“ଇଥାନୋଲ୍ ମିଶ୍ରିତ E20 ପେଟ୍ରୋଲ ବ୍ୟବହାର ଦ୍ୱାରା ଯାନବାହାନର ମାଇଲେଜ୍ କମୁଥିବା ଏବଂ ପୁରୁଣା ଇଞ୍ଜିନ୍ ଉପରେ ଏହାର ଖରାପ ପ୍ରଭାବ ପଡ଼ୁଥିବା ନେଇ ସଂସଦୀୟ କମିଟିର ସମ୍ବେଦନଶୀଳ ଆଭିମୁଖ୍ୟ। ସରକାର ଓ ପେଟ୍ରୋଲିୟମ୍ ମନ୍ତ୍ରଣାଳୟକୁ କ୍ୟାବିନେଟ୍ କମିଟି ଦେଲା କଡ଼ା ନିର୍ଦ୍ଦେଶ।”
ଦେଶରେ ପ୍ରଦୂଷଣ କମାଇବା ଏବଂ କ୍ରୁଡ୍ ଅଏଲ୍ (ଅଶୋଧିତ ତୈଳ) ଆମଦାନୀ ହ୍ରାସ କରିବା ଲକ୍ଷ୍ୟରେ କେନ୍ଦ୍ର ସରକାର ୨୦ ପ୍ରତିଶତ ଇଥାନୋଲ୍ ମିଶ୍ରିତ ପେଟ୍ରୋଲ୍ ବା ‘E20 Petrol’ ର ପ୍ରଚଳନ କରୁଛନ୍ତି। କିନ୍ତୁ ଏହି E20 ପେଟ୍ରୋଲ ବ୍ୟବହାର କରିବା ଦ୍ୱାରା ସାଧାରଣ ଯାନବାହାନର ମାଇଲେଜ୍ କମିଯାଉଥିବା ପ୍ରସଙ୍ଗରେ ସଂସଦୀୟ କମିଟି ଗଭୀର ଚିନ୍ତା ପ୍ରକଟ କରିବା ସହ ସରକାରଙ୍କୁ କଡ଼ା ପ୍ରଶ୍ନ ପଚାରିଛନ୍ତି। ଗାଡ଼ି ଚାଳକ ଏବଂ ଗ୍ରାହକମାନଙ୍କୁ ଏହି ମାଇଲେଜ୍ ହ୍ରାସ ସମ୍ପର୍କରେ ସଚେତନ କରିବା ପାଇଁ କୌଣସି ପଦକ୍ଷେପ କାହିଁକି ନିଆଯାଇ ନାହିଁ, ସେ ନେଇ ସଂସଦୀୟ ସ୍ଥାୟୀ କମିଟି ସଂପୃକ୍ତ ମନ୍ତ୍ରଣାଳୟକୁ ଜବାବ ମାଗିଛନ୍ତି।
ମାଇଲେଜ୍ ହ୍ରାସ ଓ ପୁରୁଣା ଗାଡ଼ି ଉପରେ ପ୍ରଭାବ
ସଂସଦୀୟ କମିଟି ନିଜ ରିପୋର୍ଟରେ ଦର୍ଶାଇଛି ଯେ, ଇଥାନୋଲର ଶକ୍ତି ଘନତା ପେଟ୍ରୋଲ ତୁଳନାରେ କମ୍ ଥାଏ। ଫଳରେ E20 ପେଟ୍ରୋଲ ବ୍ୟବହାର କଲେ ଯାନବାହାନଗୁଡ଼ିକର ମାଇଲେଜ୍ ପ୍ରାୟ ୬ ରୁ ୭ ପ୍ରତିଶତ ପର୍ଯ୍ୟନ୍ତ କମିଯାଇଥାଏ। ଅର୍ଥାତ୍, ଗ୍ରାହକମାନେ ସମାନ ମୂଲ୍ୟରେ ପେଟ୍ରୋଲ କିଣୁଥିଲେ ମଧ୍ୟ ସେମାନଙ୍କ ଗାଡ଼ି କମ୍ ଦୂରତା ଅତିକ୍ରମ କରୁଛି, ଯାହା ଦ୍ୱାରା ସାଧାରଣ ଲୋକଙ୍କ ଆର୍ଥିକ ବୋଝ ବୃଦ୍ଧି ପାଉଛି।
ଏହା ବ୍ୟତୀତ, ୨୦୨୩ ମସିହା ଅପ୍ରେଲ ପୂର୍ବରୁ ନିର୍ମିତ କାର୍ ଏବଂ ବାଇକ୍ଗୁଡ଼ିକର ଇଞ୍ଜିନ୍ E20 ପେଟ୍ରୋଲ୍ ସହ ସମ୍ପୂର୍ଣ୍ଣ ଅନୁକୂଳ ନୁହଁନ୍ତି। ଏହି ପୁରୁଣା ଗାଡ଼ିଗୁଡ଼ିକରେ ଉଚ୍ଚ ଇଥାନୋଲ୍ ମିଶ୍ରିତ ଇନ୍ଧନ ବ୍ୟବହାର କରିବା ଦ୍ୱାରା ଇଞ୍ଜିନ୍ର କାଟାଲିଟିକ୍ କନଭର୍ଟର, ରବର୍ ସିଲ୍ ଏବଂ ଫ୍ୟୁଏଲ୍ ପାଇପ୍ ନଷ୍ଟ ହେବାର ଆଶଙ୍କା ରହିଛି।
ସଂସଦୀୟ କମିଟିର କଡ଼ା ପ୍ରଶ୍ନ ଓ ସୁପାରିଶ
ସଂସଦୀୟ କମିଟି ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରଣାଳୟକୁ ପ୍ରଶ୍ନ କରିଛନ୍ତି ଯେ, “ଯେତେବେଳେ E20 ଇନ୍ଧନ ଯୋଗୁଁ ମାଇଲେଜ୍ କମୁଛି ଏବଂ ପୁରୁଣା ଗାଡ଼ି ଉପରେ ଏହାର ପ୍ରତିକୂଳ ପ୍ରଭାବ ପଡ଼ୁଛି, ସେତେବେଳେ ସରକାରୀ ସ୍ତରରେ ଗ୍ରାହକଙ୍କୁ ସୂଚିତ କାହିଁକି କରାଗଲା ନାହିଁ?”
