ଓଡ଼ିଶାର ମୁଖ୍ୟ ବିରୋଧୀ ଦଳ ବିଜୁ ଜନତା ଦଳ ବା ବିଜେଡି ଭିତରେ ବର୍ତ୍ତମାନ ଏଭଳି ଏକ ସ୍ଥିତି ସୃଷ୍ଟି ହୋଇଛି, ଯାହା ଦଳର ଭବିଷ୍ୟତ ଉପରେ ଏକ ବଡ଼ ପ୍ରଶ୍ନବାଚୀ ଲଗାଇ ଦେଇଛି। ନିର୍ବାଚନ ହାରିବା ପରେ ସମୀକ୍ଷା ଚାଲିଥିବାବେଳେ ଏବେ ଦଳ ଭିତରେ ଏକ ନୂଆ ବିବାଦ ମୁଣ୍ଡ ଟେକିଛି। ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ଏକ ନୂଆ ନିଷ୍ପତ୍ତିକୁ ନେଇ ଦଳର ପୁରୁଖା ଓଡ଼ିଆ ନେତାମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିବା ଚର୍ଚ୍ଚା ହେଉଛି। ପ୍ରଶ୍ନ ଉଠୁଛି— କଣ ବିଜେଡିର ଓଡ଼ିଆ ନେତାମାନେ ଦଳକୁ ସମ୍ଭାଳି ପାରୁନାହାନ୍ତି? କାହିଁକି ଦଳରେ ପୁଣି ଜଣେ ଅଣ-ଓଡ଼ିଆ ଚେହେରାଙ୍କୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଉଛି? ଏବଂ ସବୁଠାରୁ ବଡ଼ କଥା ହେଉଛି, ଯେତେବେଳେ ସୁଜାତା ରାଉତ କାର୍ତ୍ତିକେୟନଙ୍କ ଦଳରେ ରାଜନୈତିକ ଅଭିଷେକ ହେଉଛି, ସେତେବେଳେ ଦଳର ବଡ଼ ବଡ଼ ସାରଥୀମାନେ କୁଆଡ଼େ ଗଲେ? କାହିଁକି ସେମାନଙ୍କର ଦେଖାଦର୍ଶନ ମିଳୁନାହିଁ?
• ସୁଜାତାଙ୍କ ଏଣ୍ଟ୍ରି ଓ ଓଡ଼ିଆ ନେତାଙ୍କ ସାମର୍ଥ୍ୟ ଉପରେ ପ୍ରଶ୍ନ: ନବୀନ ବାବୁଙ୍କ ଏକାନ୍ତ ବିଶ୍ୱସ୍ତ ବି.କେ. ପାଣ୍ଡିଆନଙ୍କ ଧର୍ମପତ୍ନୀ ସୁଜାତା କାର୍ତ୍ତିକେୟନ ବିଜେଡିରେ ସାମିଲ। କଣ ଓଡ଼ିଆ ନେତାଙ୍କ ଉପରେ ଭରସା କରିପାରୁନାହାନ୍ତି ନବୀନ?
• କୁଆଡ଼େ ଗଲେ ବବି ଦାସ?: ଏକଦା ପାଣ୍ଡିଆନଙ୍କ ସବୁଠାରୁ ନିକଟତର କୁହାଯାଉଥିବା ଯାଜପୁରର ଟାଣୁଆ ନେତା ପ୍ରଣବ ପ୍ରକାଶ ଦାସ ଓରଫ ବବି ଦାସଙ୍କ ଅନୁପସ୍ଥିତି ପଛର ବାସ୍ତବତା କଣ? କଣ ବଳି ପଡ଼ିଥିବା ଅନୁଭବ କରୁଛି ଦାସ ପରିବାର?
• ପୁରୁଖା ନେତାଙ୍କ ଗୋପନ ବିରୋଧ: ରଣେନ୍ଦ୍ର ପ୍ରତ୍ୟାପ ସ୍ୱାଇଁ, ବଦ୍ରି ନାରାୟଣ ପାତ୍ର ଏବଂ ପ୍ରସନ୍ନ ଆଚାର୍ଯ୍ୟଙ୍କ ଭଳି ଶୀର୍ଷ ନେତାମାନେ କାହିଁକି କାର୍ଯ୍ୟକ୍ରମରୁ ଦୂରେଇ ରହିଲେ?
• ନିଜ ବଛାବଛା ଅନୁଗତଙ୍କୁ ନେଇ କାର୍ଯ୍ୟକ୍ରମ: ବିରୋଧର ଆଶଙ୍କା କରି କଣ ପାଣ୍ଡିଆନ କେବଳ ନିଜ ସମର୍ଥକଙ୍କୁ ଡାକିଥିଲେ?
