ଆଉ ମାତ୍ର ଦୁଇ ପରେ ପଶ୍ଚିମବଙ୍ଗ ବିଧାନସଭାର ପ୍ରଥମ ପର୍ଯ୍ୟାୟ ନିର୍ବାଚନର ଭୋଟ ଗ୍ରହଣ ହେବ। ଏଥିପାଇଁ ରାଜନୈତିକ ପାରଦ ଏବେ ଶୀର୍ଷରେ। ଗୋଟିଏ ପଟେ କ୍ଷମତା ବଞ୍ଚାଇବା ପାଇଁ ତୃଣମୂଳ କଂଗ୍ରେସ (TMC) ନିଜର ସମସ୍ତ ଶକ୍ତି ଲଗାଇ ଦେଇଥିବାବେଳେ, ଅନ୍ୟପଟେ ବଙ୍ଗ ଦଖଲ ପାଇଁ ବିଜେପି ନିଜର ଶାଣିତ ଅସ୍ତ୍ର ପ୍ରୟୋଗ କରିବା ଆରମ୍ଭ କରିଛି। କିନ୍ତୁ ଏଥର ଲଢ଼େଇ କେବଳ ଭୋଟ୍ ବା ବିକାଶରେ ସୀମିତ ନାହିଁ; ଏହା ଏବେ ଖାଇବା ଥାଳି ଏବଂ ଆମିଷ ରାଜନୀତି ପର୍ଯ୍ୟନ୍ତ ପହଞ୍ଚିଛି। ଆସାମ ମୁଖ୍ୟମନ୍ତ୍ରୀ ତଥା ବିଜେପିର ଷ୍ଟାର୍ ପ୍ରଚାରକ ହିମନ୍ତ ବିଶ୍ୱ ଶର୍ମାଙ୍କ ଏକ ସାମ୍ପ୍ରତିକ ବୟାନ ପୂରା ଦେଶରେ ଚର୍ଚ୍ଚାର ବିଷୟ ପାଲଟିଛି। ହିମନ୍ତ ସିଧାସଳଖ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ‘ମାଂସ ଖାଇବା ପ୍ରତିଯୋଗିତା’ ପାଇଁ ଆହ୍ୱାନ ଦେଇ ବଙ୍ଗ ରାଜନୀତିରେ ଏକ ନୂଆ ଝଡ଼ ସୃଷ୍ଟି କରିଛନ୍ତି।
ଅପପ୍ରଚାର ବନାମ ଅସଲ ସତ୍ୟ: କଣ ଥିଲା ହିମନ୍ତଙ୍କ ଚ୍ୟାଲେଞ୍ଜ?
ଅଲିପୁରଦ୍ୱାରରେ ଆୟୋଜିତ ଏକ ବିଶାଳ ଜନସଭାକୁ ସମ୍ବୋଧିତ କରି ହିମନ୍ତ ବିଶ୍ୱ ଶର୍ମା ଟିଏମସିର ସେହି ପ୍ରଚାରକୁ ଖଣ୍ଡନ କରିଛନ୍ତି, ଯେଉଁଥିରେ କୁହାଯାଉଥିଲା ଯେ ବିଜେପି ଆସିଲେ ବଙ୍ଗାଳୀଙ୍କ ଖାଦ୍ୟପେୟ ଉପରେ କଟକଣା ଲାଗିବ। ଟିଏମସି ଅଭିଯୋଗ କରିଥିଲା ଯେ ବିଜେପି ଶାସନକୁ ଆସିଲେ ମାଛ ଓ ମାଂସ ଖାଇବା ଉପରେ ରୋକ୍ ଲଗାଯିବ।
