ଏପରି ଏକ ବିଷୟ, ଯାହା ଆଗାମୀ ଦିନରେ ଦେଶର ରାଜନୈତିକ ସମୀକରଣକୁ ସମ୍ପୂର୍ଣ୍ଣ ବଦଳାଇ ଦେଇପାରେ। ଆମେ କଥା ହେଉଛେ ରାଜନୈତିକ ଦୃଷ୍ଟିରୁ ସବୁଠାରୁ ସମ୍ବେଦନଶୀଳ ରାଜ୍ୟ ଉତ୍ତରପ୍ରଦେଶ ବିଷୟରେ। ଉତ୍ତରପ୍ରଦେଶ ନିର୍ବାଚନ ପାଖେଇ ଆସୁଥିବାବେଳେ ସେଠାରେ ସବୁଠାରୁ ବଡ଼ ଚର୍ଚ୍ଚାର ବିଷୟ ପାଲଟିଛି—ମୁସଲିମ୍ ଭୋଟ୍ ବ୍ୟାଙ୍କ କାହା ଆଡ଼କୁ ଯିବ?
କଂଗ୍ରେସ, ସମାଜବାଦୀ ପାର୍ଟି, ମାୟାବତୀଙ୍କ ବିଏସପି ଏବଂ ଅସୁଦ୍ଧିନ୍ ଓୱେଇସୀ—ସମସ୍ତେ ଏହି ଭୋଟ୍ ନିଜ ଆଡ଼କୁ ଟାଣିବା ପାଇଁ ଏବେଠାରୁ ରଣନୀତି ପ୍ରସ୍ତୁତ କରିସାରିଲେଣି। କିନ୍ତୁ ପ୍ରଶ୍ନ ଏହା ଯେ, ଏହି ମୁସଲିମ୍ ଭୋଟ୍ ପାଇଁ ବିରୋଧୀ ଦଳଗୁଡ଼ିକ ଭିତରେ କାହିଁକି ଆଜି ମହାସଂଗ୍ରାମ ଆରମ୍ଭ ହୋଇଯାଇଛି? ଆସନ୍ତୁ, ଏହି ଗମ୍ଭୀର ପ୍ରସଙ୍ଗ ଉପରେ ବିସ୍ତୃତ ଭାବରେ ଆଲୋଚନା କରିବା।
ଇମ୍ରାନ ମସୁଦ ଓ ଇକ୍ରା ହସନଙ୍କ ମଧ୍ୟରେ ବୟାନବାଜି
ଉତ୍ତରପ୍ରଦେଶରେ ଏବେ ସବୁଠାରୁ ବଡ଼ ରାଜନୈତିକ ବିବାଦ ଦେଖିବାକୁ ମିଳିଛି କଂଗ୍ରେସ ଏବଂ ସମାଜବାଦୀ ପାର୍ଟି (ଏସପି) ମଧ୍ୟରେ। ପଶ୍ଚିମ ଉତ୍ତରପ୍ରଦେଶର ସାହରନପୁରରୁ କଂଗ୍ରେସ ସାଂସଦ ଇମ୍ରାନ ମସୁଦ ଏକ ବଡ଼ ଏବଂ ସ୍ପଷ୍ଟ ବୟାନ ଦେଇଛନ୍ତି। ସେ କହିଛନ୍ତି ଯେ, କେବଳ ମୁସଲିମ୍ ଭୋଟ୍ ବଳରେ କେହି ଜିତିପାରିବେ ନାହିଁ ଏବଂ ରାହୁଲ ଗାନ୍ଧୀଙ୍କ ବିନା ବିଜେପିକୁ ହରାଇବା ଅସମ୍ଭବ। ସେ ଏହା ମଧ୍ୟ ଚେତାବନୀ ଦେଇଛନ୍ତି ଯେ ଅଖିଳେଶ ଯାଦବ ଏକାକୀ କିଛି କରିପାରିବେ ନାହିଁ, ଯଦି ମେଣ୍ଟ କରିବାର ଅଛି ତେବେ ଶୀଘ୍ର କରନ୍ତୁ, ନଚେତ୍ ପରେ ହାତ ମଳିବାକୁ ପଡ଼ିବ।
ଏହି ବୟାନ ପରେ ସମାଜବାଦୀ ପାର୍ଟିର ଯୁବ ସାଂସଦ ଇକ୍ରା ହସନ ଏହାର କଡ଼ା ଜବାବ ଦେଇଛନ୍ତି। ସେ ଇମ୍ରାନ ମସୁଦଙ୍କ ଏହି ମନ୍ତବ୍ୟକୁ ‘ବେକାରୀ ଭରା ବୟାନ’ ବୋଲି କହିବା ସହ ସ୍ପଷ୍ଟ କରିଛନ୍ତି ଯେ, ଯଦି କେହି ବିଜେପିକୁ ହରାଇବାର କ୍ଷମତା ରଖିଛନ୍ତି, ସେ ହେଉଛନ୍ତି କେବଳ ଅଖିଳେଶ ଯାଦବ ଏବଂ ସମାଜବାଦୀ ପାର୍ଟି। କଂଗ୍ରେସ ଏକାକୀ କିଛି କରିପାରିବ ନାହିଁ।