• ବିଜେଡିର ଅବସ୍ଥା କଣ ଶିବସେନା କିମ୍ବା ଟିଏମସି ଭଳି ହେବ?: ରାଜନୈତିକ ମହଲରେ ଚାଲିଥିବା ସବୁଠାରୁ ବଡ଼ ଚର୍ଚ୍ଚାର ସମ୍ପୂର୍ଣ୍ଣ ପୋଷ୍ଟମର୍ଟମ।
ସୁଜାତା ଆସିଲେ… ଓଡ଼ିଆ ନେତୃତ୍ୱ ଫେଲ୍?
ବିଗତ ସାଧାରଣ ନିର୍ବାଚନରେ ଓଡ଼ିଶାରେ ବିଜେଡିର ପରାଜୟ ପଛରେ ଯେଉଁ ସବୁଠାରୁ ବଡ଼ ପ୍ରସଙ୍ଗ ଥିଲା, ସେଇଟା ଥିଲା “ଓଡ଼ିଆ ଅସ୍ମିତା” ଏବଂ ଅଣ-ଓଡ଼ିଆ ନେତୃତ୍ୱକୁ ବିରୋଧ। ନିର୍ବାଚନ ପରେ ଚର୍ଚ୍ଚା ହେଉଥିଲା ଯେ ବିଜେଡି ଏବେ ନିଜର ରଣନୀତି ବଦଳାଇବ ଏବଂ ଓଡ଼ିଆ ନେତାମାନଙ୍କୁ ଆଗକୁ ଆଣିବ। କିନ୍ତୁ ବର୍ତ୍ତମାନ ଯେଉଁ ଚିତ୍ର ସାମ୍ନାକୁ ଆସୁଛି, ତାହା ସମ୍ପୂର୍ଣ୍ଣ ଓଲଟା।
ରାଜ୍ୟର ମୁଖ୍ୟ ବିରୋଧୀ ଦଳ ବିଜୁ ଜନତା ଦଳରେ ଓଡ଼ିଆ ନେତାମାନେ ବୋଧହୁଏ ଦଳକୁ ସମ୍ଭାଳି ପାରୁ ନାହାନ୍ତି। କିମ୍ବା ଏଭଳି ଏକ ବାର୍ତ୍ତା ଦେବାକୁ ଚେଷ୍ଟା କରାଯାଉଛି। ଏହାକୁ ଅନୁଭବ କରି ଦଳର ସଭାପତି ନବୀନ ପଟ୍ଟନାୟକ ନିଜର ଏକାନ୍ତ ବିଶ୍ୱସ୍ତ ଭୈରବ କାର୍ତ୍ତିକେୟନ ପାଣ୍ଡିଆନଙ୍କ ଧର୍ମପତ୍ନୀ ତଥା ତାମିଲ ବୋହୁ ସୁଜାତା ରାଉତ କାର୍ତ୍ତିକେୟନଙ୍କୁ ଦଳରେ ସାମିଲ କରିଛନ୍ତି ଏବଂ ତାଙ୍କୁ ଏକ ବଡ଼ ରାଜନୈତିକ ପ୍ଲାଟଫର୍ମ ଦିଆଯାଇଛି। ସୁଜାତା କାର୍ତ୍ତିକେୟନ ଜଣେ ପୂର୍ବତନ ଆଇଏଏସ (IAS) ଅଫିସର ଏବଂ ଓଡ଼ିଶାର ‘ମିଶନ ଶକ୍ତି’ ବିଭାଗରେ ସେ ଦୀର୍ଘ ଦିନ ଧରି କାମ କରିଛନ୍ତି। ମହିଳା ଭୋଟରଙ୍କ ମଧ୍ୟରେ ତାଙ୍କର ଏକ ସଂଗଠନ ରହିଛି। କିନ୍ତୁ ପ୍ରଶ୍ନ ଉଠୁଛି, ନିର୍ବାଚନରେ ପରାଜୟର ମୁଖ୍ୟ କାରଣ ସାଜିଥିବା ‘ପାଣ୍ଡିଆନ ଫ୍ୟାକ୍ଟର’ ପରେ ପୁଣି ଥରେ ତାଙ୍କ ପରିବାରର ସଦସ୍ୟଙ୍କୁ ଦଳର ଆଗଧାଡ଼ିକୁ ଆଣିବା ନବୀନ ବାବୁଙ୍କର କେଉଁ ପ୍ରକାରର ରଣନୀତି? କଣ ଦଳ ଭିତରେ ଥିବା ଶହ ଶହ ଓଡ଼ିଆ ନେତାଙ୍କ ଯୋଗ୍ୟତା ଉପରେ ସୁପ୍ରିମୋଙ୍କର ଭରସା ନାହିଁ?
