ଏପରି ଗମ୍ଭୀର ଏବଂ ବିପଜ୍ଜନକ ବିଷୟ, ଯାହା ସମଗ୍ର ବିଶ୍ୱର ରାଜନୈତିକ ଏବଂ ସାମରିକ ସମୀକରଣକୁ ଦୋହଲାଇ ଦେଇଛି। ଗତ କିଛି ଦଶନ୍ଧି ମଧ୍ୟରେ ଚୀନ୍ ନିଜର ଆର୍ଥିକ ଶକ୍ତି ସହିତ ନିଜର ସାମରିକ କ୍ଷେତ୍ରକୁ ଯେଉଁଭଳି ଭାବରେ ଆକାଶଛୁଆଁ ପ୍ରସାର କରିଛି, ତାହା ଏବେ ପଡ଼ୋଶୀ ଦେଶଗୁଡ଼ିକ ପାଇଁ ଚିନ୍ତାର ବିଷୟ ପାଲଟିଛି। ବିଶେଷକରି, ଚୀନର ‘ପିପୁଲ୍ସ ଲିବରେସନ୍ ଆର୍ମି ରକେଟ୍ ଫୋର୍ସ୍’ ବା PLARF ପାଖରେ ଆଜି ଯେଉଁ ମିସାଇଲ୍ ଭଣ୍ଡାର ରହିଛି, ତାହା ବିଶ୍ୱର ସବୁଠାରୁ ବଡ଼ ଏବଂ ବିବିଧତାରେ ଭରପୂର ବୋଲି କୁହାଯାଉଛି।
ଚୀନର ଏହି ମିସାଇଲ୍ ତାଲିକାରେ ଏପରି କିଛି ଭୟଙ୍କର ଅସ୍ତ୍ରଶସ୍ତ୍ର ରହିଛି, ଯାହା କେବଳ ତାଇୱାନ ପାଇଁ ନୁହେଁ, ବରଂ ଜାପାନ ଠାରୁ ଆରମ୍ଭ କରି ପ୍ରଶାନ୍ତ ମହାସାଗରରେ ଥିବା ଆମେରିକାର ସାମରିକ ଘାଟି ‘ଗୁଆମ୍’ପର୍ଯ୍ୟନ୍ତ ସମସ୍ତଙ୍କୁ ଭୟଭୀତ କରିଦେଇଛି। ଆଜି ଆମେ ବିସ୍ତାର ଭାବରେ ଜାଣିବା ଯେ ଚୀନର ଏହି ମିସାଇଲ୍ ଗୁଡ଼ିକ କେତେ ଶକ୍ତିଶାଳୀ ଏବଂ ଏହା ପଛର ପ୍ରକତ ରଣନୀତି କ’ଣ?
ପ୍ରଥମେ ବୁଝିବା ଯେ ଚୀନ୍ ଏହି ସବୁ ଅସ୍ତ୍ରଶସ୍ତ୍ର ମାଧ୍ୟମରେ କେଉଁ ଖେଳ ଖେଳୁଛି। ‘ଦି ୱାର୍ ଜୋନ୍’ ର ଏକ ରିପୋର୍ଟ ଅନୁଯାୟୀ, ତାଇୱାନକୁ କବ୍ଜା କରିବା କିମ୍ବା ସେଠାରେ କୌଣସି ଜରୁରୀକାଳୀନ ପରିସ୍ଥିତି ସୃଷ୍ଟି କରିବା ପାଇଁ ଚୀନ୍ ପାଖରେ କମ୍ ଦୂରତାର ମିସାଇଲ୍ ଠାରୁ ଆରମ୍ଭ କରି ଆମେରିକୀୟ ନୌସେନାକୁ ଧ୍ୱଂସ କରିବା ପାଇଁ ମଧ୍ୟମ ଦୂରତାର ମିସାଇଲ୍ ପ୍ରସ୍ତୁତ ରହିଛି। ଏସବୁକୁ ବେଜିଂର ‘Anti-Access/Area-Denial’ ଅର୍ଥାତ୍ ଶତ୍ରୁପକ୍ଷକୁ ନିଜ ସୀମାରୁ ଦୂରେ ରଖିବାର ରଣନୀତିର ମେରୁଦଣ୍ଡ ବୋଲି କୁହାଯାଉଛି।