ଏଠାରେ ଆଶ୍ଚର୍ଯ୍ୟର କଥା ହେଉଛି, ଇକ୍ରା ହସନ ଏବଂ ଇମ୍ରାନ ମସୁଦ—ଉଭୟ ପଶ୍ଚିମ ଉତ୍ତରପ୍ରଦେଶର କୈରାନା ଏବଂ ସାହାରନପୁର ଅଞ୍ଚଳରୁ ଆସୁଛନ୍ତି ଏବଂ ଉଭୟଙ୍କ ପରିବାରର ଦଶନ୍ଧି ଧରି ରାଜନୈତିକ ପ୍ରତିଦ୍ୱନ୍ଦ୍ୱିତା ରହିଆସିଛି। ତେଣୁ ଏହି ବାକ୍ଯୁଦ୍ଧ କେବଳ ବ୍ୟକ୍ତିଗତ ନୁହେଁ, ବରଂ ଭୋଟର ଭିତରେ ନିଜର ପ୍ରଭାବ ଜାହିର କରିବାର ଏକ ବଡ଼ ଲଢ଼େଇ।
ମାୟାବତୀଙ୍କ ଏଣ୍ଟ୍ରି ଏବଂ ଓୱେଇସୀଙ୍କ ରଣନୀତି
ଏହା ଭିତରେ ବହୁଜନ ସମାଜ ପାର୍ଟିର ସୁପ୍ରିମୋ ମାୟାବତୀ ମଧ୍ୟ ନିଜର ଫାସ ଫୋପାଡ଼ି ଦେଇଛନ୍ତି। ସେ କହିଛନ୍ତି ଯେ ଅଖିଳେଶ ଯାଦବଙ୍କ ଉପରୁ ମୁସଲିମ୍ ସମାଜର ଭରସା ତୁଟିଯାଇଛି, କାରଣ ଏସପି ବିଜେପିକୁ ହରାଇବାରେ ସଫଳ ହେଉନାହିଁ। ଏପରି ପରିସ୍ଥିତିରେ ମୁସଲିମ୍ ଭୋଟ୍ ନିଜ ଆଡ଼କୁ ଆଣିବା ପାଇଁ ମାୟାବତୀ ମଧ୍ୟ ନିଜର ପ୍ରୟାସ ଜୋରଦାର କରିଛନ୍ତି।
ଆଉ ଜଣେ ପ୍ରମୁଖ ଚେତରା ହେଉଛନ୍ତି ଏଆଇଏମଆଇଏମର ଅସୁଦ୍ଧିନ ଓୱେଇସୀ। ଓୱେଇସୀ ସବୁବେଳେ ଗୋଟିଏ କଥା କହିଆସୁଛନ୍ତି—”ମୁସଲମାନମାନେ ଅନ୍ୟ ପଛରେ ଦରି ବିଛାଇବା ବନ୍ଦ କରନ୍ତୁ ଏବଂ ନିଜର ନେତା ନିଜେ ତିଆରି କରନ୍ତୁ।” ବିହାରରେ ଭଲ ପ୍ରଦର୍ଶନ କରିବା ପରେ, ଓୱେଇସୀ ଏବେ ଉତ୍ତରପ୍ରଦେଶରେ ମଧ୍ୟ ସେହି ସମାନ ଫର୍ମୁଲା ଆପଣାଇବାକୁ ଚାହୁଁଛନ୍ତି। ସେ ଅକ୍ଟୋବର ୨ ପର୍ଯ୍ୟନ୍ତ ଏକ ଡେଡଲାଇନ୍ ମଧ୍ୟ ଦେଇଛନ୍ତି ଏବଂ ସ୍ପଷ୍ଟ କରିଛନ୍ତି ଯେ ଯଦି ଅନ୍ୟ ଦଳଗୁଡ଼ିକ ମେଣ୍ଟ ପାଇଁ ରାଜି ନ ହୁଅନ୍ତି, ତେବେ ସେ ନିଜସ୍ୱ ସ୍ତରରେ ପ୍ରାର୍ଥୀ ଦେବେ।
