ଉତ୍ତର ପ୍ରଦେଶରେ ଚାଇନିଜ୍ ମାଞ୍ଜା ଯୋଗୁଁ ଘଟୁଥିବା କ୍ରମାଗତ ଦୁର୍ଘଟଣା ଏବଂ ଜୀବନହାନିକୁ ନେଇ ଯୋଗୀ ଆଦିତ୍ୟନାଥ ସରକାର ଏକ କଡା ଏବଂ ଐତିହାସିକ ନିଷ୍ପତ୍ତି ନେଇଛନ୍ତି । ରାଜ୍ୟରେ ଚାଇନିଜ୍ ମାଞ୍ଜାର ବ୍ୟବହାର, ବିକ୍ରୟ ଓ ଉପଲବ୍ଧତା ଉପରେ ସମ୍ପୂର୍ଣ୍ଣ ପ୍ରତିବନ୍ଧ ଲଗାଯାଇଛି । ଏହି ନିଷେଧକୁ କଡା ଭାବରେ କାର୍ଯ୍ୟକର କରିବା ପାଇଁ ମୁଖ୍ୟମନ୍ତ୍ରୀ ଯୋଗୀ ପୋଲିସ ଓ ପ୍ରଶାସନକୁ ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ, ଚାଇନିଜ୍ ମାଞ୍ଜା ଯୋଗୁଁ ଯଦି କୌଣସି ବ୍ୟକ୍ତିଙ୍କର ମୃତ୍ୟୁ ଘଟେ, ତେବେ ଏହାକୁ ସାଧାରଣ ଦୁର୍ଘଟଣା ଭାବେ ନୁହେଁ ବରଂ “ହତ୍ୟା” ଭାବେ ବିବେଚନା କରାଯିବ । ସେହି ଅନୁଯାୟୀ ଦୋଷୀମାନଙ୍କ ବିରୋଧରେ ହତ୍ୟା ମାମଲା ରୁଜୁ କରାଯିବ ଏବଂ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଗତ କିଛି ଦିନ ମଧ୍ୟରେ ରାଜ୍ୟର ବିଭିନ୍ନ ସ୍ଥାନରେ ଚାଇନିଜ୍ ମାଞ୍ଜା ଯୋଗୁଁ ଦୁଇଚକିଆ ଯାନଚାଳକ, ପଦଚାରୀ ଏବଂ ପକ୍ଷୀମାନଙ୍କ ମୃତ୍ୟୁ ଘଟିଥିବା ଖବର ମିଳିଛି। ଏହି ଘଟଣାଗୁଡ଼ିକୁ ନେଇ ମୁଖ୍ୟମନ୍ତ୍ରୀ ଗଭୀର କ୍ରୋଧ ପ୍ରକାଶ କରିଥିଲେ। ସେ ପ୍ରଶାସନିକ ଅଧିକାରୀମାନଙ୍କୁ ସିଧାସଳଖ ପ୍ରଶ୍ନ କରିଥିଲେ ଯେ, ପୂର୍ବରୁ ପ୍ରତିବନ୍ଧ ଥିବା ସତ୍ତ୍ୱେ ଚାଇନିଜ୍ ମାଞ୍ଜା କିପରି ବଜାରରେ ଉପଲବ୍ଧ ହେଉଛି ଏବଂ କିଏ ଏହାର ବେଆଇନ ବିକ୍ରୟ କରୁଛି।
ମୁଖ୍ୟମନ୍ତ୍ରୀ ସ୍ପଷ୍ଟ ଭାବେ କହିଛନ୍ତି ଯେ, ନିଷେଧ ସତ୍ତ୍ୱେ ଯଦି କୌଣସି ବ୍ୟକ୍ତି ଚାଇନିଜ୍ ମାଞ୍ଜା ବିକ୍ରୟ କିମ୍ବା ବ୍ୟବହାର କରୁଥିବା ପାଇଁ ଧରାପଡ଼େ, ତେବେ ସେମାନଙ୍କୁ କୌଣସି ପରିସ୍ଥିତିରେ ଛାଡ଼ ଦିଆଯିବ ନାହିଁ। ଏହି ବେଆଇନ ବ୍ୟବସାୟରେ ସଂପୃକ୍ତ ସମ୍ପୂର୍ଣ୍ଣ ନେଟୱାର୍କକୁ ଚିହ୍ନଟ କରି ତୁରନ୍ତ କାର୍ଯ୍ୟାନୁଷ୍ଠାନ, ଗିରଫ ଓ ଜେଲ୍ ଦଣ୍ଡ ଦେବାକୁ ସେ ପୋଲିସକୁ ନିର୍ଦ୍ଦେଶ ଦେଇଛନ୍ତି।
ଏହାସହ ରାଜ୍ୟବ୍ୟାପୀ ଚଢାଉ ଚାଲାଇ ଚାଇନିଜ୍ ମାଞ୍ଜାର ଗୋଦାମ, ଦୋକାନ ଓ ଅନଲାଇନ୍ ବିକ୍ରୟ ମାଧ୍ୟମକୁ ମଧ୍ୟ ଟାର୍ଗେଟ୍ କରିବାକୁ କୁହାଯାଇଛି। ପୋଲିସ ଓ ପ୍ରଶାସନକୁ ଏହି ବିଷୟରେ ‘ଜିରୋ ଟୋଲରେନ୍ସ’ ନୀତି ଅନୁସରଣ କରିବାକୁ ନିର୍ଦ୍ଦେଶ ମିଳିଛି।
ସରକାରଙ୍କ ଏହି କଡା ପଦକ୍ଷେପକୁ ସାଧାରଣ ଲୋକେ ସ୍ୱାଗତ କରିଥିବା ବେଳେ, ସୁରକ୍ଷା ଓ ମାନବିକ ଦୃଷ୍ଟିକୋଣରୁ ଏହାକୁ ଏକ ଅତ୍ୟନ୍ତ ଆବଶ୍ୟକ ନିଷ୍ପତ୍ତି ବୋଲି ମନାଯାଉଛି। ରାଜ୍ୟ ସରକାର କହିଛି ଯେ, ସାଧାରଣ ଲୋକଙ୍କ ଜୀବନ ସୁରକ୍ଷା ସରକାରଙ୍କ ପ୍ରଥମ ପ୍ରାଥମିକତା ଏବଂ ଏହାକୁ ନେଇ କୌଣସି ସମଝୌତା କରାଯିବ ନାହିଁ।
also read https://purvapaksa.com/missing-terror-in-delhi/
