ନିଶ୍ଚୟ ଭାରତୀୟ ରାଜନୀତିରେ ନିର୍ବାଚନ ପୂର୍ବରୁ ‘ମାଗଣା ଉପହାର’ ବା ତଥାକଥିତ Freebie Culture ବିଷୟରେ ଶୁଣିଥିବେ—ନିର୍ବାଚନ ଜିତିବା ପାଇଁ ମାଗଣା ବିଜୁଳି, ମାଗଣା ରାସନ କିମ୍ବା ଖାତାକୁ ସିଧାସଳଖ ଟଙ୍କା ପଠାଇବାର ପ୍ରତିଶ୍ରୁତି। କିନ୍ତୁ ଆପଣ କେବେ କଳ୍ପନା କରିଛନ୍ତି କି, ପୁଞ୍ଜିବାଦର ଗଡ଼ ଆମେରିକାରେ ମଧ୍ୟ ଭୋଟ୍ ପାଇଁ ଏହି ଫର୍ମୁଲା ଆରମ୍ଭ ହୋଇଯିବ?
ହଁ ଆଜ୍ଞା, ଆଶ୍ଚର୍ଯ୍ୟ ଲାଗିଲେ ମଧ୍ୟ କଥାଟି ଏକଦମ ସତ୍ୟ। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବିଶାଳ ଘୋଷଣା କରିଛନ୍ତି। ଯଦି ଆଗାମୀ ମଧ୍ୟବର୍ତ୍ତୀକାଳୀନ ନିର୍ବାଚନ ବା ମିଡ୍-ଟର୍ମ ଇଲେକ୍ସନରେ ତାଙ୍କ ଦଳ ‘ରିପବ୍ଲିକାନ୍ ପାର୍ଟି’ ବିଜୟୀ ହୁଏ, ତେବେ ଆମେରିକାର ପ୍ରତ୍ୟେକ ବୟସ୍କ ନାଗରିକଙ୍କ ବ୍ୟାଙ୍କ ଖାତାକୁ ପଠାଯିବ ପୂରା ୫,୦୦୦ ଆମେରିକୀୟ ଡଲାର! ଭାରତୀୟ ମୁଦ୍ରାରେ ହିସାବ କଲେ ଏହା ପ୍ରାୟ ୪ ଲକ୍ଷ ୧୫ ହଜାର ଟଙ୍କାରୁ ଅଧିକ।
ପ୍ରଶ୍ନ ଉଠୁଛି—ହଠାତ୍ ଟ୍ରମ୍ପ ଏତେ ବଡ଼ ପଦକ୍ଷେପ କାହିଁକି ନେଲେ? କ’ଣ ଆମେରିକାରେ ମଧ୍ୟ ନିର୍ବାଚନ ହାରିବାର ଭୟ ଟ୍ରମ୍ପଙ୍କୁ ଘାରିଛି? ଆଉ ସବୁଠାରୁ ବଡ଼ କଥା ହେଲା, ଏହି ବିରାଟ ପରିମାଣର ଟଙ୍କା ଆସିବ କେଉଁଠୁ?
