ସେପ୍ଟେମ୍ବରରେ ବାହାରିବେ ପ୍ରଥମ ବ୍ୟାଚ୍‌ର ଅଗ୍ନିବୀର, ସେନାରେ ଚାକିରି ଅବଧି ବଢ଼ାଇପାରନ୍ତି ସରକାର ! || The first batch of Agniveer will be released in September, the government may extend the service period in the army!

କେନ୍ଦ୍ର ସରକାରଙ୍କ ଦ୍ୱାରା ବହୁ ଚର୍ଚ୍ଚିତ ତଥା ବିବାଦୀୟ ‘ଅଗ୍ନିପଥ ଯୋଜନା’ ର ବର୍ତ୍ତମାନ ପ୍ରକୃତ ପରୀକ୍ଷା ସମୟ ଆସିଯାଇଛି। ପ୍ରଥମ ବ୍ୟାଚ୍‌ରେ ଭାରତୀୟ ସେନାରେ ସାମିଲ ହୋଇଥିବା ଅଗ୍ନିବୀରମାନଙ୍କର ୪ ବର୍ଷର କାର୍ଯ୍ୟକାଳ ଚଳିତ ବର୍ଷ ସେପ୍ଟେମ୍ବର ମାସରେ ଶେଷ ହେବାକୁ ଯାଉଛି। ପ୍ରଥମ ବ୍ୟାଚ୍ ସେନାରୁ ବାହାରିବାକୁ ଥିବାରୁ, ସେମାନଙ୍କର ଚାକିରି ଅବଧି ବା ସେନାରେ ରଖିବା ସୀମା କୁ ନେଇ କେନ୍ଦ୍ର ସରକାର ଏକ ବଡ଼ ଓ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇପାରନ୍ତି ବୋଲି ସଙ୍କେତ ମିଳିଛି।

ବଢ଼ିପାରେ ସ୍ଥାୟୀ ଚାକିରିର ସୀମା

ବର୍ତ୍ତମାନର ପ୍ରଚଳିତ ନିୟମ ଅନୁଯାୟୀ, ଅଗ୍ନିବୀରମାନଙ୍କର ପ୍ରତ୍ୟେକ ବ୍ୟାଚ୍‌ରୁ ସର୍ବାଧିକ ୨୫ ପ୍ରତିଶତ ଯବାନଙ୍କୁ ହିଁ ଭାରତୀୟ ସେନାରେ ସ୍ଥାୟୀ ବା ନିୟମିତ ସେବା ପାଇଁ ରଖାଯିବାର ବ୍ୟବସ୍ଥା ରହିଛି। ବାକି ୭୫ ପ୍ରତିଶତ ଅଗ୍ନିବୀର ୪ ବର୍ଷର ସେବା ସରିବା ପରେ ଏକକାଳୀନ ଆର୍ଥିକ ପ୍ୟାକେଜ୍ ପାଇ ସେନାରୁ ଅବସର ନେବେ। କିନ୍ତୁ ପ୍ରତିରକ୍ଷା ବିଭାଗ ଓ ତ୍ରିବିଧ ସେନା (ସ୍ଥଳ, ଆକାଶ ଓ ନୌସେନା) ର ଆଭ୍ୟନ୍ତରୀଣ ବୈଠକରୁ ମିଳିଥିବା ସୂଚନା ଅନୁସାରେ, ସେନା ଚାହୁଁଛି ଯେ ଅତିକମରେ ୫୦ ପ୍ରତିଶତ ଅଗ୍ନିବୀରଙ୍କୁ ସେନାରେ ସ୍ଥାୟୀ ଭାବେ ରଖାଯାଉ। ଏଭଳି ପରିସ୍ଥିତିରେ ବିରୋଧୀଙ୍କ ଚାପ ଏବଂ ଯୁବପିଢ଼ିଙ୍କ ଅସନ୍ତୋଷକୁ ଦୃଷ୍ଟିରେ ରଖି ସରକାର ଏହି ରିଟେନସନ୍ ହାରକୁ ୪୦ ରୁ ୫୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିବା ନେଇ ସେପ୍ଟେମ୍ବର ପୂର୍ବରୁ କୌଣସି ବଡ଼ ଘୋଷଣା କରିପାରନ୍ତି।

