Odisha Budget: ଏହାଦ୍ୱାରା ଅଭିବୃଦ୍ଧିରେ ବାଧା ଓ ଅର୍ଥନୀତିକୁ ପ୍ରଭାବିତ କରିପାରେ।
ଭିତ୍ତିଭୂମି ବିକାଶ, ରୋଜଗାର ସୃଷ୍ଟି ଓ ବିତ୍ତୀୟ ସଚେତନତା ଉପରେ ଗୁରୁତ୍ୱ ଦିଆଯାଉଥିବା ବେଳେ ଜାନୁଆରି ଶେଷ ସୁଦ୍ଧା ୪୪ଟି ବିଭାଗ ମଧ୍ୟରୁ ୧୬ଟି ବିଭାଗ ସେମାନଙ୍କ ଆବଣ୍ଟିତ ଅର୍ଥର ଅଧା ବି ଖର୍ଚ୍ଚ କରିପାରୁନଥିବାରୁ ଚଳିତ ଆର୍ଥିକ ବର୍ଷ ଶେଷ ସୁଦ୍ଧା କିପରି ବଜେଟର ବଳକା ଟଙ୍କା ଖର୍ଚ୍ଚ କରିବେ ସେଥିନେଇ ରାଜ୍ୟ ସରକାର ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି। ସରକାରୀ ତଥ୍ୟ ଅନୁଯାୟୀ, ସ୍ୱାସ୍ଥ୍ୟସେବା, ଶିକ୍ଷା ଓ ପୂର୍ତ୍ତ ଭଳି ପ୍ରମୁଖ କ୍ଷେତ୍ରରେ କ୍ରମାଗତ ଭାବେ ପାଣ୍ଠି ବଣ୍ଟନ ହେଉଥିବା ବେଳେ ପଞ୍ଚାୟତିରାଜ ଓ ପାନୀୟ ଜଳ (ପିଆର ଆଣ୍ଡ ଡିଡବ୍ଲୁ), ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ବର୍ଗ, ଗୃହ ନିର୍ମାଣ ଓ ନଗର ଉନ୍ନୟନ (ଏଚ୍ ଆଣ୍ଡ ୟୁଡି), କ୍ରୀଡ଼ା ଓ ଶକ୍ତି ସମେତ ଅନେକ ବିଭାଗ ଖର୍ଚ୍ଚରେ ପଛରେ ପଡ଼ିଛନ୍ତି।
ସବୁଠାରୁ କମ୍ ବ୍ୟବହାର ହେଉଥିବା ବିଭାଗଗୁଡ଼ିକ ହେଲା ବିପର୍ଯ୍ୟୟ ପରିଚାଳନା (୧୩.୫ ପ୍ରତିଶତ), କ୍ରୀଡ଼ା ଓ ଯୁବସେବା (୧୯.୭୭ ପ୍ରତିଶତ), ଇସ୍ପାତ ଓ ଖଣି (୨୦.୫ ପ୍ରତିଶତ), ମିଶନ ଶକ୍ତି (୨୩ ପ୍ରତିଶତ), ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି (୨୭ ପ୍ରତିଶତ), ପିଆରଆଣ୍ଡଡିଡବ୍ଲ୍ୟୁ (୩୮ ପ୍ରତିଶତ) ଏବଂ ପର୍ଯ୍ୟଟନ (୩୮ ପ୍ରତିଶତ)। ଅନ୍ୟାନ୍ୟ କମ୍ ଖର୍ଚ୍ଚ ହେଉଥିବା ବିଭାଗଗୁଡ଼ିକ ମଧ୍ୟରେ ଆଇନ (୪୨ ପ୍ରତିଶତ), ଏସଟି ଆଣ୍ଡ ଏସସି (୪୩.୬ ପ୍ରତିଶତ), ଏଚ୍ ଆଣ୍ଡୟୁଡି (୪୪.୮ ପ୍ରତିଶତ), ଶକ୍ତି (୪୬ ପ୍ରତିଶତ), ପରିବହନ (୪୭ ପ୍ରତିଶତ) ଏବଂ ଇଲେକ୍ଟ୍ରୋନିକ୍ସ ଏବଂ ଆଇଟି (୪୭.୪ ପ୍ରତିଶତ) ଅନ୍ତର୍ଭୁକ୍ତ। ୨୦୨୪-୨୫ ଆର୍ଥିକ ବର୍ଷ ପାଇଁ ମଞ୍ଜୁର ହୋଇଥିବା ୧୨,୧୫୫ କୋଟି ଟଙ୍କାର ସପ୍ଲିମେଣ୍ଟାରୀ ଆବଣ୍ଟନକୁ ମିଶାଇ ମୋଟ ୨.୭୭ ଲକ୍ଷ କୋଟି ଟଙ୍କାର ବଜେଟ୍ ମଧ୍ୟରୁ ୧୬ଟି ବିଭାଗର ପ୍ରାୟ ୭୧,୦୦୦ କୋଟି ଖର୍ଚ୍ଚ ନହୋଇ ପଡିରହିଛି।
