ଓଡ଼ିଶା ରାଜନୀତିରେ ପୁଣି ଥରେ ଚର୍ଚ୍ଚାର କେନ୍ଦ୍ରବିନ୍ଦୁକୁ ଆସିଛନ୍ତି ପୂର୍ବତନ ଆଇଏଏସ୍ ଅଧିକାରୀ ସୁଜାତା କାର୍ତ୍ତିକେୟନ। ଚର୍ଚ୍ଚା ହେଉଛି ଯେ, ସେ ଆସନ୍ତାକାଲି ବିଜୁ ଜନତା ଦଳରେ ଔପଚାରିକ ଭାବେ ଯୋଗ ଦେଇପାରନ୍ତି। ଯଦି ଏହା ସତ ହୁଏ, ତେବେ କେବଳ ଗୋଟିଏ ନେତ୍ରୀଙ୍କ ଦଳରେ ପ୍ରବେଶ ନୁହେଁ, ବରଂ ବିଜେଡିର ଆଗାମୀ ରାଜନୀତିକ ଦିଗକୁ ନେଇ ବଡ଼ ଚର୍ଚ୍ଚାର ଦ୍ୱାର ଖୋଲିଦେବ।
ଆଜି ନବୀନ ନିବାସରେ ହୋଇଥିବା ଏକ ଗୁରୁତ୍ୱପୂର୍ଣ୍ଣ ବୈଠକ ପରେ ଏହି ଚର୍ଚ୍ଚା ଆହୁରି ଜୋର ଧରିଛି। ଦଳର କିଛି ବରିଷ୍ଠ ନେତାଙ୍କୁ ନେଇ ହୋଇଥିବା ଏହି ବୈଠକ ପରେ ରାଜନୈତିକ ମହଲରେ କୁହାଯାଉଛି ଯେ, ଶଙ୍ଖ ଭବନରେ ଆସନ୍ତାକାଲି ହେବାକୁ ଥିବା ବଡ଼ ବୈଠକରେ ସୁଜାତାଙ୍କ ଏଣ୍ଟ୍ରି ନେଇ ଔପଚାରିକ ଘୋଷଣା ହୋଇପାରେ।
ବିଶେଷ କଥା ହେଉଛି, ଦଳର ସମସ୍ତ ବିଧାୟକ, ନେତା ଏବଂ ପଦାଧିକାରୀଙ୍କୁ ଏହି ବୈଠକରେ ଉପସ୍ଥିତ ରହିବାକୁ କୁହାଯାଇଛି। ରାଜନୈତିକ ପର୍ଯ୍ୟବେକ୍ଷକମାନେ ଏହାକୁ ସାଧାରଣ ସାଂଗଠନିକ ବୈଠକ ଭାବେ ଦେଖୁନାହାନ୍ତି। କାରଣ, ନିର୍ବାଚନ ପରାଜୟ ପରେ ବିଜେଡି ଭିତରେ ନେତୃତ୍ୱ ଓ ସଂଗଠନକୁ ନେଇ ଯେଉଁ ପ୍ରଶ୍ନ ଉଠୁଥିଲା, ସେହି ସମୟରେ ଏପରି ଏକ ବୈଠକ ନୂଆ ସଙ୍କେତ ଦେଉଛି।
ସୁଜାତା କାର୍ତ୍ତିକେୟନ କୌଣସି ସାଧାରଣ ନାମ ନୁହଁନ୍ତି। ସେ ଜଣେ ଦକ୍ଷ ଅଧିକାରୀ ଭାବେ ନିଜର ପରିଚୟ ସୃଷ୍ଟି କରିଥିଲେ। ମିଶନ ଶକ୍ତି ଠାରୁ ଆରମ୍ଭ କରି ବିଭିନ୍ନ ପ୍ରଶାସନିକ କାର୍ଯ୍ୟକ୍ରମରେ ତାଙ୍କର ସକ୍ରିୟ ଭୂମିକା ରହିଥିଲା। କିନ୍ତୁ ତାଙ୍କର ରାଜନୈତିକ ପରିଚୟ ଅଧିକ ଚର୍ଚ୍ଚିତ ହୁଏ କାରଣ ସେ ହେଉଛନ୍ତି ବିଜେଡିର ପୂର୍ବତନ ପ୍ରଭାବଶାଳୀ ନେତା ଭି.କେ. ପାଣ୍ଡିଆନଙ୍କ ପତ୍ନୀ।
୨୦୨୪ ନିର୍ବାଚନ ପରେ ପାଣ୍ଡିଆନ ରାଜନୀତିରୁ ଦୂରେଇ ଯାଇଥିବା ଘୋଷଣା କରିଥିଲେ। ତାଙ୍କର ସକ୍ରିୟ ରାଜନୈତିକ ଭୂମିକା ହଠାତ୍ ଶେଷ ହୋଇଯାଇଥିବା ପରି ଲାଗିଥିଲା। କିନ୍ତୁ ଏବେ ସୁଜାତାଙ୍କ ସମ୍ଭାବ୍ୟ ଏଣ୍ଟ୍ରିକୁ ନେଇ ବିରୋଧୀ ଏବଂ ବିଜେଡିର ଏକ ବର୍ଗ ମଧ୍ୟରେ ପ୍ରଶ୍ନ ଉଠୁଛି—ଏହା କେବଳ ସୁଜାତାଙ୍କ ରାଜନୀତିକ ଯାତ୍ରାର ଆରମ୍ଭ ନା ପାଣ୍ଡିଆନଙ୍କ ପରୋକ୍ଷ ଫେରିବାର ଏକ ନୂଆ ରଣନୀତି?
