ବର୍ତ୍ତମାନ ସମଗ୍ର ବିଶ୍ୱ ଜଳବାୟୁ ପରିବର୍ତ୍ତନ ର ଭୟଙ୍କର ପରିଣାମ ଭୋଗୁଛି। ବିଶେଷ କରି ୟୁରୋପରେ ଚଳିତ ବର୍ଷ ଗ୍ରୀଷ୍ମ ପ୍ରବାହ ସମସ୍ତ ରେକର୍ଡ ଭାଙ୍ଗି ଦେଇଛି। ଫ୍ରାନ୍ସ, ବ୍ରିଟେନ, ଜର୍ମାନୀ ଏବଂ ସ୍ପେନ୍ ଭଳି ଦେଶଗୁଡ଼ିକରେ ତାପମାତ୍ରା ୪୦ ଡିଗ୍ରୀ ସେଲସିୟସ୍ ପାଖାପାଖି ପହଞ୍ଚିବା ମାତ୍ରେ ସେଠାକାର ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।
ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ସୋସିଆଲ ମିଡିଆରେ ଅନେକ ଭିଡିଓ ଭାଇରାଲ ହେବାରେ ଲାଗିଛି, ଯେଉଁଥିରେ ୟୁରୋପର ପିଚୁ ରାସ୍ତାଗୁଡ଼ିକ ତରଳି ଯାଉଥିବା ଦେଖିବାକୁ ମିଳୁଛି। ଏହାକୁ ନେଇ ସାଧାରଣରେ ପ୍ରଶ୍ନ ଉଠୁଛି ଯେ, ଯେଉଁ ଭାରତରେ ପ୍ରତିବର୍ଷ ଗ୍ରୀଷ୍ମ ଋତୁରେ ତାପମାତ୍ରା ୪୫ ରୁ ୫୦ ଡିଗ୍ରୀ ପର୍ଯ୍ୟନ୍ତ ପହଞ୍ଚିଯାଏ, ସେଠାରେ ହାଇୱେ କିମ୍ବା ସାଧାରଣ ରାସ୍ତା କାହିଁକି ତରଳେ ନାହିଁ? ପାଣିପାଗ ଏବଂ ଭୂ-ବିଜ୍ଞାନ ବିଶେଷଜ୍ଞମାନେ ଏହା ପଛର ପ୍ରକୃତ ଇଞ୍ଜିନିୟରିଂ ଏବଂ ଭୌଗୋଳିକ କାରଣ ପ୍ରକାଶ କରିଛନ୍ତି।
ଜଳବାୟୁ ଅନୁଯାୟୀ ସାମଗ୍ରୀର ଚୟନ
ବିଶେଷଜ୍ଞଙ୍କ ଅନୁଯାୟୀ, ୟୁରୋପ ଏବଂ ଭାରତର ପାଣିପାଗ ମଧ୍ୟରେ ଆକାଶ ପାତାଳ ପାର୍ଥକ୍ୟ ରହିଛି। ସେଥିପାଇଁ ଉଭୟ ଅଞ୍ଚଳରେ ରାସ୍ତା ନିର୍ମାଣ ଶୈଳୀ ଏବଂ ବ୍ୟବହୃତ ସାମଗ୍ରୀ ସମ୍ପୂର୍ଣ୍ଣ ଭିନ୍ନ। ବ୍ରିଟେନ ଓ ୟୁରୋପୀୟ ଦେଶଗୁଡ଼ିକରେ ସାଧାରଣତଃ ବର୍ଷର ଅଧିକାଂଶ ସମୟ ପ୍ରବଳ ଶୀତ ଏବଂ ବରଫପାତ ହୋଇଥାଏ। ତେଣୁ ସେଠାକାର ରାସ୍ତାକୁ ଶୀତଳ ଜଳବାୟୁକୁ ସହ୍ୟ କରିବା ଭଳି ଡିଜାଇନ କରାଯାଇଥାଏ।
ସେଠାରେ ରାସ୍ତା ତିଆରି ପାଇଁ ନରମ କିମ୍ବା କମ୍ ଚିକିଟା ଥିବା ବିଟୁମେନ୍ ବ୍ୟବହାର କରାଯାଏ, ଯାହାଫଳରେ ଅତ୍ୟଧିକ ଶୀତରେ ମଧ୍ୟ ରାସ୍ତାରେ ଫାଟ ସୃଷ୍ଟି ହୁଏନାହିଁ। ମାତ୍ର ଯେତେବେଳେ ହଠାତ୍ ତାପମାତ୍ରା ୪୦ ଡିଗ୍ରୀ ପାର୍ ହୋଇଯାଏ, ସେତେବେଳେ କଳା ରଙ୍ଗର ଏହି ପିଚୁ ରାସ୍ତା ସୂର୍ଯ୍ୟକିରଣକୁ ଶୋଷଣ କରିନିଏ ଏବଂ ଏହାର ଉପରିଭାଗର ପ୍ରକୃତ ତାପମାତ୍ରା ୬୦ ଡିଗ୍ରୀରୁ ଅଧିକ ହୋଇଯାଏ, ଯାହାଦ୍ୱାରା ପିଚୁ ନରମ ହୋଇ ତରଳିବାକୁ ଲାଗେ।
କାହିଁକି ସୁରକ୍ଷିତ ରହେ ଭାରତୀୟ ହାଇୱେ ?
