ସାରା ଦେଶରେ ଚାଞ୍ଚଲ୍ୟ ସୃଷ୍ଟି କରିଥିବା ମେଘାଳୟର ବହୁଚର୍ଚ୍ଚିତ ‘ହନିମୁନ୍ ହତ୍ୟାକାଣ୍ଡ’ ମାମଲାରେ ଏକ ବଡ଼ ଆଇନଗତ ମୋଡ଼ ଆସିଛି । ନିଜ ସ୍ୱାମୀ ରାଜା ରଘୁବଂଶୀଙ୍କ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ସୋନମ ରଘୁବଂଶୀଙ୍କୁ ମେଘାଳୟ ହାଇକୋର୍ଟଙ୍କ ଦ୍ୱାରା ପ୍ରଦାନ କରାଯାଇଥିବା ଜାମିନକୁ ଚ୍ୟାଲେଞ୍ଜ କରି ମେଘାଳୟ ସରକାର ଦେଶର ସର୍ବୋଚ୍ଚ ଅଦାଲତ ‘ସୁପ୍ରିମକୋର୍ଟ’ଙ୍କ ଦ୍ୱାରସ୍ଥ ହୋଇଛନ୍ତି ।
ସରକାରଙ୍କ ପକ୍ଷରୁ କୋର୍ଟରେ ହାଜର ହୋଇ ଭାରତର ସଲିସିଟର ଜେନେରାଲ ତୁଷାର ମେହେଟ୍ଟା ଜଷ୍ଟିସ ଏମ.ଏମ. ସୁନ୍ଦରେଶଙ୍କ ଖଣ୍ଡପୀଠ ସମ୍ମୁଖରେ ଏହି ମାମଲାର ଜରୁରୀ ଶୁଣାଣି ପାଇଁ ଆବେଦନ କରିଛନ୍ତି । ସରକାର ଆଶଙ୍କା ପ୍ରକାଶ କରିଛନ୍ତି ଯେ, ଜାମିନ ମିଳିବା ପରେ ଅଭିଯୁକ୍ତ ସୋନମ କୋର୍ଟ ପ୍ରକ୍ରିୟାରୁ ଫେରାର୍ ହୋଇଯାଇପାରନ୍ତି ।
ଟାଇପିଂ ଭୁଲ୍ ଯୋଗୁଁ ମିଳିଥିଲା ଜାମିନ
ମେଘାଳୟ ହାଇକୋର୍ଟ ଗତ ଜୁନ୍ ୨୯ ତାରିଖରେ ସୋନମଙ୍କ ଜାମିନକୁ କାଏମ ରଖିଥିଲେ । ଗିରଫ ସମୟରେ ପୋଲିସ ଦ୍ୱାରା ପ୍ରସ୍ତୁତ ଦସ୍ତାବିଜ୍ରେ ଗିରଫଦାରୀର ସଠିକ୍ କାରଣ ଦର୍ଶାଯାଇ ନଥିବା ଏବଂ ଆଇନଗତ ଧାରା ଉଲ୍ଲେଖ କରିବାରେ ବୈଷୟିକ ତ୍ରୁଟି ଥିବା ଦର୍ଶାଇ ହାଇକୋର୍ଟ ଏହି ନିଷ୍ପତ୍ତି ନେଇଥିଲେ । ହାଇକୋର୍ଟଙ୍କ କହିବା ଅନୁଯାୟୀ, ପୋଲିସ ହତ୍ୟା ମାମଲାର ସଠିକ୍ ଧାରା ଲେଖିବା ବଦଳରେ ଭୁଲ୍ ଧାରା ଉଲ୍ଲେଖ କରିଥିଲା, ଯାହା ଅଭିଯୁକ୍ତଙ୍କ ସାମ୍ବିଧାନିକ ଅଧିକାରର ଉଲ୍ଲଂଘନ ଅଟେ ।
ମାତ୍ର ସୁପ୍ରିମକୋର୍ଟରେ ସଲିସିଟର ଜେନେରାଲ ତୁଷାର ମେହେଟ୍ଟା ଯୁକ୍ତି ବାଢ଼ିଛନ୍ତି ଯେ, ଏହା କେବଳ ଏକ ଟାଇପିଂ ବା କିରାଣିଗତ ଭୁଲ୍ ଥିଲା, ଯେଉଁଥିପାଇଁ ଏଭଳି ଏକ ସଂଗୀନ ହତ୍ୟା ମାମଲାର ମୁଖ୍ୟ ଅଭିଯୁକ୍ତଙ୍କୁ ମୁକ୍ତ କରାଯାଇପାରିବ ନାହିଁ । ସୋନମଙ୍କ ଜାମିନ ଆବେଦନ ପୂର୍ବରୁ ୩ ଥର ଖାରଜ ହୋଇସାରିଛି ଏବଂ ସେ ଜେଲରୁ ବାହାରିଲେ ପ୍ରମାଣ ନଷ୍ଟ କରିବା ସହ ଫେରାର୍ ହେବାର ସମ୍ପୂର୍ଣ୍ଣ ସମ୍ଭାବନା ରହିଛି । ସୁପ୍ରିମକୋର୍ଟ ସରକାରଙ୍କ ଆବେଦନକୁ ଗ୍ରହଣ କରି ଶୁକ୍ରବାର ଦିନ ଏହାର ଜରୁରୀ ଶୁଣାଣି କରିବାକୁ ସହମତି ପ୍ରକାଶ କରିଛନ୍ତି ।
କ’ଣ ଥିଲା ଏହି ସାଂଘାତିକ ହନିମୁନ୍ ହତ୍ୟାକାଣ୍ଡ ?