ଏହାର କଡ଼ା ଜବାବ ଦେଇ ହିମନ୍ତ କହିଛନ୍ତି, “ମମତା ଦିଦି ଲୋକଙ୍କୁ ଭୟଭୀତ କରୁଛନ୍ତି। ସେ ଭାବୁଛନ୍ତି ବିଜେପି ଆସିଲେ ବୋଧେ ବିଫ୍ ବିକ୍ରି ବନ୍ଦ ହୋଇଯିବ, କିନ୍ତୁ ସେ ମାଛ, ମଟନ୍ ଏବଂ ଚିକେନ୍ ନାଁ ନେଇ ବଙ୍ଗର ସାଧାରଣ ଲୋକଙ୍କୁ ବିଭ୍ରାନ୍ତ କରୁଛନ୍ତି।” ସେ ଆହୁରି ମଧ୍ୟ କହିଛନ୍ତି ଯେ, ଆସାମ ଏକ ବିଜେପି ଶାସିତ ରାଜ୍ୟ ହୋଇଥିଲେ ମଧ୍ୟ ସେଠାରେ ନନ୍-ଭେଜ୍ ଖାଦ୍ୟ ଉପରେ କୌଣସି କଟକଣା ନାହିଁ। ମମତାଙ୍କୁ ଏକପ୍ରକାର ପରିହାସ କରି ସେ କହିଛନ୍ତି, “ଦିଦି, ଆସନ୍ତୁ ଆମେ ଏକ ମାଂସ ଖାଇବା ପ୍ରତିଯୋଗିତା କରିବା। ମୁଁ ଆପଣଙ୍କଠାରୁ ଅତି କମରେ ୨ କିଲୋ ଅଧିକ ମାଂସ ଖାଇକି ଦେଖାଇ ଦେବି।” ରାଜନୈତିକ ମଇଦାନରେ ଏଭଳି ବ୍ୟକ୍ତିଗତ ଖାଦ୍ୟଶୈଳୀକୁ ନେଇ ଚ୍ୟାଲେଞ୍ଜ ପୂର୍ବରୁ କେବେ ଦେଖିବାକୁ ମିଳିନଥିଲା।
ଖାଦ୍ୟ ଥାଳିରୁ ଖୋଲିଲା ‘ଅନୁପ୍ରବେଶ’ର ପେଡ଼ି
ହିମନ୍ତଙ୍କ ଏହି ବୟାନ କେବଳ ହାସ୍ୟରସ କିମ୍ବା ଖାଦ୍ୟରେ ସୀମିତ ନଥିଲା। ଏହା ପଛରେ ଥିଲା ଏକ ବଡ଼ ରାଜନୈତିକ ରଣନୀତି। ସେ ପଶ୍ଚିମବଙ୍ଗର ଜନସଂଖ୍ୟା ପରିବର୍ତ୍ତନ ଏବଂ ବାଂଲାଦେଶୀ ଅନୁପ୍ରବେଶ ପ୍ରସଙ୍ଗକୁ ପୁଣି ଥରେ ସାମ୍ନାକୁ ଆଣିଛନ୍ତି। ତାଙ୍କ ମତରେ, ଟିଏମସି ସରକାର ଅନୁପ୍ରବେଶକାରୀଙ୍କୁ ପ୍ରଶ୍ରୟ ଦେଇ ପଶ୍ଚିମବଙ୍ଗର ଅସ୍ତିତ୍ୱକୁ ସଂକଟରେ ପକାଉଛନ୍ତି। “ଯଦି ମମତା ବାନାର୍ଜୀଙ୍କୁ କ୍ଷମତାରୁ ହଟା ନଯାଏ, ତେବେ ବାଂଲାଦେଶୀ ମୁସଲମାନମାନେ ଆପଣଙ୍କଠାରୁ ଆପଣଙ୍କର ରାଜ୍ୟକୁ ଛଡ଼ାଇ ନେବେ,” ବୋଲି ସେ ଚେତାବନୀ ଦେଇଛନ୍ତି।
ନିର୍ବାଚନୀ ସମୀକରଣ: ୨୦୨୬ର ଗୋଟି ଚାଳନା
