ତାମିଲନାଡୁ ରାଜନୀତିରେ ସୁପରଷ୍ଟାର୍ ତଥା ତାମିଲଗା ଭେଟ୍ରି କାଜଗାମ (TVK) ର ପ୍ରତିଷ୍ଠାତା ଥାଲାପତି ବିଜୟଙ୍କ ପଦକ୍ଷେପ ଏବେ ସାରା ଦେଶର ଦୃଷ୍ଟି ଆକର୍ଷଣ କରିଛି। ଅନ୍ୟ ବିରୋଧୀ ଦଳଗୁଡ଼ିକ ତୁଲନାରେ ବିଜୟଙ୍କ ରାଜନୈତିକ ଶୈଳୀ ସମ୍ପୂର୍ଣ୍ଣ ଭିନ୍ନ ଏବଂ ରଣନୀତିକ ମନେହେଉଛି। ନିକଟରେ ସେ ଦେଇଥିବା ଏକ ବୟାନକୁ ନେଇ ଜାତୀୟ ରାଜନୀତିରେ ଏକ ନୂଆ ଚର୍ଚ୍ଚା ଆରମ୍ଭ ହୋଇଛି। ବିଜୟ ନିଜ ରାଜନୈତିକ ଆଭିମୁଖ୍ୟ ସ୍ପଷ୍ଟ କରିବାକୁ ଯାଇ ଭାରତୀୟ ଜନତା ପାର୍ଟି ର ସ୍ଥାନୀୟ ନୀତିକୁ କଡ଼ା ସମାଲୋଚନା କରିଛନ୍ତି, ମାତ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଏବଂ ବ୍ୟକ୍ତିତ୍ୱ ସହ ଏକ ସୁନ୍ଦର ସନ୍ତୁଳନ ରଖିବାକୁ ଚେଷ୍ଟା କରିଛନ୍ତି। ବିଶେଷଜ୍ଞଙ୍କ ମତରେ, ତାମିଲନାଡୁର ଆଗାମୀ ବିଧାନସଭା ନିର୍ବାଚନ ପୂର୍ବରୁ ବିଜୟଙ୍କର ଏହି ଚାଣକ୍ୟ ନୀତି ତାଙ୍କୁ ଡିଏମକେ ଏବଂ ଅନ୍ୟ ଦଳଠାରୁ ସମ୍ପୂର୍ଣ୍ଣ ଅଲଗା ପ୍ରତିପାଦିତ କରୁଛି।
ତାମିଲନାଡୁରେ ବର୍ତ୍ତମାନ ଚାଲିଥିବା ଦ୍ରାବିଡ଼ ରାଜନୀତିରେ ସାଧାରଣତଃ ବିଜେପି ଏବଂ ପ୍ରଧାନମନ୍ତ୍ରୀ ମୋଦୀଙ୍କୁ ସିଧାସଳଖ ଏବଂ ତୀବ୍ର ଆକ୍ରମଣ କରାଯାଇଥାଏ। ମାତ୍ର ବିଜୟ ଏହି ପାରମ୍ପରିକ ଧାରାରୁ ଓହରି ଆସିଛନ୍ତି। ସେ କହିଛନ୍ତି ଯେ, ”ସେ ତାମିଲନାଡୁର ସ୍ୱାର୍ଥ ଏବଂ ସାଂସ୍କୃତିକ ପରିଚୟ ସହ କୌଣସି ପ୍ରକାରର ବୁଝାମଣା କରିବେ ନାହିଁ ଏବଂ କେନ୍ଦ୍ରର ଯେଉଁ ସବୁ ନୀତି ରାଜ୍ୟର ଅଧିକାରକୁ ସଂକୁଚିତ କରୁଛି, ସେ ତାର ଦୃଢ଼ ବିରୋଧ କରିବେ। କିନ୍ତୁ ଏହାର ଅର୍ଥ ନୁହେଁ ଯେ ସେ କେବଳ ରାଜନୈତିକ ସ୍ୱାର୍ଥ ପାଇଁ ପ୍ରଧାନମନ୍ତ୍ରୀଙ୍କ ଆସନ ଏବଂ ତାଙ୍କର ବ୍ୟକ୍ତିତ୍ୱ ପ୍ରତି କଟାକ୍ଷ କରିବେ। ପ୍ରଧାନମନ୍ତ୍ରୀ ମୋଦୀଙ୍କ ଦେଶ ବିକାଶର କେତେକ ଦୂରଦୃଷ୍ଟିସମ୍ପନ୍ନ କାର୍ଯ୍ୟ ଏବଂ ଆନ୍ତର୍ଜାତୀୟ ସ୍ତରରେ ଭାରତର ସମ୍ମାନ ବୃଦ୍ଧି କରିବା ପଦକ୍ଷେପକୁ ସେ ସମ୍ମାନ ଜଣାନ୍ତି।”
