ଗୋମୂତ୍ର ସ୍ୱାସ୍ଥ୍ୟ ପାଇଁ ହିତକାରକ? ଆଇଆଇଟି ମାଡ୍ରାସ ନିର୍ଦ୍ଦେଶକଙ୍କ ବୟାନକୁ ନେଇ ଜାରି ବିବାଦ

IIT Madras Directors Cow Urine Statement: ଗୋମୂତ୍ରର ଆଣ୍ଟିବ୍ୟାକ୍ଟେରିଆଲ, ଆଣ୍ଟିଫଙ୍ଗଲ ଏବଂ ପାଚନ ଉପକାରୀତା ବିଷୟରେ ଆଇଆଇଟି ମାଡ୍ରାସର ନିର୍ଦ୍ଦେଶକ ଭି କାମାକୋଟି ଦାବିରୁ ବିବାଦ ସୃଷ୍ଟି ହୋଇଥିଲା। ଅନେକ ଏହାକୁ ନକଲି ବିଜ୍ଞାନ କହୁଥିବାବେଳେ କିଛି ଏହାକୁ ସମର୍ଥନ କରିଛନ୍ତି।

• ଗୋମୂତ୍ରର ଫାଇଦା ଦାବି କଲେ ଆଇଆଇଟି ମାଡ୍ରାସ ନିର୍ଦ୍ଦେଶକ
• ନିର୍ଦ୍ଦେଶକ ଭି କାମାକୋଟିଙ୍କ ବୟାନକୁ ନେଇ ସାରାଦେଶରେ ଚର୍ଚ୍ଚା ଜୋର ଧରିଛି
• ·ଅନେକ ଲୋକ ଏହାକୁ ନକଲି ବିଜ୍ଞାନ ବୋଲି କହୁଛନ୍ତି ତ କେହି ସମର୍ଥନ କରିଛନ୍ତି

ଆଇଆଇଟି ମାଡ୍ରାସର ନିର୍ଦ୍ଦେଶକ ଭି କାମାକୋଟି ଗୋମୂତ୍ରକୁ ନେଇ କରିଥିବା ଦାବିକୁ ନେଇ ସାରାଦେଶରେ ଚର୍ଚ୍ଚା ଜୋର ଧରିଛି। ଜାନୁଆରୀ ୧୫, ୨୦୨୫ରେ ସେ ଗୋମୂତ୍ରର ଆଣ୍ଟିବ୍ୟାକ୍ଟେରିଆଲ, ଆଣ୍ଟିଫଙ୍ଗଲ ଏବଂ ପାଚନ ଉପକାରିତା ବିଷୟରେ କହିଥିଲେ। ସେ ଆହୁରି ମଧ୍ୟ ଦାବି କରିଛନ୍ତି ଯେ ଗୋମୂତ୍ର ସେବନଦ୍ୱାରା ଇରିଟେବଲ ବାଉଲ ସିଣ୍ଡ୍ରୋମ (ଆଇବିଏ) ଭଳି ହଜମ ଜନିତ ସମସ୍ୟାର ଚିକିତ୍ସା କରାଯାଇପାରିବ। ଆଇଆଇଟି ମାଡ୍ରାସ ନିର୍ଦ୍ଦେଶକ ଗୋମୂତ୍ରର ଔଷଧୀୟ ଗୁଣକୁ ସମର୍ଥନ କରିବା ପରେ ଏକ ବିତର୍କ ଆରମ୍ଭ ହୋଇଛି। ଭି କାମାକୋଟିଙ୍କ ଏହି ବୟାନକୁ ନେଇ ଅନେକଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲେ ମଧ୍ୟ କିଛି ଲୋକ ତାଙ୍କୁ ସମର୍ଥନ କରିଛନ୍ତି।

ଗୋମୂତ୍ରକୁ ନେଇ ଅନେକ ସମୟରେ ମିଶ୍ର ପ୍ରତିକ୍ରିୟା ପ୍ରକାଶ ପାଇଥାଏ। ଏହାର ସମର୍ଥକମାନେ ଏହା ସ୍ୱାସ୍ଥ୍ୟ ପାଇଁ ଲାଭଦାୟକ ବୋଲି ଦାବି କରୁଥିବାବେଳେ ବିରୋଧୀମାନେ ଏହାକୁ ଛଦ୍ମ ବିଜ୍ଞାନ ବୋଲି ସନ୍ଦେହ ପ୍ରକଟ କରିଛନ୍ତି। କିନ୍ତୁ ଏଭଳି ଦାବିର କୌଣସି ଆଧାର ଅଛି କି?