କୁଆଡ଼େ ଗଲେ କ୍ରୀତଦାସ? ବବି ଦାସଙ୍କ ଅନୁପସ୍ଥିତି
ଏହି ସମ୍ପୂର୍ଣ୍ଣ ଘଟଣାକ୍ରମରେ ଯେଉଁ ପ୍ରଶ୍ନଟି ସବୁଠାରୁ ଅଧିକ ଆଲୋଚନା ହେଉଛି, ତାହା ହେଉଛି— “କୁଆଡ଼େ ଗଲେ କ୍ରୀତଦାସ?”
ରାଜନୈତିକ କରିଡରରେ ଏହି ଶବ୍ଦକୁ ନେଇ ଅନେକ ଚର୍ଚ୍ଚା ଚାଲିଛି। ସୁଜାତାଙ୍କର ଏହି ରାଜନୀତି ଆରମ୍ଭରେ ତାଙ୍କ ସ୍ୱାମୀ ବା ପାଣ୍ଡିଆନଙ୍କର ଏକଦା ଅତ୍ୟନ୍ତ ବିଶ୍ୱସ୍ତ ତଥା କେତେକଙ୍କ ଭାଷାରେ ‘କ୍ରୀତଦାସ’ ଭଳି କାମ କରୁଥିବା ଯାଜପୁରର ପ୍ରଭାବଶାଳୀ ନେତା ପ୍ରଣବ ପ୍ରକାଶ ଦାସ ଓରଫ ବବି ଦାସଙ୍କର ଦେଖା ଦର୍ଶନ ମିଳି ନାହିଁ। ବିଜେଡିର ସାଂଗଠନିକ ସମ୍ପାଦକ ଭଳି ବଡ଼ ପଦବୀରେ ରହି ସମଗ୍ର ଓଡ଼ିଶାରେ ଦଳର ଗୋଟି ଚାଳନା କରୁଥିବା ବବି ଦାସ ଏଭଳି ଏକ ଗୁରୁତ୍ୱପୂର୍ଣ୍ଣ ଯୋଗଦାନ କାର୍ଯ୍ୟକ୍ରମରେ କାହିଁକି ଅନୁପସ୍ଥିତ ଥିଲେ?
ସୁଜାତାଙ୍କର ରାଜନୀତି ପ୍ରବେଶରେ ବବି ଦାସଙ୍କ ଏହି ଅନୁପସ୍ଥିତି ଅନେକ କଥା ଦର୍ଶାଉଛି ଏବଂ ଅନେକ ସଙ୍କେତ ମଧ୍ୟ ଦେଉଛି। ଏଥିରୁ ଯାହା ରାଜନୈତିକ ମହଲରେ ଆଲୋଚନା ହେଉଛି, ସୁଜାତାଙ୍କ ଏହି ରାଜନୈତିକ ରାଜ୍ୟାଭିଷେକରେ ବବି ଦାସ ଆଦୌ ଖୁସି ନାହାନ୍ତି। କାରଣ ଗତ ସାଧାରଣ ନିର୍ବାଚନରେ ତାଙ୍କୁ ଏବଂ ତାଙ୍କ ପରିବାରକୁ ପାଣ୍ଡିଆନ ଜାଣିଶୁଣି ସମ୍ବଲପୁର ଆସନରେ ବଳି ପକାଇଥିଲେ ବୋଲି ବର୍ତ୍ତମାନ ବବି ଦାସଙ୍କର ହୃଦବୋଧ ହୋଇଛି। ଯାଜପୁର ଗଡ଼ ଛାଡ଼ି ସମ୍ବଲପୁରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ଲଢ଼ି ବଡ଼ ବ୍ୟବଧାନରେ ହାରିବା ପରେ ବବି ଦାସଙ୍କ ରାଜନୈତିକ କ୍ୟାରିୟର ଏବେ ସଙ୍କଟରେ। ତେଣୁ ସେ ପାଣ୍ଡିଆନଙ୍କ ଠାରୁ ଦୂରତା ରଖୁଛନ୍ତି ବୋଲି ଯେଉଁ ଗୁଜବ ଏବଂ ଆଲୋଚନା ଚାଲିଥିଲା, ତାହା ଆଜି ସୁଜାତାଙ୍କ ଯୋଗଦାନ ସମୟରେ ବବିଙ୍କ ଅନୁପସ୍ଥିତି ଯୋଗୁଁ ସମ୍ପୂର୍ଣ୍ଣ ପ୍ରମାଣିତ ହୋଇଛି।
