ଦର୍ଶକ ବନ୍ଧୁ, ଓଡ଼ିଆରେ ଗୋଟିଏ ବହୁତ ପୁରୁଣା ଏବଂ ମଜାଦାର ଢଙ୍ଗ ଅଛି— “ଲୁଚିଛି ନା ଗୋଡ଼ ଦୁଇଟା ଦିଶୁଛି!”ଏହାର ମାନେ କ’ଣ ଆପଣମାନେ ଜାଣିଛନ୍ତି ତ? ଯେତେ ଲୁଚିବାକୁ ଚେଷ୍ଟା କଲେ ବି, ଯେତେ ଘୋଡ଼େଇ ହେବାକୁ ଚେଷ୍ଟା କଲେ ବି, ସତ କଥା କିମ୍ବା ଆପଣଙ୍କ ଅସଲ ରୂପ କିପରି ସମାନ ଭାବେ ଧରାପଡ଼ିଯାଏ, ଏହା ହିଁ ତାହାର ପ୍ରକୃତ ଅର୍ଥ । ଆଜି ଠିକ୍ ସେହିପରି ଏକ ସ୍ଥିତି ଦେଖିବାକୁ ମିଳୁଛି ଓଡ଼ିଶାର କ୍ଷମତା ନିୟନ୍ତ୍ରଣ ରାଜନୀତିରେ। ଆଉ ତାହା ହେଉଛି— ବିଜୁ ଜନତା ଦଳ ବା ବିଜେଡି ଏବଂ କଂଗ୍ରେସ ମଧ୍ୟରେ ଥିବା ଅଘୋଷିତ, କିନ୍ତୁ ଦୃଢ଼ ସମ୍ପର୍କ।
ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ଯେତେଥର କହିଥାନ୍ତୁ କାହିଁକି ନା— “କଂଗ୍ରେସ ସହିତ ଆମର କୌଣସି ସମ୍ପର୍କ ନାହିଁ, ଆମେ ଉଭୟ ଇଣ୍ଡିଆ ମେଣ୍ଟ ଏବଂ ଏନ୍ଡିଏଠାରୁ ସମଦୂରତ୍ୱ ରକ୍ଷା କରୁଛୁ”, ହେଲେ ବାସ୍ତବତା କିଛି ଅଲଗା କଥା କହୁଛି। ବାରମ୍ବାର, ପ୍ରତିଟି ଘଟଣାରେ ଏହି ସମଦୂରତ୍ୱର ନୀତି କେମିତି ପାଣିଫୋଟକା ଭଳି ଫାଟିଯାଉଛି, ତାହା ଆଜି ପୁଣିଥରେ ପଦାରେ ପଡ଼ିଛି।
କଥାଟି କ’ଣ ଆସନ୍ତୁ ଜାଣିବା। ଏସ୍ଆଇଆର (SIR) ପ୍ରସଙ୍ଗ, ସିଇସି (CEC) ଜ୍ଞାନେଶ କୁମାରଙ୍କ ମନମୁଖୀ କାର୍ଯ୍ୟକଳାପ ଏବଂ ସାରା ଦେଶରେ ୧୩ କୋଟିରୁ ଅଧିକ ଭୋଟରଙ୍କ ନାମ କଟାଯିବା ଭଳି ଏକ ସମ୍ବେଦନଶୀଳ ମାମଲାରେ ଆଜି ବିରୋଧୀ ଦଳଗୁଡ଼ିକ ପକ୍ଷରୁ ଏକ ବିରୋଧ ପଦଯାତ୍ରା ଅନୁଷ୍ଠିତ ହେଉଛି। ଆଉ ସବୁଠାରୁ ବଡ଼ କଥା ହେଲା, ଏହି ପଦଯାତ୍ରାରେ ସାମିଲ ହୋଇଛି ବିଜେଡି!
ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସିଧାସଳଖ ନିର୍ଦ୍ଦେଶକ୍ରମେ ଦଳର ସାଂସଦମାନେ ଏହି ବିରୋଧ ପଦଯାତ୍ରାରେ ଯୋଗ ଦେଇଛନ୍ତି। ଏ ନେଇ ରାଜ୍ୟସଭାରେ ବିଜେଡି ସଂସଦୀୟ ଦଳର ନେତା ମାନସ ମଙ୍ଗରାଜ ନିଜେ ସ୍ପଷ୍ଟ କରିସାରିଛନ୍ତି।
ବର୍ତ୍ତମାନ ପ୍ରଶ୍ନ ଉଠୁଛି— ଯଦି ବିଜେଡି କାହାରି ସାଥ୍ ଦେଉନି, ଯଦି ସେମାନେ କଂଗ୍ରେସ ବା ଇଣ୍ଡିଆ ମେଣ୍ଟର ଅଂଶବିଶେଷ ନୁହଁନ୍ତି, ତେବେ ଦିଲ୍ଲୀର ରାଜନୈତିକ କରିଡରରେ କଂଗ୍ରେସ ନେତୃତ୍ୱାଧୀନ ଏହି ପ୍ରତିବାଦରେ ବିଜେଡି କାହିଁକି ଏତେ ଉତ୍ସାହର ସହିତ ସାମିଲ ହେଉଛି? ଏହା କାମ କେବଳ ଏକ “ଦାୟିତ୍ୱସମ୍ପନ୍ନ ରାଜନୈତିକ ଦଳର କାମ”, ନା ଏହା ପଛରେ ରହିଛି କୌଣସି ଗୁପ୍ତ ରାଜନୈତିକ ବୁଝାମଣା?
