ଚୀନର ଅତ୍ୟାଧୁନିକ ଏବଂ ଅର୍ଥନୈତିକ ଭାବେ ସଶକ୍ତ ସହର ସାଂଘାଇରେ ଏକ ଭୟଙ୍କର ଦୁର୍ଘଟଣା ଘଟିଛି । ସହରର ଏକ ବ୍ୟସ୍ତବହୁଳ ରାସ୍ତା ହଠାତ୍ ଧସି ପଡ଼ି ବଡ଼ ଗାତ ସୃଷ୍ଟି ହୋଇଥିବାରୁ ଲୋକମାନଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି । କିଛି ସେକେଣ୍ଡ ମଧ୍ୟରେ ଭିଡିଓ ସୋସିଆଲ ମିଡିଆରେ ଭାଇରାଲ ହେବା ସହ ସହରୀ ଢାଞ୍ଚା ନେଇ ଗଭୀର ଚର୍ଚ୍ଚା ଆରମ୍ଭ ହୋଇଛି।
ପ୍ରତିଦିନ ଲକ୍ଷାଧିକ ଲୋକ ଯାତାୟାତ କରୁଥିବା ଏହି ରାସ୍ତାର ଏପରି ଧସିଯିବା ଘଟଣା ଏକ ବଡ଼ ସତର୍କ ସଙ୍କେତ ଭାବେ ଦେଖାଯାଉଛି । ପ୍ରଥମ ଦୃଷ୍ଟିରେ ଏହା କୌଣସି ପ୍ରାକୃତିକ ବିପର୍ଯ୍ୟୟ ଫଳ ନୁହେଁ ବୋଲି ଅଧିକାରୀମାନେ ଜଣାଇଛନ୍ତି । ବରଂ ଦ୍ରୁତ ଗତିରେ ବଢୁଥିବା ସହରୀକରଣ ଓ ଦୁର୍ବଳ ନିର୍ମାଣ ପ୍ରକ୍ରିୟା ଏହାର ପ୍ରମୁଖ କାରଣ ହୋଇପାରେ ବୋଲି ଆଶଙ୍କା କରାଯାଉଛି।
ବିଶେଷଜ୍ଞମାନଙ୍କ କହିବା ଅନୁଯାୟୀ, ସାଂଘାଇର ଅନେକ ଅଞ୍ଚଳ ନରମ ମାଟିରେ ଅବସ୍ଥିତ । ଏହିପରି ଭୌଗୋଳିକ ପରିସ୍ଥିତିରେ ଭାରୀ ଅଟଳିକା ଓ ଆକାଶଛୁଆଁ କୋଠା ନିର୍ମାଣ କରିବା ସମୟରେ ଯଥେଷ୍ଟ ଭୂତଳ ମଜବୁତିକରଣ ନ ହେଲେ ଏପରି ଘଟଣା ଘଟିପାରେ । ରାସ୍ତା ତଳେ ଅତ୍ୟଧିକ ଜଳ ନିଷ୍କାସନ, ପତଳା ବାଲି ସ୍ତର ଓ ଭୂଗର୍ଭ ଶୂନ୍ୟସ୍ଥାନ ସୃଷ୍ଟି ହେବାରୁ ଭୂମି ଭାର ବହନ କରିବାରେ ଅସମର୍ଥ ହୋଇପଡ଼େ । ଫଳସ୍ୱରୂପ ଏପରି ସିଙ୍କହୋଲ ସୃଷ୍ଟି ହୋଇଥାଏ।
୨୦୧୭ ରୁ ୨୦୨୩ ମଧ୍ୟରେ ପ୍ରକାଶିତ ତଥ୍ୟ ଅନୁସାରେ, ଚୀନରେ ଘଟିଥିବା ୭୨ ପ୍ରତିଶତ ସିଙ୍କହୋଲ ଘଟଣା ମାନବ କାର୍ଯ୍ୟକଳାପ ସହ ସମ୍ପୃକ୍ତ ଥିଲା । ଦୁର୍ବଳ ଭିତ୍ତିଭୂମି, ନିର୍ମାଣ ତ୍ରୁଟି ଓ ପାଇପଲାଇନ ବିଫଳତା ଏହାର ପ୍ରମୁଖ କାରଣ ଭାବେ ଚିହ୍ନଟ ହୋଇଥିଲା । ୨୦୨୪ ଜାନୁଆରୀରେ ସାଂଘାଇର ମିନହାଙ୍ଗ ଜିଲ୍ଲାରେ ମଧ୍ୟ ପ୍ରାୟ ୧୦ ମିଟର ରାସ୍ତା ଭୁଶୁଡ଼ି ପଡ଼ିଥିଲା, ଯାହା ସ୍ୱରେଜ୍ ପାଇପ୍ ବିଫଳତାର ଫଳ ବୋଲି ପରେ ଜଣାପଡ଼ିଥିଲା ।
ଏହି ନୂତନ ଘଟଣା ପରେ ସ୍ଥାନୀୟ ପ୍ରଶାସନ ତଦନ୍ତ ଆରମ୍ଭ କରିଛି ଏବଂ ଆସପାସର ଅଞ୍ଚଳରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି । ରାସ୍ତାର ଗୁଣଗତା ଯାଞ୍ଚ, ଭୂଗର୍ଭ ପାଇପଲାଇନ ପରୀକ୍ଷା ଓ ନିର୍ମାଣ ମାନଦଣ୍ଡ ପୁନଃବିଚାର କରିବାକୁ ନିର୍ଦ୍ଦେଶ ମିଳିଛି । ଦ୍ରୁତ ନଗରୀକରଣ ସହ ଉଚ୍ଚ ଅଟଳିକା ନିର୍ମାଣ ଏବଂ ଭୂଗର୍ଭ ଢାଞ୍ଚା ବିକାଶ କରୁଥିବା ସହରମାନଙ୍କ ପାଇଁ ଏହା ଏକ ଗଭୀର ଚେତାବନୀ । ବିଶେଷଜ୍ଞମାନେ କହୁଛନ୍ତି, ଆଗାମୀ ଦିନରେ ଏପରି ଘଟଣା ରୋକିବାକୁ ବୈଜ୍ଞାନିକ ଯାଞ୍ଚ, ମଜବୁତ ଭୂତଳ ନିର୍ମାଣ ଓ ନିୟମିତ ନିରୀକ୍ଷଣ ଅତ୍ୟାବଶ୍ୟକ। ସାଂଘାଇର ଏହି ଘଟଣା କେବଳ ଏକ ସହରର ସମସ୍ୟା ନୁହେଁ— ଏହା ଦ୍ରୁତ ବିକାଶ ଓ ସୁରକ୍ଷା ମଧ୍ୟରେ ସମନ୍ୱୟ ରଖିବାର ଆବଶ୍ୟକତାକୁ ପୁନର୍ମନ୍ତ୍ରଣା କରାଉଛି।
also read https://purvapaksa.com/ghooskhor-pandat/