ଚୀନର ଏହି ମିସାଇଲ୍ ଭଣ୍ଡାରକୁ ମୁଖ୍ୟତଃ କେତେକ ଭାଗରେ ବିଭକ୍ତ କରାଯାଇଛି:
୧. କମ୍ ଦୂରତାର ବାଲାଷ୍ଟିକ୍ ମିସାଇଲ୍: ଏହାର ରେଞ୍ଜ ପ୍ରାୟ ୧,୦୦୦ କିଲୋମିଟର ପର୍ଯ୍ୟନ୍ତ ହୋଇଥାଏ, ଯାହା ମୁଖ୍ୟତଃ ଯୁଦ୍ଧକ୍ଷେତ୍ର କିମ୍ବା ନିକଟସ୍ଥ ଲକ୍ଷ୍ୟ ପାଇଁ ବ୍ୟବହାର କରାଯାଏ।
୨. ମଧ୍ୟମ-ଦୂରତାର ବାଲାଷ୍ଟିକ୍ ମିସାଇଲ୍: ଏହାର ରେଞ୍ଜ ୧,୦୦୦ ରୁ ୩,୦୦୦ କିଲୋମିଟର ହୋଇଥାଏ।
୩. ଇଣ୍ଟରମିଡିଏଟ୍-ରେଞ୍ଜ ବାଲାଷ୍ଟିକ୍ ମିସାଇଲ୍: ଏହାର ରେଞ୍ଜ ୩,୦୦୦ ରୁ ୫,୫୦0 କିଲୋମିଟର ପର୍ଯ୍ୟନ୍ତ ରହିଥାଏ, ଯାହା ଦୂରବର୍ଷୀ ସ୍ଥାନଗୁଡ଼ିକୁ ମଧ୍ୟ ଟାର୍ଗେଟ୍ କରିପାରେ।
ବର୍ତ୍ତମାନ କଥା ହେବା ସବୁଠାରୁ ଆଧୁନିକ ଏବଂ ବିପଜ୍ଜନକ ମିସାଇଲ୍ DF-17 ବିଷୟରେ। ଏହା ହେଉଛି ପୃଥିବୀର ପ୍ରଥମ ଏପରି କାର୍ଯ୍ୟକ୍ଷମ ବାଲାଷ୍ଟିକ୍ ମିସାଇଲ୍, ଯାହାକୁ ବିଶେଷ ଭାବରେ HGV ଅର୍ଥାତ୍ ‘Hypersonic Glide Vehicle’ ବା ହାଇପରସୋନିକ୍ ଗ୍ଲାଇଡ୍ ଯାନ ବହନ କରିବା ପାଇଁ ଡିଜାଇନ୍ କରାଯାଇଛି।
ଭାବନ୍ତୁ, ଏହାର ରେଞ୍ଜ ପ୍ରାୟ ୧,୮୦୦ ରୁ ୨,୨୦୦ କିଲୋମିଟର ମଧ୍ୟରେ ରହିଛି। ଏହା କେବଳ ତାଇୱାନ, ଦକ୍ଷିଣ କୋରିଆ ଏବଂ ଜାପାନକୁ ନୁହେଁ, ବରଂ ‘ଫର୍ଷ୍ଟ ଆଇଲାଣ୍ଡ ଚେନ୍’ରେ ଥିବା ଆମେରିକାର ସାମରିକ ଘାଟିଗୁଡ଼ିକୁ ମଧ୍ୟ ନିଜ କବ୍ଜାକୁ ଆଣିପାରିବ। ସବୁଠାରୁ ବଡ଼ କଥା ହେଲା, ଏହି ମିସାଇଲ୍ ଶବ୍ଦର ଗତିଠାରୁ କେତେଗୁଣା ଅଧିକ ବେଗରେ ଗତି କରିଥାଏ ଏବଂ ଏହାର ଗତିପଥକୁ ମଝିରେ ଟ୍ରାକ୍ କରିବା କିମ୍ବା ନଷ୍ଟ କରିବା ବିଶ୍ୱର ବଡ଼ ବଡ଼ ମିସାଇଲ୍ ପ୍ରତିରକ୍ଷା ପ୍ରଣାଳୀ ପାଇଁ ମଧ୍ୟ ଅତ୍ୟନ୍ତ କଷ୍ଟକର ସାବ୍ୟତ୍ ହୋଇଥାଏ।