ମାନସ ମଙ୍ଗରାଜଙ୍କ ଯୁକ୍ତିକୁ ଯଦି ଆମେ ଦେଖିବା, ସେ କହିଛନ୍ତି ଯେ ଏସ୍ଆଇଆର୍ ପ୍ରସଙ୍ଗରେ ସିଇସିଙ୍କ ବିବାଦୀୟ ଭୂମିକାକୁ ନେଇ ନବୀନ ପଟ୍ଟନାୟକ ପୂର୍ବରୁ ହିଁ ଜ୍ଞାନେଶ କୁମାରଙ୍କ ଇସ୍ତଫା ଦାବି କରିସାରିଛନ୍ତି। ସେମାନଙ୍କ ଅଭିଯୋଗ ହେଲା, କେବଳ ଓଡ଼ିଶାରେ ୨୦ ଲକ୍ଷରୁ ଊର୍ଦ୍ଧ୍ୱ ଭୋଟରଙ୍କୁ ବାଦ ଦିଆଯାଇଛି ଏବଂ ସାରା ଦେଶରେ ଏହି ସଂଖ୍ୟା ୧୩ କୋଟିରୁ ଅଧିକ।
ଏହି ସନ୍ଦେହକୁ ଆହୁରି ଦୃଢ଼ କରିଛି ଆମ ଓଡ଼ିଶାର ଧାମନଗରରେ ଘଟିଥିବା ଏକ ବିଚିତ୍ର ଘଟଣା। ଧାମନଗରରେ ସ୍ଥାନୀୟ ବିଏଲ୍ଓ ଅଜ୍ଞାତସାରରେ ଗୋଟିଏ ନିର୍ଦ୍ଦିଷ୍ଟ ଅଞ୍ଚଳରୁ ସଂଖ୍ୟାଲଘୁ ସମ୍ପ୍ରଦାୟର ୨୨୭ଟି ଭୋଟ୍ କାଟିଦିଆଯିବା କଥାଟି ଏବେ ଚାଞ୍ଚଲ୍ୟ ସୃଷ୍ଟି କରିଛି। କେବଳ ଧାମନଗର ନୁହେଁ, ସାରା ରାଜ୍ୟର ବିଭିନ୍ନ ବିଧାନସଭା କ୍ଷେତ୍ରରୁ ଏପରି ହଜାର ହଜାର ଭୋଟରଙ୍କୁ ବାଦ ଦିଆଯାଇଥିବା ନେଇ ଅଭିଯୋଗ ହେଉଛି।
ଆଉ ଏହା ସହିତ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ହଠାତ୍ ସ୍ୱେଚ୍ଛାକୃତ ଅବସର ଆବେଦନ ସାଧାରଣ ଜନତାଙ୍କ ମନରେ ଆହୁରି ଅନେକ ସନ୍ଦେହ ସୃଷ୍ଟି କରିଛି। ସୁପ୍ରିମକୋର୍ଟ ମଧ୍ୟ ନିର୍ବାଚନ କମିଶନଙ୍କ ପୂର୍ବ ନିର୍ଦ୍ଦେଶକୁ ଖଣ୍ଡନ କରି କହିଛନ୍ତି ଯେ ଏପରି କୌଣସି ନିର୍ଦ୍ଦେଶ ଦିଆଯାଇ ନ ଥିଲା। ଏସବୁ ଦୃଷ୍ଟିରୁ ଦେଖିଲେ, ଭୋଟର ତାଲିକାରେ କିଛି ଗଡ଼ବଡ଼ ହୋଇଛି ବୋଲି ଯେଉଁ ଅଭିଯୋଗ ବିଜେଡି କରୁଛି, ତାହାକୁ ହେୟଜ୍ଞାନ କରାଯାଇପାରିବ ନାହିଁ।
କିନ୍ତୁ ପ୍ରଶ୍ନ ଉଠୁଛି— ଯେତେବେଳେ ରାଜ୍ୟରେ ବିଜେଡି କ୍ଷମତାରୁ ଓହରିଛି, ସେତେବେଳେ ଦଳର କେନ୍ଦ୍ରୀୟ ନୀତିରେ ଏତେ ବଡ଼ ପରିବର୍ତ୍ତନ କାହିଁକି ଆସୁଛି?
