ଓଡ଼ିଶା ରାଜନୀତିର ଏକଛତ୍ରପତି ଭାବେ ଦୀର୍ଘ ୨୪ ବର୍ଷ ଶାସନ କରିଥିବା ନବୀନ ପଟ୍ଟନାୟକ ଏବେ ବୟସର ଅପରାହ୍ନରେ। ବିଜୁ ଜନତା ଦଳର ପ୍ରତିଷ୍ଠା ଦିବସରେ ଯେଉଁ ଦୃଶ୍ୟ ଶଙ୍ଖ ଭବନରେ ଦେଖିବାକୁ ମିଳିଲା, ତାହା କେବଳ ଦଳୀୟ କର୍ମକର୍ତ୍ତା ନୁହଁନ୍ତି, ବରଂ ସମଗ୍ର ଓଡ଼ିଶାବାସୀଙ୍କ ମନରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି। “ବିଜେଡି ଆଗାମୀ ୧୦୦ ବର୍ଷ ପର୍ଯ୍ୟନ୍ତ ଓଡ଼ିଆଙ୍କ ସ୍ୱର ହୋଇ ରହିବ” ବୋଲି ନବୀନ ଘୋଷଣା ତ କରିଛନ୍ତି, କିନ୍ତୁ ତାଙ୍କର ଶାରୀରିକ ସ୍ଥିତି ଏହି ଦୃଢ଼ୋକ୍ତି ସହ ତାଳ ମେଳ ଖାଉ ନଥିବା ପରି ମନେହେଉଛି। ଏକଥା ଆମେ କହୁ ନାହୁଁ, ଏହା ତାଙ୍କ ଶରୀର କହୁଛି। ଥରେ ଏଇ ଭିଡିଓଟିକୁ ଦେଖନ୍ତୁ
ଭାଷଣ ପଢ଼ିବାରେ ଅସମର୍ଥ: ଶରୀର କହୁଛି ଅଲଗା କଥା
ପ୍ରତିଷ୍ଠା ଦିବସର ଉତ୍ସବରେ ନବୀନ ପଟ୍ଟନାୟକଙ୍କ ଉଦବୋଧନ ସମୟର ଚିତ୍ର ବେଶ୍ କଷ୍ଟଦାୟକ ଥିଲା। ଜଣେ ନେତା ଯିଏ ଦିନେ ନିଜର ଶାନ୍ତ କିନ୍ତୁ ଦୃଢ଼ ସ୍ୱରରେ ବିରୋଧୀଙ୍କୁ ଧୂଳି ଚଟାଉଥିଲେ, ଆଜି ସେ ନିଜର ଲିଖିତ ଭାଷଣ ପଢ଼ିବାକୁ ସଂଘର୍ଷ କରୁଛନ୍ତି।
ଭାଷଣ ଦେବା ସମୟରେ ଅନେକ ବାର ତାଙ୍କ ସ୍ୱର ଦବି ଯାଉଥିଲା। ଗୋଟିଏ ଧାଡ଼ି ପଢ଼ିବା ପରେ ପରବର୍ତ୍ତୀ ଧାଡ଼ି ପାଇଁ ତାଙ୍କୁ ବହୁତ ସମୟ ଅପେକ୍ଷା କରିବାକୁ ପଡ଼ୁଥିଲା। ତାଙ୍କର ଥରୁଥିବା ହାତ ଏବଂ ଭାଷଣ ପଢ଼ିବା ପାଇଁ କରୁଥିବା ଅକ୍ଲାନ୍ତ ଚେଷ୍ଟା ସୂଚାଉଛି ଯେ, ବାର୍ଦ୍ଧକ୍ୟଜନିତ ଅସୁସ୍ଥତା ଏବେ ତାଙ୍କ ରାଜନୈତିକ ସକ୍ରିୟତା ଉପରେ ଏକ ବଡ଼ ପ୍ରତିବନ୍ଧକ ସାଜିଛି।
୧୦୦ ବର୍ଷର ଦାବି: ଆତ୍ମବିଶ୍ୱାସ ନା ଆତ୍ମବଞ୍ଚନା?