୨୦୨୬ ପଶ୍ଚିମବଙ୍ଗ ନିର୍ବାଚନ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବାକୁ ଯାଉଛି। ୨୯୪ଟି ଆସନ ପାଇଁ ୨୩ ଅପ୍ରେଲ ଏବଂ ୨୯ ଅପ୍ରେଲରେ ମତଦାନ ହେବ। ଏହି ନିର୍ବାଚନରେ ବିଜେପି ନିଜର ‘ହେଭିୱେଟ୍’ ନେତାଙ୍କୁ ମଇଦାନକୁ ଓହ୍ଲାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ହିମନ୍ତ ବିଶ୍ୱ ଶର୍ମା ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଭଳି ନେତାମାନେ ବଙ୍ଗର ବିଭିନ୍ନ ପ୍ରାନ୍ତରେ ରାଲି କରୁଛନ୍ତି।
ଟିଏମସି ଏଥର ମଧ୍ୟ ‘ବଙ୍ଗାଳୀ ଅସ୍ମିତା’ ଏବଂ ‘ବାହାରି ବନାମ ଘରୋଇ’ କାର୍ଡ ଖେଳୁଥିବା ବେଳେ ବିଜେପି ସେହି ଅସ୍ତ୍ରକୁ ଖଣ୍ଡନ କରିବା ପାଇଁ ହିମନ୍ତଙ୍କ ଭଳି ପଡ଼ୋଶୀ ରାଜ୍ୟର ନେତାଙ୍କୁ ବ୍ୟବହାର କରୁଛି। ହିମନ୍ତଙ୍କ ‘ମାଂସ ଚ୍ୟାଲେଞ୍ଜ’ର ଉଦ୍ଦେଶ୍ୟ ହେଉଛି ବଙ୍ଗାଳୀ ଭୋଟରଙ୍କୁ ବୁଝାଇବା ଯେ, ବିଜେପି ସେମାନଙ୍କ ସଂସ୍କୃତି କିମ୍ବା ଖାଦ୍ୟପେୟର ବିରୋଧୀ ନୁହେଁ।
ରାଜନୀତିର ଏହା କେଉଁ ମୋଡ଼?
ସାଧାରଣତଃ ନିର୍ବାଚନୀ ପ୍ରସଙ୍ଗ ଶିକ୍ଷା, ସ୍ୱାସ୍ଥ୍ୟ, ବେକାରୀ ଏବଂ ଶିଳ୍ପାୟନ ହେବା କଥା। କିନ୍ତୁ ପଶ୍ଚିମବଙ୍ଗରେ ଲଢ଼େଇ ଏବେ ମାଛ, ମାଂସ ଏବଂ ଧାର୍ମିକ ପୋଲାରାଇଜେସନ୍ ଉପରେ କେନ୍ଦ୍ରୀଭୂତ ହେଉଛି। ହିମନ୍ତ ବିଶ୍ୱ ଶର୍ମାଙ୍କ ଏହି ଓପନ୍ ଚ୍ୟାଲେଞ୍ଜ ଉପରେ ଟିଏମସିର ପ୍ରତିକ୍ରିୟା ଏବେ ଅପେକ୍ଷିତ। କିନ୍ତୁ ଏକଥା ସ୍ପଷ୍ଟ ଯେ, ୨୦୨୬ ନିର୍ବାଚନରେ ଭୋଟରଙ୍କ ମନ ଜିତିବା ପାଇଁ ନେତାମାନେ ଏବେ ଗୁଳି-ଗୋଳା ବଦଳରେ ‘ଖାଦ୍ୟ ଥାଳି’ର ମାର୍ଗ ଆପଣାଇଛନ୍ତି।
ତେବେ ରାଜନୀତିରେ ଖାଦ୍ୟକୁ ନେଇ ଏଭଳି ଚ୍ୟାଲେଞ୍ଜ ଦେବା କେତେଦୂର ଠିକ୍?
also read : https://purvapaksa.com/the-young-woman-has-been-a-victim-of-tcss-corporate-jihad/
