୨୦୨୪ ନିର୍ବାଚନ ପରେ ଯେପରି ବିଜେଡିରେ ଅସନ୍ତୋଷ ଦେଖାଗଲା ସମସ୍ତେ ଭାବିଥିଲେ ବିଜେଡିର ଶଙ୍ଖଭବନ ବିଜେପି କବଜାକୁ ଆସିଯିବ। ବିଜେପି କ୍ଷମତାକୁ ଆସିଲା, ସରକାର ବଦଳିଲା, ମୁଖ୍ୟମନ୍ତ୍ରୀ ବଦଳିଲେ, ଶାସନ ବ୍ୟବସ୍ଥାର ରୂପରେଖ ବଦଳିବାର ପ୍ରତିଶ୍ରୁତି ଦିଆଗଲା। କିନ୍ତୁ ଆଜି ଯେଉଁ ଖବର ଭିତରର କଥା ଆମେ ଆପଣଙ୍କ ଆଗରେ ଖୋଲିବାକୁ ଯାଉଛୁ, ତାହା ଶୁଣିଲେ ଆପଣଙ୍କ ମନରେ ପ୍ରଶ୍ନ ଉଠିବ— ଶାସନ ସତରେ ବଦଳିଛି ତ? ନା କେବଳ ମୁହଁ ବଦଳିଛି ଆଉ ପଛପଟର ଚରିତ୍ର ସେଇ ପୁରୁଣା ରହିଯାଇଛନ୍ତି?
“ବିଜେପି ଅଫିସରେ ବିଜେଡି ରାଜ୍ ଚାଲିଛି କିପରି?”
ବିଜେଡି ଶାସନ ସମୟରେ ଯେଉଁ ଭୈରବ କାର୍ତ୍ତିକେୟନ ପାଣ୍ଡିଆନଙ୍କ ଦ୍ୱାରା ତିଆରି ହୋଇଥିବା ପିଆର୍ ଏଜେନ୍ସି ବା ପ୍ରଚାର ସଂସ୍ଥାଗୁଡ଼ିକ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ଭୈରବ କାର୍ତ୍ତିକେୟନ. ପାଣ୍ଡିଆନଙ୍କ ବ୍ୟକ୍ତିଗତ ବ୍ରାଣ୍ଡିଂରେ କୋଟି କୋଟି ଟଙ୍କା ଖର୍ଚ୍ଚ କରୁଥିଲେ, ଆଜି ସେହି ସମାନ ଏଜେନ୍ସି କେଉଁ ସୂତ୍ରରେ ବିଜେପି ସରକାର ଏବଂ ସଙ୍ଗଠନର ପିଆର୍ ବ୍ୟବସ୍ଥାକୁ ନିୟନ୍ତ୍ରଣ କରୁଛନ୍ତି? ଏହା କ’ଣ କେବଳ ଏକ ବ୍ୟବସାୟିକ ଚୁକ୍ତି, ନା ପୁରୁଣା ଶାସକ ଦଳକୁ ପଛ ଦୁଆରୁ ସୁହାଇବା ପାଇଁ ତିଆରି ହୋଇଛି ଏକ ବଡ଼ ରାଜନୈତିକ ଚକ୍ରବ୍ୟୂହ?
କର୍ମୀଙ୍କ ଲୁହ ଓ ନେତାଙ୍କ ଅନ୍ଧପଣ
ନିର୍ବାଚନ ପୂର୍ବ କଥା ଟିକେ ମନେ ପକାନ୍ତୁ। ଯେତେବେଳେ ବିଜେପି ବିରୋଧୀ ଦଳରେ ଥିଲା, ସେତେବେଳେ ରାତିଦିନ ଏକ କରି କାମ କରୁଥିଲେ ସାଧାରଣ କର୍ମୀ ଓ ଦଳର ତୃଣମୂଳ ଆଇଟି ସେଲ୍ର ସ୍ୱେଚ୍ଛାସେବୀମାନେ। ବିନା ସ୍ୱାର୍ଥରେ, କେବଳ ଏକ ପରିବର୍ତ୍ତନର ଆଶାରେ ସେମାନେ ରାସ୍ତାରେ ଲାଠି ଖାଇଲେ, ସୋସିଆଲ ମିଡିଆରେ ଗାଳି ଖାଇଲେ, ନିଜ ଭବିଷ୍ୟତକୁ ବାଜି ଲଗାଇ ଲଢ଼ିଲେ।
କିନ୍ତୁ ଆଜି ଯେତେବେଳେ କ୍ଷମତାର ମହୁଫେଣା ସାମ୍ନାକୁ ଆସିଲା, ସେତେବେଳେ ସେହି ନିଷ୍ଠାପର କର୍ମୀ କୁଆଡ଼େ ଗଲେ? ସେମାନେ ଆଜି ଅନ୍ଧାର କୋଣରେ ବସି ନିଜ ଭାଗ୍ୟକୁ ନିନ୍ଦୁଛନ୍ତି। ଆଉ ଯେଉଁମାନେ ନିର୍ବାଚନ ବେଳେ ବିଜେପିକୁ ଧୂଳିସାତ୍ କରିବା ପାଇଁ ବିଜେଡି ଏବଂ ତୃତୀୟ ମହଲାରୁ କୋଟି କୋଟି ଟଙ୍କାର ପ୍ରୋଜେକ୍ଟ ନେଇ ସ୍କ୍ରିପ୍ଟ ଲେଖୁଥିଲେ, ବିଜେଡିର ସେହି ପିଆର୍ ସଂସ୍ଥାମାନେ ଆଜି କ୍ଷମତାର ଶୀର୍ଷରେ ବସି ନୂଆ ସରକାରର ପ୍ରଚାର ଦାୟିତ୍ୱ ତୁଲାଉଛନ୍ତି।
ବିଡ଼ମ୍ବନା ଦେଖନ୍ତୁ— ଯେଉଁମାନେ ଗତକାଲି ଯାଏଁ ବିଜେପିକୁ ‘ଓଡ଼ିଶା ବିରୋଧୀ’ ବୋଲି ପ୍ରଚାର କରୁଥିଲେ, ସେମାନେ ରାତାରାତି କେମିତି ‘ବିକଶିତ ଓଡ଼ିଶା’ର ପ୍ରଚାରକ ସାଜିଗଲେ? ଆଉ ବିଜେପିର ଶୀର୍ଷ ନେତୃତ୍ୱ ଏହି ବିପଦଜନକ ଖେଳକୁ ବୁଝିପାରୁ ନାହାନ୍ତି କିପରି?
ଢିଲା ପ୍ରଚାର ଓ ବିରୋଧୀଙ୍କ ଆଗରେ ଆତ୍ମସମର୍ପଣ
ଗତ କିଛିମାସର ରାଜନୈତିକ ଘଟଣାବଳୀ ଉପରେ ଟିକେ ନଜର ପକାନ୍ତୁ। ଯେତେବେଳେ ବି ବିଜେଡି କୌଣସି ପ୍ରସଙ୍ଗରେ ସରକାରଙ୍କୁ ଘେରିବାକୁ ଚେଷ୍ଟା କରୁଛି, ସୋସିଆଲ ମିଡିଆରେ ବିଜେପିର ପ୍ରତିକ୍ରିୟା ଏତେ ନିରୁତ୍ସାହିତ କାହିଁକି? ବିରୋଧୀ ଦଳ ଯେତେବେଳେ ତଥ୍ୟହୀନ ଆକ୍ରମଣ କରୁଛି, ଶାସକ ଦଳର ଉତ୍ତର ଏତେ ଦୁର୍ବଳ କାହିଁକି ଲାଗୁଛି?