ନବୀନ କହିଛନ୍ତି ଯେ ବିଜେଡି ୧୦୦ ବର୍ଷ ତିଷ୍ଠିବ। ଜଣେ ଆଦର୍ଶବାଦୀ ନେତା ଭାବେ ଏହି ବାଣୀ ଶୁଣିବାକୁ ଭଲ ଲାଗିପାରେ, କିନ୍ତୁ ବାସ୍ତବତା ହେଉଛି— କୌଣସି ଆଞ୍ଚଳିକ ଦଳ ତା’ର ଶକ୍ତିଶାଳୀ ନେତୃତ୍ୱ ବିନା ଦୀର୍ଘକାଳ ତିଷ୍ଠି ରହିବା କଷ୍ଟକର।
ନବୀନଙ୍କ ପରେ କିଏ? ଏହି ପ୍ରଶ୍ନର ଉତ୍ତର ବିଜେଡି ପାଖରେ ନାହିଁ
ଯେତେବେଳେ ମୁଖ୍ୟ ନେତା ନିଜେ କର୍ମୀଙ୍କ ସହ ସିଧାସଳଖ ଯୋଡ଼ି ହେବାକୁ ଶାରୀରିକ ଭାବେ ଅକ୍ଷମ ହୁଅନ୍ତି, ସେତେବେଳେ ଦଳ ମଧ୍ୟରେ ଫାଟ ସୃଷ୍ଟି ହେବା ସ୍ୱାଭାବିକ। ନବୀନଙ୍କ ଏହି ଅସୁସ୍ଥତା ହିଁ ଦଳରେ ‘ଉତ୍ତରାଧିକାରୀ’ ବିବାଦକୁ ଅଧିକ ତେଜିଛି।
ଅସୁସ୍ଥତା ଓ ଦଳ ମଧ୍ୟରେ କ୍ଷମତା ଯୁଦ୍ଧ
ନବୀନଙ୍କ ଦୁର୍ବଳତାର ସୁଯୋଗ ନେଇ ଦଳ ଏବେ ବିଭିନ୍ନ ଗୋଷ୍ଠୀରେ ବିଭକ୍ତ ହେବାରେ ଲାଗିଛି।
ପାଣ୍ଡିଆନଙ୍କ ସମର୍ଥକମାନେ ଚାହୁଁଛନ୍ତି ନବୀନଙ୍କ ଅସୁସ୍ଥତା ସମୟରେ ସେମାନେ ଦଳକୁ ନିଜ ନିୟନ୍ତ୍ରଣରେ ରଖିବେ।
ଅରୁଣ ସାହୁ, ବବି ଦାସ ଓ ରଣେନ୍ଦ୍ର ସ୍ୱାଇଁଙ୍କ ଭଳି ନେତାମାନେ ନିଜର ଅସ୍ତିତ୍ୱ ରକ୍ଷା ପାଇଁ ସୁଜାତା କାର୍ତ୍ତିକେୟନଙ୍କ ଭଳି ନୂଆ ଏଣ୍ଟ୍ରିକୁ ବିରୋଧ କରୁଛନ୍ତି। ନବୀନଙ୍କ ଅସୁସ୍ଥତା ଏହି ଦୁଇ ଗୋଷ୍ଠୀ ମଧ୍ୟରେ ଥିବା ଖାଇକୁ ଅଧିକ ପ୍ରଶସ୍ତ କରିଛି। କର୍ମୀମାନେ ଏବେ ଦ୍ୱନ୍ଦ୍ୱରେ— ସେମାନେ ନବୀନଙ୍କ ଆଦେଶ ପାଳନ କରିବେ ନା ତାଙ୍କ ନାମରେ ନିଷ୍ପତ୍ତି ନେଉଥିବା ପରଦା ପଛର ନେତାଙ୍କ କଥା ମାନିବେ?
