ଯଦି ଆପଣ ଗାଡ଼ି ଚଲାଇବା ସମୟରେ ଟ୍ରାଫିକ୍ ନିୟମକୁ ହାଲୁକା ଭାବେ ନେଉଛନ୍ତି, ତେବେ ବର୍ତ୍ତମାନ ହିଁ ନିଜର ଏହି ଅଭ୍ୟାସ ବଦଳାଇ ଦିଅନ୍ତୁ। ବାରମ୍ବାର ଟ୍ରାଫିକ୍ ନିୟମ ଉଲ୍ଲଂଘନ କରୁଥିବା ଏବଂ ବେପରୁଆ ଭାବେ ଗାଡ଼ି ଚଲାଉଥିବା ଚାଳକମାନଙ୍କ ଉପରେ କଡ଼ା ନଜର ରଖିବା ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ସଡ଼କ ପରିବହନ ମନ୍ତ୍ରଣାଳୟ ପକ୍ଷରୁ ପ୍ରସ୍ତୁତ କରାଯାଉଥିବା ନୂଆ ନିୟମ ଅନୁଯାୟୀ, ଯେଉଁ ଚାଳକମାନଙ୍କର ଟ୍ରାଫିକ୍ ଚାଲାଣ କିମ୍ବା ନିୟମ ଭାଙ୍ଗିବାର ପୁରୁଣା ଇତିହାସ ଥିବ, ସେମାନଙ୍କର ଡ୍ରାଇଭିଂ ଲାଇସେନ୍ସ ସହଜରେ ନବୀକରଣ ବା ରିନ୍ୟୁ ହେବନାହିଁ। ସେହିଭଳି ବେପରୁଆ ଡ୍ରାଇଭରମାନଙ୍କୁ ନିଜର ଲାଇସେନ୍ସ ନବୀକରଣ କରିବା ପାଇଁ RTO ରେ ପୁଣି ଥରେ ନୂଆ କରି ଡ୍ରାଇଭିଂ ଟେଷ୍ଟ ଦେବାକୁ ପଡ଼ିପାରେ। ସଡ଼କ ଦୁର୍ଘଟଣା ହ୍ରାସ କରିବା ଏବଂ ଦାୟିତ୍ୱହୀନ ଚାଳକଙ୍କ ଉପରେ ଲଗାମ ଲଗାଇବା ଏହି ପ୍ରସ୍ତାବର ମୁଖ୍ୟ ଉଦ୍ଦେଶ୍ୟ।
ରିପୋର୍ଟ ଅନୁଯାୟୀ, ସଡ଼କ ପରିବହନ ମନ୍ତ୍ରଣାଳୟର ଏକ ସ୍ୱତନ୍ତ୍ର ପ୍ୟାନେଲ୍ ଏହି ସଂଶୋଧନ ବିଲ୍କୁ ଚୂଡ଼ାନ୍ତ ରୂପ ଦେବା ପାଇଁ ମଞ୍ଜୁରୀ ଦେଇସାରିଛି ଏବଂ ଆଗାମୀ ସଂସଦର ମୌସୁମୀ ଅଧିବେଶନରେ ଏହାକୁ ଉପସ୍ଥାପନ କରାଯାଇପାରେ। ନୂଆ ପ୍ରସ୍ତାବ ଅନୁସାରେ, ‘ଲାପରବାହା ବା ବେପରୁଆ ଡ୍ରାଇଭର’ ଶ୍ରେଣୀରେ କେତେକ ନିର୍ଦ୍ଦିଷ୍ଟ ଅପରାଧକୁ ସାମିଲ କରାଯାଇଛି। ସେଗୁଡ଼ିକ ମଧ୍ୟରେ ‘ମଦ୍ୟପାନ କିମ୍ବା ନିଶାଦ୍ରବ୍ୟ ସେବନ କରି ଗାଡ଼ି ଚଲାଇବା, ନିର୍ଦ୍ଧାରିତ ଗତି ସୀମାଠାରୁ ଅଧିକ ବେଗରେ ଗାଡ଼ି ଦୌଡ଼ାଇବା, ରେଡ୍ ଲାଇଟ୍ ଡେଇଁବା, ନୋ-ଏଣ୍ଟ୍ରି ଅଞ୍ଚଳ କିମ୍ବା ଭୁଲ୍ ଦିଗରେ ଗାଡ଼ି ଚଲାଇବା, ବିପଜ୍ଜନକ ଭାବେ ଓଭରଟେକ୍ କରିବା, ଗାଡ଼ି ଚଲାଇବା ସମୟରେ ହଠାତ୍ ବ୍ରେକ୍ ମାରିବା, ଖରାପ ଲାଇଟ୍ କିମ୍ବା ବ୍ରେକ୍ ଥିବା ଗାଡ଼ି ଚଲାଇବା ଏବଂ ବିନା