ଓଡ଼ିଶା ରାଜନୀତିରେ ଯଦି “ଧୂର୍ତ୍ତତା”କୁ ରାଜନୈତିକ ବୁଦ୍ଧି, ସମୟ ବୁଝିବା କ୍ଷମତା ଓ ସୁଯୋଗକୁ ନିଜ ପକ୍ଷରେ ଘୁଞ୍ଚାଇ ନେବା ଦକ୍ଷତା ଭାବେ ବ୍ୟାଖ୍ୟା କରାଯାଏ, ତେବେ ସେହି ତାଲିକାର ଶୀର୍ଷରେ ଥିବା ନାମ ହେଉଛି- ନବୀନ ପଟ୍ଟନାୟକ।
ଏହା ନିନ୍ଦା ନୁହେଁ, ବରଂ ଓଡ଼ିଶାର ୨୮ ବର୍ଷର ରାଜନୀତିକ ଅଭିଜ୍ଞତାରୁ ଉପଜିଥିବା ଏକ ମୂଲ୍ୟାଙ୍କନ।
ଭାରତୀୟ ରାଜନୀତିରେ ଦିବଂଗତ ରାମ ବିଳାସ ପାଶୱାନ କିମ୍ବା ଅଜିତ ପାୱାରଙ୍କ ଭଳି ନବୀନ ପଟ୍ଟନାୟକ ମଧ୍ୟ ଏକ ପ୍ରକାର “ରାଜନୈତିକ ପାଣିପାଗ ବିଜ୍ଞାନୀ”। କେନ୍ଦ୍ରରେ କେଉଁ ଦଳ କ୍ଷମତାକୁ ଆସିବ, ସେଥିରେ କିପରି ନିଜକୁ ଖାପ ଖୁଆଇବା- ଏହା ତାଙ୍କ ରାଜନୀତିର ମୂଳ ଧାରା। ୨୦୦୯ ଓ ୨୦୧୪ ନିର୍ବାଚନ ପରବର୍ତ୍ତୀ ଘଟଣାକ୍ରମ ଏହାର ସ୍ପଷ୍ଟ ଉଦାହରଣ।
ଏହି ପୃଷ୍ଠଭୂମିରେ ଏବେ ପ୍ରଶ୍ନ ଉଠୁଛି-
- ଚତୁର୍ଥ ରାଜ୍ୟସଭା ଆସନ ପାଇଁ ଭକ୍ତ ଚରଣ ଦାସ ଦେଇଥିବା ପ୍ରସ୍ତାବକୁ ନବୀନ ପଟ୍ଟନାୟକ ଗ୍ରହଣ କରିବେ କି?
- ନା ପୁଣିଥରେ ସେ ନିଜର ନିରବ, କିନ୍ତୁ ଗଣିତ ଭିତ୍ତିକ ରାଜନୀତି ଖେଳିବେ?
ଚତୁର୍ଥ ରାଜ୍ୟସଭା ଆସନ: ଛୋଟ ଆସନ, ବଡ଼ ରାଜନୀତି
ଓଡ଼ିଶାର ଚତୁର୍ଥ ରାଜ୍ୟସଭା ଆସନ ଏବେ କେବଳ ଗୋଟିଏ ସଂଖ୍ୟାର ପ୍ରଶ୍ନ ନୁହେଁ। ଏହା ଏକ ରାଜନୈତିକ ସମନ୍ୱୟ, ଭବିଷ୍ୟତ ସମ୍ଭାବନା ଓ କେନ୍ଦ୍ର–ରାଜ୍ୟ ସମ୍ପର୍କର ପରୀକ୍ଷା।
ବିଧାନସଭାର ସଂଖ୍ୟା ଦୃଷ୍ଟିରୁ—
• ଶାସକ ବିଜେପି ପାଖରେ ତୃତୀୟ ଆସନ ଜିତିବା ପାଇଁ ପର୍ଯ୍ୟାପ୍ତ ସମର୍ଥନ ନାହିଁ,
• ବିଜେଡି ସହଜରେ ଗୋଟିଏ ଆସନ ନିଶ୍ଚିତ କରିପାରିବ,
• କଂଗ୍ରେସ ଏକାକୀ ଭାବେ କୌଣସି ଆସନ ଜିତିବା ସ୍ଥିତିରେ ନାହିଁ।
ଏହି ସଂଖ୍ୟାଗତ ଅସମର୍ଥତା ହିଁ ଚତୁର୍ଥ ଆସନକୁ ରାଜନୈତିକ ମେଣ୍ଟ ଓ ଗୁପ୍ତ ବୁଝାମଣାର କେନ୍ଦ୍ରବିନ୍ଦୁ କରିଛି।
ଭକ୍ତ ଚରଣ ଦାସଙ୍କ ପ୍ରସ୍ତାବ: ରାଜନୀତି ନା ବଞ୍ଚିବାର ଚେଷ୍ଟା?
ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ଭକ୍ତ ଚରଣ ଦାସଙ୍କ ଘୋଷଣା- ସେ ଫେବୃଆରୀ ପ୍ରଥମ ସପ୍ତାହରେ ନବୀନ ପଟ୍ଟନାୟକଙ୍କୁ ଭେଟିପାରନ୍ତି- ସାଧାରଣ ସୌଜନ୍ୟ ସାକ୍ଷାତ୍ ନୁହେଁ। ଏହା ଏକ ସ୍ପଷ୍ଟ ରାଜନୈତିକ ସଙ୍କେତ।
ଭକ୍ତ ଦାସ କହୁଛନ୍ତି- ବିଜେଡି ଓ କଂଗ୍ରେସ ଯଦି ହାତ ମିଳାଇପାରନ୍ତି, ତେବେ ଚତୁର୍ଥ ରାଜ୍ୟସଭା ଆସନ ଜିତାଯାଇ ପାରିବ। ସେ ଏକ “ମିଳିତ ପ୍ରାର୍ଥୀ” ପ୍ରସ୍ତାବ ଦେବାକୁ ପ୍ରସ୍ତୁତ।
ପ୍ରଶ୍ନ ହେଉଛି- ଏହା କ’ଣ କଂଗ୍ରେସର ରାଜନୀତିକ ପୁନରୁତ୍ଥାନର ଯୋଜନା?
ନା ଏକ ଦୁର୍ବଳ ଦଳର ରାଜନୀତିକ ବଞ୍ଚିବା ଯୁଦ୍ଧ?
ଓଡ଼ିଶାରେ କଂଗ୍ରେସ ଯେଉଁ ସ୍ଥିତିରେ ଅଛି, ସେଠାରେ ରାଜ୍ୟସଭାର ଗୋଟିଏ ଆସନ ତାଙ୍କ ପାଇଁ କେବଳ ସଂସଦର ପ୍ରତିନିଧିତ୍ୱ ନୁହେଁ- ଏହା ଦଳୀୟ ଅସ୍ତିତ୍ୱର ପ୍ରତୀକ।
ବିଜେଡିର ନିରବତା: ରଣନୀତିର ପ୍ରଥମ ପଦକ୍ଷେପ
ଭକ୍ତ ଚରଣ ଦାସଙ୍କ ପ୍ରସ୍ତାବକୁ ନେଇ ବିଜେଡି ଯେଉଁ ଭାବରେ ପ୍ରତିକ୍ରିୟା ଦେଉଛି, ସେଥିରେ ମଧ୍ୟ ରାଜନୀତି ଲୁଚିଛି। ବିଜେଡିର ଜୁନିଅର ମୁଖପାତ୍ର ଲେନିନ୍ ମହାନ୍ତି କହୁଛନ୍ତି—ଭକ୍ତ ଦାସ କ’ଣ କହିବାକୁ ଚାହୁଁଛନ୍ତି, ସେଥିରେ ସ୍ପଷ୍ଟତା ନାହିଁ; ଉପଯୁକ୍ତ ସମୟରେ ନବୀନ ତାଙ୍କ ମତ ଦେବେ।
ଏହି “ନିରବତା” ନବୀନ ପଟ୍ଟନାୟକଙ୍କ ପରିଚିତ ଶୈଳୀ।
ନା ସିଧା ନା,
ନ ସିଧା ହଁ-
କେବଳ ସମୟ ଦେଖି ଚାଲ।
ବିଜେପିର ସଙ୍କେତ: ଦୃଶ୍ୟରେ ନୁହେଁ, ଗଣିତରେ
ବିଜେପି ପାଖରେ ଆବଶ୍ୟକ ସଂଖ୍ୟା ନ ଥିଲେ ମଧ୍ୟ, ଦଳ ନିଷ୍କ୍ରିୟ ନୁହେଁ। ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀଙ୍କ ବୟାନ- ରାଜନୀତିରେ ସମର୍ଥନ ଯେକୌଣସି ଦିଗରୁ ଆସିପାରେ- ଏକ ପରୋକ୍ଷ ବାର୍ତ୍ତା।
