ଓଡ଼ିଶାରେ ସରକାର ବଦଳିଛି ସତ, କିନ୍ତୁ ରାଜନୀତିର ଭିତର ଚିତ୍ର ବଦଳି ନାହିଁ। ଦିନେ ଯେଉଁ ଦଳ ଭିତରେ ସଂଶୋଧନ ଏବଂ ଅନୁଶାସନର ବଡ଼ ବଡ଼ ଡିଣ୍ଡିମ ପିଟାଯାଉଥିଲା, ଆଜି ସେହି ଦଳ ଭିତରୁ ହିଁ ବିଦ୍ରୋହ ଓ ଗୋଷ୍ଠୀ କନ୍ଦଳର ସ୍ୱର ସ୍ପଷ୍ଟ ଶୁଣାଯାଉଛି। ଓଡ଼ିଶା ବିଜେପି ଭିତରେ ଏବେ ଏକ ଶୀତଳ ଯୁଦ୍ଧ ଆରମ୍ଭ ହୋଇଯାଇଛି, ଯାହାର କେନ୍ଦ୍ରବିନ୍ଦୁ ପାଲଟିଛି ସ୍ଵୟଂ ରାଜଧାନୀ ଭୁବନେଶ୍ୱର। ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କର ଏକ ସାଧାରଣ ବୟାନ ଏବେ ଦଳ ଭିତରେ ଏଭଳି ଝଡ଼ ସୃଷ୍ଟି କରିଛି, ଯାହା ସୋସିଆଲ ମିଡିଆଠାରୁ ଆରମ୍ଭ କରି ଦଳୀୟ କାର୍ଯ୍ୟାଳୟ ପର୍ଯ୍ୟନ୍ତ ସବୁଠି ନିଆଁ ଲଗାଇ ଦେଇଛି।
ଆଲୋଚନା ହେଉଛି କି, ଅପରାଜିତା ଷଡ଼ଙ୍ଗୀଙ୍କ ଟାର୍ଗେଟରେ ଏବେ କୌଣସି ବିରୋଧୀ ନେତା ନାହାନ୍ତି, ବରଂ ତାଙ୍କ ନିଜ ଦଳର ସବୁଠାରୁ ବଡ଼ ଚେହେରା ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅଛନ୍ତି। ମଧ୍ୟ-ଭୁବନେଶ୍ୱର ନିର୍ବାଚନମଣ୍ଡଳୀର ନେତା ଜଗନ୍ନାଥ ପ୍ରଧାନଙ୍କ ମାଧ୍ୟମରେ ସାଂସଦ ପରୋକ୍ଷରେ ଧର୍ମେନ୍ଦ୍ରଙ୍କୁ ଘେରିବାକୁ ଚେଷ୍ଟା କରୁଛନ୍ତି ବୋଲି ଚର୍ଚ୍ଚା ଜୋର ଧରିଛି। କଣ ଏହି ପୂରା ଘଟଣା? କାହିଁକି ନିଜ ଦଳର କର୍ମୀମାନେ ହିଁ ଆଜି ସାଂସଦଙ୍କୁ ଗଣିତ ପଢ଼ାଇବାକୁ ସାମ୍ନାକୁ ଆସିଛନ୍ତି? ଆସନ୍ତୁ ଜାଣିବା ଆମର ଏହି ସ୍ୱତନ୍ତ୍ର ରିପୋର୍ଟରେ।
ଜଗନ୍ନାଥ ପ୍ରଧାନଙ୍କୁ କାଉଣ୍ଟର: ରୁଦ୍ରଙ୍କ ଏଣ୍ଟ୍ରି ପଛର ଖେଳ
ରାଜନୀତିରେ କେହି ଏମିତି ଏମିତି କୌଣସି ପଦକ୍ଷେପ ନିଏନାହିଁ। ଭୁବନେଶ୍ୱର ମଧ୍ୟ ନିର୍ବାଚନମଣ୍ଡଳୀର ବରିଷ୍ଠ ବିଜେପି ନେତା ଜଗନ୍ନାଥ ପ୍ରଧାନ ହେଉଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଗୋଷ୍ଠୀର ଜଣେ ଅତି ବିଶ୍ୱସ୍ତ ନେତା। ଏହା ରାଜନୈତିକ କରିଡରରେ ସମସ୍ତେ ଜାଣନ୍ତି। ଚର୍ଚ୍ଚା ହେଉଛି ଯେ, ନିଜ ନିର୍ବାଚନମଣ୍ଡଳୀରେ ଜଗନ୍ନାଥ ପ୍ରଧାନଙ୍କ ପ୍ରଭାବକୁ କମାଇବା ପାଇଁ ଏବଂ ତାଙ୍କୁ କାଉଣ୍ଟର କରିବା ପାଇଁ ଅପରାଜିତା ଷଡ଼ଙ୍ଗୀ ଏକ ବଡ଼ ଚାଲ୍ ଚଳାଇଛନ୍ତି। ସେଥିପାଇଁ ସେ ରୁଦ୍ର ସାମନ୍ତରାୟଙ୍କୁ ଦଳରେ ମିଶାଇ ନିଜର ଏକ ସ୍ୱତନ୍ତ୍ର ପତିଆରା ସୃଷ୍ଟି କରିବାକୁ ଚେଷ୍ଟା କରୁଛନ୍ତି।
କିନ୍ତୁ ଖେଳ ସେତିକିରେ ସରିନାହିଁ। ନିକଟରେ ଅପରାଜିତା ଷଡ଼ଙ୍ଗୀ ଏକ ବିବୃତି ଦେଇଥିଲେ, ଯାହାକୁ ନେଇ ଏବେ ସୋସିଆଲ ମିଡିଆରେ ସେ ନିଜେ ଟ୍ରୋଲ୍ର ଶିକାର ହେଉଛନ୍ତି। ସାଂସଦ କହିଥିଲେ ଯେ, ଗତ ୨୦୨୪ ସାଧାରଣ ନିର୍ବାଚନରେ ଭୁବନେଶ୍ୱର ଲୋକସଭା ଆସନ ଅନ୍ତର୍ଗତ ୭ଟି ବିଧାନସଭା କ୍ଷେତ୍ର ମଧ୍ୟରୁ ସବୁଠି ବିଜେପିର ସଂଗଠନ ମଜବୁତ ଥିବାବେଳେ ମଧ୍ୟ-ଭୁବନେଶ୍ୱରରେ ଦଳ ଟିକେ ଦୁର୍ବଳ ରହିଛି ଏବଂ ଏହାକୁ ସୁଧାରିବାକୁ ଚେଷ୍ଟା କରାଯିବ। ସାଂସଦଙ୍କ ଏହି ଗୋଟିଏ ବାକ୍ୟ ବିଜେପିର ସେହି କର୍ମୀମାନଙ୍କୁ ଆଘାତ ଦେଇଛି, ଯେଉଁମାନେ ଦିନରାତି ଏକ କରି ତାଙ୍କୁ ଜିତାଇବା ପାଇଁ ଲଢ଼ିଥିଲେ।
କର୍ମୀଙ୍କ ଗଣିତ କ୍ଲାସ: ମୋବାଇଲ୍ରୁ ମୋବାଇଲ୍ ବୁଲୁଛି ରିପୋର୍ଟ କାର୍ଡ
ସାଂସଦ ତ କହିଦେଲେ ମଧ୍ୟ-ଭୁବନେଶ୍ୱରରେ ଦଳ ଦୁର୍ବଳ, କିନ୍ତୁ ତାଙ୍କର ଏହି ଦାବିକୁ ସମ୍ପୂର୍ଣ୍ଣ ଭୁଲ୍ ପ୍ରମାଣିତ କରିବା ପାଇଁ ଦଳର କର୍ମୀମାନେ ଏବେ ସାଂସଦଙ୍କୁ ଗତ ନିର୍ବାଚନର ଅସଲ ହିସାବ ଦେଖାଇଛନ୍ତି। କର୍ମୀମାନେ ସାଂସଦଙ୍କୁ ଏଭଳି ଗଣିତ ପଢ଼ାଇଛନ୍ତି, ଯାହାର ତଥ୍ୟ ଏବେ ସୋସିଆଲ ମିଡିଆରେ ମୋବାଇଲ୍ରୁ ମୋବାଇଲ୍କୁ ଘୂରି ବୁଲୁଛି।
ଭୁବନେଶ୍ଵର ଲୋକସଭା କ୍ଷେତ୍ର ଅଧୀନରେ ୭ଟି ବିଧାନସଭା ଆସନ ଆସେ। ସେଗୁଡ଼ିକ ହେଉଛି—ଜୟଦେବ, ମଧ୍ୟ-ଭୁବନେଶ୍ୱର, ଉତ୍ତର-ଭୁବନେଶ୍ୱର, ଏକାମ୍ର-ଭୁବନେଶ୍ୱର, ଜଟଣୀ, ବେଗୁନିଆ ଏବଂ ଖୋର୍ଦ୍ଧା। ଏହି ୭ଟି ଆସନ ମଧ୍ୟରୁ ବିଜେପି କେବଳ ଏକାମ୍ର-ଭୁବନେଶ୍ୱର ଏବଂ ଖୋର୍ଦ୍ଧା ଆସନରେ ବିଧାନସଭା ଜିତିପାରିଛି। ବାକି ୫ଟି ଯାକ ଆସନ ବିଜେଡି ଦଖଲରେ ଅଛି।