ପୁରୁଖା ନେତାଙ୍କ ବିଦ୍ରୋହ ଓ ପାଣ୍ଡିଆନଙ୍କ ଗୋଟିଚାଳନା
କେବଳ ବବି ଦାସ ନୁହଁନ୍ତି ଦର୍ଶକ ବନ୍ଧୁ, ଏହି ତାଲିକା ବହୁତ ଲମ୍ବା। ଯେଉଁ ଦିନ ଭୈରବ କାର୍ତ୍ତିକେୟନ ପାଣ୍ଡିଆନ ପ୍ରଥମ କରି ବିଜେଡିରେ ଯୋଗଦେଇଥିଲେ, ସେଦିନ ମଞ୍ଚ ଉପରେ ସବୁଠାରୁ ଖୁସି ଦେଖାଯାଉଥିବା ଏବଂ ପାଣ୍ଡିଆନଙ୍କ ଜୟଗାନ କରୁଥିବା ଆଠଗଡ଼ ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ ଓରଫ ରାଜା ସ୍ୱାଇଁ ମଧ୍ୟ ଆଜିର ଏହି କାର୍ଯ୍ୟକ୍ରମରେ ନଥିଲେ। ସେହିପରି ପାଣ୍ଡିଆନଙ୍କ ଅହଂକାର ଏବଂ ତାଙ୍କର କାର୍ଯ୍ୟଶୈଳୀକୁ ସବୁବେଳେ ପରୋକ୍ଷ କିମ୍ବା ପ୍ରତ୍ୟକ୍ଷ ଭାବେ ସମାଚନା କରୁଥିବା ଘଷିପୁରା ବିଧାୟକ ବଦ୍ରିନାରାୟଣ ପାତ୍ର ମଧ୍ୟ ଏହି ଉତ୍ସବରୁ ନିଜକୁ ଦୂରେଇ ରଖିଛନ୍ତି। ଏପରିକି ବିଧାନସଭାରେ ଦଳର ଉପନେତା ତଥା ବରିଷ୍ଠ ଶୀର୍ଷ ନେତା ପ୍ରସନ୍ନ ଆଚାର୍ଯ୍ୟଙ୍କର ମଧ୍ୟ ଦେଖା ମିଳି ନାହିଁ।
ଏହି ବଡ଼ ବଡ଼ ପୁରୁଖା ଓଡ଼ିଆ ନେତାମାନଙ୍କର ଅନୁପସ୍ଥିତି କଣ ଏକ ସଂଯୋଗ, ନା ଏହା ଏକ ଯୋଜନାବଦ୍ଧ ବୟକଟ୍ ବା ବର୍ଜନ? ସୂତ୍ର ଅନୁସାରେ, ଏହି ଯୋଗଦାନ କାର୍ଯ୍ୟକ୍ରମରେ ଯେପରି କୌଣସି ପୁରୁଖା ନେତା ବିରୋଧ ପ୍ରଦର୍ଶନ ନକରିପାରିବେ କିମ୍ବା ଗଣମାଧ୍ୟମ ଆଗରେ କିଛି ଓଲଟା ବୟାନ ନଦେବେ, ସେଥିପାଇଁ ପାଣ୍ଡିଆନ କୁଆଡ଼େ ନିଜର ବଛାବଛା ଅନୁଗତ ଏବଂ ନବନିର୍ବାଚିତ କିଛି ଯୁବ ସମର୍ଥକମାନଙ୍କୁ ହିଁ କେବଳ ଡାକିଥିଲେ। ଅର୍ଥାତ୍ ଦଳ ଭିତରେ ଏବେ ଏକ ବଡ଼ ପ୍ରାଚୀର ଠିଆ ହୋଇଛି— ଗୋଟିଏ ପଟେ ପାଣ୍ଡିଆନ ଓ ତାଙ୍କ ଗୋଷ୍ଠୀ, ଏବଂ ଅନ୍ୟପଟେ ଦଳର ପୁରୁଖା ଓଡ଼ିଆ ନେତୃତ୍ୱ।
ବିଜେଡିର ଅବସ୍ଥା କଣ ଶିବସେନା କିମ୍ବା ଟିଏମସି ଭଳି ହେବ?
