ସୀମାରେ ଯେକୌଣସି ଜରୁରୀକାଳୀନ ପରିସ୍ଥିତିର ତୁରନ୍ତ ଏବଂ ଶକ୍ତିଶାଳୀ ମୁକାବିଲା କରିବା ପାଇଁ ଭାରତୀୟ ସେନା ନିଜର ଯୁଦ୍ଧ କୌଶଳରେ ଏକ ବଡ଼ ପରିବର୍ତ୍ତନ କରିଛି। ସେନା ପକ୍ଷରୁ ପ୍ରସ୍ତୁତ କରାଯାଉଥିବା ଅତ୍ୟାଧୁନିକ ‘ଇଣ୍ଟିଗ୍ରେଟେଡ୍ ବ୍ୟାଟେଲ୍ ଗ୍ରୁପ୍’ (IBG) ବା ସମନ୍ୱିତ ଯୁଦ୍ଧ ସମୂହ ବର୍ତ୍ତମାନ ସୀମାରେ ମୁତୟନ ପାଇଁ ସମ୍ପୂର୍ଣ୍ଣ ରୂପେ ପ୍ରସ୍ତୁତ। ପ୍ରତ୍ୟେକ ଗ୍ରୁପ୍ରେ ପ୍ରାୟ ୫,୦୦୦ ସୈନ୍ୟ ରହିବେ ଏବଂ ଏହାର କମାଣ୍ଡ ବା ନେତୃତ୍ୱ ଜଣେ ମେଜର ଜେନେରାଲ୍ ପାହ୍ୟାର ଅଧିକାରୀଙ୍କ ହାତରେ ନ୍ୟସ୍ତ ରହିବ।
ଯୁଦ୍ଧ ସମୟରେ ମିଳିବ ବଡ଼ ଫାଇଦା
ସେନା ସୂତ୍ର ଅନୁଯାୟୀ, ପାରମ୍ପରିକ ବ୍ୟବସ୍ଥାରେ ଏକ ବଡ଼ ସେନା ବାହିନୀ କୁ ଯୁଦ୍ଧକ୍ଷେତ୍ରକୁ ପଠାଇବା ଏବଂ ସେମାନଙ୍କ ମଧ୍ୟରେ ସମନ୍ୱୟ ରକ୍ଷା କରିବା ପାଇଁ ସମୟ ଲାଗୁଥିଲା। କିନ୍ତୁ ଏହି ନୂତନ IBG ଗଠନ ହେବା ପରେ ଏହି ସମସ୍ୟାର ସମାଧାନ ହୋଇପାରିବ। ଏହି ଛୋଟ ଏବଂ କ୍ଷିପ୍ର ଯୁଦ୍ଧ ସମୂହଗୁଡ଼ିକ ଶତ୍ରୁ ଉପରେ ଅତି ଦ୍ରୁତ ଗତିରେ ଓ ମାରାତ୍ମକ ଆକ୍ରମଣ କରିବାରେ ସକ୍ଷମ ହେବେ। ଚୀନ୍ ଏବଂ ପାକିସ୍ତାନ ସୀମାରେ ସେନାର ପ୍ରସ୍ତୁତିକୁ ଆହୁରି ମଜବୁତ କରିବା ପାଇଁ ଏହି ରଣନୀତି ପ୍ରସ୍ତୁତ କରାଯାଇଛି।
ସମସ୍ତ ଶକ୍ତି ଗୋଟିଏ ଗ୍ରୁପ୍ରେ ସାମିଲ
ଏହି ଇଣ୍ଟିଗ୍ରେଟେଡ୍ ବ୍ୟାଟେଲ୍ ଗ୍ରୁପ୍ର ସବୁଠାରୁ ବଡ଼ ବିଶେଷତ୍ୱ ହେଉଛି, ଏଥିରେ ସେନାର ସମସ୍ତ ଗୁରୁତ୍ୱପୂର୍ଣ୍ଣ ବିଭାଗକୁ ଏକାଠି କରାଯାଇଛି। ପ୍ରତ୍ୟେକ IBG ମଧ୍ୟରେ ସେନା ଇନଫାଣ୍ଟ୍ରି (ପଦାତିକ ସେନା), ଆର୍ମର୍ଡ (ଟ୍ୟାଙ୍କ ବାହିନୀ), ଆର୍ଟିଲାରୀ (ତୋପଖାନା), ଏୟାର ଡିଫେନ୍ସ ଏବଂ ଲଜିଷ୍ଟିକ୍ସ (ଯୋଗାଣ ବିଭାଗ) ର ସୈନ୍ୟ ଏକାଠି ରହିବେ। ଏହାଦ୍ୱାରା ଯୁଦ୍ଧ ସମୟରେ ଅନ୍ୟ କୌଣସି ୟୁନିଟ୍ର ସହାୟତା ପାଇଁ ଅପେକ୍ଷା ନକରି ଏହି ଗ୍ରୁପ୍ ନିଜ ସ୍ତରରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ।
ପରୀକ୍ଷଣ ସଫଳ, ସୀମାରେ ହେବ ମୁତୟନ
ଭାରତୀୟ ସେନା ପୂର୍ବରୁ ପାକିସ୍ତାନକୁ ଲାଗିଥିବା ପଶ୍ଚିମ ସୀମା ଏବଂ ଚୀନକୁ ଲାଗିଥିବା ପୂର୍ବ ସୀମାରେ ଏହି IBGର ସଫଳ ଯୁଦ୍ଧ ପରୀକ୍ଷଣ ବା ଓ୍ୱାର୍ ଗେମ୍ସ କରିସାରିଛି। ବର୍ତ୍ତମାନ ସମସ୍ତ ପରୀକ୍ଷଣ ଶେଷ ହେବା ପରେ ଏହାକୁ ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ କରାଯାଉଛି। ପ୍ରଥମ ପର୍ଯ୍ୟାୟରେ ଏହି ଗ୍ରୁପ୍ଗୁଡ଼ିକୁ ରକ୍ଷାମୂଳକ ଏବଂ ଆକ୍ରମଣାତ୍ମକ ସ୍ଥିତି ଆଧାରରେ ଅତି ସମ୍ବେଦନଶୀଳ ସୀମାନ୍ତ ଅଞ୍ଚଳରେ ମୁତୟନ କରାଯିବ, ଯାହା ଦେଶର ପ୍ରତିରକ୍ଷା ବ୍ୟବସ୍ଥାକୁ ଏକ ନୂଆ ଶକ୍ତି ପ୍ରଦାନ କରିବ।
Also read : https://purvapaksa.com/law-should-be-a-shield-for-the-innocent-not-a-sword-for-the-vengeful-supreme-court/