ଏହି ଚର୍ଚ୍ଚା ମଧ୍ୟରେ ବିଜେଡିର ପୂର୍ବତନ ନେତ୍ରୀ ଶ୍ରୀମୟୀ ମିଶ୍ରଙ୍କ ପ୍ରତିକ୍ରିୟା ରାଜନୈତିକ ମହଲକୁ ଆହୁରି ଉତ୍ତପ୍ତ କରିଛି। ସେ ସୋସିଆଲ ମିଡିଆରେ ଏକ କଠୋର ବାର୍ତ୍ତା ଦେଇ ଅଭିଯୋଗ କରିଛନ୍ତି ଯେ, ଏହା ଦଳକୁ ସମ୍ପୂର୍ଣ୍ଣ ଦଖଲକୁ ନେବା ପାଇଁ ଏକ ଯୋଜନାବଦ୍ଧ ପଦକ୍ଷେପ।
ଶ୍ରୀମୟୀଙ୍କ ଅଭିଯୋଗ ଅନୁଯାୟୀ, ପ୍ରଥମେ ଦିଲ୍ଲୀର ସମ୍ପତ୍ତି ଏବଂ ଟ୍ରଷ୍ଟ ଉପରେ ପ୍ରଭାବ ବଢ଼ାଯାଇଛି, ଏବେ ନଜର ରହିଛି ନବୀନ ନିବାସ ଓ ଦଳର ସାଂଗଠନିକ ଢାଞ୍ଚା ଉପରେ। ତାଙ୍କ କହିବା କଥା, ସୁଜାତାଙ୍କୁ ଦଳରେ ଆଣିବା ମାଧ୍ୟମରେ ଆଗାମୀ ଦିନରେ ବିଜେଡିର ସମ୍ପୂର୍ଣ୍ଣ ନେତୃତ୍ୱ ଏକ ନିର୍ଦ୍ଦିଷ୍ଟ ଗୋଷ୍ଠୀ ହାତକୁ ଯାଇପାରେ।
ଯଦିଓ ଏହି ଅଭିଯୋଗଗୁଡ଼ିକର କୌଣସି ସରକାରୀ ପ୍ରମାଣ ଏପର୍ଯ୍ୟନ୍ତ ସାମ୍ନାକୁ ଆସିନାହିଁ, ତଥାପି ଏହା ଦଳ ଭିତରେ ଥିବା ଅସନ୍ତୋଷ ଓ ସନ୍ଦେହକୁ ସ୍ପଷ୍ଟ କରୁଛି।
ଅନ୍ୟପକ୍ଷରେ, ବିଜେଡିର ଅନେକ କର୍ମୀ ଓ ସମର୍ଥକ ଏହାକୁ ସକାରାତ୍ମକ ଦୃଷ୍ଟିରେ ଦେଖୁଛନ୍ତି। ସେମାନଙ୍କ ମତରେ, ଦଳ ବର୍ତ୍ତମାନ ଏକ କଠିନ ପର୍ଯ୍ୟାୟ ଦେଇ ଗତି କରୁଛି। ଏପରି ସମୟରେ ପ୍ରଶାସନିକ ଅଭିଜ୍ଞତା ଥିବା ଜଣେ ବ୍ୟକ୍ତିଙ୍କ ଯୋଗଦାନ ସଂଗଠନକୁ ଶକ୍ତିଶାଳୀ କରିପାରେ।
ଏଠାରେ ସବୁଠାରୁ ବଡ଼ ପ୍ରଶ୍ନ ହେଉଛି, ଯଦି ସୁଜାତା ବିଜେଡିରେ ଯୋଗ ଦିଅନ୍ତି, ତେବେ ତାଙ୍କୁ କେବଳ ସାଧାରଣ ସଦସ୍ୟ ଭାବେ ରଖାଯିବ ନା ତାଙ୍କୁ ସିଧାସଳଖ କୌଣସି ବଡ଼ ସାଂଗଠନିକ ଦାୟିତ୍ୱ ଦିଆଯିବ?