କ‘ଣ କହିଲେ କାମାକୋଟି?

ଆଇଆଇଟି ମାଡ୍ରାସର ନିର୍ଦ୍ଦେଶକ ଭି କାମାକୋଟି ଜାନୁଆରୀ ୧୫ ତାରିଖରେ ତାମିଲନାଡୁର ଚେନ୍ନାଇରେ ମାଟୁ ପୋଙ୍ଗଲ ଅବସରରେ ଏକ ‘ଗୋସୁରକ୍ଷା’ କାର୍ଯ୍ୟକ୍ରମରେ ଯୋଗଦେଇ ଯେଉଁ କଥା କହିଥିଲେ ତାହାର ଏକ ଭିଡିଓ ଭାଇରାଲ ହେବା ପରେ ବିବାଦ ଆରମ୍ଭ ହୋଇଥିଲା। ବାସ୍ତବରେ ସେହି କାର୍ଯ୍ୟକ୍ରମରେ କାମାକୋଟି ଜଣେ ସାଧୁଙ୍କ କାହାଣୀ ମଧ୍ୟ ସେୟାର କରିଥିଲେ। ଯିଏ ଗୋମୂତ୍ର ପିଇ ଜ୍ୱର ଭଲ କରିଥିବା ଦାବି କରିଥିଲେ। ସେ କହିଛନ୍ତି ଯେ ଗୋମୂତ୍ର ଖାଇବାର ୧୫ ମିନିଟ୍ ମଧ୍ୟରେ ସାଧୁଙ୍କ ଜ୍ୱର ଦୂର ହୋଇଯାଇଥିଲା।

ବିବୃତିକୁ ସମାଲୋଚନା

ଭି କାମାକୋଟିଙ୍କ ଏହି ବୟାନକୁ ବ୍ୟାପକ ସମାଲୋଚନା କରାଯାଇଥିଲା ଏବଂ ଅନେକ ଲୋକ ଏହାକୁ ଛଦ୍ମ ବିଜ୍ଞାନ ବୋଲି କହିଥିଲେ। ଦ୍ରାବିଡ଼ ମୁନେତ୍ରା କଜଗମ (ଡିଏମକେ) ନେତା ଟିକେଏସ ଏଲାନଗୋଭାନ ଏହି ବୟାନକୁ ନିନ୍ଦା କରିବା ସହ କେନ୍ଦ୍ର ସରକାର ଦେଶରେ ଶିକ୍ଷାକୁ ନଷ୍ଟ କରିବାକୁ ଚେଷ୍ଟା କରୁଛନ୍ତି ବୋଲି ଅଭିଯୋଗ କରିଛନ୍ତି। କଂଗ୍ରେସର କାର୍ତ୍ତି ଚିଦାମ୍ବରମ ମଧ୍ୟ ଆଇଆଇଟି ମାଡ୍ରାସ ନିର୍ଦ୍ଦେଶକଙ୍କୁ ଟାର୍ଗେଟ କରି ସେ ଛଦ୍ମ ବିଜ୍ଞାନର ପ୍ରଚାର ଓ ପ୍ରସାର କରୁଥିବା ଅଭିଯୋଗ କରିଛନ୍ତି। ଡକ୍ଟର୍ସ ଆସୋସିଏସନ୍ ଫର୍ ସୋସିଆଲ ଇକ୍ୱାଲିଟିର ଡାକ୍ତର ଜି.ଆର. ରବୀନ୍ଦ୍ରନାଥ ଗୋମୂତ୍ର ସେବନ ନ କରିବାକୁ ସତର୍କ କରାଇ ଦେଇ କହିଛନ୍ତି ଯେ ଏହା ବ୍ୟାକ୍ଟେରିଆ ସଂକ୍ରମଣର ଆଶଙ୍କା ରହିଛି। ତାମିଲନାଡୁ ଭାରତୀୟ ଜନତା ପାର୍ଟି (ବିଜେପି) ମୁଖ୍ୟ କେ.ଅନ୍ନାମଲାଇ ଭି.କାମାକୋଟିଙ୍କୁ ସମର୍ଥନ କରିଛନ୍ତି। ସମାଲୋଚକମାନେ ଏହି ପ୍ରସଙ୍ଗରେ ରାଜନୀତି କରୁଛନ୍ତି ବୋଲି ସେ ଅଭିଯୋଗ କରିଛନ୍ତି ଏବଂ କହିଛନ୍ତି ଯେ ଆଇଆଇଟି ମାଡ୍ରାସ ନିର୍ଦ୍ଦେଶକଙ୍କର ତାଙ୍କ ବ୍ୟକ୍ତିଗତ ମତ ରଖିବାର ଅଧିକାର ଅଛି। ଅନାମଲାଇ କହିଛନ୍ତି ଯେ ସେ କାହାକୁ ଗୋମୂତ୍ର ଖାଇବାକୁ କହିନାହାଁନ୍ତି।