ଉଭୟ ପକ୍ଷଙ୍କ ଦାବିର ହେବ ପରୀକ୍ଷା

ସୂଚନାଯୋଗ୍ୟ ଯେ, ଯେତେବେଳେ ସରକାରଙ୍କ ପକ୍ଷରୁ ଅଗ୍ନିପଥ ଯୋଜନା ଘୋଷଣା କରାଯାଇଥିଲା, ସେତେବେଳେ ଦେଶର ବିଭିନ୍ନ ସ୍ଥାନରେ ତୀବ୍ର ଉତ୍ତେଜନା ଓ ହିଂସାତ୍ମକ ପ୍ରତିବାଦ ଦେଖିବାକୁ ମିଳିଥିଲା। ବିରୋଧୀ ଦଳଗୁଡ଼ିକ ଏହି ଯୋଜନାକୁ ଯୁବକମାନଙ୍କ ଭବିଷ୍ୟତ ନଷ୍ଟ କରିବା ଏବଂ ଜାତୀୟ ସୁରକ୍ଷା ପ୍ରତି ଏକ ବିପଦ ବୋଲି ଦର୍ଶାଇଥିଲେ। ଅନ୍ୟପଟେ, କେନ୍ଦ୍ର ସରକାର ଏହାକୁ ପ୍ରତିରକ୍ଷା କ୍ଷେତ୍ରର ଏକ ବଡ଼ ସଂସ୍କାର କହିବା ସହ ସେନାକୁ ଅଧିକ ଯୁବକ ଶକ୍ତିରେ ପରିଣତ କରିବା ଏବଂ ଆଧୁନିକ ଆହ୍ୱାନ ପାଇଁ ପ୍ରସ୍ତୁତ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଦାବି କରିଥିଲେ। ୪ ବର୍ଷର ସେବା ପରେ ପ୍ରଥମ ବ୍ୟାଚ୍ ବାହାରିବା ସମୟରେ ଉଭୟ ସରକାର ଏବଂ ବିରୋଧୀଙ୍କ ଦାବିର ପ୍ରକୃତ ମୂଲ୍ୟାଙ୍କନ ହେବ।

ଯୋଜନା ଆରମ୍ଭ ସମୟରେ ହିଁ ସରକାର ସ୍ପଷ୍ଟ କରିଥିଲେ ଯେ, ଭବିଷ୍ୟତର ଆବଶ୍ୟକତା ଏବଂ ଅନୁଭୂତି ଆଧାରରେ ଏହି ସ୍କିମ୍‌ର ନିୟମରେ ପରିବର୍ତ୍ତନ କରାଯାଇପାରିବ। ବର୍ତ୍ତମାନ ପେପର ଲିକ୍ ମାମଲା ଏବଂ ନିଯୁକ୍ତିକୁ ନେଇ ଦେଶର ଯୁବପିଢ଼ିଙ୍କ ଆକ୍ରମଣାତ୍ମକ ଆଭିମୁଖ୍ୟ ମଧ୍ୟରେ ସରକାର ଅଗ୍ନିବୀରଙ୍କ ସ୍ଥାୟୀ ଚାକିରି ସୀମା ବଢ଼ାଇବାକୁ ନେଇ କିଭଳି ନୀତି ଆପଣାଉଛନ୍ତି, ତାହା ଉପରେ ସାରା ଦେଶର ନଜର ରହିଛି।

Also read : https://purvapaksa.com/india-provides-tents-for-afghan-refugees-returning-from-pakistan/

ପାକିସ୍ତାନରୁ ଫେରୁଥିବା ଆଫଗାନିସ୍ତାନର ଶରଣାର୍ଥୀଙ୍କ ପାଇଁ ଭାରତ ତରଫରୁ ଦିଆଗଲା ଟେଣ୍ଟ || India provides tents for Afghan refugees returning from Pakistan

TRUPTIMAYEE SAHOO