ଡାଲାସ୍ ଠାରେ ଆୟୋଜିତ ରିପବ୍ଲିକାନ୍ ପାର୍ଟିର ଏକ ବଡ଼ ସମ୍ମିଳନୀରେ ଭାଷଣ ଦେଉଥିବା ବେଳେ ଟ୍ରମ୍ପ ଏହି ବିସ୍ଫୋରକ ଘୋଷଣା କରିଥିଲେ।
ସେ ଖୋଲାଖୋଲି କହିଛନ୍ତି—
“ଯଦି ରିପବ୍ଲିକାନ୍ ଜିତନ୍ତି, ତେବେ ଆପଣ ମଧ୍ୟ ଆମ ସହିତ ଜିତିବେ। ପ୍ରତ୍ୟେକ ଆମେରିକୀୟ ବୟସ୍କ ନାଗରିକଙ୍କୁ ୫,୦୦୦ ଡଲାର ମିଳିବ। ଏବଂ ଏହାକୁ କୁହାଯିବ ‘ଟ୍ରମ୍ପ ଡିଭିଡେଣ୍ଡ’।”
ଏଠାରେ ଟ୍ରମ୍ପଙ୍କ ଶବ୍ଦ ଚୟନକୁ ଲକ୍ଷ୍ୟ କରନ୍ତୁ। ସେ ଏହାକୁ ‘ମାଗଣା ଟଙ୍କା’ ବୋଲି କହୁନାହାନ୍ତି। ସେ କହୁଛନ୍ତି ଏହା ଏକ ‘ଡିଭିଡେଣ୍ଡ’ ବା ଲାଭାଂଶ। ସେ ତୁଳନା କରି କହିଛନ୍ତି ଯେ, ଯେପରି ଗୋଟିଏ ବଡ଼ କମ୍ପାନୀ ବହୁତ ଲାଭ କଲେ ନିଜ ଶେୟାରଧାରକମାନଙ୍କୁ ଲାଭର ଅଂଶ ବଣ୍ଟନ କରେ, ଠିକ୍ ସେହିପରି ଆମେରିକାର ଅର୍ଥନୀତି ଆଜି ଯେଉଁ ଉଚ୍ଚତାରେ ପହଞ୍ଚିଛି, ସେଥିପାଇଁ ସରକାର ନିଜ ନାଗରିକମାନଙ୍କୁ ଏହି ଲାଭାଂଶ ଦେବାକୁ ଚାହୁଁଛନ୍ତି।
କିନ୍ତୁ ଏହି ଘୋଷଣାର ମାତ୍ର କିଛି ଘଣ୍ଟା ମଧ୍ୟରେ କ’ଣ ଘଟିଲା ଜାଣନ୍ତି? ଟ୍ରମ୍ପଙ୍କ ଏହି ବୟାନ ଆସିବା ମାତ୍ରେ ତାଙ୍କରି ନିଜ ପ୍ରଶାସନ ମଧ୍ୟରେ ହଇଚଇ ସୃଷ୍ଟି ହୋଇଗଲା।
ଉପରାଷ୍ଟ୍ରପତି ଜେ.ଡି. ଭ୍ୟାନ୍ସ ଏକ ଘଣ୍ଟା ନପୁରୁଣୁ ଗଣମାଧ୍ୟମ ଆଗକୁ ଆସି ଏକ ପ୍ରକାର ଢାଙ୍କୁଣି ଦେବା ଆରମ୍ଭ କଲେ। ସେ କହିଲେ ଯେ ଏହି ଟଙ୍କା ସମସ୍ତଙ୍କୁ ମିଳିବ ନାହିଁ—ବିଶେଷ କରି ଧନୀକ ଶ୍ରେଣୀର ଲୋକଙ୍କୁ ଏଥିରୁ ବାଦ୍ ଦିଆଯିବ। ଆଉ ଏହି ଟଙ୍କାର ଭରଣା ଆମେରିକା ଦ୍ୱାରା ଅନ୍ୟ ଦେଶରୁ ଆମଦାନୀ ହେଉଥିବା ଦ୍ରବ୍ୟ ଉପରେ ଲଗାଯାଉଥିବା ‘ଟାରିଫ୍’ ବା ଆମଦାନୀ ଶୁଳ୍କରୁ କରାଯିବ। ଅର୍ଥାତ୍, ରାଷ୍ଟ୍ରପତି ଗୋଟିଏ କଥା କହିବା ବେଳେ ଉପରାଷ୍ଟ୍ରପତି ତାହାକୁ ସମ୍ଭାଳିବାକୁ ଚେଷ୍ଟା କରୁଛନ୍ତି।
ବର୍ତ୍ତମାନ ଆସନ୍ତୁ କଥା ହେବା ଏହି ଯୋଜନାର ଅସଲ ଗଣିତ ବିଷୟରେ। ଜଣେ ସାଧାରଣ ନାଗରିକ ଭାବରେ ଆପଣଙ୍କୁ ଲାଗିପାରେ ଯେ ୫,୦୦୦ ଡଲାର ପାଇବା ତ ବହୁତ ଭଲ କଥା। କିନ୍ତୁ ଅର୍ଥନୀତିର ନିୟମ ଏତେ ସରଳ ନୁହେଁ।
ପ୍ରଥମ କଥା: ଆମେରିକାରେ ପ୍ରାୟ ୨୬ କୋଟି ବୟସ୍କ ନାଗରିକ ଅଛନ୍ତି। ଯଦି ପ୍ରତ୍ୟେକଙ୍କୁ ୫,୦୦୦ ଡଲାର ଦିଆଯାଏ, ତେବେ ଆମେରିକା ରାଜକୋଷ ଉପରେ କେତେ ବୋଝ ପଡ଼ିବ?
