ଅଯୋଧ୍ୟା ରାମ ମନ୍ଦିର ନିର୍ମାଣ ପାଇଁ ସଂଗୃହିତ ଦାନ ବା ପାଣ୍ଠିରେ ହେରଫେର ହୋଇଥିବା ଅଭିଯୋଗର ସିବିଆଇ (CBI) ତଦନ୍ତ ଦାବି ସମ୍ପର୍କିତ ଏକ ଆବେଦନ ଉପରେ ଜରୁରୀ ଶୁଣାଣି କରିବାକୁ ସୁପ୍ରିମକୋର୍ଟ ସଫା ସଫା ମନା କରିଦେଇଛନ୍ତି। ମାମଲାର ତ୍ୱରିତ ଶୁଣାଣି ପାଇଁ ହୋଇଥିବା ଅନୁରୋଧକୁ ଖାରଜ କରି ସର୍ବୋଚ୍ଚ ଅଦାଲତ ଏକ ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି। କୋର୍ଟ କହିଛନ୍ତି ଯେ, ଏହି ମାମଲାରେ ଏମିତି କୌଣସି ଜରୁରୀ ପରିସ୍ଥିତି ସୃଷ୍ଟି ହୋଇନାହିଁ, ଯେଉଁଥିପାଇଁ ନିୟମିତ ପ୍ରକ୍ରିୟା ବାହାରକୁ ଯାଇ ତୁରନ୍ତ ଶୁଣାଣି କରିବାକୁ ପଡ଼ିବ। ଏହି ଆବେଦନ ଉପରେ ଯଦି ନିର୍ଦ୍ଧାରିତ ସମୟରେ ଶୁଣାଣି ହୁଏ, ତେବେ “ଆକାଶ ଛିଣ୍ଡି ପଡ଼ିବ ନାହିଁ”।
/odishatv/media/media_files/2025/11/25/ayodhya-ram-mandir-2025-11-25-08-36-28.jpeg)
ନିୟମିତ ପ୍ରକ୍ରିୟାରେ ହିଁ ହେବ ଶୁଣାଣି
ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ସାମ୍ନାରେ ଆବେଦନକାରୀଙ୍କ ଓକିଲ ଏହି ପ୍ରସଙ୍ଗକୁ ଉଠାଇ କହିଥିଲେ ଯେ, ଶ୍ରଦ୍ଧାଳୁଙ୍କ ଆବେଗ ଏବଂ କୋଟି କୋଟି ଟଙ୍କାର ଜନସାଧାରଣଙ୍କ ଅର୍ଥ ଏହି ଦାନ ସହ ଜଡ଼ିତ ଥିବାରୁ ଏହାର ସିବିଆଇ ଯାଞ୍ଚ ପାଇଁ ଦାୟର ମାମଲାର ତୁରନ୍ତ ଶୁଣାଣି କରାଯାଉ। କିନ୍ତୁ ଅଦାଲତ ଏହି ଯୁକ୍ତିକୁ ଗ୍ରହଣ ନକରି ସ୍ପଷ୍ଟ କରିଛନ୍ତି ଯେ, କୋର୍ଟରେ ପୂର୍ବରୁ ଅନେକ ଗୁରୁତ୍ୱପୂର୍ଣ୍ଣ ମାମଲା ବିଚାରଧୀନ ରହିଛି। ତେଣୁ ଏହି ସ୍ପେଶାଲ ଲିଭ୍ ପିଟିସନ୍ କୁ ଜରୁରୀ ମାମଲା ଭାବେ ତାଲିକାଭୁକ୍ତ କରାଯାଇପାରିବ ନାହିଁ ଏବଂ ଏହା ନିଜ କ୍ରମ ଅନୁସାରେ ହିଁ ଶୁଣାଣି ପାଇଁ ଆସିବ।
ଟ୍ରଷ୍ଟ ବିରୋଧରେ ଆସିଥିଲା ଅଭିଯୋଗ
ସୂଚନାଯୋଗ୍ୟ ଯେ, ଶ୍ରୀ ରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ପକ୍ଷରୁ ମନ୍ଦିର ନିର୍ମାଣ ପାଇଁ ସାରା ଦେଶରୁ ସଂଗ୍ରହ କରାଯାଇଥିବା ଅର୍ଥ ଏବଂ ଜମି କିଣାବିକାରେ ବ୍ୟାପକ ଅନିୟମିତତା ହୋଇଥିବା ଦର୍ଶାଇ କୋର୍ଟଙ୍କ ଦ୍ୱାରସ୍ଥ ହୋଇଥିଲେ ଆବେଦନକାରୀ। ପୂର୍ବରୁ ହାଇକୋର୍ଟ ଏହି ଆବେଦନକୁ ଖାରଜ କରିଦେଇଥିବାରୁ, ଏହାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଆପିଲ୍ କରାଯାଇଥିଲା। ତେବେ ସର୍ବୋଚ୍ଚ ଅଦାଲତ ଜରୁରୀ ଶୁଣାଣିକୁ ମନା କରିଦେଇଥିବାରୁ ଆବେଦନକାରୀଙ୍କୁ ବର୍ତ୍ତମାନ କୋର୍ଟଙ୍କ ପରବର୍ତ୍ତୀ ନିୟମିତ କାର୍ଯ୍ୟସୂଚୀ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ।