ବୟାନ ଉପରେ କାୟମ କାମାକୋଟି

ବିବାଦ ବଢିବା ପରେ କାମାକୋଟି ନିଜ ବୟାନକୁ ସମର୍ଥନ କରିଥିଲେ। ସେ କହିଥିଲେ ଯେ, ଆମେରିକାରେ କରାଯାଇଥିବା ସମସ୍ତ ୫ଟି ଗବେଷଣା ପତ୍ରକୁ ମୁଁ ଆପଣଙ୍କ ଆଗରେ ରଖିବି, ଯେଉଁଥିରେ ଗୋମୂତ୍ରରେ ଲାଭଦାୟକ ଗୁଣ ରହିଛି ବୋଲି ବୈଜ୍ଞାନିକ ସ୍ତରରେ ପ୍ରମାଣିତ ହୋଇଛି। ଏହି ପ୍ରସଙ୍ଗ ପୁଣିଥରେ ପାରମ୍ପରିକ ଭାରତୀୟ ଔଷଧ ପ୍ରତି ଦୃଷ୍ଟି ଆକର୍ଷଣ କରିଛି ଯାହାର ଉପକାରିତା ଆଧୁନିକ ବିଜ୍ଞାନରେ ଏପର୍ଯ୍ୟନ୍ତ ପ୍ରମାଣିତ ହୋଇନାହିଁ।

ଗୋମୂତ୍ର ଦ୍ୱାରା କ‘ଣ ଫାଇଦା ମିଳିଥାଏ?