ସିଟ୍ ବେଲ୍ଟ ବା ହେଲମେଟ୍ରେ ଗାଡ଼ି ଚଲାଇବା’ ଆଦି ଅନ୍ତର୍ଭୁକ୍ତ। ଯଦି କୌଣସି ବ୍ୟକ୍ତି ବାରମ୍ବାର ଏହିସବୁ ନିୟମ ଭାଙ୍ଗି ଚାଲାଣ କାଟିଥାନ୍ତି, ତେବେ ଲାଇସେନ୍ସ ନବୀକରଣ ସମୟରେ ସିଷ୍ଟମ୍ ସେମାନଙ୍କୁ ଚିହ୍ନଟ କରିବ ଏବଂ ନୂଆ କରି ଗାଡ଼ି ଚଲାଇବା ପରୀକ୍ଷା ଦେବା ବାଧ୍ୟତାମୂଳକ କରାଯିବ।
ଏହା ବ୍ୟତୀତ ସଡ଼କ ଦୁର୍ଘଟଣାରେ ପୀଡ଼ିତ ବ୍ୟକ୍ତି ଏବଂ ସେମାନଙ୍କ ପରିବାରକୁ ତୁରନ୍ତ ସହାୟତା ଯୋଗାଇଦେବା ପାଇଁ ମଧ୍ୟ ଏହି ବିଲ୍ରେ ଏକ ବଡ଼ ପ୍ରସ୍ତାବ ଦିଆଯାଇଛି। ମୋଟର ଦୁର୍ଘଟଣା ଦାବି ନ୍ୟାୟାଧିକରଣ କୁ ଏବେ ଏହି ଅଧିକାର ଦିଆଯିବ, ଯାହାଦ୍ୱାରା ସେମାନେ ମାମଲାର ଚୂଡ଼ାନ୍ତ ନିଷ୍ପତ୍ତି ପୂର୍ବରୁ ପୀଡ଼ିତଙ୍କ ପରିବାରକୁ ‘ଅନ୍ତରୀଣ କ୍ଷତିପୂରଣ’ ପ୍ରଦାନ କରିପାରିବେ। ବର୍ତ୍ତମାନର ବ୍ୟବସ୍ଥାରେ ଏଭଳି କୌଣସି ତୁରନ୍ତ ଆର୍ଥିକ ଆଶ୍ୱାସନା ଦେବାର ବ୍ୟବସ୍ଥା ନଥିଲା, ଯାହା ଫଳରେ ପୀଡ଼ିତଙ୍କ ପରିବାର ବହୁତ ହଇରାଣ ହେଉଥିଲେ। ଆହୁରି ମଧ୍ୟ, ଯଦି କୌଣସି ବୀମା କମ୍ପାନୀ କିମ୍ବା ଦୋଷୀ ପକ୍ଷ ଟ୍ରିବ୍ୟୁନାଲ୍ର ଆଦେଶକୁ ଉପରିସ୍ଥ କୋର୍ଟରେ ଚ୍ୟାଲେଞ୍ଜ କରନ୍ତି, ତେବେ ସେମାନଙ୍କୁ ପ୍ରଥମେ ୧୦ ଲକ୍ଷ ଟଙ୍କା କିମ୍ବା ଧାର୍ଯ୍ୟ କ୍ଷତିପୂରଣର ୫୦ ପ୍ରତିଶତ ଅର୍ଥ ଜମା କରିବାକୁ ପଡ଼ିବ, ଯାହା ପୂର୍ବରୁ ମାତ୍ର ୨୫,୦୦୦ ଟଙ୍କା ଥିଲା। ଏହି ସଂଶୋଧନ ବଳରେ ଗାଡ଼ିର ବୟସ ଏବଂ ଚାଲାଣ ଇତିହାସ ଆଧାରରେ ଇନ୍ସୁରେନ୍ସ ରେଗୁଲେଟର ଦ୍ୱାରା ଥର୍ଡ-ପାର୍ଟି ପ୍ରିମିୟମ୍ ସ୍ଥିର କରିବା ବ୍ୟବସ୍ଥା ମଧ୍ୟ ପୁନଃ ଲାଗୁ କରାଯାଇପାରେ। ଏହି ସମସ୍ତ କଡ଼ା ଆଇନଗତ ପ୍ରସ୍ତାବ ଦେଶରେ ଦୁର୍ଘଟଣା ରୋକିବା ସହ ସଡ଼କ ସୁରକ୍ଷା ବ୍ୟବସ୍ଥାକୁ ଏକ ନୂଆ ଦିଗ ଦେବ ବୋଲି ଆଶା କରାଯାଉଛି।
Also read : https://purvapaksa.com/india-to-restore-famous-10th-century-prambanan-shiva-temple-during-pm-modis-visit/
