ଭାରତୀୟ ରାଜନୀତିରେ ପଶ୍ଚିମବଙ୍ଗ ସବୁବେଳେ ଏକ ଚର୍ଚ୍ଚାର କେନ୍ଦ୍ରବିନ୍ଦୁ ହୋଇ ରହିଆସିଛି। ଆଉ ଯେତେବେଳେ ପଶ୍ଚିମବଙ୍ଗ ନିର୍ବାଚନ କଥା ଉଠେ, ସେତେବେଳେ ଗୋଟିଏ ଶବ୍ଦ ସବୁଠାରୁ ଅଧିକ ଶୁଣିବାକୁ ମିଳେ – ତାହା ହେଉଛି ‘ମୁସଲିମ୍ ଫ୍ୟାକ୍ଟର’।
କେମିତି ମମତା ବାନାର୍ଜୀଙ୍କ ପାଇଁ ଏହି ମୁସଲିମ୍ ଭୋଟ୍ ବ୍ୟାଙ୍କ ଏକ ଅଜୟ ଦୁର୍ଗ ପାଲଟିଛି। କାହିଁକି ବିଜେପି ଏତେ ଚେଷ୍ଟା ପରେ ବି ଏହି କାନ୍ଥକୁ ଭାଙ୍ଗି ପାରୁନାହିଁ? ୭୦ ପ୍ରତିଶତ ହିନ୍ଦୁ ଭୋଟ୍ର ଥାଇ ମଧ୍ୟ କାହିଁକି ୨୭ ପ୍ରତିଶତ ମୁସଲିମ୍ ଭୋଟ୍ର ହିଁ ସ୍ଥିର କରୁଛନ୍ତି କିଏ ହେବ ବଙ୍ଗଳାର ମୁଖ୍ୟମନ୍ତ୍ରୀ? ଏବଂ ସବୁଠାରୁ ବଡ଼ ପ୍ରଶ୍ନ – ମୁସଲିମ୍ ଭୋଟ୍ କେବଳ ମମତାଙ୍କୁ ହିଁ କାହିଁକି ମିଳୁଛି? କଂଗ୍ରେସ ଏବଂ ବାମଦଳ କୁଆଡ଼େ ଗଲେ?
ପଶ୍ଚିମବଙ୍ଗର ଜନସଂଖ୍ୟାକୁ ଯଦି ଆମେ ଦେଖିବା, ତେବେ ଏଠାରେ ପ୍ରାୟ ୭୦% ହିନ୍ଦୁ ଏବଂ ୨୭% ମୁସଲିମ୍ ବସବାସ କରନ୍ତି। ସାଧାରଣ ଦୃଷ୍ଟିରୁ ଦେଖିଲେ ମନେହେବ ଯେ ୭୦% ହିନ୍ଦୁ ଭୋଟ୍ ନିର୍ବାଚନ ଜିତିବା ପାଇଁ ଯଥେଷ୍ଟ। କିନ୍ତୁ ବାସ୍ତବତା ସମ୍ପୂର୍ଣ୍ଣ ଅଲଗା।
ଏଠାରେ ମୁସଲିମ୍ ଭୋଟ୍ରମାନେ ନିର୍ଣ୍ଣାୟକ ଭୂମିକା ଗ୍ରହଣ କରନ୍ତି। କାହିଁକି? କାରଣ ହିନ୍ଦୁ ଭୋଟ୍ ବିଭିନ୍ନ ଦଳ ମଧ୍ୟରେ ବିଭାଜିତ ହୋଇଯାଏ, କିନ୍ତୁ ମୁସଲିମ୍ ଭୋଟ୍ ଏବେ ଏକଜୁଟ ହୋଇ କେବଳ ଗୋଟିଏ ଦଳକୁ ଯାଉଛି। ଏବଂ ସେହି ଦଳଟି ହେଉଛି ତୃଣମୂଳ କଂଗ୍ରେସ (TMC)।
୨୦୨୧ ବିଧାନସଭା ନିର୍ବାଚନରେ ୪୪ ଜଣ ମୁସଲିମ୍ ବିଧାୟକ ଜିତିଥିଲେ । ସେଥିମଧ୍ୟରୁ ୪୩ ଜଣ କେବଳ TMCରୁ ଥିଲେ । ଏହା ଦର୍ଶାଉଛି ଯେ ବଙ୍ଗଳାର ମୁସଲିମ୍ ଭୋଟ୍ର ଏବେ ଅନ୍ୟ କୌଣସି ବିକଳ୍ପ ବିଷୟରେ ଚିନ୍ତା କରୁନାହାନ୍ତି ।