ଆପଣ ଶୁଣିଲେ ଚମକି ପଡ଼ିବେ—ଏହି ପରିମାଣ ପାଖାପାଖି ୧ ଟ୍ରିଲିୟନ୍ ଡଲାର ବା ୧୦୦୦ ଆରବ ଡଲାର!
ଏବେ ଆପଣ ଭାବନ୍ତୁ, ଯେଉଁ ଆମେରିକା ଆଜି ନିଜର ଇତିହାସର ସବୁଠାରୁ ବଡ଼ ଆର୍ଥିକ ସଙ୍କଟ ଦେଇ ଗତି କରୁଛି, ସେଠାରେ ୧ ଟ୍ରିଲିୟନ୍ ଡଲାରର ମାଗଣା ବଣ୍ଟନ କିପରି ସମ୍ଭବ? ଆସନ୍ତୁ କିଛି ବାସ୍ତବ ତଥ୍ୟ ଦେଖିବା:
1. ଜାତୀୟ ଋଣ: ନିକଟରେ ଆମେରିକାର ମୋଟ ଋଣ ଇତିହାସରେ ପ୍ରଥମ ଥର ପାଇଁ ୪୦ ଟ୍ରିଲିୟନ୍ ଡଲାର ଅତିକ୍ରମ କରିଛି।
2. ବଜେଟ୍ ନିଅଣ୍ଟ : ଆମେରିକାର ବାର୍ଷିକ ବଜେଟ୍ ନିଅଣ୍ଟ ପ୍ରାୟ ୧.୮ ଟ୍ରିଲିୟନ୍ ଡଲାର। ଅର୍ଥାତ୍ ସରକାରଙ୍କ ଆୟ ତୁଳନାରେ ଖର୍ଚ୍ଚ ବହୁତ ଅଧିକ।
3. ଆମଦାନୀ ଶୁଳ୍କର ସୀମା: ଜେ.ଡି. ଭ୍ୟାନ୍ସ କହୁଛନ୍ତି ଟାରିଫ୍ ବା ଶୁଳ୍କରୁ ଟଙ୍କା ଆସିବ। କିନ୍ତୁ ଅର୍ଥନୀତିଜ୍ଞମାନେ ସ୍ପଷ୍ଟ କହିଛନ୍ତି ଯେ ଆମେରିକାର ମୋଟ ବାର୍ଷିକ ଟାରିଫ୍ ଆୟ ମଧ୍ୟ ଏହି ୧ ଟ୍ରିଲିୟନ୍ ଡଲାର ଆଗରେ ଅତ୍ୟନ୍ତ ନଗଣ୍ୟ।
ଆଉ ଏହା ବ୍ୟତୀତ, ଆମେରିକାର ସର୍ବୋଚ୍ଚ ନ୍ୟାୟାଳୟ ପୂର୍ବରୁ ଟ୍ରମ୍ପଙ୍କ ଅନେକ ଏକତରଫା ଟାରିଫ୍ ନିଷ୍ପତ୍ତି ଉପରେ ରୋକ୍ ଲଗାଇ ସାରିଛନ୍ତି। ତାହା ସହିତ, ଏପରି ଏକ ବିରାଟ ଆର୍ଥିକ ରାଶି ଖର୍ଚ୍ଚ କରିବା ପାଇଁ ଆମେରିକୀୟ ସଂସଦ ବା ‘କଂଗ୍ରେସ’ର ଅନୁମୋଦନ ଏକାନ୍ତ ଆବଶ୍ୟକ। ଯଦି କଂଗ୍ରେସ ଏହାକୁ ପାସ୍ ନକରେ, ତେବେ ଟ୍ରମ୍ପ ଚାହିଁଲେ ମଧ୍ୟ ଗୋଟିଏ ସେଣ୍ଟ କାହାକୁ ଦେଇପାରିବେ ନାହିଁ।
ଏବେ ପ୍ରଶ୍ନ ଆସୁଛି—ଯଦି ଏହି ଯୋଜନା ବାସ୍ତବରେ ଲାଗୁ କରିବା ଏତେ କଷ୍ଟକର, ତେବେ ଟ୍ରମ୍ପ ଏଭଳି ଏକ ଅବାସ୍ତବ ପ୍ରତିଶ୍ରୁତି କାହିଁକି ଦେଲେ?
