ଓଡ଼ିଶାରେ ବିଜେପି ସରକାର ଆସିବା ପରଠାରୁ ରାଜ୍ୟର ରାଜନୈତିକ ପାରଦ କ୍ରମାଗତ ଭାବରେ ଉପରମୁହାଁ ରହିଛି। ବିଶେଷକରି କେନ୍ଦ୍ରୀୟ ମନ୍ତ୍ରିମଣ୍ଡଳରେ ଓଡ଼ିଶାରୁ କିଏ ଏବଂ କେଉଁମାନେ ସ୍ଥାନ ପାଇବେ, ସେପଟେ ରାଜ୍ୟ ରାଜନୀତିରେ କାହା ଭାଗ୍ୟ ଫିଟିବ, ଏହାକୁ ନେଇ ପ୍ରତିଦିନ ନୂଆ ନୂଆ ଚର୍ଚ୍ଚା ସାମ୍ନାକୁ ଆସୁଛି। ଗତକାଲି ପର୍ଯ୍ୟନ୍ତ ସମସ୍ତଙ୍କ ମୁହଁରେ ଗୋଟିଏ କଥା ଥିଲା—କେନ୍ଦ୍ରରେ ମନ୍ତ୍ରୀ ହେବା ରେସରେ ମାତ୍ର ତିନିଜଣ ଓଡ଼ିଆ ସାଂସଦ ଅଛନ୍ତି। ସେମାନେ ହେଲେ ରାଜ୍ୟ ବିଜେପି ସଭାପତି ମନମୋହନ ସାମଲ, କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ଏବଂ ପୁରୀ ସାଂସଦ ସମ୍ବିତ ପାତ୍ର।
କିନ୍ତୁ, ରାଜନୀତି କେବେବି ଗୋଟିଏ ସ୍ଥାନରେ ସ୍ଥିର ରହେ ନାହିଁ। ଗତକାଲି ବିଜେପିର କେନ୍ଦ୍ରୀୟ କମିଟି ଗଠନ ହେବା ପରେ ଏହି ସମୀକରଣ ସମ୍ପୂର୍ଣ୍ଣ ବଦଳି ଯାଇଛି! ଆଜି ଆମେ ବିସ୍ତୃତ ଭାବେ ଆଲୋଚନା କରିବା ଯେ, କେମିତି ବଦଳିଲା ଦିଲ୍ଲୀ ଦରବାରର ଗଣିତ ଏବଂ ଓଡ଼ିଶାରୁ କେଉଁ ନେତାଙ୍କ ଆଶା ବଢ଼ିଲା ଓ କାହାର ମଉଳିଲା।
କେନ୍ଦ୍ରୀୟ କମିଟି ଘୋଷଣା ପରେ ସେହି ତିନିଜଣିଆ ତାଲିକାରୁ ଦୁଇଜଣ ହେଭିୱେଟ୍ ନେତା—ଅର୍ଥାତ୍ ବୈଜୟନ୍ତ ପଣ୍ଡା ଏବଂ ସମ୍ବିତ ପାତ୍ର ସିଧାସଳଖ ଏହି ରେସରୁ ଦୂରେଇ ଯାଇଛନ୍ତି। କାହିଁକି ଜାଣିଛନ୍ତି? କାରଣ ଏହି ଦୁଇଜଣଙ୍କୁ ଦଳର ସଂଗଠନରେ ଅତି ଗୁରୁତ୍ୱପୂର୍ଣ୍ଣ ପଦବୀ ଏବଂ ଦାୟିତ୍ୱ ମିଳିଛି। ଯେଉଁମାନେ ସଂଗଠନର ମୁଖ୍ୟ ଦାୟିତ୍ୱରେ ରୁହନ୍ତି, ସାଧାରଣତଃ ସେମାନଙ୍କୁ ସରକାରୀ ଦାୟିତ୍ୱ ବା ମନ୍ତ୍ରିମଣ୍ଡଳଠାରୁ ଦୂରରେ ରଖାଯାଏ କିମ୍ବା ସଂଗଠନ କାମରେ ବ୍ୟସ୍ତ ରଖାଯାଏ। ତେଣୁ ଏବେ ଏହି ତାଲିକାରେ କେବଳ ଏକମାତ୍ର ନାଁ ରହିଗଲା—ମନମୋହନ ସାମଲ।
