ମେ ୧ରେ ଚୋରୟାସି (ଗୁଜରାଟ) ଏବଂ ମଇ ୧୧ରେ ମୁଣ୍ଡକା (ଦିଲ୍ଲୀ)ରେ କାର୍ଯ୍ୟାନ୍ୱୟନ ପରେ, NHAI ଏବେ ପୁରୁଣା ଦିଲ୍ଲୀ-ଜୟପୁର ଏକ୍ସପ୍ରେସୱେ (NH-48) ବାଧାମୁକ୍ତ କରିବାକୁ ପ୍ରସ୍ତୁତ ହେଉଛି । ଏହି ରାଜପଥରେ ତିନୋଟି ଟୋଲ୍ ପ୍ଲାଜା ଅଛି, ଏବଂ ଏହି ଜୁନ୍ ମାସରେ ଏହାକୁ ବାଧାମୁକ୍ତ କରାଯିବ । ଏହି ପ୍ରକ୍ରିୟା ଜୟପୁର ନିକଟ ଦୌଲତପୁରା ଟୋଲ୍ ପ୍ଲାଜା ସହିତ ଆରମ୍ଭ ହେବ, ତା’ପରେ ଶାହଜାହାନପୁର ଏବଂ ମନୋହରପୁର ଟୋଲ୍ ପ୍ଲାଜାରେ କାର୍ଯ୍ୟକାରୀ ହେବ ।
NHAI ଅଧିକାରୀମାନେ କ’ଣ କହିଛନ୍ତି
NHAI ଅଧିକାରୀମାନେ କହିଛନ୍ତି ଯେ, ବାଧାମୁକ୍ତ କାର୍ଯ୍ୟକୁ ସକ୍ଷମ କରିବା ପାଇଁ ପୁରୁଣା ଦିଲ୍ଲୀ-ଜୟପୁର NH-48 ଏକ୍ସପ୍ରେସୱେର ସମସ୍ତ ତିନୋଟି ଟୋଲ୍ ପ୍ଲାଜାରେ AI-ଆଧାରିତ ସିଷ୍ଟମ୍ ସ୍ଥାପନ କରାଯାଇଛି । ଏହି ସିଷ୍ଟମ୍ ଦ୍ୱାରା ଯାନବାହାନଗୁଡ଼ିକୁ ପ୍ଲାଜାରେ ଅଟକି ନଯାଇ ଟୋଲ୍ ଟିକସ କାଟି ହେବ।
ଜୁନ୍ ୧୦ ସୁଦ୍ଧା ବାଧାମୁକ୍ତ ହେବାର ଆଶା
ଏହି ପଦକ୍ଷେପ ଦ୍ୱାରା ସାଧାରଣତଃ ଭିଡ଼ ସମୟରେ ଟୋଲ୍ ପ୍ଲାଜାରେ ଲାଗିଥିବା ଯାନବାହାନର ଧାଡ଼ି ଦୂର ହେବ । ଅଧିକାରୀମାନେ କହିଛନ୍ତି ଯେ ଦୌଲତପୁରା ଟୋଲ୍ ପ୍ଲାଜା ପ୍ରଥମ ବାଧାମୁକ୍ତ ହେବ, ଜୁନ୍ ୧୦ ପାଖାପାଖି ପରିବର୍ତ୍ତନ ଆଶା କରାଯାଉଛି । ପରବର୍ତ୍ତୀ ସମୟରେ, ଏହି ରୁଟରେ ଥିବା ବାକି ଦୁଇଟି ଟୋଲ୍ ପ୍ଲାଜା ମଧ୍ୟ ମାସ ଶେଷ ସୁଦ୍ଧା ବାଧାମୁକ୍ତ ହୋଇଯିବ।
ଟୋଲ୍ ଚୋରି ରୋକିବା
ମନ୍ତ୍ରାଳୟ ଅନୁଯାୟୀ, ସେପ୍ଟେମ୍ବର ସୁଦ୍ଧା ବଦରପୁର-ଫରିଦାବାଦ ଟୋଲ୍ ପ୍ଲାଜା ମଧ୍ୟ ବାଧାମୁକ୍ତ ହୋଇଯିବ । ପ୍ରଥମ ପର୍ଯ୍ୟାୟରେ ଦିଲ୍ଲୀ, ହରିୟାଣା ଏବଂ ରାଜସ୍ଥାନ ସମେତ ନଅଟି ରାଜ୍ୟରେ ୧୭ଟି ଟୋଲ୍ ପ୍ଲାଜା ଏହି ତାଲିକାର ଅନ୍ତର୍ଭୁକ୍ତ ହୋଇଛି । ଜୁନ୍ ସୁଦ୍ଧା, ହରିୟାଣାର ଘାରାଉଣ୍ଡା ଟୋଲ୍ ପ୍ଲାଜା ଏବଂ ରାଜସ୍ଥାନର ଦୌଲତପୁରା, ମନୋହରପୁରା ଏବଂ ଶାହଜାହାନପୁର ଟୋଲ୍ ପ୍ଲାଜାକୁ ମଧ୍ୟ ଏହି ବ୍ୟବସ୍ଥାରେ ସଂଯୁକ୍ତ କରାଯିବ । ମାର୍ଚ୍ଚ ୨୦୨୭ ସୁଦ୍ଧା ଦେଶବ୍ୟାପୀ ୧୦୮ଟି ଟୋଲ୍ ପ୍ଲାଜାକୁ ବାଧାମୁକ୍ତ କରିବାର ଯୋଜନା ରହିଛି । ନୂତନ ପ୍ରଯୁକ୍ତିବିଦ୍ୟା ଟୋଲ୍ ଚୋରି ରୋକିବା ଏବଂ ମାନବ ହସ୍ତକ୍ଷେପକୁ କମ କରିବାରେ ମଧ୍ୟ ସାହାଯ୍ୟ କରିବ ।
