କିଛି ଲୋକ ବାରମ୍ବାର ପରିସ୍ରା ଆସିବାକୁ ନେଇ ଦୀର୍ଘ ସମୟ ଧରି ଚିନ୍ତାରେ ରହୁଛନ୍ତି। ଡାକ୍ତରୀ ଯାଞ୍ଚରେ ନା ଡାଇବେଟିସ, ନା ୟୁରିନ ଇନଫେକ୍ସନର କୌଣସି ସ୍ପଷ୍ଟ ସଙ୍କେତ ମିଳୁନାହିଁ। ଏପରି ସ୍ଥିତିରେ ଅନେକେ ହତାଶ ହୋଇଯାଆନ୍ତି। କିନ୍ତୁ ବିଶେଷଜ୍ଞମାନେ କହୁଛନ୍ତି, ଏହାର ପଛରେ ଓଭରଆକ୍ଟିଭ ବ୍ଲାଡର ସିଣ୍ଡ୍ରୋମ (Overactive Bladder Syndrome – OAB) ଏକ ମୁଖ୍ୟ କାରଣ ହୋଇପାରେ।
ସାଧାରଣତଃ ବ୍ଲାଡର ପରିସ୍ରାରେ ପୂର୍ଣ୍ଣ ହେବା ପରେ ମସ୍ତିଷ୍କକୁ ସଙ୍କେତ ପଠାଏ। କିନ୍ତୁ ଓଭରଆକ୍ଟିଭ ବ୍ଲାଡରରେ, ଅଳ୍ପ ପରିମାଣର ପରିସ୍ରା ଭରିଲେ ମଧ୍ୟ ବ୍ଲାଡର ବାରମ୍ବାର ବ୍ରେନକୁ ସିଗନାଲ ପଠାଇଥାଏ। ଫଳରେ ବ୍ୟକ୍ତିକୁ ଘନଘନ ପରିସ୍ରା ଆସିବାର ଅନୁଭବ ହୁଏ।
ଏହି ସମସ୍ୟା ପୁରୁଷ ଓ ମହିଳା – ଉଭୟଙ୍କ ଠାରେ ଦେଖାଯାଇପାରେ। ବୟସ ବଢ଼ିବା ସହିତ ଏହାର ସମ୍ଭାବନା ମଧ୍ୟ ବଢ଼ିଯାଏ। ବିଶେଷକରି ମହିଳାଙ୍କ ମଧ୍ୟରେ ହର୍ମୋନାଲ ପରିବର୍ତ୍ତନ ହେତୁ ଏହି ସମସ୍ୟା ଅଧିକ ଦେଖାଯାଏ।
ଡାକ୍ତରମାନଙ୍କ ମତାନୁସାରେ, ଦୀର୍ଘ ସମୟ ଧରି ପରିସ୍ରାକୁ ରୋକିବାର ଅଭ୍ୟାସ, ମୋଟାପା, ଶାରୀରିକ ଆକ୍ଟିଭିଟିର ଅଭାବ, ଅତ୍ୟଧିକ ଚାପ ଓ ଟେନ୍ସନ ମଧ୍ୟ ବ୍ଲାଡରର କାର୍ଯ୍ୟ ପ୍ରଣାଳୀକୁ ପ୍ରଭାବିତ କରେ। କେତେକ ମାମଲାରେ ମେରୁଦଣ୍ଡ, ନର୍ଭସ ସିଷ୍ଟମ କିମ୍ବା ମସ୍ତିଷ୍କ ସହ ଜଡିତ ସମସ୍ୟା ଯୋଗୁଁ ବ୍ଲାଡର ସିଗନାଲ ବିକୃତ ହୋଇପାରେ।
ଓଭରଆକ୍ଟିଭ ବ୍ଲାଡରର ମୁଖ୍ୟ ଲକ୍ଷଣ ହେଉଛି—
-
ବାରମ୍ବାର ପରିସ୍ରା ଆସିବା
-
ଅଚାନକ ଏବଂ ଦ୍ରୁତ ୟୁରିନ ଆସିବାର ଇଚ୍ଛା
-
ପରିସ୍ରା ରୋକିବାରେ ଅସୁବିଧା
-
ରାତିରେ ବାରମ୍ବାର ନିଦରୁ ଉଠି ପରିସ୍ରାକୁ ଯିବା
-
ବ୍ଲାଡର ପୂରା ଖାଲି ନ ହେବାର ଅନୁଭବ
ଏହି ସମସ୍ୟା ଧୀରେଧୀରେ ବ୍ୟକ୍ତିର ନିଦ, କାର୍ଯ୍ୟକ୍ଷମତା ଓ ସାମାଜିକ ଜୀବନକୁ ଗଭୀରଭାବେ ପ୍ରଭାବିତ କରିପାରେ।
ବିଶେଷଜ୍ଞମାନେ କିଛି ସରଳ ଉପାୟ ପରାମର୍ଶ ଦେଉଛନ୍ତି— କଫିନ, ସଫ୍ଟ ଡ୍ରିଙ୍କ ଓ ଅତିରିକ୍ତ ଚା ପାନ କମ୍ କରନ୍ତୁ। ଠିକ୍ ସମୟରେ ଓ ସନ୍ତୁଳିତ ମାତ୍ରାରେ ପାଣି ପିଅନ୍ତୁ। ପରିସ୍ରାକୁ ଦୀର୍ଘ ସମୟ ଧରି ରୋକିବାର ଅଭ୍ୟାସ ଛାଡ଼ନ୍ତୁ। ଚାପ କମାଇବା ପାଇଁ ଯୋଗ ଓ ଧ୍ୟାନ କରନ୍ତୁ ଏବଂ ଓଜନକୁ ନିୟନ୍ତ୍ରଣରେ ରଖନ୍ତୁ। ସମୟରେ ସଚେତନ ହେଲେ ଓ ଜୀବନଶୈଳୀରେ ପରିବର୍ତ୍ତନ ଆଣିଲେ, ଓଭରଆକ୍ଟିଭ ବ୍ଲାଡର ସମସ୍ୟାକୁ ବହୁ ମାତ୍ରାରେ ନିୟନ୍ତ୍ରଣ କରାଯାଇପାରେ।
also read https://purvapaksa.com/samsung-galaxy-a07-5g/
