Tariff: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଲାଗୁ କରିଥିବା ୨୬% ପାରସ୍ପରିକ ଶୁଳ୍କ ଭାରତର ରପ୍ତାନୀ ପାଇଁ ଏକ ବଡ଼ ଝଟକା, ଯାହା ଏକାଧିକ ଶିଳ୍ପକୁ ପ୍ରଭାବିତ କରିଛି। ଜାଣନ୍ତୁ ଭାରତୀୟ ଅର୍ଥନୀତି ପାଇଁ ଏହାର ଅର୍ଥ କ’ଣ ଏବଂ ବିପଦରେ ଥିବା ପ୍ରମୁଖ କ୍ଷେତ୍ର ଉପରେ ମଧ୍ୟ ନଜର ପକାନ୍ତୁ ।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତକୁ ଏକ ବଡ଼ ବାଣିଜ୍ୟ ଝଟକା ଦେଇଛନ୍ତି ଏବଂ ୨୬% ପାରସ୍ପରିକ ଶୁଳ୍କ ଲାଗୁ କରିଛନ୍ତି। ଯାହା ଦେଶର ଅର୍ଥନୀତିକୁ ବିପର୍ଯ୍ୟସ୍ତ କରିପାରେ । ‘ମୁକ୍ତି ଦିବସ’ ଅଭିଭାଷଣରେ ଘୋଷଣା କରାଯାଇଥିବା ଏହି ପଦକ୍ଷେପ ନୂଆ ବାଣିଜ୍ୟ ପ୍ରତିବନ୍ଧକ ପରିବର୍ତ୍ତେ ଶୁଳ୍କ ରିହାତି ଆଶା ରଖିଥିବା ନୂଆଦିଲ୍ଲୀ ପାଇଁ ଏକ ଝଟକା।

ବରଂ ଏପ୍ରିଲ ୯ତାରିଖରୁ ଆମେରିକାରେ ପ୍ରବେଶ କରୁଥିବା ସମସ୍ତ ଭାରତୀୟ ସାମଗ୍ରୀ ଉପରେ ସର୍ବନିମ୍ନ ୨୬% ଶୁଳ୍କ ଲାଗୁ ହେବ, ଯାହା ଫଳରେ ବ୍ୟବସାୟୀମାନେ କ୍ଷୟକ୍ଷତି ଆକଳନ କରିବାକୁ ଅଣ୍ଟା ଭିଡ଼ିବେ।
ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ‘ମହାନ ବନ୍ଧୁ’ ବୋଲି କହୁଥିବା ବେଳେ ସେ ଦାବି କରିଛନ୍ତି ଯେ ଭାରତ ଆମେରିକୀୟ ସାମଗ୍ରୀ ଉପରେ ଅତ୍ୟଧିକ ଶୁଳ୍କ ଆଦାୟ କରୁଥିବା ବେଳେ ଆମେରିକା ଦଶନ୍ଧି ଧରି ନରମ ମନୋଭାବ ପୋଷଣ କରୁଛି।

ଟ୍ରମ୍ପ ତାଙ୍କ ଅଭିଭାଷଣରେ ସ୍ପଷ୍ଟ କରିଛନ୍ତି ଯେ ସେମାନେ (ଭାରତ) ଆମଠାରୁ ୫୨% ଶୁଳ୍କ ଆଦାୟ କରୁଛନ୍ତି ଏବଂ ଆମେ ବର୍ଷ ବର୍ଷ ଏବଂ ଦଶନ୍ଧି ଧରି ପ୍ରାୟ କିଛି ଆଦାୟ କରୁନାହୁଁ। ଭାରତ ସହ ଆମେରିକାର ବାଣିଜ୍ୟ ନିଅଣ୍ଟ ୪୬ ବିଲିୟନ ଡଲାର ରହିଛି ଏବଂ ଟ୍ରମ୍ପ ସ୍ପଷ୍ଟ କରିଛନ୍ତି ଯେ ଏହି ତଥାକଥିତ ‘ବିପଦ’ର ସମାଧାନ ନହେବା ପର୍ଯ୍ୟନ୍ତ ଏହି ଶୁଳ୍କ ବଳବତ୍ତର ରହିବ।

ଭାରତ ଉପରେ ପ୍ରଭାବ
ଭାରତ ପାଇଁ ପାରସ୍ପରିକ ଶୁଳ୍କ ଏକ ବଡ଼ ମୁଣ୍ଡବିନ୍ଧାର କାରଣ ହୋଇପାରେ। ଏହାର କାରଣ ହେଉଛି ଅନେକ ପ୍ରମୁଖ କ୍ଷେତ୍ର ଗୁରୁତର ଭାବେ ପ୍ରଭାବିତ ହେବ ଏବଂ କ୍ଷୁଦ୍ର କମ୍ପାନୀଠାରୁ ଆରମ୍ଭ କରି ବଡ଼ ବଡ଼ କମ୍ପାନୀ ପର୍ଯ୍ୟନ୍ତ ଅନେକ କମ୍ପାନୀର ରାଜସ୍ୱ ପ୍ରଭାବିତ ହେବ।

