ଭାରତୀୟ ସଂସଦୀୟ ଇତିହାସରେ ଏକ ନୂଆ ଅଧ୍ୟାୟ ଯୋଡ଼ି ହୋଇଛି । ଦଶନ୍ଧି ଦଶନ୍ଧି ଧରି ଅଟକି ରହିଥିବା ମହିଳା ସଂରକ୍ଷଣ ବିଲ୍ ଏବେ ବାସ୍ତବତାରେ ରୂପାନ୍ତରିତ ହୋଇଛି । ତେବେ ଏହି ବିଲ୍କୁ ନେଇ ଦେଶର ପ୍ରମୁଖ ବିରୋଧୀ ଦଳ ଯଥା— କଂଗ୍ରେସ, ସମାଜବାଦୀ ପାର୍ଟି (SP), ଡିଏମକେ (DMK), ଆରଜେଡି (RJD) ଓ ବିଆରଏସ (BRS) ମଧ୍ୟରେ ଏକ ଭିନ୍ନ ପ୍ରକାରର ତର୍କ ଦେଖିବାକୁ ମିଳୁଛି । ପ୍ରଶ୍ନ ଉଠୁଛି, ଯେଉଁ ବିଲ୍ ସାଧାରଣ ମହିଳାଙ୍କୁ ସଂସଦକୁ ପଠାଇବା ପାଇଁ ପଥ ପରିଷ୍କାର କରୁଛି, ତାହାକୁ ନେଇ ଏହି ଦଳଗୁଡ଼ିକ ଏତେ ଚିନ୍ତିତ କାହିଁକି?
୧. ପରିବାରବାଦ ଓ ଦବଦବା ହ୍ରାସ ହେବାର ଭୟ?
ରାଜନୈତିକ ସମୀକ୍ଷକଙ୍କ ମତରେ, ଭାରତର ଅନେକ ଆଞ୍ଚଳିକ ଓ ଜାତୀୟ ଦଳରେ ଏବେ ବି ପରିବାରବାଦର ପ୍ରଭାବ ଅଧିକ ରହିଛି । ଯେତେବେଳେ ୩୩ ପ୍ରତିଶତ ଆସନ ମହିଳାଙ୍କ ପାଇଁ ସଂରକ୍ଷିତ ହୋଇଯିବ, ସେତେବେଳେ କେବଳ ପରିବାରର ମହିଳା ସଦସ୍ୟଙ୍କୁ ଟିକେଟ୍ ଦେଇ ଆସନ ସୁରକ୍ଷିତ ରଖିବା କଷ୍ଟକର ହୋଇପଡ଼ିବ ।
- କଂଗ୍ରେସ: ସୋନିଆ ଗାନ୍ଧୀ ରାଜ୍ୟସଭାରେ ଓ ପ୍ରିୟଙ୍କା ଗାନ୍ଧୀ ବାଡ୍ରା ଲୋକସଭା ନିର୍ବାଚନ ମଇଦାନରେ ସକ୍ରିୟ ଥିବାବେଳେ, ସାଧାରଣ ବର୍ଗର ମହିଳାଙ୍କ ପ୍ରବେଶ ଫଳରେ ଦଳ ଭିତରେ କ୍ଷମତା ସନ୍ତୁଳନ ବଦଳିପାରେ ।
- ସମାଜବାଦୀ ପାର୍ଟି ଓ ଆରଜେଡି: ଅଖିଳେଶ ଯାଦବଙ୍କ ପତ୍ନୀ ଡିମ୍ପଲ ଯାଦବ ଓ ଲାଲୁ ଯାଦବଙ୍କ ଝିଅ ମିସା ଭାରତୀ କିମ୍ବା ରୋହିଣୀ ଆଚାର୍ଯ୍ୟଙ୍କ ଭଳି ଚେହେରାମାନେ ଏବେ ସଂସଦରେ ପରିବାରର ପ୍ରତିନିଧିତ୍ୱ କରୁଛନ୍ତି । ବିରୋଧୀଙ୍କ ମୁଖ୍ୟ ଯୁକ୍ତି ହେଉଛି “Quota within Quota” ଅର୍ଥାତ୍ ଓବିସି (OBC) ମହିଳାଙ୍କ ପାଇଁ ପୃଥକ ସଂରକ୍ଷଣ । ମାତ୍ର ସମାଲୋଚକଙ୍କ ମତରେ, ଏହା ଏକ ଆଳ ମାତ୍ର ; ପ୍ରକୃତରେ ସାଧାରଣ ମହିଳା ନେତ୍ରୀମାନେ ଶକ୍ତିଶାଳୀ ହେଲେ ପରିବାରର ଏକଛତ୍ରବାଦୀ ଶାସନ ପ୍ରଭାବିତ ହେବାର ସମ୍ଭାବନା ରହିଛି ।
୨. ସିଟ୍ ସୀମା ନିର୍ଦ୍ଧାରଣ ଓ ଚୟନର ଜଟିଳତା
ବିଲ୍ ଲାଗୁ ହେବା ପରେ ଅନେକ ବର୍ତ୍ତମାନର ପୁରୁଷ ସାଂସଦଙ୍କ ସିଟ୍ ମହିଳାଙ୍କ ପାଇଁ ସଂରକ୍ଷିତ ହୋଇଯିବ । ଡିଏମକେର କାନିମୋଝୀ, ଏନସିପି (ଶରଦ ପାୱାର ଗୋଷ୍ଠୀ) ର ସୁପ୍ରିୟା ସୁଲେ କିମ୍ବା ବିଆରଏସର କେ. କବିତାଙ୍କ ଭଳି ପ୍ରତିଷ୍ଠିତ ମହିଳା ନେତ୍ରୀମାନେ ନିଜ ନିଜ ଗଡ଼ରେ ସୁରକ୍ଷିତ ଥିଲେ ମଧ୍ୟ, ଦଳର ଅନ୍ୟ ପୁରୁଷ ନେତାମାନେ ନିଜର ସିଟ୍ ହରାଇବା ଭୟରେ ଏହାକୁ ପରୋକ୍ଷରେ ବିରୋଧ କରୁଛନ୍ତି।