ହିନ୍ଦୁ ଧର୍ମରେ ଗାଈ ଏକ ପୂଜ୍ୟ ପ୍ରାଣୀ ଅଟେ। ଆୟୁର୍ବେଦରେ ଗୋମୂତ୍ରର ଚିକିତ୍ସା ବ୍ୟବହାରକୁ ଦୀର୍ଘ ଦିନ ଧରି ପ୍ରଶଂସା କରାଯାଇଛି। ତେବେ ଆଧୁନିକ ବିଜ୍ଞାନରେ ଏଭଳି ଦାବିକୁ ସମର୍ଥନ କରିବା ପାଇଁ ଖୁବ୍ କମ୍ ପ୍ରମାଣ ରହିଛି। ଗୋମୂତ୍ର ସମର୍ଥକମାନେ ଦାବି କରିଛନ୍ତି ଯେ ଏହା କର୍କଟ, ମଧୁମେହ ଏବଂ ଯକ୍ଷ୍ମା ସମେତ ଅନେକ ରୋଗକୁ ଭଲ କରିଥାଏ। ତେବେ ଏଭଳି ଦାବିକୁ ପ୍ରୋତ୍ସାହନ ନ ଦେବାକୁ ଡାକ୍ତରମାନେ ଚେତାବନୀ ଦେଇଛନ୍ତି। ଜଣେ ଡାକ୍ତର ୨୦୧୪ରେ ଏବିସି ନ୍ୟୁଜକୁ କହିଥିଲେ, ‘ମୁଁ ଭାବୁଛି ମୁଁ ଏହା କହିବାରେ ସମ୍ପୂର୍ଣ୍ଣ ସହଜ ଅନୁଭବ କରୁଛି ଯେ ଗୋମୂତ୍ର କର୍କଟ ରୋଗର ଚିକିତ୍ସା କିମ୍ବା ପ୍ରତିରୋଧରେ କାମ କରେ ବୋଲି ସୂଚାଉଥିବା କୌଣସି ତଥ୍ୟ ବିଷୟରେ ମୁଁ ଅବଗତ ନୁହେଁ। ଏହା ପ୍ରତିରୋଧ କରିବାରେ ସାହାଯ୍ୟ କରିପାରେ। କୋଭିଡ୍-୧୯ ମହାମାରୀ ସମୟରେ ଗୁଜରାଟର କିଛି ଲୋକ ଗୋ-ଆଶ୍ରୟସ୍ଥଳୀକୁ ଯାଇ ନିଜ ଶରୀରକୁ ଗୋବର ଓ ମୂତ୍ରରେ ଢାଙ୍କି ଦେଉଥିଲେ ଏବଂ ଆଶା କରୁଥିଲେ ଯେ ଏହା ସେମାନଙ୍କ ରୋଗ ପ୍ରତିରୋଧକ ଶକ୍ତି ବଢ଼ାଇବ।’

ଚେତାବନୀ ଦେଇଥିଲା ଆଇଏମଏ

ତେବେ ସେହି ସମୟରେ ଡାକ୍ତରମାନେ ଏଭଳି ଅଭ୍ୟାସ ବିରୋଧରେ ଚେତାବନୀ ଦେଇଥିଲେ। ସେହି ସମୟରେ ଇଣ୍ଡିଆନ୍ ମେଡିକାଲ ଆସୋସିଏସନ୍ (ଆଇଏମ୍ଏ)ର ରାଷ୍ଟ୍ରୀୟ ସଭାପତି ଡାକ୍ତର ଜେଏ ଜୟଲାଲ କହିଥିଲେ ଯେ, ଗୋବର କିମ୍ବା ଗୋମୂତ୍ର କୋଭିଡ୍-୧୯ ବିରୋଧରେ ରୋଗ ପ୍ରତିରୋଧକ ଶକ୍ତି ବଢ଼ାଇବାରେ କାମ କରେ ବୋଲି କୌଣସି ଠୋସ୍ ବୈଜ୍ଞାନିକ ପ୍ରମାଣ ନାହିଁ, ଏହା ସମ୍ପୂର୍ଣ୍ଣ ବିଶ୍ୱାସ ଉପରେ ଆଧାରିତ। ଏହି ଉତ୍ପାଦଗୁଡ଼ିକ ପ୍ରୟୋଗ କିମ୍ବା ଖାଇବା ସହିତ ଜଡ଼ିତ ସ୍ୱାସ୍ଥ୍ୟ ବିପଦ ମଧ୍ୟ ରହିଛି। ଅନ୍ୟାନ୍ୟ ରୋଗ ପଶୁଙ୍କଠାରୁ ମଣିଷକୁ ବ୍ୟାପିପାରେ।

Also readhttps://purvapaksa.com/saif-ali-khan-property-dispute-know-enemy-property-act-under-which-government-take-possession-on-saif-bhopal-property/

ସୈଫ୍‍ଙ୍କ ୧୫ ହଜାର କୋଟି ଟଙ୍କାର ସମ୍ପତ୍ତିକୁ କବଜାକୁ ନେଇପାରନ୍ତି ସରକାର!

Purva Paksha