ଏହାର ଉତ୍ତର ଲୁଚି ରହିଛି ଆମେରିକାର ‘ମିଡ୍-ଟର୍ମ ଇଲେକ୍ସନ୍’ ବା ମଧ୍ୟବର୍ତ୍ତୀକାଳୀନ ନିର୍ବାଚନର ଇତିହାସ ଭିତରେ।
ଆମେରିକା ରାଜନୀତିରେ ଏକ ପୁରୁଣା ଧାରା ରହିଆସିଛି। ରାଷ୍ଟ୍ରପତି ନିର୍ବାଚିତ ହେବାର ଦୁଇ ବର୍ଷ ପରେ ଯେତେବେଳେ ସଂସଦର ଉଭୟ ଗୃହ ପାଇଁ ମଧ୍ୟବର୍ତ୍ତୀକାଳୀନ ନିର୍ବାଚନ ହୁଏ, ସେତେବେଳେ ପ୍ରାୟ ସବୁ ସମୟରେ କ୍ଷମତାସୀନ ରାଷ୍ଟ୍ରପତିଙ୍କ ଦଳ ପରାଜୟର ସମ୍ମୁଖୀନ ହୋଇଥାଏ।
ଓବାମାଙ୍କ ସମୟରେ ହେଉ କିମ୍ବା ଟ୍ରମ୍ପଙ୍କ ନିଜର ପ୍ରଥମ କାର୍ଯ୍ୟକାଳ ସମୟରେ—ଶାସକ ଦଳ ମିଡ୍-ଟର୍ମ ନିର୍ବାଚନରେ ସଂସଦରେ ନିଜର ବହୁମତ ହରାଇଛି।
ଡୋନାଲ୍ଡ ଟ୍ରମ୍ପ ବେଶ ଭଲ ଭାବେ ଜାଣନ୍ତି ଯେ ଯଦି ଚଳିତ ନଭେମ୍ବର ମାସରେ ହେବାକୁ ଥିବା ନିର୍ବାଚନରେ ରିପବ୍ଲିକାନ୍ ପାର୍ଟି ସଂସଦରେ ନିୟନ୍ତ୍ରଣ ହରାଇବ, ତେବେ ଡେମୋକ୍ରାଟ୍ ମାନେ ତାଙ୍କ ରାଷ୍ଟ୍ରପତିତ୍ୱକୁ ଅଚଳ କରିଦେବେ। ସେ କୌଣସି ନୂଆ ନୀତି ବା ଆଇନ ଲାଗୁ କରିପାରିବେ ନାହିଁ।
ସେଥିପାଇଁ, ଇତିହାସର ଏହି ଧାରାକୁ ବଦଳାଇବା ପାଇଁ, ନିର୍ବାଚନ ହାରିବାର ଡରରୁ ମୁକୁଳିବା ପାଇଁ ଟ୍ରମ୍ପ ଏବେ ଆମେରିକୀୟ ଭୋଟରଙ୍କୁ ସିଧାସଳଖ ୫,୦୦୦ ଡଲାରର ଲୋଭ ଦେଖାଇବା ଆରମ୍ଭ କରିଛନ୍ତି। ଏହା କୌଣସି ଅର୍ଥନୈତିକ ସଂସ୍କାର ନୁହେଁ, ବରଂ ନିଚ୍ଛକ ଭାବେ ଏକ ନିର୍ବାଚନୀ ପଶାପାଲି!