କମିଟି ସରକାରଙ୍କୁ ନିମ୍ନଲିଖିତ ଗୁରୁତ୍ୱପୂର୍ଣ୍ଣ ସୁପାରିଶଗୁଡ଼ିକ କରିଛନ୍ତି:
ବ୍ୟାପକ ସଚେତନତା ଅଭିଯାନ : ପ୍ରତ୍ୟେକ ପେଟ୍ରୋଲ ପମ୍ପରେ ସ୍ପଷ୍ଟ ଭାବେ ବୋର୍ଡ ଲଗାଇ ଗ୍ରାହକଙ୍କୁ E20 ପେଟ୍ରୋଲର ଗୁଣବତ୍ତା, ମାଇଲେଜ୍ ଉପରେ ପ୍ରଭାବ ଏବଂ ଗାଡ଼ିର ଅନୁକୂଳତା ସମ୍ପର୍କରେ ସୂଚନା ଦିଆଯାଉ।
E10 ଓ ସାଧାରଣ ପେଟ୍ରୋଲର ବିକଳ୍ପ : ଯେଉଁ ଗ୍ରାହକମାନଙ୍କ ପାଖରେ ପୁରୁଣା ଗାଡ଼ି ରହିଛି, ସେମାନଙ୍କ ପାଇଁ ପେଟ୍ରୋଲ ପମ୍ପଗୁଡ଼ିକରେ E10 କିମ୍ବା ନନ-ଇଥାନୋଲ୍ (ସାଧାରଣ) ପେଟ୍ରୋଲ୍ ବିକଳ୍ପ ଉପଲବ୍ଧ କରାଯାଉ।
ଅଟୋମୋବାଇଲ୍ ସଂସ୍ଥାଙ୍କ ସହ ବୈଠକ : କାର୍ ଓ ବାଇକ୍ ନିର୍ମାତା କମ୍ପାନୀଗୁଡ଼ିକୁ ପୁରୁଣା ଗାଡ଼ିଗୁଡ଼ିକୁ E20 ଅନୁକୂଳ କରିବା ପାଇଁ ଆବଶ୍ୟକ କିଟ୍ ସ୍ୱଳ୍ପ ମୂଲ୍ୟରେ ଯୋଗାଇଦେବାକୁ ନିର୍ଦ୍ଦେଶ ଦିଆଯାଉ।
ପେଟ୍ରୋଲିୟମ୍ ମନ୍ତ୍ରଣାଳୟର ସଫାଇ
ଅନ୍ୟପକ୍ଷରେ, ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଇଥାନୋଲ୍ ବ୍ଲେଣ୍ଡିଂ କାର୍ଯ୍ୟକ୍ରମ ଦେଶର ଶକ୍ତି ସୁରକ୍ଷା ଏବଂ ପରିବେଶ ସୁରକ୍ଷା ପାଇଁ ଏକ ବୈପ୍ଲବିକ ପଦକ୍ଷେପ। ଏହା ଦ୍ୱାରା ବିଦେଶୀ ମୁଦ୍ରା ସଞ୍ଚୟ ହେବା ସହ କୃଷକମାନଙ୍କ ଆୟ ବୃଦ୍ଧି ପାଉଛି। ତେବେ ସଂସଦୀୟ କମିଟିର ସୁପାରିଶ ଅନୁଯାୟୀ, ଗ୍ରାହକମାନଙ୍କୁ ସଚେତନ କରିବା ଏବଂ ପେଟ୍ରୋଲ ପମ୍ପଗୁଡ଼ିକରେ ଆବଶ୍ୟକୀୟ ସୂଚନା ପ୍ରଦର୍ଶନ କରିବା ପାଇଁ ପଦକ୍ଷେପ ନିଆଯିବ ବୋଲି ମନ୍ତ୍ରଣାଳୟ କହିଛି।