ଅପରପକ୍ଷରେ, ଭାରତରେ ପ୍ରାୟ ୪ ରୁ ୫ ମାସ ଧରି ପ୍ରବଳ ଗ୍ରୀଷ୍ମ ପ୍ରବାହ ଜାରି ରହେ। ଭାରତର ଏହି ପ୍ରାକୃତିକ ପରିବେଶକୁ ଦୃଷ୍ଟିରେ ରଖି ଏଠାରେ ଜାତୀୟ ରାଜପଥ ଏବଂ ଏକ୍ସପ୍ରେସୱେ ନିର୍ମାଣରେ ଉଚ୍ଚ ଗୁଣବତ୍ତା ସମ୍ପନ୍ନ ତଥା ଅଧିକ ଚିକିଟା ବିଟୁମେନ୍ ଗ୍ରେଡ୍ ଯେପରିକି ‘VG-30’ ଏବଂ ‘VG-40’ ବ୍ୟବହାର କରାଯାଏ। ଏହା ବ୍ୟତୀତ ଆଧୁନିକ ପ୍ରକଳ୍ପଗୁଡ଼ିକରେ ପଲିମର ମଡିଫାଇଡ୍ ବିଟୁମେନ୍ (PMB) ର ବ୍ୟବହାର କରାଯାଉଛି, ଯାହା ୫୦ ରୁ ୫୫ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ପ୍ରବଳ ଉତ୍ତାପକୁ ସହଜରେ ସହ୍ୟ କରିପାରେ। ଭାରତୀୟ ରାସ୍ତାରେ ବଡ଼ ଆକାରର ପଥରଖଣ୍ଡ ମଧ୍ୟ ମିଶାଯାଇଥାଏ, ଯାହା ଭାରୀ ଯାନବାହନ ଚଳାଚଳ ସତ୍ତ୍ୱେ ରାସ୍ତାର ସ୍ଥିରତା ବଜାୟ ରଖେ।
‘ହିଟ୍ ଡୋମ୍’ ର ପ୍ରଭାବ
ବର୍ତ୍ତମାନ ୟୁରୋପରେ ଏକ ପ୍ରକାରର ‘ହିଟ୍ ଡୋମ୍’ ପରିସ୍ଥିତି ସୃଷ୍ଟି ହୋଇଛି, ଯେଉଁଥିରେ ଆଣ୍ଟି-ସାଇକ୍ଲୋନିକ୍ ସଞ୍ଚାଳନ ଯୋଗୁଁ ଗରମ ପବନ ବାହାରକୁ ନଯାଇ ଭୂପୃଷ୍ଠ ନିକଟରେ ହିଁ ବନ୍ଦୀ ହୋଇ ରହିଯାଉଛି। ୟୁରୋପର କୋଠାବାଡ଼ି ଓ ଘରଗୁଡ଼ିକ ମଧ୍ୟ ଶୀତରୁ ରକ୍ଷା ପାଇବା ପାଇଁ ମୋଟା କାନ୍ଥ ବିଶିଷ୍ଟ କରାଯାଇଥାଏ, ଯାହା ଭିତରର ଗରମକୁ ବାହାରକୁ ଛାଡ଼େ ନାହିଁ। ବର୍ତ୍ତମାନର ଏହି ଅସ୍ୱାଭାବିକ ପାଣିପାଗ ୟୁରୋପୀୟ ଢାଞ୍ଚାରେ ପ୍ରସ୍ତୁତ ଭିତ୍ତିଭୂମିକୁ ସମ୍ପୂର୍ଣ୍ଣ ପ୍ରଭାବିତ କରିଛି। ଏହି ଘଟଣା ସମଗ୍ର ବିଶ୍ୱକୁ ଚେତାଇ ଦେଇଛି ଯେ, ଆଗାମୀ ଦିନରେ ନିର୍ମାଣ କାର୍ଯ୍ୟ କେବଳ ପୁରୁଣା ମାନଦଣ୍ଡରେ ନୁହେଁ, ବରଂ ଜଳବାୟୁ ପରିବର୍ତ୍ତନର ଆହ୍ୱାନକୁ ଆଖି ଆଗରେ ରଖି କରାଯିବା ଉଚିତ।