ମିଳିଥିବା ସୂଚନା ଅନୁଯାୟୀ, ରତ୍ନ, ଅଳଙ୍କାର, ଔଷଧ ଓ ଅଟୋ ପାର୍ଟସ୍ ସମେତ ୨୩ ବିଲିୟନ ଡଲାର ମୂଲ୍ୟର ଆମେରିକୀୟ ଆମଦାନୀ ଉପରେ ଶୁଳ୍କ ହ୍ରାସ କରିବାକୁ ଭାରତ ବିଚାର କରୁଛି। କିନ୍ତୁ ପରିସ୍ଥିତି ଯେମିତି ରହିଛି, ଏପର୍ଯ୍ୟନ୍ତ କୌଣସି ଚୁକ୍ତି ଚୂଡ଼ାନ୍ତ ହୋଇନାହିଁ।

ଭିଟି ମାର୍କେଟର ମାର୍କେଟ ଆନାଲିଷ୍ଟ ଅଙ୍କୁର ଶର୍ମା କହିଛନ୍ତି ଯେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ, ଜାପାନ ଏବଂ ଅନ୍ୟାନ୍ୟ ରାଷ୍ଟ୍ର ଉପରେ ପାରସ୍ପରିକ ଶୁଳ୍କ ଘୋଷଣା କରିବା ବିଶ୍ୱ ବାଣିଜ୍ୟରେ ବିଶେଷ କରି ଭାରତ ଭଳି ଉଦୀୟମାନ ଅର୍ଥନୀତି ପାଇଁ ଏକ ଗୁରୁତ୍ୱପୂର୍ଣ୍ଣ ଅଟେ।
ଆମେରିକୀୟ ସାମଗ୍ରୀ ଉପରେ ଏହି ଦେଶଗୁଡ଼ିକ ଦ୍ୱାରା ଲଗାଯାଇଥିବା ଉଚ୍ଚ ଆମଦାନୀ ଶୁଳ୍କକୁ ପ୍ରତିହତ କରିବା ଉଦ୍ଦେଶ୍ୟରେ ଏହି ଶୁଳ୍କ ଭାରତର ଅର୍ଥନୀତି, ବାଣିଜ୍ୟିକ ସମ୍ପର୍କ ଏବଂ ମୁଦ୍ରା ବଜାର ଉପରେ ଉଭୟ ସ୍ୱଳ୍ପକାଳୀନ ଏବଂ ଦୀର୍ଘମିଆଦୀ ପ୍ରଭାବ ପକାଇବ।

ବିପଦରେ ଥିବା କ୍ଷେତ୍ର
ଅଟୋ, ଫାର୍ମାସ୍ୟୁଟିକାଲ୍ସ ଏବଂ ଆଇଟି ଭଳି ଶୁଳ୍କ ଦ୍ୱାରା ସର୍ବାଧିକ ପ୍ରଭାବିତ ହେବାକୁ ଥିବା ଭାରତୀୟ କ୍ଷେତ୍ର ଗୁଡ଼ିକ ଉପରେ ଶର୍ମା ଆଲୋକପାତ କରିଥିଲେ। ସେ ଦର୍ଶାଇଛନ୍ତି ଯେ ଆମେରିକା ଆମଦାନୀ ହୋଇଥିବା ଅଟୋମୋବାଇଲ ଏବଂ ଅଟୋ ପାର୍ଟସ୍ ଉପରେ ଘୋଷଣା କରିଥିବା ୨୫% ଶୁଳ୍କ ବ୍ୟତୀତ ୨୬% ପାରସ୍ପରିକ ଶୁଳ୍କ, କାର୍ ଏବଂ ହାଲୁକା ଟ୍ରକ୍ ପାଇଁ ଏପ୍ରିଲ ୨ ରୁ ଏବଂ ଅଟୋ ପାର୍ଟସ୍ ପାଇଁ ମେ ୩ ରୁ ଲାଗୁ ହୋଇଛି

ଏବେ ଯଦି ଆମେ ଭାରତୀୟ ବଜାରକୁ ବିଚାର କରିବା ତେବେ ଆମେରିକାକୁ ଯାନ ରପ୍ତାନୀ କରୁଥିବା ଜାଗୁଆର ଲ୍ୟାଣ୍ଡରୋଭର (ଜେଏଲଆର)ର ମୂଳ କମ୍ପାନୀ ଟାଟା ମୋଟର୍ସ ଶୁଳ୍କ ଘୋଷଣା ପରେ ୫% ହ୍ରାସ ପାଇଛି। ସୋନା କମଷ୍ଟାରରେ ମଧ୍ୟ ୪ ପ୍ରତିଶତ ହ୍ରାସ ଘଟିଛି ବୋଲି ଶର୍ମା କହିଛନ୍ତି।

