ରାଜ୍ୟର ରାଜଧାନୀରେ ଗତକାଲି ଘଟିଥିବା ଏକ ଘଟଣା ସମସ୍ତଙ୍କୁ ଆଶ୍ଚର୍ୟ ଏବଂ କ୍ରୋଧିତ କରିଛି। ମାତ୍ର ଗୋଟିଏ ଟ୍ରକରେ ଲାଗିଥିବା ନିଆଁ ପୂରା ସହରର ଟ୍ରାଫିକ ବ୍ୟବସ୍ଥାକୁ ପାଞ୍ଚ ଘଣ୍ଟା ପର୍ଯ୍ୟନ୍ତ ଅଚଳ କରିଦେଇଥିଲା। ଏହା କୌଣସି ସିନେମାର ଦୃଶ୍ୟ ନୁହେଁ, ବରଂ ଆମ “ସ୍ମାର୍ଟ ସିଟି”ର ଏକ କଠୋର ଯଥାର୍ଥ ଚିତ୍ର।
ଜାତୀୟ ରାଜପଥ ଉପରେ ହଠାତ୍ ଗୋଟିଏ ଟ୍ରକରେ ଆଗ୍ନିକାଣ୍ଡ ଘଟିଥିଲା। କିଛି ସମୟ ମଧ୍ୟରେ ଟ୍ରକଟି ସମ୍ପୂର୍ଣ୍ଣ ଭାବେ ଜଳିଗଲା। ଏହା ପରେ ଆରମ୍ଭ ହେଲା ଭୟାବହ ଅବ୍ୟବସ୍ଥା—ରାସ୍ତା ବନ୍ଦ, ଗାଡି ଅଟକିଗଲା, ଏବଂ ଧୀରେ ଧୀରେ ସମଗ୍ର ରାଜଧାନୀ ଟ୍ରାଫିକ ଜାମରେ ଆବଦ୍ଧ ହୋଇପଡ଼ିଲା।
ସାଧାରଣତଃ ଯେଉଁ ରାସ୍ତା ଅତିକ୍ରମ କରିବାକୁ ୫ ମିନିଟ୍ ଲାଗେ, ସେଠାରେ ଲୋକମାନେ ଘଣ୍ଟାଏ ଧରି ଫସି ରହିଥିଲେ। ଆମ୍ବୁଲାନ୍ସ ଜାମରେ ଅଟକି ରହିଗଲା, ରୋଗୀମାନେ ଜୀବନ ଓ ମୃତ୍ୟୁ ସହ ସଂଘର୍ଷ କରୁଥିଲେ। ଛାତ୍ର, କର୍ମଚାରୀ, ବ୍ୟବସାୟୀ—ସମସ୍ତେ ଏହି ଅସହ୍ୟ ପରିସ୍ଥିତିରେ ପଡ଼ିଥିଲେ।
ଏହି ଘଟଣା କେବଳ ଟ୍ରାଫିକ ଜାମ ନୁହେଁ, ବରଂ ପ୍ରଶାସନିକ ବିଫଳତାର ଏକ ସ୍ପଷ୍ଟ ଉଦାହରଣ। ଏହା ପ୍ରଶ୍ନ ଉଠାଉଛି—ଆମ ଟ୍ରାଫିକ ବ୍ୟବସ୍ଥା ସତରେ କେତେ ସୁଦୃଢ଼?
ଆମେ ପ୍ରାୟତଃ “ବିଶ୍ୱସ୍ତରୀୟ ସହର” ବୋଲି ଗର୍ବ କରୁଥାଉ—ହକି ଷ୍ଟାଡିୟମ, ପ୍ରକଳ୍ପ ଓ ଆଧୁନିକ ଢଞ୍ଞା ବିଷୟରେ ଗପ କରୁଥାଉ। କିନ୍ତୁ ମୂଳ ପ୍ରଶ୍ନ ହେଉଛି—ଆମର ଟ୍ରାଫିକ ବ୍ୟବସ୍ଥା କେଉଁ ସ୍ତରର?
ଯେତେବେଳେ କୌଣସି ବଡ଼ ମନ୍ତ୍ରୀଙ୍କ ଅନୁଷ୍ଠାନ ହୁଏ, ସେଠାରେ ବହୁ ସଂଖ୍ୟକ ପୋଲିସ କର୍ମଚାରୀ ଟ୍ରାଫିକ ନିୟନ୍ତ୍ରଣ କରୁଥିବା ଦେଖାଯାଏ। କିନ୍ତୁ ସାଧାରଣ ଲୋକଙ୍କ ପାଇଁ ସେହି ସକ୍ରିୟତା କେଉଁଠି ହାରାଇଯାଏ?
ରାଜଧାନୀରେ ସ୍ଥାପିତ ହୋଇଥିବା ସିସିଟିଭି କ୍ୟାମେରା ଓ ଆଧୁନିକ ପ୍ରଣାଳୀ ମଧ୍ୟ ଏହି ପରିସ୍ଥିତିରେ ବିଫଳ ହୋଇଥିବା ଦେଖାଗଲା। ଯେଉଁଠାରେ ହେଲମେଟ୍ ନ ପିନ୍ଧିଲେ ସତ୍ୱର ଚାଲାଣ ଆସିଯାଏ, ସେଠାରେ ଏପରି ଆପତ୍କାଳୀନ ସ୍ଥିତିକୁ ମ୍ୟାନେଜ୍ କରିବାରେ ବ୍ୟବସ୍ଥା ନିରବ ରହିଗଲା।
ଯଦି ଟ୍ରକ ଜଳିବା ସମୟରୁ ଯଥାସମୟରେ ପଦକ୍ଷେପ ନିଆଯାଇଥାନ୍ତା, ଟ୍ରାଫିକକୁ ବିକଳ୍ପ ରାସ୍ତାରେ ଘୁଞ୍ଚାଯାଇଥାନ୍ତା, ତେବେ ଏପରି ଅବସ୍ଥା ସୃଷ୍ଟି ହୋଇନଥାନ୍ତା।
ଏହି ଘଟଣା ଏକ ଗଭୀର ଚେତାବନୀ—ଯଦି ମାତ୍ର ଗୋଟିଏ ଟ୍ରକ ପାଇଁ ସହର ପାଞ୍ଚ ଘଣ୍ଟା ପର୍ଯ୍ୟନ୍ତ ଅଚଳ ହୋଇପାରେ, ତେବେ ଆଗାମୀ ଦିନରେ ବଡ଼ ଘଟଣା ଘଟିଲେ ପରିସ୍ଥିତି କେତେ ଭୟାବହ ହେବ?
ତେଣୁ ଏହା ସମୟର ଦାବି—ସରକାର ତୁରନ୍ତ ଏହି ଘଟଣାର ତଦନ୍ତ କରି, ଦାୟୀ ଅଧିକାରୀଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନିଅନ୍ତୁ। ନଚେତ୍, ଏପରି ଅବ୍ୟବସ୍ଥା ଆଗାମୀ ଦିନରେ ଆଉ ବଡ଼ ସଙ୍କଟର ରୂପ ନେଇପାରେ।
AlsoRead; https://purvapaksa.com/odishas-unemployed-youth-and-the-struggle-for-the-future/
