ହାଇଦ୍ରାବାଦରୁ ବିଜୟଓ୍ୱାଡା ଯାଉଥିବା ଏକ ଘରୋଇ ଯାତ୍ରୀ ବସରେ ହଠାତ୍ ଭୟଙ୍କର ନିଆଁ ଲାଗିଯାଇ ଯାତ୍ରୀମାନଙ୍କ ମଧ୍ୟରେ ଭୟାବହ ଆତଙ୍କ ସୃଷ୍ଟି ହୋଇଥିଲା । ଏହି ଘଟଣା ଆନ୍ଧ୍ରପ୍ରଦେଶର ଏନଟିଆର ଜିଲ୍ଲା ଅନ୍ତର୍ଗତ କାଞ୍ଚିକଚେରଲା ପୋଲିସ ଷ୍ଟେସନ ଅଞ୍ଚଳର ନନ୍ଦୀଗାମା ନିକଟସ୍ଥ କୀସାରା ଟୋଲ ପ୍ଲାଜା ପାଖରେ ଘଟିଥିଲା। ସମୟରେ ବସରେ ମୋଟ ୩୯ ଜଣ ଯାତ୍ରୀ, ଡ୍ରାଇଭର ଓ ହେଲ୍ପର ଉପସ୍ଥିତ ଥିଲେ।
ପ୍ରତ୍ୟକ୍ଷଦର୍ଶୀ ଓ ପୋଲିସ ସୂଚନା ଅନୁସାରେ ବସ ଚଳିତବସ୍ଥାରେ ଥିବା ବେଳେ ହଠାତ୍ ଇଞ୍ଜିନ ଭାଗରୁ ଧୂଆଁ ବାହାରୁଥିବା ଡ୍ରାଇଭର ଦେଖିଥିଲେ। ସଚେତନତା ଦେଖାଇ ଡ୍ରାଇଭର ବସକୁ ତୁରନ୍ତ ରାସ୍ତା କୂଳରେ ଅଟକାଇ ଦେଇଥିଲେ। ଏହା ପରେ ସେ ଯାତ୍ରୀମାନଙ୍କୁ ତୁରନ୍ତ ବସରୁ ଓହ୍ଲାଇବାକୁ ସୂଚନା ଦେଇଥିଲେ।
ଡ୍ରାଇଭର, ହେଲ୍ପର ଏବଂ କିଛି ସଚେତନ ଯାତ୍ରୀଙ୍କ ସହଯୋଗରେ ସମସ୍ତ ୩୯ ଜଣ ଯାତ୍ରୀଙ୍କୁ ସୁରକ୍ଷିତ ଭାବେ ବସରୁ ଓହ୍ଲାଇ ଦିଆଯାଇଥିଲା। ନିଆଁ ଦ୍ରୁତ ଗତିରେ ବ୍ୟାପିବା ପୂର୍ବରୁ ସମସ୍ତେ ନିଜ ଜୀବନ ରକ୍ଷା କରିପାରିଥିବାରୁ ଏକ ବଡ଼ ଦୁର୍ଘଟଣା ଟଳିଯାଇଛି ।
କିଛି ମିନିଟ୍ ମଧ୍ୟରେ ବସଟି ସମ୍ପୂର୍ଣ୍ଣ ଭାବେ ନିଆଁର ଆହୁତି ହୋଇଯାଇଥିଲା । ଖବର ପାଇ ତୁରନ୍ତ ଦମକଳ ବାହିନୀ ଓ ପୋଲିସ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲେ। ଯଦିଓ ନିଆଁ ନିୟନ୍ତ୍ରଣରେ ଆସିଥିଲା, କିନ୍ତୁ ସେତେବେଳେ ବସଟି ସମ୍ପୂର୍ଣ୍ଣ ଜଳିପୋଡ଼ି ପାଉଁଶ ହୋଇଯାଇଥିଲା।
ସୌଭାଗ୍ୟବଶତଃ ଏହି ଅଗ୍ନିକାଣ୍ଡରେ କୌଣସି ଯାତ୍ରୀ ଆହତ ହୋଇନାହାନ୍ତି। ସମସ୍ତ ଯାତ୍ରୀ ସୁରକ୍ଷିତ ଥିବା ନେଇ ପୋଲିସ ନିଶ୍ଚିତ କରିଛି। ତେବେ ବସରେ ନିଆଁ କେମିତି ଲାଗିଲା, ଏନେଇ ଏଯାଏଁ ସ୍ପଷ୍ଟ କାରଣ ଜଣାପଡ଼ିନାହିଁ। ପ୍ରାଥମିକ ଭାବେ ଯାନ୍ତ୍ରିକ ତ୍ରୁଟି କିମ୍ବା ସର୍ଟ ସର୍କିଟ୍ ହେବା ସନ୍ଦେହ କରାଯାଉଛି। ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଏହି ଘଟଣା ପୁଣିଥରେ ଯାତ୍ରୀ ବାହନଗୁଡ଼ିକର ନିୟମିତ ଯାଞ୍ଚ ଓ ସୁରକ୍ଷା ବ୍ୟବସ୍ଥାର ଆବଶ୍ୟକତାକୁ ସାମ୍ନାକୁ ଆଣିଛି।
also read https://purvapaksa.com/farmers-block-roads-in-protest-against-12-crop-chutney-quota/
https://purvapaksa.com/farmers-block-roads-in-protest-against-12-crop-chutney-quota/
