ଆଜିର ଖବରଟି ଆମ ଓଡ଼ିଶାବାସୀଙ୍କ ପାଇଁ ଆହୁରି ଅଧିକ ଗର୍ବର ବିଷୟ। କାରଣ ଏହି ଅତ୍ୟାଧୁନିକ ଡ୍ରୋନକୁ ଆମ ରାଜ୍ୟର, ବିଶେଷ କରି ଭଦ୍ରକ ଜିଲ୍ଲା ବାସୁଦେବପୁରର ଯୁବ ଉଦ୍ୟୋଗୀ ତଥା ସଫଳ ଡ୍ରୋଣ ନିର୍ମାଣକାରୀ ବୋଧିସତ୍ତ୍ୱ ସଂଘପ୍ରିୟଙ୍କ କମ୍ପାନୀ ‘ଆଇଜି ଡିଫେନ୍ସ’ (IG Defence) ପ୍ରସ୍ତୁତ କରିଛି।
ଭାରତୀୟ ପ୍ରତିରକ୍ଷା ପ୍ରଯୁକ୍ତିବିଦ୍ୟା କମ୍ପାନୀ ‘ଆଇଜି ଡିଫେନ୍ସ’ ଦ୍ୱାରା ନିର୍ମିତ ଦେଶର ପ୍ରଥମ ସ୍ୱଦେଶୀ ଲଙ୍ଗ୍-ରେଞ୍ଜ୍ ୱାନ୍-ୱେ ଆଟାକ୍ ଡ୍ରୋନ୍ ଅର୍ଥାତ୍ ‘କାଳ’ (KAL) ତାର ସଫଳ ପରୀକ୍ଷା ରାଜସ୍ଥାନର ପୋଖରଣ ଫିଲ୍ଡ ଫାୟାରିଂ ରେଞ୍ଜରେ ସମ୍ପୂର୍ଣ୍ଣ କରିଛି। ଏହି ଖବର ସାମ୍ନାକୁ ଆସିବା ପରେ ଶତ୍ରୁପକ୍ଷଙ୍କ ଶିବିରରେ କମ୍ପନ ସୃଷ୍ଟି ହୋଇଯାଇଛି। ଆଜି ଆମେ ଏହି ଭିଡିଓରେ ବିସ୍ତାର ଭାବରେ ଜାଣିବା ଯେ ଏହି ଡ୍ରୋନ୍ କିପରି କାମ କରେ, ଏହାର ମାର୍ତ୍ତିକ କ୍ଷମତା କ’ଣ ଏବଂ ଏହା ଭାରତୀୟ ସେନା ପାଇଁ କାହିଁକି ଏତେ ଗୁରୁତ୍ୱପୂର୍ଣ୍ଣ? ତେବେ ଭିଡିଓଟିକୁ ଶେଷ ପର୍ଯ୍ୟନ୍ତ ଦେଖନ୍ତୁ।
ସବୁଠାରୁ ପ୍ରଥମେ ଜାଣିବା ଜରୁରୀ ଯେ ଏହି ‘କାଳ’ ଡ୍ରୋନ୍ ପ୍ରକୃତରେ କ’ଣ? ଏହା ହେଉଛି ଏକ ‘କାମିକାଜେ’ ବା ଆତ୍ମଘାତି ଡ୍ରୋନ୍। ଏହାର ସରଳ ଅର୍ଥ ହେଲା—ଏହାକୁ ଶତ୍ରୁର ସଠିକ୍ ଠିକଣା ବା ଟାର୍ଗେଟ୍ ଧ୍ୱଂସ କରିବା ପାଇଁ ପଠାଯାଏ ଏବଂ ଯେତେବେଳେ ଏହା ନିଜର ଲକ୍ଷ୍ୟ ପୂରଣ କରେ, ସେତେବେଳେ ଏହା ନିଜେ ମଧ୍ୟ ବିସ୍ଫୋରିତ ହୋଇ ନଷ୍ଟ ହୋଇଯାଏ।
ଏହି ଡ୍ରୋନର କିଛି ଅତି ଆଶ୍ଚର୍ଯ୍ୟଜନକ ବୈଷୟିକ କ୍ଷମତା ରହିଛି, ଯାହା ଆପଣଙ୍କୁ ଆଶ୍ଚର୍ଯ୍ୟ କରିଦେବ:
• ଏହି ଡ୍ରୋନ୍ ଗୋଟିଏ ଥର ଉଡ଼ାଣ ଆରମ୍ଭ କଲେ ସିଧାସଳଖ ୧,୦୦୦ କିଲୋମିଟର ଦୂରରେ ଥିବା ଶତ୍ରୁର ଠିକଣାକୁ ଚିହ୍ନଟ କରି ମାଟିରେ ମିଶାଇ ପାରିବ।
• ଏହା ଆକାଶରେ କ୍ରମାଗତ ଭାବେ ୭ ରୁ ୮ ଘଣ୍ଟା ପର୍ଯ୍ୟନ୍ତ ବିନା ବାଧାରେ, ନିରବଚ୍ଛିନ୍ନ ଭାବେ ଉଡ଼ିପାରେ।
• ଏହି ଡ୍ରୋନ୍ ନିଜ ସହିତ ପ୍ରାୟ ୫୦ କିଲୋଗ୍ରାମ ପର୍ଯ୍ୟନ୍ତ ଅତ୍ୟନ୍ତ ଶକ୍ତିଶାଳୀ ବିସ୍ଫୋରକ (Warhead) ବହନ କରିବାର କ୍ଷମତା ରଖିଛି, ଯାହା ବଡ଼ ବଡ଼ ବଙ୍କରକୁ ଧ୍ୱଂସ କରିବା ପାଇଁ ଯଥାଷ୍ଟ।
• ଏହା ସମୁଦ୍ର ପତନରୁ ପ୍ରାୟ ୫,୦୦୦ ମିଟର ଅର୍ଥାତ୍ ପ୍ରାୟ ୧୬,୪୦୦ ଫୁଟ୍ ଉଚ୍ଚତା ପର୍ଯ୍ୟନ୍ତ ସଫଳତାର ସହ ଅପରେଟ୍ କରିପାରେ।
ଏହି ସମସ୍ତ ବୈଶିଷ୍ଟ୍ୟ ଏହାକୁ ବିଶ୍ୱର ଅନ୍ୟାନ୍ୟ ଅଗ୍ରଣୀ ଡ୍ରୋନ୍ଗୁଡ଼ିକ ସହିତ ସମକକ୍ଷ କରିପାରିଛି।
ନୋଏଡାସ୍ଥିତ ପ୍ରତିରକ୍ଷା କମ୍ପାନୀ ‘ଆଇଜି ଡିଫେନ୍ସ’ ପକ୍ଷରୁ ସ୍ପଷ୍ଟ କରାଯାଇଛି ଯେ ପୋଖରଣର ପ୍ରଖର ମରୁଭୂମିରେ ଏହି ଡ୍ରୋନର ଫ୍ଲାଇଟ୍ ଟେଷ୍ଟ ଅତ୍ୟନ୍ତ ସଫଳ ହୋଇଛି। ଏହି ପରୀକ୍ଷା ସମୟରେ ଡ୍ରୋନର ଗୁରୁତ୍ୱପୂର୍ଣ୍ଣ ଅଂଶଗୁଡ଼ିକ ଯେପରିକି ଏୟାରଫ୍ରେମ୍ (Airframe), ପ୍ରୋପଲସନ୍ (Propulsion), ଏଭିଓନିକ୍ସ (Avionics), ନାଭିଗେସନ୍ ଏବଂ ମିଶନ ଆର୍କିଟେକ୍ଚରର ସଫଳ ଯାଞ୍ଚ କରାଯାଇଥିଲା। ସବୁ ମାନଦଣ୍ଡରେ ଏହା ଶତ ପ୍ରତିଶତ ସଫଳ ହୋଇଛି।