ଚୀନ୍ ପାଖରେ କେବଳ DF-17 ନାହିଁ, ବରଂ ପାରମ୍ପରିକ ଏବଂ ପୁରୁଣା କିନ୍ତୁ ଅଧିକ ମାତ୍ରାରେ ଉପଲବ୍ଧ DF-11, DF-15 ଏବଂ DF-16 ପରି କମ୍ ଦୂରତାର ମିସାଇଲ୍ ଗୁଡ଼ିକର ଏକ ବିଶାଳ ଭଣ୍ଡାର ରହିଛି। ଏହି ସମସ୍ତ ମିସାଇଲ୍ ଗୁଡ଼ିକୁ ସଡ଼କ ପଥରେ ଯେକୌଣସି ସ୍ଥାନକୁ ସହଜରେ ନିଆଯାଇପାରିବ। ଏହାର ଅର୍ଥ ହେଲା, ଯୁଦ୍ଧ ସମୟରେ ଚୀନ୍ ଏଗୁଡ଼ିକୁ ଲୁଚାଇ ରଖି ହଠାତ୍ ଆକ୍ରମଣ କରିବାର କ୍ଷମତା ରଖିଛି। ତାଇୱାନ ଜଳଦଳମଧ୍ୟରେ ଯଦି କୌଣସି ଯୁଦ୍ଧ ପରିସ୍ଥିତି ଉପୁଜେ, ତେବେ ଏହି କମ୍ ଦୂରତାର ମିସାଇଲ୍ ଗୁଡ଼ିକ ସବୁଠାରୁ ଆଗରେ ବ୍ୟବହାର ହେବ ବୋଲି ପ୍ରତିରକ୍ଷା ବିଶେଷଜ୍ଞମାନେ ମତ ଦେଇଛନ୍ତି।
ବର୍ତ୍ତମାନ ମଧ୍ୟମ ଏବଂ ଅଧିକ ଦୂରତାର ମିସାଇଲ୍, ଯାହା ସିଧାସଳଖ ଆମେରିକାକୁ ଟାର୍ଗେଟ୍ କରୁଛି। ଚୀନର DF-26 ଭଳି ମିସାଇଲ୍ ଗୁଡ଼ିକ ମଧ୍ୟମ ଏବଂ ଇଣ୍ଟରମିଡିଏଟ୍ ରେଞ୍ଜର ଅଟେ, ଯାହା ପ୍ରଶାନ୍ତ ମହାସାଗରରେ ଥିବା ଆମେରିକାର ରଣନୈତିକ ଦ୍ୱୀପ ‘ଗୁଆମ୍’କୁ ସହଜରେ ଧ୍ୱଂସ କରିବାର କ୍ଷମତା ରଖିଛି। ଏହାକୁ ‘ଗୁଆମ୍ କ୍ଲିବର’ ବୋଲି ମଧ୍ୟ କୁହାଯାଏ। କେବଳ ସେତିକି ନୁହେଁ, ବେଜିଂ ଏବେ ଆହୁରି ଅଧିକ ଶକ୍ତିଶାଳୀ DF-27 ମିସାଇଲ୍ ଉପରେ କାମ କରୁଛି, ଯାହାର ରେଞ୍ଜ ୫,୦୦୦ ରୁ ୮,୦୦୦ କିଲୋମିଟର ପର୍ଯ୍ୟନ୍ତ ହୋଇପାରେ ବୋଲି ପେଣ୍ଟାଗନ୍ ଆକଳନ କରିଛି। ଏହା ଯଦି କାର୍ଯ୍ୟକ୍ଷମ ହୁଏ, ତେବେ ଏହା ଆମେରିକାର ଆଲାସ୍କା ଏବଂ ଅଷ୍ଟ୍ରେଲିଆର କିଛି ଅଞ୍ଚଳକୁ ମଧ୍ୟ ନିଜ ପରିସରଭୁକ୍ତ କରିବ।