ଏପରିକି ଫାର୍ମା ସେକ୍ଟର ଉପରେ ଏହାର ଅଧିକ ପ୍ରଭାବ ପଡ଼ିବ ବୋଲି ଆମେ ଆଶା କରିପାରିବା। ନିର୍ଦ୍ଦିଷ୍ଟ ଶୁଳ୍କ ପ୍ରତିଶତ ବିଷୟରେ ବିସ୍ତୃତ ଭାବେ ଉଲ୍ଲେଖ କରାଯାଇ ନଥିଲେ ମଧ୍ୟ ଭାରତୀୟ ଔଷଧ ରପ୍ତାନୀ ପାଇଁ ଆମେରିକା ଏକ ଗୁରୁତ୍ୱପୂର୍ଣ୍ଣ ବଜାର। ଶୁଳ୍କ ବୃଦ୍ଧି ଯୋଗୁଁ ରପ୍ତାନୀ ରାଜସ୍ୱ ହ୍ରାସ ପାଇବାର ସମ୍ଭାବନା ରହିଛି ବୋଲି ସେ କହିଛନ୍ତି।ଅନ୍ୟ ଏକ କ୍ଷେତ୍ର ଯାହା ଶୁଳ୍କ ଯୋଗୁଁ ଗୁରୁତର ଭାବେ ପ୍ରଭାବିତ ହେବ ତାହା ହେଉଛି ଆଇଟି । ଆଇଟି ସେବା ଉପରେ ସମ୍ଭାବ୍ୟ ଶୁଳ୍କ ଲାଗୁ କରିବାକୁ ଆମେରିକା ସଙ୍କେତ ଦେଇଛି, ଯେଉଁ କ୍ଷେତ୍ରରେ ଭାରତର ଯଥେଷ୍ଟ ରପ୍ତାନୀ ରହିଛି।

ଆମେରିକାର ପାରସ୍ପରିକ ଶୁଳ୍କ ଭାରତର ଅର୍ଥନୀତି ଉପରେ ବହୁମୁଖୀ ପ୍ରଭାବ ପକାଇବ ଏବଂ ପ୍ରମୁଖ ରପ୍ତାନୀ କ୍ଷେତ୍ର ଏବଂ ଆନୁଷଙ୍ଗିକ ଶିଳ୍ପ ଉପରେ ଗୁରୁତ୍ୱପୂର୍ଣ୍ଣ ପ୍ରଭାବ ପକାଇବ। ଏହି ପ୍ରଭାବର ବ୍ୟାପକତା ଶୁଳ୍କ ଅବଧି ଏବଂ ବିକଶିତ ବାଣିଜ୍ୟ ପରିଦୃଶ୍ୟ ସହିତ ଖାପ ଖୁଆଇବା ପାଇଁ ଭାରତୀୟ ଉଦ୍ୟୋଗଗୁଡ଼ିକର କ୍ଷମତା ଉପରେ ନିର୍ଭର କରିବ ବୋଲି ଶର୍ମା କହିଛନ୍ତି।

ବାଣିଜ୍ୟ ଚୁକ୍ତି ଉପରେ ସମସ୍ତଙ୍କ ନଜର
ଆଗାମୀ ସପ୍ତାହଗୁଡ଼ିକ ଗୁରୁତ୍ୱପୂର୍ଣ୍ଣ ହେବ। ଯଦି ଭାରତ ତୁରନ୍ତ ପଦକ୍ଷେପ ନ ନିଏ, ତେବେ ଏହି ଶୁଳ୍କ ରପ୍ତାନୀ, ବାଣିଜ୍ୟିକ ସମ୍ପର୍କ ଏବଂ ସାମଗ୍ରିକ ଅର୍ଥନୈତିକ ଅଭିବୃଦ୍ଧିକୁ ଏକ ବଡ଼ ଝଟକା ଦେଇପାରେ। ସରକାରଙ୍କ ପାଖରେ ସୀମିତ ବିକଳ୍ପ ରହିଛି- ହୁଏତ ଆମେରିକୀୟ ସାମଗ୍ରୀ ଉପରେ ଆଲୋଚନା କରି ଶୁଳ୍କ ହ୍ରାସ କରନ୍ତୁ କିମ୍ବା ଦୀର୍ଘ ଦିନ ଧରି ବାଣିଜ୍ୟ ଯୁଦ୍ଧ ପାଇଁ ପ୍ରସ୍ତୁତ ହୁଅନ୍ତୁ।

ଗୋଟିଏ କଥା ସ୍ପଷ୍ଟ: ଟ୍ରମ୍ପଙ୍କ ୨୬% ଶୁଳ୍କ ଏକ ସିଧାସଳଖ ଆହ୍ୱାନ ଏବଂ ଏହାର ପ୍ରଭାବକୁ ହ୍ରାସ କରିବା ପାଇଁ ଭାରତକୁ ଦ୍ରୁତ ରଣନୀତି ପ୍ରସ୍ତୁତ କରିବାକୁ ପଡିବ ।

Previous article: https://purvapaksa.com/budget-session-ends-university-amendment-bill-passed/

ବିଶ୍ୱବିଦ୍ୟାଳୟ ସଂଶୋଧନ ବିଲ ପାରିତ ସହ ସରିଲା ବଜେଟ ଅଧିବେଶନ