ରାଜନୈତିକ ମହଲରେ ଏହି ଚର୍ଚ୍ଚା ମଧ୍ୟ ଜୋର ଧରିଛି ଯେ, ସେ ସାଧାରଣ ସମ୍ପାଦିକା କିମ୍ବା ଦଳର ଅନ୍ୟ କୌଣସି ମୁଖ୍ୟ ପଦରେ ଅବସ୍ଥାପିତ ହୋଇପାରନ୍ତି। ଯଦି ଏପରି ହୁଏ, ତେବେ ଏହା ବିଜେଡିର ଆଗାମୀ ଉତ୍ତରାଧିକାର ରାଜନୀତିକୁ ନେଇ ଚର୍ଚ୍ଚାକୁ ଆହୁରି ତୀବ୍ର କରିଦେବ।
ନବୀନ ପଟ୍ଟନାୟକଙ୍କ ପରେ ବିଜେଡିର ଭବିଷ୍ୟତ କିଏ ନିର୍ଦ୍ଧାରଣ କରିବ? ଦଳର ପରବର୍ତ୍ତୀ ପିଢ଼ିର ନେତୃତ୍ୱ କାହା ହାତକୁ ଯିବ? ଏହି ପ୍ରଶ୍ନର ଉତ୍ତର ଗତ କିଛି ବର୍ଷ ଧରି ଅସ୍ପଷ୍ଟ ରହିଛି। ସୁଜାତାଙ୍କ ଏଣ୍ଟ୍ରି ସେହି ଶୂନ୍ୟସ୍ଥାନକୁ ପୂରଣ କରିବାର ଏକ ଚେଷ୍ଟା କି ନୁହେଁ, ତାହା ମଧ୍ୟ ଆଲୋଚନାର ବିଷୟ।
ତେବେ ଏହି ସମସ୍ତ ଚର୍ଚ୍ଚା ଓ ଅଟକଳର ଶେଷ ହେବ ଆସନ୍ତାକାଲି। ଶଙ୍ଖ ଭବନରେ ହେବାକୁ ଥିବା ବୈଠକରେ କଣ ଘୋଷଣା ହେବ, ସୁଜାତା କାର୍ତ୍ତିକେୟନ ସତରେ ବିଜେଡିରେ ଯୋଗ ଦେବେ କି ନାହିଁ, ଏବଂ ଯଦି ଯୋଗ ଦିଅନ୍ତି ତେବେ ତାଙ୍କୁ କେଉଁ ଦାୟିତ୍ୱ ମିଳିବ—ଏହା ଉପରେ ସମସ୍ତଙ୍କ ନଜର ରହିଛି।
ଗୋଟିଏ କଥା ନିଶ୍ଚିତ, ସୁଜାତାଙ୍କ ସମ୍ଭାବ୍ୟ ଏଣ୍ଟ୍ରି ବିଜେଡିରେ କେବଳ ଏକ ସାଧାରଣ ସଦସ୍ୟତା ଅଭିଯାନ ନୁହେଁ। ଏହା ହୋଇପାରେ ଦଳର ଭବିଷ୍ୟତ ରାଜନୀତି, ନେତୃତ୍ୱ ଏବଂ ଶକ୍ତି ସନ୍ତୁଳନକୁ ପ୍ରଭାବିତ କରିବାକୁ ଯାଉଥିବା ଏକ ବଡ଼ ଘଟଣା। ଆଉ ସେଥିପାଇଁ ଓଡ଼ିଶା ରାଜନୀତିର ନଜର ଏବେ ଶଙ୍ଖ ଭବନ ଉପରେ।
AlsoRead; https://purvapaksa.com/are-major-parties-in-tension-over-suryavanshi/
ସୂର୍ଯ୍ୟବଂଶୀଙ୍କୁ ନେଇ ଟେନସନରେ ବଡ଼ ବଡ଼ ଦଳ? || Are major parties in tension over Suryavanshi?
