ଆକାଶରେ ଘଟିବାକୁ ଯାଉଛି ଚଳିତ ବର୍ଷର ଦ୍ୱିତୀୟ ଏବଂ ଶେଷ ସୂର୍ଯ୍ୟଗ୍ରହଣ। ଆସନ୍ତା ୧୨ ଅଗଷ୍ଟ ୨୦୨୬ରେ ଘଟିବାକୁ ଥିବା ଏହି ଘଟଣା ଏକ ପୂର୍ଣ୍ଣ ସୂର୍ଯ୍ୟଗ୍ରହଣ ହେବ। ଏହାକୁ ନେଇ ସମସ୍ତଙ୍କ ମଧ୍ୟରେ ବେଶ୍ ଉତ୍ସାହ ଦେଖାଦେଇଛି।
ତେବେ ସବୁଠାରୁ ବଡ଼ ପ୍ରଶ୍ନ ହେଉଛି—ଏହି ବିରଳ ସୂର୍ଯ୍ୟଗ୍ରହଣ କ’ଣ ଭାରତରେ ଦେଖାଯିବ?
୧୨ ଅଗଷ୍ଟର ଏହି ପୂର୍ଣ୍ଣ ସୂର୍ଯ୍ୟଗ୍ରହଣ ଭାରତରୁ ଦେଖାଯିବ ନାହିଁ। ଭାରତୀୟ ସମୟ ଅନୁସାରେ ଗ୍ରହଣର ପ୍ରମୁଖ ପର୍ଯ୍ୟାୟ ରାତି ସମୟରେ ଘଟିବ। ଏହି କାରଣରୁ ଭାରତରୁ ଏହା ସିଧାସଳଖ ଦେଖିବା ସମ୍ଭବ ହେବ ନାହିଁ।
ଅର୍ଥାତ୍, ଓଡ଼ିଶା ସମେତ ଭାରତର ଅନ୍ୟ କୌଣସି ଅଞ୍ଚଳରୁ ଏହି ଗ୍ରହଣ ଦୃଶ୍ୟମାନ ହେବ ନାହିଁ।
ଭାରତୀୟ ସମୟ ଅନୁସାରେ ୧୨ ଅଗଷ୍ଟ ରାତି ପ୍ରାୟ ୯ଟା ୦୪ ମିନିଟ୍ରେ ସୂର୍ଯ୍ୟଗ୍ରହଣ ଆରମ୍ଭ ହେବ। ପରେ ରାତି ୧୦ଟା ୨୯ ମିନିଟ୍ରେ ପୂର୍ଣ୍ଣ ଗ୍ରହଣର ପର୍ଯ୍ୟାୟ ଆରମ୍ଭ ହେବ।
ଗ୍ରହଣର ସର୍ବୋଚ୍ଚ ପର୍ଯ୍ୟାୟ ପ୍ରାୟ ରାତି ୧୧ଟା ୧୬ ମିନିଟ୍ରେ ହେବ। ସମଗ୍ର ଗ୍ରହଣ ପ୍ରକ୍ରିୟା ୧୩ ଅଗଷ୍ଟ ରାତି ପ୍ରାୟ ୧ଟା ୨୭ ମିନିଟ୍ରେ ଶେଷ ହେବ।
ଏହି ପୂର୍ଣ୍ଣ ସୂର୍ଯ୍ୟଗ୍ରହଣର ସବୁଠାରୁ ଚମତ୍କାର ଦୃଶ୍ୟ ଗ୍ରୀନଲ୍ୟାଣ୍ଡ, ଆଇସଲ୍ୟାଣ୍ଡ ଏବଂ ସ୍ପେନର କିଛି ଅଞ୍ଚଳରୁ ଦେଖିବାକୁ ମିଳିବ। ୟୁରୋପର ଅନେକ ଅଞ୍ଚଳରୁ ମଧ୍ୟ ଆଂଶିକ ସୂର୍ଯ୍ୟଗ୍ରହଣ ଦେଖାଯିବ।
