ଭାରତର ସବୁଠୁ ଚର୍ଚ୍ଚିତ ଆର୍ଥିକ ପ୍ରତାରଣା ମାମଲାର ଅଭିଯୁକ୍ତ ତଥା “ମହାଠକ” ଭାବେ ପରିଚିତ ସୁକେଶ ଚନ୍ଦ୍ରଶେଖର ପୁଣି ଥରେ ଚର୍ଚ୍ଚାରେ ଆସିଛନ୍ତି । ଏଥର କାରଣ ହେଉଛି ତାଙ୍କର ଅଦ୍ଭୁତ ଓ ଆଶ୍ଚର୍ଯ୍ୟଜନକ ପ୍ରସ୍ତାବ—ସେ ଆଇପିଏଲ୍ର ପ୍ରସିଦ୍ଧ ଟିମ୍ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) କୁ ୧ ବିଲିୟନ୍ ଡଲାର (ପ୍ରାୟ ୮ ହଜାର କୋଟି ଟଙ୍କାରୁ ଅଧିକ) ଦେଇ କିଣିବାକୁ ଚାହୁଁଛନ୍ତି।
ସୁକେଶ ଏହି ବୋଲିକୁ ନିଜେ “ଏକ ସ୍ପେସିଆଲ୍ ଗିଫ୍ଟ” ବୋଲି କହିଛନ୍ତି, ଯାହା ସେ ବଲିଉଡ୍ ଅଭିନେତ୍ରୀ ଜାକ୍ଲିନ୍ ଫର୍ନାଣ୍ଡେଜଙ୍କ ପାଇଁ ଦେବାକୁ ଚାହୁଁଛନ୍ତି । ଏହି କଥା ସେ ଡିୟାଜିଓ କମ୍ପାନୀକୁ ଲେଖାଯାଇଥିବା ଏକ ଚିଠିରେ ଉଲ୍ଲେଖ କରିଛନ୍ତି ଯାହା ବର୍ତ୍ତମାନ RCB ଟିମ୍ର ମାଲିକ।
ଜେଲରେ ରହି ବିଲିୟନ୍ ଡଲାରର ସ୍ୱପ୍ନ
ବିସ୍ମୟର କଥା ହେଉଛି, ସୁକେଶ ଚନ୍ଦ୍ରଶେଖର ବର୍ତ୍ତମାନ ଦିଲ୍ଲୀର ମଣ୍ଡୋଳି ଜେଲରେ ବନ୍ଦୀ ଅଛନ୍ତି। ତାଙ୍କ ବିରୋଧରେ ଅନେକ କୋଟି ଟଙ୍କାର ଠକେଇ, ମନିଲଣ୍ଡରିଂ ଓ ପ୍ରଭାବ ବ୍ୟବହାର କରିବା ଭଳି ଗୁରୁତର ଅଭିଯୋଗ ରହିଛି। ଏପରି ସ୍ଥିତିରେ ଜେଲରେ ରହି ଏକ IPL ଟିମ୍ କିଣିବା ପାଇଁ ବୋଲି ଲଗାଇବା ଘଟଣା ସମଗ୍ର ଦେଶରେ ଚର୍ଚ୍ଚା ସୃଷ୍ଟି କରିଛି।
ସୁକେଶ ତାଙ୍କ ଚିଠିରେ ଦାବି କରିଛନ୍ତି ଯେ ସେ ସମ୍ପୂର୍ଣ୍ଣ ରାଶି କ୍ୟାଶ୍ରେ ଦେବାକୁ ପ୍ରସ୍ତୁତ ଏବଂ କୌଣସି ବ୍ୟାଙ୍କ ଋଣ କିମ୍ବା ତୃତୀୟ ପକ୍ଷର ସହାୟତା ନେବେ ନାହିଁ। ସେ ଏହା ମଧ୍ୟ କହିଛନ୍ତି ଯେ ଆବଶ୍ୟକ ହେଲେ ୪୮ ଘଣ୍ଟା ଭିତରେ ଡିଲ୍ ସମ୍ପୂର୍ଣ୍ଣ କରିପାରିବେ।
ଜାକ୍ଲିନ୍ ସହ ସମ୍ପର୍କ ପୁଣି ଚର୍ଚ୍ଚାରେ
ସୁକେଶ ଓ ଜାକ୍ଲିନ୍ଙ୍କ ସମ୍ପର୍କ ପୂର୍ବରୁ ମଧ୍ୟ ବହୁବାର ଖବରର ଶିରୋନାମା ହୋଇଛି। ମହଙ୍ଗା ଗିଫ୍ଟ, ବିଦେଶୀ କାର, ଗହଣା ଓ ଲକ୍ଷାଧିକ ଟଙ୍କାର ଉପହାର ମାମଲାରେ ଜାକ୍ଲିନ୍ଙ୍କ ନାଁ ଆସିଥିଲା। ଯଦିଓ ଅଭିନେତ୍ରୀ ନିଜକୁ ନିର୍ଦୋଷ ବୋଲି କହିଛନ୍ତି, ତଥାପି ସୁକେଶଙ୍କ ଏହି ନୂଆ ପ୍ରସ୍ତାବ ତାଙ୍କ ସମ୍ପର୍କକୁ ପୁଣିଥରେ ଆଲୋଚନାର କେନ୍ଦ୍ରବିନ୍ଦୁ କରିଛି।
RCB ବିକ୍ରୟ ନେଇ କୌଣସି ସ୍ପଷ୍ଟତା ନାହିଁ
ଏପର୍ଯ୍ୟନ୍ତ RCB କିମ୍ବା ତାହାର ମାଲିକ ଡିୟାଜିଓ ପକ୍ଷରୁ ଟିମ୍ ବିକ୍ରୟ ସମ୍ପର୍କରେ କୌଣସି ଆଧିକାରିକ ଘୋଷଣା ହୋଇନାହିଁ। କ୍ରିକେଟ ବିଶେଷଜ୍ଞମାନେ କହୁଛନ୍ତି ଯେ IPL ଫ୍ରାଞ୍ଚାଇଜି ମାଲିକାନା ପରିବର୍ତ୍ତନ ପାଇଁ BCCIର କଠୋର ନିୟମ ରହିଛି ଏବଂ ଏକ ଅଭିଯୁକ୍ତ ବ୍ୟକ୍ତି ପାଇଁ ଏପରି ଡିଲ୍ ସମ୍ଭବ ହେବା ଅତ୍ୟନ୍ତ କଷ୍ଟକର। ତଥାପି, ସୁକେଶ ଚନ୍ଦ୍ରଶେଖରଙ୍କ ୧ ବିଲିୟନ୍ ଡଲାରର ଏହି ବୋଲି ଦେଶର କ୍ରିକେଟ, ବ୍ୟବସାୟ ଓ ବଲିଉଡ୍ ତିନୋଟି ମଞ୍ଚକୁ ଏକ ସାଥିରେ ଆଣି ଦେଇଛି, ଯାହା ଆସନ୍ତା ଦିନରେ ଆଉ ନୂଆ ଚର୍ଚ୍ଚାକୁ ଜନ୍ମ ଦେଇପାରେ।
also read https://purvapaksa.com/anubhav-mohanty/