ଗୋଟିଏ ପଟେ ଦଳ କହୁଛି— “ଆମେ ବିଜେପି (ଏନ୍ଡିଏ) କିମ୍ବା କଂଗ୍ରେସ (ଇଣ୍ଡିଆ ମେଣ୍ଟ) କାହା ସାଙ୍ଗରେ ବି ନାହୁଁ, ଆମର ନୀତି ହେଲା ସମଦୂରତ୍ୱ।” କିନ୍ତୁ ଅନ୍ୟପଟେ, ଯେତେବେଳେ ଜାତୀୟ ସ୍ତରରେ ବିଜେପି ବିରୋଧରେ କୌଣସି ମିଳିତ ଆନ୍ଦୋଳନ କିମ୍ବା ପଦଯାତ୍ରା ହୁଏ, ସେଠାରେ ବିଜେଡିର ଉପସ୍ଥିତି ବେଶ୍ ଆଖିଦୃଶିଆ ହୋଇଥାଏ।
ଏହାକୁ କ’ଣ କୁହାଯିବ? ଏହା କାମ କେବଳ ଗଣତନ୍ତ୍ରକୁ ବଞ୍ଚାଇବାର ଏକ ନିରପେକ୍ଷ ଲଢ଼େଇ, ନା ଆଗାମୀ ଦିନର ରାଜନୈତିକ ସମୀକରଣ ପାଇଁ ଏହା ଏକ ପୂର୍ବ ପ୍ରସ୍ତୁତି?
ରାଜନୀତିରେ କୌଣସି କଥା ବିନା କାରଣରେ ହୁଏ ନାହିଁ। ଗୋଟିଏ ଦଳ ଯେତେବେଳେ ଦୀର୍ଘ ଦିନ ଧରି କ୍ଷମତାରେ ରହିବା ପରେ ହଠାତ୍ ବିରୋଧୀ ଆସନକୁ ଆସେ, ସେତେବେଳେ ତାର ବଞ୍ଚି ରହିବା ପାଇଁ ଏକ ଜାତୀୟ ବା କ୍ଷେତ୍ରୀୟ ମେଣ୍ଟର ଆବଶ୍ୟକତା ଅନୁଭବ ହୁଏ। ଆଜି ଯଦି ବିଜେଡି କଂଗ୍ରେସ ସହିତ ହାତ ମାଳ ନ କଲେ ମଧ୍ୟ, କଂଗ୍ରେସ ନେତୃତ୍ୱାଧୀନ ପ୍ରତିବାଦରେ ସାମିଲ ହେଉଛି, ତେବେ ଏହା ସ୍ପଷ୍ଟ ଯେ ରାଜନୈତିକ ବାଧ୍ୟବାଧକତା ସେମାନଙ୍କୁ ଏକାଠି ଆଣୁଛି।
ତେଣୁ ସେହି ପୁରୁଣା କଥାଟି ପୁଣି ଥରେ ମନକୁ ଆସେ— “ଲୁଚିଛି ନା ଗୋଡ଼ ଦୁଇଟା ଦିଶୁଛି!”
ମୁହଁରେ ଯେତେ କହିଲେ ବି ଯେ ଆମର କାହା ସାଙ୍ଗରେ ସମ୍ପର୍କ ନାହିଁ, ଯେତେ ସମଦୂରତ୍ୱର ଦ୍ୱାହି ଦେଲେ ବି, ଯେତେବେଳେ ରାସ୍ତା ଉପରକୁ ଓହ୍ଲାଇବାକୁ ପଡ଼େ, ସେତେବେଳେ ଅସଲ ଚେହେରା ସାମ୍ନାକୁ ଆସିଯାଏ। ଭୋଟର ତାଲିକା ଜାଲିଆତି କିମ୍ବା ଇସ୍ତଫା ଦାବି ଭଳି ପ୍ରସଙ୍ଗରେ ବିଜେଡିର ଏହି ଆଭିମୁଖ୍ୟ ଓଡ଼ିଶା ରାଜନୀତିରେ ଆଗାମୀ ଦିନରେ କି ନୂଆ ମୋଡ଼ ଆଣୁଛି, ତାହା ଉପରେ ରହିବ ଆମ ସମସ୍ତଙ୍କର ନଜର।
also read
Respect or insult for the senior leader? II ବରିଷ୍ଠ ନେତାଙ୍କୁ ସମ୍ମାନ ନା ଅପମାନ?
https://purvapaksa.com/respect-or-insult-for-the-senior-leader/
