ପଶ୍ଚିମବଙ୍ଗ, ଯାହାକୁ କୁହାଯାଏ ଭାରତୀୟ ରାଜନୀତିର ଏପରି ଏକ ଲ୍ୟାବ୍, ଯେଉଁଠି ପ୍ରତି ପାଞ୍ଚବର୍ଷରେ କିଛି ନା କିଛି ନୂଆ ‘ଖେଳ’ ହୁଏ। କିନ୍ତୁ ୨୦୨୬ର ଏହି ବିଧାନସଭା ନିର୍ବାଚନ କେବଳ ଖେଳ ନୁହେଁ, ଏହା ହେଉଛି ବଙ୍ଗଳାର ଅସ୍ତିତ୍ୱର ଲଢ଼େଇ।
ପ୍ରଥମ ପର୍ଯ୍ୟାୟରେ ୧୫୨ଟି ଆସନରେ ଭୋଟ୍ ଗ୍ରହଣ ଶେଷ ହୋଇଛି। କିନ୍ତୁ ଆଶ୍ଚର୍ଯ୍ୟର କଥା ହେଉଛି ମତଦାନର ପ୍ରତିଶତ। ପ୍ରାୟ ୯୨ ପ୍ରତିଶତ ଭୋଟ୍! କିଛି ସ୍ଥାନରେ ୯୩ ତ କେଉଁଠି ୯୫ ପ୍ରତିଶତ ମତଦାନ ହୋଇଛି । ଲୋକମାନେ କହୁଛନ୍ତି “ଫୁଲ ଫୁଟିବ”, କିନ୍ତୁ ସେହି ଫୁଲଟି ଘାସଫୁଲ (TMC) ନା ପଦ୍ମଫୁଲ (BJP)? ଆଜି ଆମେ ବୁଝିବାକୁ ଚେଷ୍ଟା କରିବା ଯେ ଏହି ବିପୁଳ ମତଦାନ କାହାର ବିଜୟର ସଙ୍କେତ ଏବଂ କାହାର ପରାଜୟର ଆହଟ?
ରେକର୍ଡ ମତଦାନ: ପରିବର୍ତ୍ତନ ନା ସମର୍ଥନ?
ଯେତେବେଳେ ମତଦାନ ପ୍ରତିଶତ ୮୦-୯୦ ଅତିକ୍ରମ କରେ, ତାକୁ ସାଧାରଣ ବୋଲି ଧରାଯାଏ ନାହିଁ। ୨୦୧୧ ମସିହାର ସେହି ଐତିହାସିକ ନିର୍ବାଚନ ମନେ ପକାନ୍ତୁ, ଯେତେବେଳେ ବଙ୍ଗଳାରେ ୩୪ ବର୍ଷର ବାମପନ୍ଥୀ ଶାସନର ମୂଳୋତ୍ପାଟନ ହୋଇଥିଲା। ସେତେବେଳେ ମଧ୍ୟ ଜନତା ଏମିତି ବାହାରକୁ ବାହାରିଥିଲେ।
ରଘୁନାଥଗଞ୍ଜରେ ୯୫% ଭୋଟ୍ ପଡ଼ିବା କ’ଣ କହୁଛି? କ’ଣ ଜନତା ମମତା ବାନାର୍ଜୀଙ୍କ ସରକାରୀ ଯୋଜନା ଉପରେ ମୋହର ମାରିବାକୁ ଆସିଛନ୍ତି, ନା ସେମାନେ ଭିତରେ ଭିତରେ ରାଗିଛନ୍ତି? ବୋମାମାଡ଼, ହିଂସା ଏବଂ ବୁଥ୍ ଦଖଲର ଅଭିଯୋଗ ସତ୍ତ୍ୱେ ଲୋକେ ଧାଡ଼ିରେ ଛିଡ଼ା ହୋଇ ଭୋଟ୍ ଦେବା ପ୍ରମାଣ କରୁଛି ଯେ ସେମାନେ ନିଷ୍ପତ୍ତି ନେଇ ସାରିଛନ୍ତି।
SIR: ନାମ କଟିବାର ଭୟ ଓ ଭୋଟରଙ୍କ ଆତଙ୍କ