ପୂର୍ବରୁ ପରିସ୍ଥିତି ଏମିତି ନଥିଲା। ୨୦୧୧ ପୂର୍ବରୁ ମୁସଲିମ୍ ଭୋଟ୍ କଂଗ୍ରେସ, ବାମଦଳ ଏବଂ ଟିଏମସି ମଧ୍ୟରେ ବାଣ୍ଟି ହୋଇଯାଉଥିଲା। କିନ୍ତୁ ଯେତେବେଳେ ବିଜେପି ପଶ୍ଚିମବଙ୍ଗରେ ଶକ୍ତିଶାଳୀ ହେବାକୁ ଲାଗିଲା, ମୁସଲିମ୍ ଭୋଟ୍ରମାନଙ୍କ ମଧ୍ୟରେ ଏକ ସ୍ପଷ୍ଟ ବାର୍ତ୍ତା ଗଲା।
ସେମାନେ ବୁଝିଗଲେ ଯେ ଯଦି ବିଜେପିକୁ କେହି ରୋକିପାରିବ, ସେ ହେଉଛନ୍ତି କେବଳ ‘ଦିଦି’ ଅର୍ଥାତ୍ ମମତା ବାନାର୍ଜୀ। ସେଥିପାଇଁ ସେମାନେ ନିଜର ପାରମ୍ପରିକ ପସନ୍ଦ କଂଗ୍ରେସ ବା ସିପିଏମକୁ ଛାଡ଼ି ମମତାଙ୍କ ପଛରେ ଛିଡ଼ା ହେଲେ।
ଏହି ଧ୍ରୁବୀକରଣ ଏତେ ଶକ୍ତିଶାଳୀ ଯେ, ଯଦି ବିଜେପି କୌଣସି ମୁସଲିମ୍ ବହୁଳ ଅଞ୍ଚଳରେ ଜଣେ ମୁସଲିମ୍ ପ୍ରାର୍ଥୀଙ୍କୁ ମଧ୍ୟ ଛିଡ଼ା କରେ, ତେବେ ବି ସେଠାକାର ଲୋକ ତାଙ୍କୁ ଭୋଟ୍ ଦିଅନ୍ତି ନାହିଁ । ୨୦୨୧ରେ ବିଜେପି ୮ ଜଣ ମୁସଲିମ୍ ପ୍ରାର୍ଥୀ ଦେଇଥିଲା, କିନ୍ତୁ ସମସ୍ତେ ଶୋଚନୀୟ ଭାବେ ପରାଜିତ ହେଲେ। ଏହାର ଅର୍ଥ ହେଉଛି – ବଙ୍ଗଳାରେ ବିଜେପିର ସାମାନ୍ୟ ସମର୍ଥନ ଥିବା ମୁସଲିମ୍ ନେତାଙ୍କର ମଧ୍ୟ କୌଣସି ଜାଗା ନାହିଁ।
ଜନସଂଖ୍ୟା ଅନୁପାତରେ ମୁସଲିମ୍ଙ୍କୁ କ’ଣ ସଠିକ୍ ପ୍ରତିନିଧିତ୍ୱ ମିଳୁଛି?
ବଙ୍ଗଳାରେ ୨୭% ମୁସଲିମ୍ ଅଛନ୍ତି, କିନ୍ତୁ ବିଧାୟକଙ୍କ ସଂଖ୍ୟା ମାତ୍ର ୧୫%। ମମତା ବାନାର୍ଜୀ ନିଜେ ୨୦୧୬ରେ ୫୭ ଜଣ ମୁସଲିମ୍ଙ୍କୁ ଟିକେଟ୍ ଦେଇଥିବା ବେଳେ ୨୦୨୧ରେ ଏହାକୁ ୪୨କୁ କମାଇ ଦେଇଥିଲେ । ଚଳିତ ବର୍ଷ ଏହା ୪୭ ରହିଛି । ଅର୍ଥାତ୍ ମାତ୍ର ୧୬% ଟିକେଟ୍ ମୁସଲିମ୍ଙ୍କୁ ମିଳିଛି।
ତଥାପି, ମୁସଲିମ୍ ସମୁଦାୟ ମମତାଙ୍କୁ ହିଁ ଭୋଟ୍ ଦେଉଛନ୍ତି। ଏହାର ଏକମାତ୍ର କାରଣ ହେଉଛି ‘ବିଜେପିର ଭୟ’ ଏବଂ ମମତାଙ୍କୁ ଏକ ସୁରକ୍ଷା କବଚ ଭାବେ ଗ୍ରହଣ କରିବା।