ଏହା ବ୍ୟତୀତ, ଆଉ ଏକ ଚିନ୍ତାଜନକ ବିଷୟ ହେଲା JL-1 ମିସାଇଲ୍, ଯାହାକୁ ଆକାଶରୁ ଲଞ୍ଚ କରାଯାଇପାରିବ। ଚୀନର ‘PLAAF’ ବା ବାୟୁସେନାର ଆଧୁନିକୀକରଣ ହୋଇଥିବା H-6N ବୋମାବର୍ଷା ବିମାନ ମାଧ୍ୟମରେ ଏହି ବଡ଼ ବଡ଼ କ୍ଷେପଣାସ୍ତ୍ରଗୁଡ଼ିକୁ ଆକାଶରୁ ହିଁ ଶତ୍ରୁପକ୍ଷ ଉପରକୁ ଛାଡ଼ିହେବ। ଏହା ଚୀନର ‘ନ୍ୟୁକ୍ଲିୟର ଟ୍ରାଏଡ୍’ ଅର୍ଥାତ୍ ଜଳ, ସ୍ଥଳ ଏବଂ ଆକାଶ – ତିନିୋଟି ଯାକ କ୍ଷେତ୍ରରୁ ପରମାଣୁ ଆକ୍ରମଣ କରିବାର କ୍ଷମତାକୁ ଦ୍ୱିଗୁଣିତ କରିଦେଇଛି।
ତେବେ ପ୍ରଶ୍ନ ହେଉଛି, ଚୀନର ଏହି ଅତ୍ୟାଧୁନିକ ମିସାଇଲ୍ ପ୍ରଦର୍ଶନ ଏବଂ ଏହାର ଗୁପ୍ତ ପ୍ରସ୍ତୁତି ପଛର ଉଦ୍ଦେଶ୍ୟ କ’ଣ?
ବିଶେଷଜ୍ଞମାନଙ୍କ ମତରେ, ଆମେରିକା ଏବଂ ଏହାର ସହଯୋଗୀ ଦେଶଗୁଡ଼ିକ ଯେତେବେଳେ ପ୍ରଶାନ୍ତ ମହାସାଗରରେ ମିଳିତ ସାମରିକ ଅଭ୍ୟାସ କରୁଛନ୍ତି, ଠିକ୍ ସେହି ସମୟରେ ଚୀନ୍ ଏହି ମିସାଇଲ୍ ଗୁଡ଼ିକର ଭିଡିଓ ଏବଂ କ୍ଷମତା ପ୍ରଦର୍ଶନ କରି ଏକ କଡ଼ା ଚେତାବନୀ ଦେଉଛି। ଚୀନ୍ ଏହା ଜଣାଇବାକୁ ଚାହୁଁଛି ଯେ ଯଦି ଭବିଷ୍ୟତରେ ତାଇୱାନକୁ ନେଇ କୌଣସି ଯୁଦ୍ଧ ହୁଏ, ତେବେ ଆମେରିକାର ସାମରିକ ଶକ୍ତିକୁ ମଧ୍ୟ ସେମାନେ ମାଟିରେ ମିଶାଇ ଦେଇପାରିବେ।
ଏସିଆ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ଯେକୌଣସି ମୁହୂର୍ତ୍ତରେ ଏକ ବଡ଼ଧରଣର ସାମରିକ ଉତ୍ତେଜନା ସୃଷ୍ଟି ହୋଇପାରେ। ଭାରତ ପାଇଁ ମଧ୍ୟ ଏହି ପରିସ୍ଥିତି ଉପରେ ତୀକ୍ଷ୍ଣ ନଜର ରଖିବା ଅତ୍ୟନ୍ତ ଜରୁରୀ, କାରଣ ଉତ୍ତର ଏବଂ ପୂର୍ବ ସୀମାରେ ଚୀନର ଏହି ବାଲାଷ୍ଟିକ୍ କ୍ଷମତା ଏକ ବଡ଼ ବିପଦ ସୃଷ୍ଟି କରିପାରେ।
AlsoRead; https://purvapaksa.com/i-will-resign-as-prime-minister-tomorrow-morning/
କାଲି ସକାଳେ ମୁଁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବି! || I will resign as Prime Minister tomorrow morning!