ଗଣତନ୍ତ୍ରରେ ନେତୃତ୍ୱର ଦାୟିତ୍ୱ
ରାଜନୀତିରେ ସକ୍ରିୟ ରହିବା ପାଇଁ କେବଳ ବୁଦ୍ଧି ନୁହେଁ, ଶାରୀରିକ ସାମର୍ଥ୍ୟ ମଧ୍ୟ ଆବଶ୍ୟକ। ଜଣେ ବିରୋଧୀ ଦଳ ନେତା ଭାବେ ନବୀନଙ୍କୁ ଲୋକଙ୍କ ପାଖକୁ ଯିବାକୁ ପଡ଼ିବ, ସରକାରଙ୍କୁ ଘେରିବାକୁ ପଡ଼ିବ ଏବଂ ରାସ୍ତାକୁ ଓହ୍ଲାଇବାକୁ ପଡ଼ିବ। କିନ୍ତୁ ଯିଏ ନିଜର ଭାଷଣ ପଢ଼ିବାକୁ ସଂଘର୍ଷ କରୁଛନ୍ତି, ସେ କିଭଳି ଭାବେ ଶାସକ ଦଳର ମୁକାବିଲା କରିବେ?
ଏହା କହିବା ଭୁଲ୍ ହେବ ନାହିଁ ଯେ, ବିଜେଡି ଏବେ ‘ନବୀନ ବ୍ରାଣ୍ଡ’ର ବଳରେ ଚାଲିଛି, କିନ୍ତୁ ସେହି ବ୍ରାଣ୍ଡର ମୁଖ୍ୟ ଚେହେରା ଏବେ ଅସ୍ତଗାମୀ ସୂର୍ଯ୍ୟ ସଦୃଶ। ଯଦି ନବୀନ ସମୟ ଥାଉ ଥାଉ ଜଣେ ସୁସ୍ଥ ଓ ଗ୍ରହଣୀୟ ଉତ୍ତରାଧିକାରୀ ବାଛି ନଥାନ୍ତି, ତେବେ ୧୦୦ ବର୍ଷ ତ ଦୂରର କଥା, ଆଗାମୀ ୫ ବର୍ଷ ମଧ୍ୟ ଦଳ ପାଇଁ ଅତ୍ୟନ୍ତ କଷ୍ଟକର ହେବ।
ବିଜେଡି ପ୍ରତିଷ୍ଠା ଦିବସରୁ ଏତିକି ସ୍ପଷ୍ଟ ଜଣାପଡ଼ୁଛି ଯେ, ନବୀନଙ୍କ ରାଜନୈତିକ ଇନିଂସ ଏବେ ଶେଷ ପର୍ଯ୍ୟାୟରେ। ତାଙ୍କର ଶାରୀରିକ ଅସୁସ୍ଥତା କେବଳ ତାଙ୍କର ବ୍ୟକ୍ତିଗତ ସମସ୍ୟା ନୁହେଁ, ଏହା ଓଡ଼ିଶାର ସବୁଠାରୁ ବଡ଼ ଆଞ୍ଚଳିକ ଦଳର ଅସ୍ତିତ୍ୱର ସଙ୍କଟ। ନବୀନ ବାବୁଙ୍କ ପ୍ରତି ସମ୍ମାନ ରଖି ମଧ୍ୟ ଏତିକି କୁହାଯାଇପାରେ ଯେ— ଶରୀର ଯେତେବେଳେ ସାଥ୍ ଦିଏ ନାହିଁ, ସେତେବେଳେ କେବଳ ଶବ୍ଦ ଜାଲରେ ଦଳକୁ ବଞ୍ଚାଇ ରଖିବା ସମ୍ଭବ ନୁହେଁ।
ଓଡ଼ିଶା ରାଜନୀତିରେ ଏବେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହେବାକୁ ଯାଉଛି, ଯାହାକୁ ଭରିବା ପାଇଁ ବିଜେପି ଓ କଂଗ୍ରେସ ନିଶ୍ଚିତ ଭାବେ ପ୍ରସ୍ତୁତ ହୋଇ ରହିଛନ୍ତି।
https://purvapaksa.com/g-ramji-law-congress-will-start-grassroots-protest-prepare-strategy-for-workers/