ଯେତେବେଳେ ୨୭% ମୁସଲିମ୍ ଭୋଟ୍ ଏକଜୁଟ ହୋଇଯାଉଛି, ସେତେବେଳେ ବିଜେପି ପାଇଁ ଗୋଟିଏ ହିଁ ରାସ୍ତା ଖୋଲା ଅଛି – ତାହା ହେଉଛି ୭୦% ହିନ୍ଦୁ ଭୋଟ୍ର ଏକଜୁଟ୍ କରିବା । ଏହା ହେଉଛି ‘୭୦ ବନାମ ୨୭’ ର ଲଢ଼େଇ।
ଏଥିପାଇଁ ବିଜେପି ତାର ସବୁଠାରୁ ବଡ଼ ଫାୟାରବ୍ରାଣ୍ଡ ନେତା ଯୋଗୀ ଆଦିତ୍ୟନାଥଙ୍କୁ ମଇଦାନକୁ ଓହ୍ଲାଇଛି । ଯୋଗୀ ନିଜ ଭାଷଣରେ ସିଧାସଳଖ ମମତାଙ୍କୁ ଟାର୍ଗେଟ୍ କରିଛନ୍ତି। ସେ କହିଛନ୍ତି ଯେ, “ମମତା ଦିଦି ରାମ ନାମ ନେଲେ ଚିଢ଼ନ୍ତି, ଦୁର୍ଗା ପୂଜା ଏବଂ ବିସର୍ଜନ ଉପରେ ରୋକ୍ ଲଗାନ୍ତି, କିନ୍ତୁ ରାସ୍ତାରେ ଇଫ୍ତାର୍ ପାର୍ଟି କରନ୍ତି।”
ବିଜେପି ଚାହୁଁଛି ଯେ ହିନ୍ଦୁ ଭୋଟ୍ରମାନେ ନିଜର ଧର୍ମ ଏବଂ ପରିଚୟକୁ ନେଇ ସମ୍ବେଦନଶୀଳ ହୁଅନ୍ତୁ ଏବଂ ମୁସଲିମ୍ ଧ୍ରୁବୀକରଣ ବିରୁଦ୍ଧରେ ହିନ୍ଦୁ ଧ୍ରୁବୀକରଣ ସୃଷ୍ଟି ହେଉ।
ତେବେ ପଶ୍ଚିମବଙ୍ଗର ଏହି ନିର୍ବାଚନୀ ରଣଭୂମିରେ ଗୋଟିଏ ପଟେ ଅଛି ମମତାଙ୍କର ସୁଦୃଢ଼ ମୁସଲିମ୍ ସମର୍ଥନ ଏବଂ ଅନ୍ୟପଟେ ଅଛି ବିଜେପିର ହିନ୍ଦୁତ୍ୱ ରଣନୀତି।
ମୁସଲିମ୍ ଭୋଟ୍ ଏବେ ବଙ୍ଗଳା ରାଜନୀତିର ଏପରି ଏକ ଚାବିକାଠି ଯାହା ବିନା କ୍ଷମତାର ଦ୍ୱାର ଖୋଲିବା ଅସମ୍ଭବ। ମମତା ବାନାର୍ଜୀ ନିଜକୁ ଏହି ଭୋଟ୍ରମାନଙ୍କ ପାଇଁ ଏକମାତ୍ର ରକ୍ଷକ ଭାବେ ଉପସ୍ଥାପିତ କରିବାରେ ସଫଳ ହୋଇଛନ୍ତି । କିନ୍ତୁ ଆଗାମୀ ସମୟରେ ହିନ୍ଦୁ ଭୋଟ୍ର କେତେଦୂର ଏକଜୁଟ୍ ହେଉଛନ୍ତି, ତାହା ହିଁ ବଙ୍ଗଳାର ଭବିଷ୍ୟତ ସ୍ଥିର କରିବ।
ମୁସଲିମ୍ ଭୋଟ୍ରଙ୍କ ଏହି ଏକତରଫା ସମର୍ଥନ କେବଳ ମମତାଙ୍କୁ ହିଁ ଜିତାଇବ ନା ବିଜେପି ଏଥର ୭୦% ଗଣିତରେ ବାଜି ମାରିନେବ?
also read : https://purvapaksa.com/bjps-game-changer-bhupendra-yadav/
ବିଜେପିର ଗେମ୍ ଚେଞ୍ଜର ଭୂପେନ୍ଦ୍ର ଯାଦବ || BJP’s game changer Bhupendra Yadav