୩. ବିରୋଧୀଙ୍କ ପ୍ରମୁଖ ଅଭିଯୋଗ: ‘କୋଟା ଭିତରେ କୋଟା’
କଂଗ୍ରେସ ସମେତ ସମାଜବାଦୀ ପାର୍ଟିର ଦାବି ହେଉଛି ଯେ, ଯଦି ଏଥିରେ ଓବିସି ମହିଳାଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା ନରହେ, ତେବେ କେବଳ ଉଚ୍ଚବର୍ଗର ବା ସମ୍ଭ୍ରାନ୍ତ ଶ୍ରେଣୀର ମହିଳାମାନେ ହିଁ ସଂସଦକୁ ଆସିବେ। ଏହା ଦ୍ୱାରା ଦଳିତ ଓ ପଛୁଆ ବର୍ଗର ମହିଳାମାନେ ବଞ୍ଚିତ ହେବେ। ତେବେ ସରକାରୀ ପକ୍ଷର ଯୁକ୍ତି ହେଉଛି, ଏହା କେବଳ ବିଲ୍କୁ ବିଳମ୍ବ କରିବା ପାଇଁ ଏକ ରଣନୀତି।
ରାଜନୈତିକ ପରିବାରର ମହିଳା ଶକ୍ତି: ଏକ ନଜର
କଂଗ୍ରେସ ନେତା ରାହୁଲ ଗାନ୍ଧୀଙ୍କ ମାଆ ସୋନିଆ ଗାନ୍ଧି ରାଜ୍ୟସଭା ସାଂସଦ ହୋଇଥିବାବେଳେ ତାଙ୍କ ଭଉଣୀ ପ୍ରିୟଙ୍କା ଭଦ୍ରା ଲୋକସଭା ସଂସଦ। ସମାଜବାଦୀ ପାର୍ଟିର ନେତା ଅଖିଳେଶ ଯାଦବଙ୍କ ପତ୍ନୀ ଡିମ୍ପଲ ଯାଦବ ମଧ୍ୟ ଲୋକସଭାରେ ସାଂସଦ ଅଛନ୍ତି, ଯିଏକି ତାଙ୍କ ପଛ ସିଟରେ ବସୁଛନ୍ତି।
ସେହିପରି ଡିଏମକେ ନେତା ଏମ କେ ଷ୍ଟାଲିନଙ୍କ ଭଉଣୀ କାନିମୋଝୀ ଲୋକସଭା ସାଂସଦ ଥିବାବେଳେ ଶରଦ ପାୱାରଙ୍କ ଝିଅ ସୁପ୍ରିୟା ସୁଲେ ମଧ୍ୟ ସାସଦ ଅଛନ୍ତି। ଆରଜେଡି ନେତା ତେଜସ୍ୱୀ ଯାଦବଙ୍କ ଭଉଣୀ ମଧ୍ୟ ସାଂସଦ ଥିବାବେଳେ ତେଲେଙ୍ଗାନାର ବିଆରଏସ ନେତା ଚନ୍ଦ୍ରଶେଖରଙ୍କ କେ କବିତା ମଧ୍ୟ ରାଜନୀତି କରୁଛନ୍ତି।
ମହିଳା ସଂରକ୍ଷଣ ବିଲ୍ କେବଳ ସଂଖ୍ୟାର ଖେଳ ନୁହେଁ, ବରଂ ଏହା ଭାରତର ସାମାଜିକ ଓ ରାଜନୈତିକ ଢାଞ୍ଚାରେ ଏକ ବଡ଼ ପରିବର୍ତ୍ତନ । ଯଦିଓ ବିରୋଧୀ ଦଳମାନେ ଓବିସି କୋଟା କଥା କହି ଏହାକୁ ସମାଲୋଚନା କରୁଛନ୍ତି, କିନ୍ତୁ ବାସ୍ତବରେ ଏହା ପାରିବାରିକ ରାଜନୀତିର ପରିସର ବାହାରେ ଥିବା ସାଧାରଣ କର୍ମୀଙ୍କୁ ଆଗକୁ ଆଣିବାର ଏକ ସୁଯୋଗ । ଆଗାମୀ ଦିନରେ ଏହି ବିଲ୍ କିଭଳି ଭାବେ କାର୍ଯ୍ୟକାରୀ ହେଉଛି ଏବଂ ନିର୍ବାଚନ ମଣ୍ଡଳୀ ଗୁଡ଼ିକର ପୁନଃନିର୍ଦ୍ଧାରଣ କିପରି ହେଉଛି, ତାହା ହିଁ ଦେଶର ରାଜନୈତିକ ଭବିଷ୍ୟତ ସ୍ଥିର କରିବ ।
also read : https://purvapaksa.com/there-is-a-possibility-of-implementation-of-womens-protection-in-the-elections/