ପୂର୍ଣ୍ଣ ସୂର୍ଯ୍ୟଗ୍ରହଣ ସମୟରେ ଚନ୍ଦ୍ର ସୂର୍ଯ୍ୟ ଓ ପୃଥିବୀ ମଧ୍ୟରେ ଏପରି ଭାବେ ଅବସ୍ଥାନ କରେ ଯେ ସୂର୍ଯ୍ୟର ଆଲୋକ ସମ୍ପୂର୍ଣ୍ଣ ଭାବେ ଆଚ୍ଛାଦିତ ହୋଇଯାଏ। ଫଳରେ ଦିନ ସମୟରେ ମଧ୍ୟ କିଛି ସମୟ ପାଇଁ ଆକାଶ ଅନ୍ଧକାରମୟ ଦେଖାଯାଏ।
ସୂର୍ଯ୍ୟଗ୍ରହଣକୁ ନେଇ ହିନ୍ଦୁ ଧାର୍ମିକ ପରମ୍ପରାରେ ସୂତକ କାଳର ମାନ୍ୟତା ରହିଛି। ସାଧାରଣତଃ ଯେଉଁ ଅଞ୍ଚଳରେ ଗ୍ରହଣ ଦୃଶ୍ୟମାନ ହୁଏ, ସେଠାରେ ସୂତକ କାଳକୁ ଗୁରୁତ୍ୱ ଦିଆଯାଏ।
ଏହି ଗ୍ରହଣ ଭାରତରୁ ଦୃଶ୍ୟମାନ ନହେବାରୁ, ଭାରତରେ ଅଶୁଭ କାଳ ଲାଗୁ ହେବ ନାହିଁ ବୋଲି ଜ୍ୟୋତିଷ ସୂଚନା ଦେଇଛନ୍ତି ।
ବୈଜ୍ଞାନିକ ଭାବେ ସୂର୍ଯ୍ୟଗ୍ରହଣ ଏକ ସ୍ୱାଭାବିକ ଖଗୋଳୀୟ ଘଟଣା। ଯେତେବେଳେ ଚନ୍ଦ୍ର ପୃଥିବୀ ଓ ସୂର୍ଯ୍ୟ ମଧ୍ୟରେ ଆସି ସୂର୍ଯ୍ୟର ଆଲୋକକୁ ଆଂଶିକ କିମ୍ବା ସମ୍ପୂର୍ଣ୍ଣ ଭାବେ ଢାଙ୍କିଦିଏ, ସେତେବେଳେ ସୂର୍ଯ୍ୟଗ୍ରହଣ ହୁଏ।
ଏହା ଏକ ବିରଳ ଓ ଚମତ୍କାର ଦୃଶ୍ୟ। ତେବେ ସୂର୍ଯ୍ୟଗ୍ରହଣ ଦେଖିବା ସମୟରେ ଖାଲି ଆଖିରେ ସୂର୍ଯ୍ୟକୁ ଦେଖିବା ଅତ୍ୟନ୍ତ ବିପଜ୍ଜନକ। ସୁରକ୍ଷିତ ଭାବେ ଗ୍ରହଣ ଦେଖିବା ପାଇଁ solar viewing glasses କିମ୍ବା ଉପଯୁକ୍ତ ସୋଲାର ଫିଲ୍ଟର ବ୍ୟବହାର କରିବା ଆବଶ୍ୟକ।
ଏଭଳି ଗୁରୁତ୍ୱପୂର୍ଣ୍ଣ ବିଜ୍ଞାନ, ଧର୍ମ ଓ ଦେଶ-ବିଦେଶର ଖବର ପାଇଁ ଆମ ପୋର୍ଟାଲ୍ ସହ ଯୋଡ଼ି ରୁହନ୍ତୁ।