କିନ୍ତୁ ସବୁଠାରୁ ବଡ଼ ପ୍ରଶ୍ନ ହେଉଛି—କ’ଣ ମୁସଲମାନମାନେ ଏବେ ମଧ୍ୟ ସମାଜବାଦୀ ପାର୍ଟିକୁ ନିଜର ପ୍ରଥମ ପସନ୍ଦ ଭାବରେ ଦେଖୁଛନ୍ତି? ସର୍ଭେ ତଥ୍ୟ କହୁଛି ଯେ ୨୦୨୨ ବିଧାନସଭା ନିର୍ବାଚନରେ ପ୍ରାୟ ୭୯% ରୁ ୮୩% ପର୍ଯ୍ୟନ୍ତ ମୁସଲିମ୍ ଭୋଟ୍ ସମାଜବାଦୀ ପାର୍ଟି ମେଣ୍ଟକୁ ଯାଇଥିଲା। ଏହାର ଅର୍ଥ ହେଉଛି, ଯେତେ ବି ଦଳ ଦାବି କରନ୍ତୁ ନା କାହିଁକି, ମୁସଲିମ ଜନସାଧାରଣଙ୍କ ମନରେ ସମାଜବାଦୀ ପାର୍ଟି ପ୍ରତି ଏକ ଗଭୀର ବିଶ୍ୱାସ ରହିଛି।
ବିଜେପିର ସ୍ଥିତି ଏବଂ ସଂଗଠନ ଭିତରେ ଅସନ୍ତୋଷ
ଏସବୁ ଭିତରେ, ଶାସକ ଦଳ ବିଜେପିର ସ୍ଥିତି କିପରି ଅଛି? ବିଜେପିର ଆଭ୍ୟନ୍ତରୀଣ ସ୍ଥିତିକୁ ଦେଖିଲେ ଜଣାପଡ଼େ ଯେ ଦଳ ଭିତରେ ମଧ୍ୟ କିଛି ଚ୍ୟାଲେଞ୍ଜ ରହିଛି। ବିଶେଷକରି କର୍ମକର୍ତ୍ତା ଏବଂ ବିଧାୟକମାନଙ୍କ ମଧ୍ୟରେ ଅମଲାତନ୍ତ୍ରକୁ ନେଇ କିଛି ମାତ୍ରାରେ ଅସନ୍ତୋଷ ଦେଖିବାକୁ ମିଳୁଛି।
ଲୋକମାନେ ନିଜର ଛୋଟ-ମୋଟ କାମ ପାଇଁ ଯେତେବେଳେ ପ୍ରଶାସନିକ ସ୍ତରରେ ଅସୁବିଧାର ସମ୍ମୁଖୀନ ହୁଅନ୍ତି, ସେତେବେଳେ ସ୍ଥାନୀୟ ନେତାମାନଙ୍କ ଉପରେ ଏହାର ପ୍ରଭାବ ପଡ଼ିଥାଏ।
ତଥାପି, ବିଜେପିର ବରିଷ୍ଠ ନେତୃତ୍ୱ ଏହି ସବୁ ସମସ୍ୟାକୁ ବୁଝି ସାରିଛନ୍ତି। ଦଳର ଜାତୀୟ ଅଧ୍ୟକ୍ଷ ଜେ.ପି. ନଡ଼ା ଏବଂ ଅନ୍ୟ ବରିଷ୍ଠ ନେତାମାନେ ନିରନ୍ତର ବିଧାୟକ ଏବଂ ସଙ୍ଗଠନର କର୍ମକର୍ତ୍ତାଙ୍କ ସହ ବୈଠକ କରି ସେମାନଙ୍କ ଅସନ୍ତୋଷ ଦୂର କରିବାକୁ ଚେଷ୍ଟା କରୁଛନ୍ତି। ପାର୍ଟିର ରଣନୀତିକାରମାନେ ଭଲ ଭାବରେ ଜାଣନ୍ତି ଯେ ଯଦି ନିର୍ବାଚନ ସମୟରେ ଜାତି ଏବଂ ଆଇନ ଶୃଙ୍ଖଳାକୁ ଠିକ୍ ଭାବରେ ପରିଚାଳନା କରାଯାଇପାରେ, ତେବେ ବିରୋଧୀଙ୍କ ସମସ୍ତ ମେଣ୍ଟ ସମୀକରଣ ଧୂଳିସାତ୍ ହୋଇଯିବ।
ତେବେ, ସାମଗ୍ରିକ ଭାବରେ ଦେଖିବାକୁ ଗଲେ, ଉତ୍ତରପ୍ରଦେଶର ରାଜନୀତି ଏବଂ ମୁସଲିମ୍ ଭୋଟ୍ ବ୍ୟାଙ୍କ୍ କୌଣସି ଗୋଟିଏ ଦଳର ପକେଟରେ ନାହିଁ। କଂଗ୍ରେସ ନିଜର ଅସ୍ତିତ୍ୱ ଫେରି ପାଇବାକୁ ଚାହୁଁଛି, ସମାଜବାଦୀ ପାର୍ଟି ନିଜର ଭୋଟ୍ ବ୍ୟାଙ୍କ ବଜାୟ ରଖିବାକୁ ଚେଷ୍ଟା କରୁଛି, ଏବଂ ଓୱେଇସୀ ଓ ମାୟାବତୀ ଏହି ଭୋଟ୍ରେ ଭାଗ ବଣ୍ଟନ କରିବାକୁ ପୂରା ପ୍ରସ୍ତୁତ ଅଛନ୍ତି।