ଖାଦ୍ୟ ଯୋଗାଣ ଓ ଉପଭୋକ୍ତା କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ମଧ୍ୟ କହୁଛନ୍ତି- ରାଜନୀତିରେ କିଛି ଅସମ୍ଭବ ନୁହେଁ।
ଏହା ସୂଚାଉଛି ଯେ- ବିଜେପି ମଧ୍ୟ ନବୀନଙ୍କ ନିଷ୍ପତ୍ତିକୁ ଗଭୀର ଭାବେ ଅପେକ୍ଷା କରିଛି।
ନବୀନଙ୍କ ସାମ୍ନାରେ ତିନିଟି ପଥ
ନବୀନ ପଟ୍ଟନାୟକଙ୍କ ପାଖରେ ଏବେ ତିନିଟି ସ୍ପଷ୍ଟ ବିକଳ୍ପ ରହିଛି-
1. କଂଗ୍ରେସ ସହ ଗୁପ୍ତ ବୁଝାମଣା
– ଚତୁର୍ଥ ଆସନରେ ମିଳିତ ପ୍ରାର୍ଥୀ,
– କେନ୍ଦ୍ରରେ ଭବିଷ୍ୟତ ସମୀକରଣ ପାଇଁ ଏକ ନୂଆ ଦ୍ୱାର।
2. ବିଜେପି ସହ ନିରବ ସମର୍ଥନ
– ପୁରୁଣା ଶୈଳୀ,
– କେନ୍ଦ୍ରୀୟ ଶାସନ ସହ ସମ୍ପର୍କ ରକ୍ଷା।
3. ସମ୍ପୂର୍ଣ୍ଣ ଦୂରତା ଓ ନିଜସ୍ୱ ଖେଳ
– କାହାକୁ ସ୍ପଷ୍ଟ ସମର୍ଥନ ନୁହେଁ,
– ଶେଷ ମୁହୂର୍ତ୍ତରେ ନିଷ୍ପତ୍ତି।
ନବୀନ ପଟ୍ଟନାୟକଙ୍କ ରାଜନୀତି ଭାବନାରେ ଭିତ୍ତି କରେନାହିଁ, ଗଣିତ ଉପରେ କରେ। ତେଣୁ ଭକ୍ତ ଚରଣ ଦାସଙ୍କ ପ୍ରସ୍ତାବ ସେତେବେଳେ ମାତ୍ର ଗ୍ରହଣଯୋଗ୍ୟ ହେବ, ଯେତେବେଳେ ଏହା ନବୀନଙ୍କ ଦୀର୍ଘମିଆଦୀ ରାଜନୀତିକ ଲାଭ ସହ ମେଳ ଖାଇବ।
ଏହା ନିଶ୍ଚିତ-ନବୀନ କୌଣସି ତଡ଼ବଡ଼ିଆ ନିଷ୍ପତ୍ତି ନେବେ ନାହିଁ।
ସେ ଅପେକ୍ଷା କରିବେ।
ପାଣିପାଗ ଦେଖିବେ।
ଆଉ ଶେଷରେ—ନିଜ ପାଇଁ ସର୍ବାଧିକ ଲାଭକାରୀ ପଥକୁ ବାଛିବେ।
ସେଇଥିପାଇଁ ପ୍ରଶ୍ନ ରହିଯାଏ-
ଭକ୍ତଙ୍କ ପ୍ରସ୍ତାବ ଗ୍ରହଣ କରିବେ କି ‘ଧୂର୍ତ୍ତ’ ନବୀନ?
ଉତ୍ତର—ନବୀନ ନିଜେ ଦେବେ, ସମୟ ଆସିଲେ।
https://purvapaksa.com/are-you-suffering-from-migraine-pain-try-this-remedy-and-get-relief-in-10-minutes/