ଏହାର ମୂଳ କାରଣ ହେଉଛି ‘ସ୍ୱାର୍ଥର ସଂଘର୍ଷ’। ଯେଉଁ ପିଆର ଏଜେନ୍ସି କାଲି ପର୍ଯ୍ୟନ୍ତ ବିଜେଡି, ନବୀନ ପଟ୍ଟନାୟକ ଓ ପାଣ୍ଡିଆନଙ୍କ ଗୁଣଗାନ କରୁଥିଲା, ତା’ର ଆତ୍ମା ଏବେବି ପୁରୁଣା ମାଲିକଙ୍କ ପାଖରେ ବନ୍ଧା ପଡ଼ିଛି। ଚର୍ଚ୍ଚା ହେଉଛି, ବିଜେପି ସରକାରଙ୍କ ଯୋଜନା ଓ ସଫଳତାକୁ ଏମିତି ଢିଲା ଢାଲା ଭାବେ ଉପସ୍ଥାପନ କରାଯାଉଛି, ଯେପରି ସାଧାରଣ ଲୋକଙ୍କ ପାଖରେ ଏହା ପ୍ରଭାବହୀନ ହୋଇ ରହିଯିବ। ଯାହାଫଳରେ ମାତ୍ର ୨୬ ମାସ ଭିତରେ ସରକାର ଓ ବିଜେପିର ଛବି ମଳିନ ହେବାରେ ଲାଗିଛି।
ସବୁଠାରୁ ଲଜ୍ଜାଜନକ କଥା କ’ଣ ଜାଣନ୍ତି? ବିଜେପି କାମ ନେଇଥିବା କିଛି ତଥାକଥିତ ଏଜେନ୍ସି ପାଖରେ ନିଜସ୍ୱ ପ୍ରଡକ୍ସନ୍ ଇନଫ୍ରାଷ୍ଟ୍ରକ୍ଚର୍ ନାହିଁ। ବିଶ୍ୱସ୍ତ ସୂତ୍ରରୁ ମିଳୁଥିବା ଖବର ଅନୁଯାୟୀ, ବିଜେପି ସରକାରର ପ୍ରଚାର କଣ୍ଟେଣ୍ଟ ବିଜେଡି ଘନିଷ୍ଠ ନେତାଙ୍କ ଷ୍ଟୁଡିଓ ଓ ପ୍ରଡକ୍ସନ୍ ୟୁନିଟ୍ରେ ତିଆରି ହେଉଛି! ଏହାଠାରୁ ବଡ଼ ହାସ୍ୟାସ୍ପଦ ଓ ବିପଦଜନକ କଥା ଆଉ କ’ଣ ହୋଇପାରେ? ଯେଉଁ ଷ୍ଟୁଡିଓରୁ ବିଜେପିକୁ ହରାଇବା ପାଇଁ ରଣନୀତି ପ୍ରସ୍ତୁତ ହେଉଥିଲା, ସେଇଠି ଆଜି ବିଜେପି ସରକାରଙ୍କ ପ୍ରଚାର ସାମଗ୍ରୀ ପ୍ରସ୍ତୁତ ହେଉଛି। ଏହା ଲୋକଙ୍କ ଆଖିରେ ଧୂଳି ଦେବା ନୁହେଁ ତ ଆଉ କ’ଣ?
କରୋନା କାଳ ଓ DMF ଫଣ୍ଡର ସନ୍ଦିଗ୍ଧ ଇତିହାସ
ଟିକେ ପଛକୁ ଫେରିବା। ଏହି ଏଜେନ୍ସିମାନଙ୍କ ଅତୀତ କ’ଣ ଥିଲା?
କରୋନା ମହାମାରୀ ସମୟରେ, ଯେତେବେଳେ ସାରାରାଜ୍ୟ ଭୟ ଓ ଆତଙ୍କ ଭିତରେ ଥିଲା, ସେତେବେଳେ କିଛି ପିଆର ଏଜେନ୍ସି ଶାସକ ଦଳର ଛତ୍ରଛାୟା ତଳେ ରହି କୋଟି କୋଟି ଟଙ୍କାର ସରକାରୀ ବିଜ୍ଞାପନ ହାତେଇଥିଲେ। ସରକାରୀ ଅଧିକାରୀଙ୍କ ଉପରେ ଚାପ ପକାଇ, ସେମାନଙ୍କ ନାମ ନେଇ ଧମକାଇ କାମ ହାସଲ କରିବାର ଅଭିଯୋଗ ମଧ୍ୟ ଏମାନଙ୍କ ବିରୋଧରେ ଉଠିଥିଲା।