ସାଧାରଣ ନିର୍ବାଚନ, ପ୍ରକଳ୍ପ ଅନୁମୋଦନରେ ବିଳମ୍ବ, କ୍ରୟ ବିଳମ୍ବ, ବଡ଼ ଧରଣର ଖାଲି ପଡ଼ିଥିବା ପଦବୀ, ମୌସୁମୀ ବାଧା ଏବଂ କେନ୍ଦ୍ରୀୟ ପାଣ୍ଠି ପ୍ରବାହରେ ସମସ୍ୟା ଯୋଗୁଁ ଖର୍ଚ୍ଚ ମନ୍ଥର ହେବାର କାରଣ ବୋଲି ବିଶେଷ ସୂତ୍ରରୁ ଜଣାପଡ଼ିଛି। ଅନେକ ବିଭାଗ ପ୍ରକଳ୍ପ ଅନୁମୋଦନରେ ପ୍ରଶାସନିକ ବିଳମ୍ବ ସହ ସଂଘର୍ଷ କରୁଥିବା ବେଳେ ପାଣ୍ଠି ବିତରଣ ଓ କାର୍ଯ୍ୟକାରିତା ମନ୍ଥର ହେଉଥିବା ବେଳେ ଲମ୍ବା ଟେଣ୍ଡର ଓ କ୍ରୟ ପ୍ରକ୍ରିୟା ଯୋଗୁଁ କେତେକ ବିଭାଗରେ ଖର୍ଚ୍ଚ ହ୍ରାସ ପାଇଛି।
ଅର୍ଥନୀତିଜ୍ଞମାନେ କହିଛନ୍ତି ଯେ ଆବଣ୍ଟିତ ପାଣ୍ଠିକୁ ଦକ୍ଷତାର ସହ ଖର୍ଚ୍ଚ କରିବାରେ ଅସମର୍ଥତା ଅଭିବୃଦ୍ଧି ପଥରେ ବାଧା ସୃଷ୍ଟି କରିପାରେ ଏବଂ ଅର୍ଥନୀତିକୁ ପ୍ରଭାବିତ କରିପାରେ। ନିଯୁକ୍ତି ସୃଷ୍ଟି ଓ ସମାଜ କଲ୍ୟାଣ କାର୍ଯ୍ୟକ୍ରମକୁ ପ୍ରଭାବିତ କରୁଥିବା ଗୁରୁତ୍ୱପୂର୍ଣ୍ଣ ଗ୍ରାମ୍ୟ ଉନ୍ନୟନ ପ୍ରକଳ୍ପ ବିଳମ୍ବିତ ହେବ। ପୂର୍ବତନ ମୁଖ୍ୟ ଶାସନ ସଚିବ ସହଦେବ ସାହୁ କହିଛନ୍ତି ଯେ ତୃତୀୟ ତ୍ରୟମାସ (ଡିସେମ୍ବର) ଶେଷ ସୁଦ୍ଧା ବିଭାଗଗୁଡ଼ିକ ସେମାନଙ୍କୁ ଆବଣ୍ଟିତ ବଜେଟର ୬୦ ପ୍ରତିଶତ ଖର୍ଚ୍ଚ କରିବା କଥା, କିନ୍ତୁ ଗତ କିଛି ବର୍ଷ ଧରି କମ୍ ଖର୍ଚ୍ଚ ହେଉଛି ଯାହା ଅପାରଗ ପ୍ରଶାସନିକ କାର୍ଯ୍ୟକାରିତାକୁ ସୂଚାଉଛି।
ଯୋଜନା ଅନୁଯାୟୀ ପ୍ରକଳ୍ପ କାର୍ଯ୍ୟକାରୀ କରିବା ପାଇଁ ସରକାର ପ୍ରତିବନ୍ଧକଗୁଡ଼ିକୁ ଚିହ୍ନଟ କରିବା ସହ ପାଣ୍ଠି ବଣ୍ଟନକୁ ସୁବ୍ୟବସ୍ଥିତ କରିବା ଦରକାର ବୋଲି ସେ କହିଛନ୍ତି। ଅର୍ଥ ବିଭାଗର ଜଣେ ବରିଷ୍ଠ ଅଧିକାରୀ ବଜେଟର କମ ଖର୍ଚ୍ଚକୁ ସ୍ୱୀକାର କରି କହିଛନ୍ତି, ଆମେ ପରିସ୍ଥିତି ଉପରେ ନଜର ରଖିଛୁ ଏବଂ ଚଳିତ ଆର୍ଥିକ ବର୍ଷର ଶେଷ ଦୁଇ ମାସରେ ଖର୍ଚ୍ଚ ତ୍ୱରାନ୍ୱିତ ହେବ ବୋଲି ଆଶା କରୁଛୁ।
previous article:https://purvapaksa.com/ai-camera-surveillance-to-satkosia-debrigarh-sanctuaries/