ସୁଜାତାଙ୍କର ଦଳ ପ୍ରବେଶ ଏବଂ ଏହି ଅବସରରେ ଦଳର ବଡ଼ ବଡ଼ ନେତାମାନଙ୍କର ଏହି ଅନୁପସ୍ଥିତି ଗୋଟିଏ କଥା ସ୍ପଷ୍ଟ ଭାବେ ଦର୍ଶାଉଛି ଯେ ବିଜେଡିରେ ସବୁକିଛି ଠିକ୍ ନାହିଁ। ଦଳର ଭିତର ସ୍ଥିତି ଏବେ ଅତ୍ୟନ୍ତ ଦୋହଲି ଯାଇଛି। ରାଜନୈତିକ ବିଶ୍ଳେଷକମାନଙ୍କ ମଧ୍ୟରେ ଏବେ ଏକ ବଡ଼ ଆଲୋଚନା ଆରମ୍ଭ ହୋଇଛି ଯେ, ସୁଜାତାଙ୍କର ଏହି ବିଜେଡି ପ୍ରବେଶ ଏବଂ ପାଣ୍ଡିଆନଙ୍କର ପୁଣି ଥରେ ପଛପଟୁ ଦଳକୁ ନିୟନ୍ତ୍ରଣ କରିବା ଚେଷ୍ଟା, ଦଳକୁ ମହାରାଷ୍ଟ୍ରର ଶିବସେନା କିମ୍ବା ପଶ୍ଚିମବଙ୍ଗର ଟିଏମସି (TMC) ଭଳି ପରିସ୍ଥିତି ଆଡ଼କୁ ନେଇଯାଇପାରେ।
କାହିଁକି ହେଉଛି ଏଭଳି ଆଲୋଚନା?
ଶିବସେନାରେ ଯେତେବେଳେ ପୁରୁଖା ନେତାମାନଙ୍କୁ ବାଦ୍ ଦେଇ କିଛି ବାହାର ଲୋକ କିମ୍ବା ଅନୁଗତଙ୍କୁ ପ୍ରାଧାନ୍ୟ ଦିଆଗଲା, ସେତେବେଳେ ଏକନାଥ ସିନ୍ଦେଙ୍କ ନେତୃତ୍ୱରେ ଦଳ ଦୁଇ ଭାଗ ହୋଇଗଲା। ଠିକ୍ ସେହିପରି ଟିଏମସି ଭିତରେ ମଧ୍ୟ ପୁରୁଖା ନେତା ଏବଂ ଅଭିଷେକ ବାନାର୍ଜୀଙ୍କ ଯୁବ ଗୋଷ୍ଠୀ ମଧ୍ୟରେ ସବୁବେଳେ ଟକ୍କର ଚାଲିଛି। ବିଜେଡିରେ ମଧ୍ୟ ଯଦି ପୁରୁଖା ଓଡ଼ିଆ ନେତାମାନଙ୍କୁ ଦଳରେ କୋଣଠେସା କରାଯାଏ, ତେବେ ଆଗାମୀ ଦିନରେ ବିଜେଡି ଭାଙ୍ଗିବା ସହ ଏକ ବଡ଼ ବିଦ୍ରୋହର ସୂତ୍ରପାତ ହୋଇପାରେ, ଯାହାର ସିଧାସଳଖ ଫାଇଦା ବିଜେପି (BJP) କୁ ମିଳିବ।
ରାଜନୀତିରେ କେହି କାହାର ଚିରସ୍ଥାୟୀ ବନ୍ଧୁ ନୁହନ୍ତି କି ଶତ୍ରୁ ନୁହନ୍ତି, ଏବଂ କେହି କାହାର ‘କ୍ରୀତଦାସ’ ମଧ୍ୟ ନୁହନ୍ତି। ସମୟ ବଦଳିବା ସହ ସମୀକରଣ ବଦଳିଯାଏ। ବବି ଦାସଙ୍କ ଭଳି ଟାଣୁଆ ନେତାଙ୍କର ଦୂରତା ଏବଂ ପୁରୁଖା ନେତାଙ୍କ ଏହି ନୀରବତା ଆଗାମୀ ଦିନରେ ଓଡ଼ିଶା ରାଜନୀତିକୁ କେଉଁ ମୋଡ଼କୁ ନେଉଛି, ତାହା ଦେଖିବା ବାକି ରହିଲା। କଣ ନବୀନ ବାବୁ ସୁଜାତାଙ୍କ ମାଧ୍ୟମରେ ଦଳକୁ ପୁଣି ସଂଗଠିତ କରିପାରିବେ, ନା ଏହି ନିଷ୍ପତ୍ତି ବିଜେଡିର ପତନର କାରଣ ସାଜିବ?
AlsoRead; https://purvapaksa.com/the-historic-explosion-of-the-glorious-sun-on-irish-soil/
