ ଆନ୍ନା ଦ୍ରାବିଡ ମୁନେତ୍ର କାଝଗମ (ଏଆଇଏଡିଏମକେ) କୁ ସରକାରରେ ଯୋଗଦେବା ପାଇଁ କୌଣସି ନିମନ୍ତ୍ରଣ ଦିଆଯାଇ ନାହିଁ ।
ଥାଲାପଥି ବିଜୟଙ୍କ କ’ଣ ରହିଛି ରଣନୀତି ?
ଟିଭିକେର ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ଭାବରେ ଦେଖାଯାଉଛି । କେବଳ ତାମିଲନାଡୁ ରାଜନୀତି ପରିପ୍ରେକ୍ଷୀରେ ନୁହେଁ ବରଂ ଜାତୀୟ ବିରୋଧୀ ରାଜନୀତି ଦୃଷ୍ଟିକୋଣରୁ ମଧ୍ୟ । ବିଜୟଙ୍କ ଦଳ ଲୋକସଭା ନିର୍ବାଚନ ପରେ ଦକ୍ଷିଣ ଭାରତରେ ନିଜକୁ ଏକ ନୂତନ ରାଜନୈତିକ ଶକ୍ତି ଭାବରେ ପ୍ରତିଷ୍ଠିତ କରିବାକୁ ଚେଷ୍ଟା କରୁଥିବା ବେଳେ, କଂଗ୍ରେସ ସଂସଦର ଉଚ୍ଚ ସଦନରେ ନିଜର ସଂଖ୍ୟା ବୃଦ୍ଧି କରିବା ପାଇଁ ସକ୍ରିୟ ଭାବରେ ଏକ ରଣନୀତି ଉପରେ କାମ କରୁଛି ।
ରାଜ୍ୟ ସଭାରେ କଂଗ୍ରେସର ସଂଖ୍ୟା ଗରିଷ୍ଠତା ?
ରାଜନୈତିକ ବିଶ୍ଳେଷକମାନେ ବିଶ୍ୱାସ କରନ୍ତି ଯେ ପାଞ୍ଚଟି ରାଜ୍ୟରେ ନିର୍ବାଚନ ଫଳାଫଳ ପରେ ବିରୋଧୀ ରାଜନୀତି ମଧ୍ୟରେ ନୂତନ ସମୀକରଣ ସୃଷ୍ଟି ହେଉଛି ; ଅନ୍ୟ ବିରୋଧୀ ଦଳଗୁଡ଼ିକ ପରାଜୟର ସମ୍ମୁଖୀନ ହେଉଥିବା ଦେଖାଯାଉଛି , ଏହି ପର୍ଯ୍ୟାୟରେ କଂଗ୍ରେସ ସବୁଠାରୁ ସୁବିଧାଜନକ ସ୍ଥିତିରେ ଥିବା ପରି ମନେ ହେଉଛି । ରାଜ୍ୟସଭା ନିର୍ବାଚନର ପରବର୍ତ୍ତୀ ଦୁଇଟି ପର୍ଯ୍ୟାୟରେ ଦଳ ଚାରୋଟି ଅତିରିକ୍ତ ଆସନ ହାସଲ କରିବାର ସମ୍ଭାବନା ରହିଛି ବୋଲି ଆକଳନ କରାଯାଉଛି । ଫଳସ୍ୱରୂପ, ରାଜ୍ୟସଭାରେ କଂଗ୍ରେସର ସଂଖ୍ୟା ୩୦ ରୁ ୩୪ କୁ ବୃଦ୍ଧି ପାଇପାରେ ।