କିନ୍ତୁ ଆଶ୍ଚର୍ଯ୍ୟର କଥା ଦେଖନ୍ତୁ! ଯେଉଁ ମଧ୍ୟ-ଭୁବନେଶ୍ୱରକୁ ସାଂସଦ ଅପରାଜିତା ଦୁର୍ବଳ ବୋଲି କହୁଛନ୍ତି, ସେହି ନିର୍ବାଚନମଣ୍ଡଳୀରୁ ହିଁ ତାଙ୍କୁ ସବୁଠାରୁ ଅଧିକ ଭୋଟ୍ ଲିଡ୍ ମିଳିଥିଲା! ସୋସିଆଲ ମିଡିଆରେ ଲୋକେ ପକାଉଥିବା ହିସାବ ଅନୁସାରେ:
• ମଧ୍ୟ-ଭୁବନେଶ୍ୱରରୁ: ସାଂସଦଙ୍କୁ ସର୍ବାଧିକ ୧୧,୨୧୨ ଭୋଟ୍ର ଲିଡ୍ ମିଳିଥିଲା।
• ଉତ୍ତର-ଭୁବନେଶ୍ୱରରୁ: ୯,୩୯୮ ଭୋଟ୍ର ଲିଡ୍ ମିଳିଥିଲା।
• ଏକାମ୍ର-ଭୁବନେଶ୍ୱରରୁ: (ଯେଉଠି ବିଜେପି ବିଧାୟକ ଜିତିଛନ୍ତି) ସେଠାରୁ ମିଳିଥିଲା ୭,୬୩୪ ଭୋଟ୍ର ଲିଡ୍।
• ବେଗୁନିଆରୁ: ୫,୧୮୯ ଭୋଟ୍ର ଲିଡ୍ ମିଳିଥିଲା।
• ଜଟଣୀରୁ: ମାତ୍ର ୮୬୭ ଭୋଟ୍ର ଲିଡ୍ ମିଳିଥିଲା।
• ଏବଂ ଜୟଦେବ ନିର୍ବାଚନମଣ୍ଡଳୀରୁ ତ ସାଂସଦ ପ୍ରାର୍ଥୀଙ୍କୁ ବିଜେଡି ତୁଳନାରେ ୮,୭୭୮ ଖଣ୍ଡ କମ୍ ଭୋଟ୍ ମିଳିଥିଲା।
ବିଧାୟକ ପ୍ରାର୍ଥୀ ଜଗନ୍ନାଥଙ୍କ ଅବଦାନକୁ ଅଣଦେଖା କରାଯାଉଛି କି?
ଏହି ସଂଖ୍ୟା ଗୁଡ଼ିକୁ ଦେଖିଲା ପରେ ଯେକୌଣସି ସାଧାରଣ ବ୍ୟକ୍ତି ମଧ୍ୟ ବୁଝିପାରିବ ଯେ ମଧ୍ୟ-ଭୁବନେଶ୍ୱର କ୍ଷେତ୍ର ବିଜେପି ପାଇଁ କେତେ ସଂଜୀବନୀ ସଦୃଶ ଥିଲା। ରାଜନୀତିର ଏକ ସରଳ ନିୟମ ଅଛି— ସାଂସଦ ପ୍ରାର୍ଥୀଙ୍କୁ ବିଧାନସଭା କ୍ଷେତ୍ରରୁ ମିଳୁଥିବା ଲିଡ୍ ଭୋଟ୍ରେ ସେଠାକାର ସ୍ଥାନୀୟ ନେତା ଓ ବିଧାୟକ ପ୍ରାର୍ଥୀଙ୍କ ରକ୍ତଭିଜା ପରିଶ୍ରମ ଓ ଅବଦାନ ସବୁଠାରୁ ଅଧିକ ଥାଏ। ଏଥିରେ କୌଣସି ଦ୍ୱିମତ ନାହିଁ। ଜଗନ୍ନାଥ ପ୍ରଧାନ ମଧ୍ୟ-ଭୁବନେଶ୍ୱରରେ ନିଜେ ବିଧାନସଭା ଆସନ ହାରିଥିଲେ ମଧ୍ୟ ସାଂସଦଙ୍କ ପାଇଁ ସେଠାରୁ ୧୧ ହଜାରରୁ ଅଧିକ ଭୋଟ୍ର ପ୍ଲସ୍ ଲିଡ୍ ବାହାର କରିଥିଲେ।
