ମୁମ୍ବାଇର ଛତ୍ରପତି ଶିବାଜୀ ମହାରାଜ ଆନ୍ତର୍ଜାତୀୟ ବିମାନବନ୍ଦରରେ ଏକ ବଡ଼ ବିମାନ ଦୁର୍ଘଟଣା ଅଳ୍ପରେ ଟଳିଯାଇଛି । ଏୟାର୍ ଇଣ୍ଡିଆର ଏକ ବିମାନ ଓ ଇଣ୍ଡିଗୋର ଅନ୍ୟ ଏକ ବିମାନ ଟ୍ୟାକ୍ସିୱେରେ ଥିବାବେଳେ ଉଭୟ ବିମାନର ଡେଣା ମଧ୍ୟରେ ଧକ୍କା ଲାଗିଥିଲା । ସୌଭାଗ୍ୟବଶତଃ ଏହି ଘଟଣାରେ କୌଣସି ଯାତ୍ରୀ କିମ୍ବା କର୍ମଚାରୀ ଆହତ ହୋଇନଥିବା ଜଣାପଡ଼ିଛି ।
ସୂଚନା ଅନୁଯାୟୀ, ଘଟଣା ସମୟରେ ଉଭୟ ବିମାନ ଉଡ଼ାଣ ପାଇଁ ଟ୍ୟାକ୍ସିୱେରେ ଅପେକ୍ଷା କରୁଥିଲେ । ମୁମ୍ବାଇରୁ କୋଏମ୍ବାଟୁର ଯିବାକୁ ଥିବା ଏୟାର୍ ଇଣ୍ଡିଆର ବିମାନ ଏଆଇ–୨୭୩୨ ଟେକଅଫ୍ ପୂର୍ବରୁ ଟ୍ୟାକ୍ସିୱେରେ ଥିବାବେଳେ ହାଇଦ୍ରାବାଦରୁ ଆସି ମୁମ୍ବାଇରେ ଅବତରଣ କରିଥିବା ଇଣ୍ଡିଗୋ ବିମାନର ଡେଣା ସହ ସଂସ୍ପର୍ଶରେ ଆସିଥିଲା । ଏହାର ପରିଣାମ ସ୍ୱରୂପ ଏୟାର୍ ଇଣ୍ଡିଆ ବିମାନର ଡେଣା କ୍ଷତିଗ୍ରସ୍ତ ହୋଇଥିବା ଏୟାର୍ ଇଣ୍ଡିଆ ପକ୍ଷରୁ ସ୍ପଷ୍ଟ କରାଯାଇଛି ।
ଘଟଣା ପରେ ବିମାନବନ୍ଦର ପ୍ରଶାସନ ସହ ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA)ର ଅଧିକାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚି ପରିସ୍ଥିତିର ସମୀକ୍ଷା କରିଥିଲେ । ଉଭୟ ବିମାନକୁ ଟ୍ୟାକ୍ସିୱେରୁ ହଟାଇ ନିରାପଦ ସ୍ଥାନକୁ ନିଆଯାଇଥିଲା ଏବଂ ବିମାନ ଚଳାଚଳ କିଛି ସମୟ ପାଇଁ ପ୍ରଭାବିତ ହୋଇଥିବା ଖବର ମିଳିଛି ।
ଏୟାର୍ ଇଣ୍ଡିଆ ପକ୍ଷରୁ କୁହାଯାଇଛି ଯେ, ଘଟଣା ପରେ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବିମାନରୁ ଓହ୍ଲାଇ ଦିଆଯାଇଛି । ଯାତ୍ରୀମାନଙ୍କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦିଆଯାଇଥିବା ଏବଂ ବିକଳ୍ପ ବ୍ୟବସ୍ଥା ମାଧ୍ୟମରେ ଗନ୍ତବ୍ୟସ୍ଥଳକୁ ପଠାଇବା ପାଇଁ ପଦକ୍ଷେପ ନିଆଯାଇଛି ବୋଲି ଏୟାର୍ ଇଣ୍ଡିଆ କହିଛି ।
ଘଟଣା ପରେ ଉଭୟ ଏୟାର୍ ଇଣ୍ଡିଆ ଓ ଇଣ୍ଡିଗୋ ବିମାନର ସମ୍ପୂର୍ଣ୍ଣ ବୈଷୟିକ ଯାଞ୍ଚ କରାଯାଇଛି । ଡିଜିସିଏ ପକ୍ଷରୁ ଏହି ଘଟଣା କିପରି ଘଟିଲା ଏବଂ ଟ୍ୟାକ୍ସିୱେରେ କୌଣସି ପ୍ରୋଟୋକଲ ଉଲ୍ଲଂଘନ ହୋଇଛି କି ନାହିଁ, ସେନେଇ ତଦନ୍ତ ଆରମ୍ଭ କରାଯାଇଛି । ପ୍ରାରମ୍ଭିକ ତଦନ୍ତ ରିପୋର୍ଟ ଆସିବା ପରେ ଆଗାମୀ କାର୍ଯ୍ୟାନୁଷ୍ଠାନ ନିଆଯିବ ବୋଲି କୁହାଯାଇଛି ।
ବିମାନବନ୍ଦରରେ ଏପରି ଘଟଣା ଘଟିଥିବାରୁ ଯାତ୍ରୀମାନଙ୍କ ମଧ୍ୟରେ କିଛି ସମୟ ପାଇଁ ଭୟ ଓ ଉତ୍କଣ୍ଠା ସୃଷ୍ଟି ହୋଇଥିଲା । ତେବେ କୌଣସି ବଡ଼ ଦୁର୍ଘଟଣା ନ ଘଟିଥିବାରୁ ସମସ୍ତେ ସ୍ୱସ୍ତି ଅନୁଭବ କରିଛନ୍ତି । ବିଶେଷଜ୍ଞମାନେ ଏପରି ଘଟଣାରୁ ଶିକ୍ଷା ନେଇ ବିମାନବନ୍ଦରରେ ସୁରକ୍ଷା ବ୍ୟବସ୍ଥାକୁ ଆହୁରି କଠୋର କରିବା ଆବଶ୍ୟକ ବୋଲି ମତ ପ୍ରକାଶ କରିଛନ୍ତି ।
also read https://purvapaksa.com/india-and-bangladesh/
https://purvapaksa.com/india-and-bangladesh/