ଏହି ନିର୍ବାଚନରେ ସବୁଠାରୁ ବଡ଼ ‘ସାଇଲେଣ୍ଟ ଫ୍ୟାକ୍ଟର’ ହେଉଛି SIR ବା Special Intensive Revision। ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ପଶ୍ଚିମବଙ୍ଗର ଭୋଟର ତାଲିକାରୁ ପ୍ରାୟ ୯୧ ଲକ୍ଷ ନାମ କାଟି ଦିଆଯାଇଛି। ବିଶେଷ କରି ସୀମାବର୍ତ୍ତୀ ଜିଲ୍ଲା ଯଥା ମାଲଦା, ମୁର୍ଶିଦାବାଦ ଏବଂ ଉତ୍ତର ଦିନାଜପୁରରେ ଅବୈଧ ନାଗରିକତା ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ହୋଇଛି।
ଏଥିପାଇଁ ସଂଖ୍ୟାଲଘୁ ଏବଂ ମତୁଆ ସମୁଦାୟ ଭିତରେ ଏକ ଅଜଣା ଭୟ ସୃଷ୍ଟି ହୋଇଛି। ଜଣେ ଭୋଟରଙ୍କ କଥା ମନେପଡ଼େ, ଯିଏ କହିଥିଲେ— “ଆଜି ଯଦି ଭୋଟ୍ ଦେବୁନି, କାଲି ହୁଏତ ଦେଶର ଲିଷ୍ଟରୁ ଆମ ନାଁ କଟିଯିବ”। ତେଣୁ ଏହି ୯୦% ମତଦାନ କେବଳ ସରକାର ଗଢ଼ିବା ପାଇଁ ନୁହେଁ, ବରଂ ନିଜର ପରିଚୟ ବଞ୍ଚାଇବା ପାଇଁ ଏକ ଲଢ଼େଇ ମଧ୍ୟ ହୋଇପାରେ।
ନାରୀ ଶକ୍ତି: ଲକ୍ଷ୍ମୀ ଭଣ୍ଡାର ବନାମ ସୁରକ୍ଷା
ବଙ୍ଗଳା ନିର୍ବାଚନରେ ମହିଳା ଭୋଟରଙ୍କ ସଂଖ୍ୟା ପୁରୁଷଙ୍କ ଠାରୁ ଅଧିକ। ମମତା ଦିଦିଙ୍କ ‘ଲକ୍ଷ୍ମୀ ଭଣ୍ଡାର’ ଯୋଜନା ଯୋଗୁଁ କୋଟି କୋଟି ମହିଳାଙ୍କ ହାତକୁ ସିଧାସଳଖ ଟଙ୍କା ଯାଉଛି। ଏହା ଦିଦିଙ୍କର ଏକ ବଡ଼ ଶକ୍ତି। କିନ୍ତୁ ଅନ୍ୟପଟେ ଅଛି ‘ସନ୍ଦେଶଖାଲି’ ଏବଂ ‘ଆର.ଜି. କର ମେଡିକାଲ କଲେଜ’ ଘଟଣାରେ ମହିଳାଙ୍କ ଉପରେ ହୋଇଥିବା ଅନ୍ୟାୟ ଉପରେ ମମତା ଚୁପ ଥିଲେ।
ବୁଥ୍ ଭିତରକୁ ଯିବା ବେଳେ ଜଣେ ମାଆ କିମ୍ବା ଝିଅ ମନରେ କ’ଣ ଚାଲିଥିବ? ମାସିକ ମିଳୁଥିବା ସେହି ରାସନ ଓ ଟଙ୍କା, ନା ନିଜର ସୁରକ୍ଷା ଓ ସମ୍ମାନ? ଏହି ଦ୍ୱନ୍ଦ୍ୱ ହିଁ ୨୦୨୬ ର ସ୍କ୍ରିପ୍ଟ ଲେଖିବ। ଯଦି ମହିଳାମାନେ ସୁରକ୍ଷା ଅପେକ୍ଷା ଯୋଜନାକୁ ଅଧିକ ଗୁରୁତ୍ୱ ଦେଇଥିବେ, ତେବେ ଦିଦିଙ୍କୁ ରୋକିବା କଷ୍ଟକର।
ତୃତୀୟ ପକ୍ଷ: ଡାର୍କ ହର୍ସ ସାଜିବେ କି ବାମପନ୍ଥୀ?
ଆମେ ସବୁବେଳେ TMC ବନାମ BJP କଥା କହୁଛୁ, କିନ୍ତୁ ଏହି ଖେଳରେ ଜଣେ ‘ଡାର୍କ ହର୍ସ’ ବା ଲୁଚି ରହିଥିବା ଖେଳାଳି ଅଛନ୍ତି। ସେମାନେ ହେଲେ ବାମପନ୍ଥୀ-କଂଗ୍ରେସ ମେଣ୍ଟ ଏବଂ ନୌସାଦ ସିଦ୍ଦିକିଙ୍କ ISF।
ମୁର୍ଶିଦାବାଦ ଏବଂ ମାଲଦା ଭଳି ମୁସଲିମ ବହୁଳ ଅଞ୍ଚଳରେ ଯଦି ଭୋଟ୍ ଭାଗ ଭାଗ ହୁଏ, ତେବେ କାହାର ଲାଭ ହେବ? ସ୍ପଷ୍ଟ କଥା— ବିଜେପିର। ଯଦି ସଂଖ୍ୟାଲଘୁ ଭୋଟ୍ TMC ରୁ ଛିଟିକି ISF କିମ୍ବା କଂଗ୍ରେସ ପାଖକୁ ଯାଏ, ତେବେ ବିଜେପି ପାଇଁ ରାସ୍ତା ସହଜ ହୋଇଯିବ। ପୁଣି ଯେଉଁ ବାମପନ୍ଥୀ ଭୋଟରମାନେ ଗତଥର ବିଜେପିକୁ ଭୋଟ୍ ଦେଇଥିଲେ, ସେମାନେ ଯଦି ନିଜ ‘ଘର’କୁ ଫେରିଆସନ୍ତି, ତେବେ ବିଜେପିକୁ ଝଟ୍କା ଲାଗିପାରେ।
ପ୍ରବାସୀ ଶ୍ରମିକ: ସେମାନଙ୍କର ହିସାବ କିତାବ
ବଙ୍ଗଳାର ଲକ୍ଷ ଲକ୍ଷ ଶ୍ରମିକ କେରଳ, ମୁମ୍ବାଇ ବା ଓଡ଼ିଶାରେ କାମ କରନ୍ତି। କିନ୍ତୁ ଏହି ନିର୍ବାଚନରେ ହଜାର ହଜାର କିଲୋମିଟର ଦୂରରୁ ସେମାନେ ନିଜ ଗାଁକୁ ଫେରିଛନ୍ତି । ସେମାନେ କାହିଁକି ଫେରିଛନ୍ତି? କେବଳ ଭୋଟ୍ ଦେବାକୁ?
ଏହି ଶ୍ରମିକମାନେ ନିଜ ସହିତ ବଙ୍ଗଳାର ଦାରିଦ୍ର୍ୟ, ବେକାରୀ ଏବଂ ପ୍ରବାସୀ ହେବାର ପୀଡ଼ାକୁ ନେଇ ଆସିଛନ୍ତି। ଯଦି ସେମାନେ ନିଷ୍ପତ୍ତି ନେଇଥିବେ ଯେ ଆଉ ବାହାରକୁ ଯିବେ ନାହିଁ ଏବଂ ବଙ୍ଗଳାରେ ହିଁ କାମ ପାଇବେ, ତେବେ ସେମାନେ କାହାକୁ ଭୋଟ୍ ଦେବେ? ଏହି ପ୍ରବାସୀ ଶ୍ରମିକଙ୍କ ଭୋଟ୍ ବହୁତ ଗୁରୁତ୍ୱପୂର୍ଣ୍ଣ, କାରଣ ଏହା ସିଧାସଳଖ ଶାସକ ଦଳ ବିରୋଧରେ ଯିବାର ସମ୍ଭାବନା ଅଧିକ।
୪ ମଇକୁ ଅପେକ୍ଷା
ସାରାଂଶରେ କହିବାକୁ ଗଲେ, ପଶ୍ଚିମବଙ୍ଗର ଏହି ୯୦% ମତଦାନ କେବଳ ଏକ ସଂଖ୍ୟା ନୁହେଁ, ଏହା ହେଉଛି ବଙ୍ଗଳା ଜନତାଙ୍କର ଏକ ଚିତ୍କାର। ଏହା SIR ର ଭୟ ହେଉ, ନାରୀ ଶକ୍ତିର ମୌନ ବିଦ୍ରୋହ ହେଉ ବା ପ୍ରବାସୀ ଶ୍ରମିକଙ୍କ ହିସାବ କିତାବ— ଏସବୁ ମିଶି ଏକ ଏମିତି ରହସ୍ୟ ସୃଷ୍ଟି କରିଛନ୍ତି ଯାହାକୁ କୌଣସି Exit Poll ସହଜରେ ବୁଝିପାରିବ ନାହିଁ।
୪ ମଇରେ ଯେତେବେଳେ ଭୋଟ୍ ଗଣତି ହେବ, ସେତେବେଳେ ଜଣାପଡ଼ିବ ଯେ ବଙ୍ଗଳାରେ ନୂଆ ରାଜନୈତିକ ସୂର୍ଯ୍ୟୋଦୟ ହେଉଛି ନା ଦିଦିଙ୍କ ଗଡ଼ ଆହୁରି ମଜବୁତ ହେଉଛି।
AlsoRead; https://purvapaksa.com/rahul-gandhis-statement-and-questioning-the-existence-of-congress/