ଏହି ଡ୍ରୋନରେ ଅତ୍ୟାଧୁନିକ ମଲ୍ଟି-ବ୍ୟାଣ୍ଡ ଗ୍ଲୋବାଲ୍ ନାଭିଗେସନ୍ ସାଟେଲାଇଟ୍ ସିଷ୍ଟମ୍ (GNSS) ଏବଂ ଇନର୍ସିଆଲ୍ ନାଭିଗେସନ୍ ସିଷ୍ଟମ୍ (INS)ର ବ୍ୟବହାର କରାଯାଇଛି। ଏହାର ସବୁଠାରୁ ବଡ଼ ବିଶେଷତା ହେଲା ଯେ, ଯଦି ଯୁଦ୍ଧକ୍ଷେତ୍ରରେ ଶତ୍ରୁପକ୍ଷ ଜିପିଏସ୍ (GPS) ଜାମ୍ କରିଦିଅନ୍ତି, ତେବେ ମଧ୍ୟ ଏହା ଇନର୍ସିଆଲ୍ ନାଭିଗେସନ୍ ଜରିଆରେ ସମ୍ପୂର୍ଣ୍ଣ ସ୍ୱୟଂଚାଳିତ (Autonomous) ଭାବେ ନିଜର ଲକ୍ଷ୍ୟ ଆଡ଼କୁ ସଠିକ୍ ଭାବେ ଆଗେଇ ପାରିବ। ସବୁଠାରୁ ବଡ଼ କଥା ହେଲା, ଏହାକୁ କୌଣସି ବିରାଟ ରନ୍ୱେ’ର ଆବଶ୍ୟକତା ନାହିଁ; ବରଂ ଏହାକୁ ଏକ ଗାଡ଼ିମାଉଣ୍ଟେଡ୍ ଲଞ୍ଚ୍ ପ୍ଲାଟଫର୍ମରୁ ଅତି ସହଜରେ ଆକାଶକୁ ଛଡ଼ାଯାଇପାରିବ।
ଆଜିର ଦୁନିଆରେ ଚାଲିଥିବା ବିଭିନ୍ନ ଯୁଦ୍ଧ (ଯେପରିକି ଋଷ-ୟୁକ୍ରେନ ଯୁଦ୍ଧ କିମ୍ବା ମଧ୍ୟପ୍ରାଚ୍ୟର ସଂଘର୍ଷ) ଏହା ସ୍ପଷ୍ଟ ଭାବେ ପ୍ରମାଣ କରିସାରିଛି ଯେ ଲଙ୍ଗ୍-ରେଞ୍ଜ୍ କାମିକାଜେ ଡ୍ରୋନ୍ଗୁଡ଼ିକ ଯୁଦ୍ଧର ଗତିପଥକୁ ସମ୍ପୂର୍ଣ୍ଣ ଭାବେ ବଦଳାଇ ଦେଇପାରେ। ଅତ୍ୟନ୍ତ କମ୍ ଖର୍ଚ୍ଚରେ ଶତ୍ରୁପକ୍ଷରକୋଟିକୋଟି ଟଙ୍କାର ବଡ଼ ବଡ଼ ଏୟାର ଡିଫେନ୍ସ ସିଷ୍ଟମ୍, ରାଡାର୍ ଇନଷ୍ଟଳେସନ୍ ଏବଂ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାମରିକ ପ୍ରତିଷ୍ଠାନଗୁଡ଼ିକୁ ଧ୍ୱଂସ କରିବା ପାଇଁ ଏହି ଡ୍ରୋନ୍ଗୁଡ଼ିକ ଅତ୍ୟନ୍ତ ଅମୋଘ ଅସ୍ତ୍ର ଭାବରେ କାମ କରିଥାଏ।
ଏହି ପ୍ରସଙ୍ଗରେ ‘ଆଇଜି ଡିଫେନ୍ସ’ର ପ୍ରତିଷ୍ଠାତା ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ବୋଧିସତ୍ତ୍ୱ ସଂଘପ୍ରିୟ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ଏହା କେବଳ ଏକ ସାମରିକ ଡ୍ରୋନ୍ ନୁହେଁ, ବରଂ ଏହା ଭାରତର ସ୍ୱାଧୀନ ପ୍ରତିରକ୍ଷା କ୍ଷମତା ଏବଂ ‘ଆତ୍ମନିର୍ଭରଶୀଳତା’ର ଏକ ବଡ଼ ପ୍ରମାଣ ଅଟେ। ଭାରତୀୟ ସେନାର ଆବଶ୍ୟକତାକୁ ଦୃଷ୍ଟିରେ ରଖି ଏହାକୁ ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳରେ ଡିଜାଇନ୍ କରାଯାଇଛି।
ଏହି ଡ୍ରୋନର ଅବିଶ୍ୱସନୀୟ ସଫଳତା ପରେ କେବଳ ଭାରତୀୟ ସେନା ନୁହେଁ, ବରଂ ବିଦେଶୀ ରାଷ୍ଟ୍ରମାନଙ୍କର ମଧ୍ୟ ଏହା ପ୍ରତି ପ୍ରବଳ ଆଗ୍ରହ ବଢ଼ିବାରେ ଲାଗିଛି। ଭାରତ ସରକାରଙ୍କ ଆବଶ୍ୟକୀୟ ଅନୁମୋଦନ ଏବଂ ଏକ୍ସପୋର୍ଟ କ୍ଲିୟରନ୍ସ ପାଇବା ପରେ, ଖାଡ଼ି (Gulf) ଅଞ୍ଚଳର କେତେକ ଦେଶ ଏହି ‘କାଳ’ ଡ୍ରୋନ୍ କ୍ରୟ କରିବା ପାଇଁ ବେଶ୍ ଆଗ୍ରହ ପ୍ରକାଶ କରିଛନ୍ତି।
ଏହାସହ, ସବୁଠାରୁ ବଡ଼ କଥା ହେଲା ଯେ ଏହି ଡ୍ରୋନ୍ କମ୍ପାନିର AI-ଆଧାରିତ ‘GRID’ ବ୍ୟାଟେଲ୍ ମ୍ୟାନେଜମେଣ୍ଟ ସିଷ୍ଟମ୍ ସହିତ ମଧ୍ୟ ସହଜରେ ସଂଯୋଗ କରାଯାଇପାରିବ। ଏହା ଯୁଦ୍ଧଭୂମିରେ ସଠିକ୍ ତଥ୍ୟ ସଂଗ୍ରହ କରିବାରେ ଏବଂ ଅତି କମ୍ ସମୟରେ ରଣନୈତିକ ନିଷ୍ପତ୍ତି ନେବାରେ ସେନାକୁ ବହୁତ ସାହାଯ୍ୟ କରିଥାଏ।
ଆଜି ଆମେ ଦେଖିଲେ ଯେ କିପରି ଭାରତୀୟ ଘରୋଇ ପ୍ରତିରକ୍ଷା କମ୍ପାନୀ ଏବଂ ଷ୍ଟାର୍ଟଅପ୍ଗୁଡ଼ିକ ଦେଶକୁ ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭର କରିବା ଦିଗରେ ଦ୍ରୁତ ଗତିରେ ଆଗେଇ ଚାଲିଛନ୍ତି। ବିଶେଷକରି ଓଡ଼ିଶାର ଯୁବ ପ୍ରତିଭାଙ୍କ ଦ୍ୱାରା ପ୍ରସ୍ତୁତ ‘କାଳ’ ଡ୍ରୋନର ସଫଳ ପରୀକ୍ଷା ଆମର ଶତ୍ରୁମାନଙ୍କ ପାଇଁ ଏକ କଡ଼ା ଚେତାବନୀ ଏବଂ ଆମ ସେନା ପାଇଁ ଏକ ବଡ଼ ଶକ୍ତି ଅଟେ।