ସବୁଠାରୁ ବଡ଼ ପ୍ରଶ୍ନ ଉଠୁଛି ଖଣି ସମ୍ପଦରେ ଭରପୂର ସୁନ୍ଦରଗଡ଼ ଓ କେନ୍ଦୁଝର ଜିଲ୍ଲାର ଜିଲ୍ଲା ଖଣିଜ ପ୍ରତିଷ୍ଠାନ ବା DMF (District Mineral Foundation) ଫଣ୍ଡକୁ ନେଇ।
- ଏହି ଫଣ୍ଡ୍ କାହା ପାଇଁ ଉଦ୍ଦିଷ୍ଟ ଥିଲା? ଖଣି ପ୍ରଭାବିତ ଗରିବ ଜନଜାତିଙ୍କ ବିକାଶ, ପିଇବା ପାଣି, ଶିକ୍ଷା ଓ ସ୍ୱାସ୍ଥ୍ୟ ପାଇଁ।
- କିନ୍ତୁ ବିଜେଡି ଶାସନରେ କ’ଣ ହେଲା? ଏହି ଫଣ୍ଡର ଏକ ବଡ଼ ଭାଗ ପ୍ରଚାର, ଡକ୍ୟୁମେଣ୍ଟାରୀ ଏବଂ ଇଭେଣ୍ଟ ମ୍ୟାନେଜମେଣ୍ଟ ନାମରେ ଏହି ସ୍ୱାର୍ଥପର ପିଆର ଏଜେନ୍ସିମାନଙ୍କ ପକେଟକୁ ଗଲା।
ଆଜି ବିଜେପି ସରକାରଙ୍କୁ ଆମର ସିଧା ପ୍ରଶ୍ନ— ଆପଣ ତ ଦୁର୍ନୀତି ବିରୋଧରେ ଶୂନ୍ୟ ସହନଶୀଳତାର କଥା କହୁଥିଲେ, ତେବେ ସେହି DMF ଫଣ୍ଡର ଅପବ୍ୟବହାର ଉପରେ ଏପର୍ଯ୍ୟନ୍ତ ଏକ ଉଚ୍ଚସ୍ତରୀୟ ତଦନ୍ତ କାହିଁକି ହେଲାନାହିଁ? ଯେଉଁ ପିଆର ଏଜେନ୍ସିମାନେ ଗରିବଙ୍କ ହକ୍ର ଟଙ୍କା ଲୁଟିଥିଲେ, ସେମାନଙ୍କୁ ଦଣ୍ଡ ଦେବା ବଦଳରେ ପୁଣି ନୂଆ କାମର ପୁରସ୍କାର କାହିଁକି ଦିଆଯାଉଛି?
ସରକାରୀ ବିଭାଗଗୁଡ଼ିକ ଉପରେ ପୁରୁଣା ସିଣ୍ଡିକେଟ୍ର କବ୍ଜା
ଆପଣ ଯଦି ସରକାରୀ ସଚିବାଳୟକୁ ଯିବେ, ତେବେ ଦେଖିବେ ବିଭିନ୍ନ ଗୁରୁତ୍ୱପୂର୍ଣ୍ଣ ବିଭାଗରେ ଏବେବି ସେହି ପୁରୁଣା ସିଣ୍ଡିକେଟ୍ ଚାଲିଛି।
- ଆଇଟି ବିଭାଗ
- ଶକ୍ତି ବିଭାଗ
- ସ୍ୱାସ୍ଥ୍ୟ ଓ ପରିବାର କଲ୍ୟାଣ
- ନଗର ଉନ୍ନୟନ
- ବାଣିଜ୍ୟ ଓ ପରିବହନ
- ପଞ୍ଚାୟତିରାଜ ଓ ଗ୍ରାମ୍ୟ ଉନ୍ନୟନ
- ମହିଳା ଓ ଶିଶୁ ବିକାଶ
- ପର୍ଯ୍ୟଟନ ବିଭାଗ