ତେଣୁ ଏବେ ବିଜେପି କର୍ମୀମାନେ ସିଧାସଳଖ ସାଂସଦଙ୍କୁ ପ୍ରଶ୍ନ କରୁଛନ୍ତି ଯେ, ସେ କେଉଁ ଆଧାରରେ ଏବଂ କାହାକୁ ସନ୍ତୁଷ୍ଟ କରିବା ପାଇଁ ମଧ୍ୟ-ଭୁବନେଶ୍ୱରକୁ ଦୁର୍ବଳ ବୋଲି କହିଲେ? କର୍ମୀମାନଙ୍କର ସାଂଘାତିକ ଅଭିଯୋଗ ହେଉଛି ଯେ, ସାଂସଦଙ୍କ ଏଭଳି ବିବାଦୀୟ ଓ ଦାୟିତ୍ୱହୀନ ବୟାନ ସେମାନଙ୍କ ମନୋବଳକୁ ସମ୍ପୂର୍ଣ୍ଣ ଦୁର୍ବଳ କରୁଛି ଏବଂ ଜନସାଧାରଣଙ୍କ ପାଖକୁ ଏହି ବାର୍ତ୍ତା ଯାଉଛି ଯେ ବିଜେପି ଭିତରେ ସବୁ କିଛି ଠିକ୍ ଚାଲିନାହିଁ।
ଦଳୀୟ କନ୍ଦଳର ସଙ୍କେତ: କେଉଁଆଡ଼େ ଯାଉଛି ଓଡ଼ିଶା ବିଜେପି?
ଏହି ଘଟଣା କେବଳ ଭୁବନେଶ୍ୱର ଭିତରେ ସୀମିତ ନାହିଁ। ଏହା ସ୍ପଷ୍ଟ ସଙ୍କେତ ଦେଉଛି ଯେ ଓଡ଼ିଶା ବିଜେପିରେ ଏବେ ଏକ ବଡ଼ ‘ଅନ୍ତରଯୁଦ୍ଧ’ ଆରମ୍ଭ ହୋଇଛି। ଗୋଟିଏ ପଟେ ମୋହନ ଚରଣ ମାଝୀଙ୍କ ନେତୃତ୍ୱରେ ସରକାର ଚାଲିଛି, କିନ୍ତୁ ଅନ୍ୟପଟେ ଦଳର ଶୀର୍ଷ ନେତାମାନଙ୍କ ମଧ୍ୟରେ ନିଜ ନିଜର ଗୋଷ୍ଠୀକୁ ମଜବୁତ କରିବାର ପ୍ରତିଯୋଗିତା ଚାଲିଛି। ଅପରାଜିତା ଷଡ଼ଙ୍ଗୀ ନିଜର ଏକ ସ୍ୱତନ୍ତ୍ର ସାମ୍ରାଜ୍ୟ ତିଆରି କରିବାକୁ ଚାହୁଁଥିବା ବେଳେ ଧର୍ମେନ୍ଦ୍ର ପ୍ରଧାନଙ୍କ ଗୋଷ୍ଠୀ ଏହାକୁ ସହଜରେ ଗ୍ରହଣ କରିପାରୁନାହିଁ। ଆଉ ଏହି ଲଢ଼େଇ ଭିତରେ ବଳି ପଡ଼ୁଛନ୍ତି ସେହି ସାଧାରଣ କର୍ମୀ, ଯେଉଁମାନେ ନିଜର ସବୁକିଛି ସମର୍ପଣ କରି ଦଳକୁ କ୍ଷମତାକୁ ଆଣିଥିଲେ।
ନିଜ ଦଳର ସାଂସଦଙ୍କୁ କର୍ମୀମାନେ ସୋସିଆଲ ମିଡିଆରେ ଖୋଲାଖୋଲି ହିସାବ ମାଗିବା ଏବଂ ପ୍ରଶ୍ନବାଚୀ ସୃଷ୍ଟି କରିବା ବିଜେପିର ସଂଗଠନ ପାଇଁ ଆଦୌ ଶୁଭ ସଙ୍କେତ ନୁହେଁ। ଯଦି ଏହି ଆଭ୍ୟନ୍ତରୀଣ କନ୍ଦଳକୁ ଏବେଠାରୁ ରୋକାନଯାଏ, ତେବେ ଆଗାମୀ ଦିନରେ ଏହା ଏକ ବଡ଼ ବିସ୍ଫୋରକ ରୂପ ନେଇପାରେ।
AlsoRead; https://purvapaksa.com/maharashtra-plays-in-bengal-will-yoda-ghaza-phull-be-lost-from-didis-hands/