ମଧ୍ୟପ୍ରଦେଶର ଇନ୍ଦୋର ବାସିନ୍ଦା ତଥା ପରିବହନ ବ୍ୟବସାୟୀ ୨୯ ବର୍ଷୀୟ ରାଜା ରଘୁବଂଶୀଙ୍କ ବିବାହ ୧୨ ମେ ୨୦୨୫ରେ ସୋନମଙ୍କ ସହିତ ହୋଇଥିଲା । ବିବାହ ପରେ ଉଭୟ ହନିମୁନ୍ ପାଇଁ ୨୦ ମେ’ରେ ମେଘାଳୟ ଗସ୍ତ କରିଥିଲେ । ତେବେ ମେ ୨୩ ତାରିଖରେ ଚେରାପୁଞ୍ଜିର ଏକ ହୋମଷ୍ଟେ’ରୁ ବାହାରିବା ପରେ ସେମାନେ ନିଖୋଜ ହୋଇଯାଇଥିଲେ । ପରବର୍ତ୍ତୀ ସମୟରେ ଜୁନ୍ ୨ ତାରିଖରେ ଚେରାପୁଞ୍ଜିର ଏକ ଗଭୀର ଖାତ ମଧ୍ୟରୁ ରାଜା ରଘୁବଂଶୀଙ୍କ କ୍ଷତବିକ୍ଷତ ମୃତଦେହ ଉଦ୍ଧାର କରାଯାଇଥିଲା ।
ମେଘାଳୟ ପୋଲିସର ତଦନ୍ତରୁ ଜଣାପଡ଼ିଥିଲା ଯେ, ସୋନମ ନିଜର ପ୍ରେମୀ ରାଜ କୁଶୱାହା ସହ ମିଶି ସ୍ୱାମୀଙ୍କୁ ହତ୍ୟା କରିବା ପାଇଁ ସୁପାରି କିଲର ବା ଭଡ଼ାଟିଆ ଗୁଣ୍ଡା ନିୟୋଜିତ କରିଥିଲେ ଏବଂ ହନିମୁନ୍ ବାହାନାରେ ମେଘାଳୟ ଆଣି ପାହାଡ଼ରୁ ତଳକୁ ଫିଙ୍ଗି ହତ୍ୟା କରିଥିଲେ । ପୋଲିସ ଉତ୍ତର ପ୍ରଦେଶରୁ ସୋନମ ଓ ତାଙ୍କ ପ୍ରେମୀଙ୍କ ସହ ୩ ଜଣ ସହଯୋଗୀଙ୍କୁ ଗିରଫ କରିଥିଲା । ଏହି ସଂବେଦନଶୀଳ ମାମଲାରେ ପୋଲିସ କୋର୍ଟରେ ୭୦୦ରୁ ଅଧିକ ପୃଷ୍ଠାର ଚାର୍ଜସିଟ୍ ମଧ୍ୟ ଦାଖଲ କରିସାରିଛି । ବର୍ତ୍ତମାନ ସୁପ୍ରିମକୋର୍ଟଙ୍କ ଆଗାମୀ ନିର୍ଦ୍ଦେଶ ଉପରେ ସମସ୍ତଙ୍କ ନଜର ରହିଛି।