ପ୍ରାୟ ସମସ୍ତ ପ୍ରମୁଖ ବିଭାଗର ପ୍ରଚାର ଓ ପ୍ରସାର ଦାୟିତ୍ୱ ଆଜି ବି ସେହି ଗୋଟିଏ ନିର୍ଦ୍ଦିଷ୍ଟ ଗୋଷ୍ଠୀର ହାତରେ। ପରିଣାମ କ’ଣ ହେଉଛି? ମୋହନ ଚରଣ ମାଝୀଙ୍କ ନେତୃତ୍ୱାଧୀନ ସରକାର କାମ କରୁଛନ୍ତି ସତ, କିନ୍ତୁ ଲୋକଙ୍କ ପାଖରେ ତାହା ସଠିକ୍ ଭାବେ ପହଞ୍ଚିପାରୁ ନାହିଁ। ବରଂ ଏପରି ଏକ ଧାରଣା ସୃଷ୍ଟି କରାଯାଉଛି ଯେପରି ପୂର୍ବ ସରକାର ହିଁ ସବୁକିଛି ଭଲ କରୁଥିଲେ।
ଏହି ଏଜେନ୍ସିମାନେ ବିଜେପିର ପ୍ରଚାରରେ ଏତେ ଉଦାସୀନ କାହିଁକି? କାରଣ ସେମାନଙ୍କର ଲୟାଲ୍ଟି ବା ବିଶ୍ୱସ୍ତତା ଏବେବି ସେହି ନବୀନ ନିବାସ ପ୍ରତି ରହିଛି। ବିଜେପି ଭିତରେ ଥିବା କିଛି ଅମଲାତାନ୍ତ୍ରିକ ଗୋଷ୍ଠୀ ଏବଂ ଦଳର କିଛି ଅଦୂରଦର୍ଶୀ ନେତା ଏହି ଏଜେନ୍ସିମାନଙ୍କୁ ସୁରକ୍ଷା ଦେଉଛନ୍ତି। ଏହା ବିଜେପି କର୍ମୀଙ୍କ ପିଠିରେ ଛୁରୀ ମାରିବା ସହ ସମାନ ନୁହେଁ କି?
ରାଜନୀତିରେ ଗୋଟିଏ କଥା ସବୁବେଳେ ମନେରଖିବା ଉଚିତ— “ଶତ୍ରୁର ସୈନ୍ୟ କେବେ ନିଜର ସୁରକ୍ଷାକର୍ମୀ ହୋଇପାରିବେ ନାହିଁ।”
ବିଜେପି ନେତୃତ୍ୱଙ୍କୁ ଏବେ ଆତ୍ମସମୀକ୍ଷା କରିବାର ସମୟ ଆସିଛି। ଆପଣ କ୍ଷମତା ପାଇଲେ, କିନ୍ତୁ ସିଷ୍ଟମକୁ ବଦଳାଇ ପାରିଲେ କି? ଯଦି ବିଜେଡିର ପୁରୁଣା ପିଆର୍ ସିଣ୍ଡିକେଟ୍ ହିଁ ଆପଣଙ୍କ ସରକାରଙ୍କ ଭାଗ୍ୟ ନିର୍ଦ୍ଧାରଣ କରିବ, ତେବେ ଲୋକମାନେ ଆପଣଙ୍କୁ ‘ବିକଳ୍ପ’ ଭାବି ଭୋଟ୍ ଦେଇଥିଲେ କାହିଁକି?
ଏବେ ସମୟ ଆସିଛି:
- ସନ୍ଦିଗ୍ଧ ପିଆର୍ ଏଜେନ୍ସିଗୁଡ଼ିକ ବିରୋଧରେ ହୋଇଥିବା ଅଭିଯୋଗ ଏବଂ କରୋନା ଓ DMF ଫଣ୍ଡର ସମ୍ପୂର୍ଣ୍ଣ ଅଡିଟ୍ ଓ ତଦନ୍ତ ହେଉ।
- ଦଳ ପାଇଁ ନିସ୍ୱାର୍ଥପର ଭାବେ ଖଟିଥିବା ନିଜସ୍ୱ କର୍ମୀ ଓ ଯୁବ ପ୍ରତିଭାମାନଙ୍କୁ ସୁଯୋଗ ମିଳୁ।
- ସରକାରୀ ବିଭାଗଗୁଡ଼ିକୁ ପୁରୁଣା ସିଣ୍ଡିକେଟ୍ର ଚାପରୁ ମୁକ୍ତ କରାଯାଉ।
ନଚେତ୍ ଇତିହାସ ସାକ୍ଷୀ ଅଛି— ଯେଉଁ ଦଳ ନିଜ କର୍ମୀଙ୍କୁ ଅଣଦେଖା କରି ଭଡ଼ାଟିଆ ପ୍ରଚାରକଙ୍କ ଉପରେ ଭରସା କରେ, ସେ ଦଳ ବେଶୀ ଦିନ ଲୋକଙ୍କ ହୃଦୟରେ ରାଜ୍ କରିପାରେ ନାହିଁ।