ଭାରତରେ ସୁପ୍ରିମକୋର୍ଟଙ୍କ ଠାରୁ ଆରମ୍ଭ କରି ବଡ଼ ବଡ଼ ଅର୍ଥନୀତିଜ୍ଞମାନେ ବାରମ୍ବାର ଚେତାବନୀ ଦିଅନ୍ତି ଯେ—ମାଗଣା ରାଜନୀତି ଦେଶର ଅର୍ଥନୀତିକୁ ପଙ୍ଗୁ କରିଦିଏ। ଶ୍ରୀଲଙ୍କା ଏବଂ ଭେନେଜୁଏଲାର ଉଦାହରଣ ଆମ ସାମ୍ନାରେ ରହିଛି।
କିନ୍ତୁ ଆଜି ସେହି ରୋଗ ଆମେରିକାକୁ ମଧ୍ୟ ଡେଇଁଛି। ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ଯଦି ବାସ୍ତବରେ ଏହି ୧ ଟ୍ରିଲିୟନ୍ ଡଲାର ଲୋକଙ୍କ ହାତକୁ ଦିଆଯାଏ, ତେବେ ତାର ଦୁଇଟି ମାରାତ୍ମକ ପରିଣାମ ହେବ:
1. ମୁଦ୍ରାସ୍ଫୀତି ବା ଆକାଶଛୁଆଁ ମହଙ୍ଗା: କରୋନା ମହାମାରୀ ସମୟରେ ଯେତେବେଳେ ଆମେରିକା ସରକାର ଲୋକଙ୍କ ଆକାଉଣ୍ଟକୁ ପ୍ରୋତ୍ସାହନ ରାଶି ପଠାଇଥିଲେ, ତାହା ପରେ ଆମେରିକାରେ ଗତ ୪୦ ବର୍ଷର ସବୁଠାରୁ ଭୟଙ୍କର ମହଙ୍ଗା ମାଡ଼ ଦେଖିବାକୁ ମିଳିଥିଲା। ପୁଣି ଥରେ ମାର୍କେଟକୁ ଏତେ ଟଙ୍କା ଛାଡ଼ିଲେ ଜିନିଷପତ୍ରର ଦାମ୍ ଏତେ ବଢ଼ିଯିବ ଯେ ସାଧାରଣ ଲୋକଙ୍କ ବଞ୍ଚିବା କଷ୍ଟକର ହୋଇପଡ଼ିବ।
2. ଡଲାର ଉପରୁ ବିଶ୍ୱାସ ହ୍ରାସ: ଆମେରିକା ଯଦି ନିଜର ଋଣ ସୁଝିବା ପରିବର୍ତ୍ତେ ନିର୍ବାଚନ ଜିତିବା ପାଇଁ ଆହୁରି ଋଣ କରି ଟଙ୍କା ବାଣ୍ଟିବ, ତେବେ ବିଶ୍ୱ ବଜାରରେ ଆମେରିକୀୟ ଡଲାରର ପ୍ରଭାବ କମିବା ଆରମ୍ଭ କରିବ।
ତେଣୁ, ସମୁଦାୟ ଚିତ୍ରକୁ ଦେଖିଲେ ଗୋଟିଏ କଥା ସ୍ପଷ୍ଟ ଜଣାପଡୁଛି—ରାଜନୀତି ଭାରତର ହେଉ କି ଆମେରିକାର, ଭୋଟରଙ୍କୁ ଆକର୍ଷିତ କରିବା ପାଇଁ ନେତାମାନେ ଏବେ ସମାନ ରାସ୍ତା ଆପଣାଉଛନ୍ତି।
ଟ୍ରମ୍ପ ଜାଣନ୍ତି ଯେ ସାଧାରଣ ଲୋକ ଏବେ ମହଙ୍ଗା ମାଡ଼ରେ ଅତିଷ୍ଠ। ଆଉ ଏହି ସମୟରେ ସିଧାସଳଖ ୫,୦୦୦ ଡଲାରର ପ୍ରଲୋଭନ ଦେଖାଇ ସେ ନିର୍ବାଚନୀ ବୈତରଣୀ ପାର୍ ହେବାକୁ ଚାହୁଁଛନ୍ତି। କିନ୍ତୁ ଆମେରିକାର ବୁଦ୍ଧିଜୀବୀ ଓ ଭୋଟରମାନେ କ’ଣ ଏହି ପ୍ରତିଶ୍ରୁତିର ମାୟାଜାଲରେ ଫସିବେ? ନା ସେମାନେ ନିଜ ଦେଶର ୪୦ ଟ୍ରିଲିୟନ୍ ଡଲାରର ଋଣ ଏବଂ ଭବିଷ୍ୟତକୁ ଗୁରୁତ୍ୱ ଦେବେ? ତାହା ଆଗାମୀ ନଭେମ୍ବର ମାସର ନିର୍ବାଚନ ଫଳାଫଳ ହିଁ କହିବ।
AlsoRead; https://purvapaksa.com/russian-military-aircraft-lands-at-noida-airport/
ନୋଏଡା ବିମାନବନ୍ଦରରେ ରୁଷୀୟ ସେନା ବିମାନର ଅବତରଣ || Russian military aircraft lands at Noida airport