ରାଜନୈତିକ ସମୀକ୍ଷକମାନେ ଥାଲାପତି ବିଜୟଙ୍କ ଏହି ନୂଆ ଆଭିମୁଖ୍ୟକୁ ଅତ୍ୟନ୍ତ ଚତୁରତାପୂର୍ଣ୍ଣ ବୋଲି ଅଭିହିତ କରିଛନ୍ତି। ପ୍ରକୃତରେ, ତାମିଲନାଡୁରେ ବିଜେପି ବିରୋଧରେ ଏକ ବଡ଼ ଭୋଟ୍ ବ୍ୟାଙ୍କ ରହିଛି, ଯାହାକୁ ହାତେଇବା ପାଇଁ ବିଜୟ ଦଳୀୟ ସ୍ତରରେ ବିଜେପିକୁ ଟାର୍ଗେଟ୍ କରୁଛନ୍ତି। ଅନ୍ୟପଟେ, ରାଜ୍ୟରେ ପ୍ରଧାନମନ୍ତ୍ରୀ ମୋଦୀଙ୍କର ମଧ୍ୟ ଏକ ବଡ଼ ବ୍ୟକ୍ତିଗତ ଜନପ୍ରିୟତା ରହିଛି, ବିଶେଷ କରି ଯୁବପିଢ଼ି ଓ ଶିକ୍ଷିତ ଭୋଟରଙ୍କ ମଧ୍ୟରେ ତାଙ୍କ ପ୍ରତି ସକରାତ୍ମକ ମନୋଭାବ ରହିଛି। ବିଜୟ ପ୍ରଧାନମନ୍ତ୍ରୀଙ୍କ ସହ ନିଜର ସମ୍ପର୍କ ଏବଂ ସନ୍ତୁଳନ ରଖି ସେହି ଭୋଟରମାନଙ୍କୁ ନିଜ ଆଡ଼କୁ ଆକର୍ଷିତ କରିବାକୁ ଚାହୁଁଛନ୍ତି, ଯେଉଁମାନେ ବର୍ତ୍ତମାନର ଶାସକ ଦଳ ଡିଏମକେର ପରିବାରବାଦ ଏବଂ ଦୁର୍ନୀତି ଉପରେ ଅତିଷ୍ଠ ହୋଇ ଏକ ଶକ୍ତିଶାଳୀ ବିକଳ୍ପ ଖୋଜୁଛନ୍ତି।
TVK ର ଏହି ରଣନୀତି ରାଜ୍ୟର ଅନ୍ୟ ପ୍ରମୁଖ ବିରୋଧୀ ଦଳ ଯେପରିକି AIADMK ଏବଂ ଶାସକ DMK ମହଲରେ ଚିନ୍ତା ବଢ଼ାଇ ଦେଇଛି। ବିଜୟ ନିଜର ପ୍ରତ୍ୟେକଟି ସଭାରେ ସ୍ପଷ୍ଟ କରୁଛନ୍ତି ଯେ,’ତାଙ୍କ ରାଜନୀତି କେବଳ କାହାକୁ ବିରୋଧ କରିବା ପାଇଁ ନୁହେଁ, ବରଂ ରାଜ୍ୟରେ ଏକ ସ୍ୱଚ୍ଛ, ଦୁର୍ନୀତିମୁକ୍ତ ଏବଂ ପ୍ରଗତିଶୀଳ ଶାସନ ପ୍ରତିଷ୍ଠା କରିବା ପାଇଁ ଅଭିପ୍ରେତ।’ ସିନେମା ଜଗତରେ ନିଜର ଅପ୍ରତିଦ୍ୱନ୍ଦ୍ୱୀ ଲୋକପ୍ରିୟତା ପରେ ଏବେ ରାଜନୀତିର ମଇଦାନରେ ସେ ଯେଉଁଭଳି ଭାବେ ଗୋଟି ଚାଳନା କରୁଛନ୍ତି, ତାହା ଆଗାମୀ ନିର୍ବାଚନରେ କେଉଁଭଳି ପ୍ରଭାବ ପକାଉଛି ଏବଂ କେନ୍ଦ୍ର ସହ ସେ ତାଙ୍କର ଏହି ସନ୍ତୁଳନ ନୀତିକୁ କେତେ ଦୂର ବଜାୟ ରଖିପାରୁଛନ୍ତି, ତାହା ଉପରେ ଏବେ ସମଗ୍ର ଦେଶର ରାଜନୈତିକ ବିଶ୍ଳେଷକମାନଙ୍କ ନଜର ରହିଛି।