ଏହି ପରିବର୍ତ୍ତନ ପରେ ରାଜନୈତିକ ମହଲରେ ଏକ ବଡ଼ କଳ୍ପନାଜଳ୍ପନା ଆରମ୍ଭ ହୋଇଯାଇଛି। ଚର୍ଚ୍ଚା ହେଉଛି ଯେ, ବର୍ତ୍ତମାନର କେନ୍ଦ୍ର ଆଦିବାସୀ କଲ୍ୟାଣମନ୍ତ୍ରୀ ଜୁଏଲ ଓରାମ ମଧ୍ୟ ମନ୍ତ୍ରିମଣ୍ଡଳରୁ ବାଦ୍ ପଡ଼ିପାରନ୍ତି! ଯଦି ପ୍ରକୃତରେ ଏପରି ହୁଏ, ତେବେ ଓଡ଼ିଶାରୁ କେହିଜଣେ ବି ପୁରୁଣା ଏବଂ ଅଭିଜ୍ଞ ଚେହେରା କେନ୍ଦ୍ର ମନ୍ତ୍ରିମଣ୍ଡଳରେ ରହିବେ ନାହିଁ। ଆଉ ଏହି ଗୋଟିଏ ଘଟଣା ରାଜ୍ୟ ବିଜେପିର ଅନ୍ୟାନ୍ୟ ଆଶାୟୀ ସାଂସଦମାନଙ୍କ ମନରେ ନୂତନ ଆଶା ଓ ଉତ୍କଣ୍ଠା ବଢ଼ାଇ ଦେଇଛି। ଏହି ରେସରେ କିଏ କେଉଁ ସମୀକରଣକୁ ଧରି ଆଗକୁ ବଢ଼ୁଛନ୍ତି।
କେନ୍ଦ୍ରମନ୍ତ୍ରୀ ହେବାକୁ ଥିବା ଆଶାୟୀଙ୍କ ନୂଆ ତାଲିକା
ସବୁଠାରୁ ବଡ଼ କଥା ହେଲା, ଏହି ତାଲିକାରେ ଏବେ ମହିଳା କୋଟାରୁ ଦୁଇଜଣ ନୂତନ ସାଂସଦଙ୍କ ନାଁ ଯୋଡ଼ି ହୋଇଛି। କାରଣ ବିଜେପି ଏବେ ମହିଳା ସଂରକ୍ଷଣ ଉପରେ ଗୁରୁତ୍ୱ ଦେଉଥିବାରୁ ରାଜ୍ୟର ମହିଳା ସାଂସଦମାନଙ୍କ ଗୁରୁତ୍ୱ ବଢ଼ିବାରେ ଲାଗିଛି। ମନ୍ତ୍ରୀ ପଦ ଆଶାୟୀମାନେ ହେଲେ କଳାହାଣ୍ଡି ସାଂସଦ ମାଳବିକା ଦେବୀ ଏବଂ ଆସ୍କା ସାଂସଦ ଅନୀତା ଶୁଭଦର୍ଶିନୀ।
ସଂସଦରେ ମାଳବିକା ଦେବୀ ପ୍ରଶ୍ନ ପଚାରିବା ସହିତ ସଂସଦୀୟ କାମରେ ଆଗ୍ରହ ଦେଖାଉଥିବାରୁ ସେ ଏବେ କେନ୍ଦ୍ରୀୟ ନେତାଙ୍କ ଦୃଷ୍ଟି ଆକର୍ଷଣ କରିଛନ୍ତି। ସେହିପରି ନବୀନଙ୍କ ଗଡ଼ରୁ ଜିତି ସାଂସଦ ହୋଇଥିବା ଅନୀତା ଶୁଭଦର୍ଶିନୀ ମନ୍ତ୍ରୀ ହେବାର ଦୃଢ଼ ଆଶା ରଖୁଛନ୍ତି।
କିନ୍ତୁ ପ୍ରଶ୍ନ ଉଠୁଛି, ଅନ୍ୟ ଦୁଇଜଣ ଜଣାଶୁଣା ମହିଳା ସାଂସଦ—ସଙ୍ଗୀତା ସିଂହଦେଓ ଏବଂ ଅପରାଜିତା ଷଡ଼ଙ୍ଗୀ କେଉଁଠି ଅଛନ୍ତି? ରାଜନୈତିକ କରିଡରରେ ଏମାନେ ପ୍ରବଳ ଦାବିଦାର ଥିଲେ ହେଁ, ବର୍ତ୍ତମାନ ସେମାନେ ସମ୍ପୂର୍ଣ୍ଣ ଭାବରେ ରେସରୁ ବାହାରେ ବୋଲି କୁହାଯାଉଛି। ଏହାର କାରଣଗୁଡ଼ିକ ମଧ୍ୟ ବେଶ୍ ରୋଚକ:
• ପ୍ରଥମତଃ, ସଙ୍ଗୀତା ସିଂହଦେଓଙ୍କ ସ୍ୱାମୀ କନକ ବର୍ଦ୍ଧନ ସିଂହଦେଓ ରାଜ୍ୟର ଉପମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଛନ୍ତି। ଗୋଟିଏ ପରିବାରରୁ ଉଭୟ ରାଜ୍ୟରେ ଏତେ ବଡ଼ ପଦବୀ ଏବଂ କେନ୍ଦ୍ରରେ ମନ୍ତ୍ରିପଦ ମିଳିବା ସମ୍ଭାବନାକୁ ଦଳୀୟ ନୀତିରେ ସୀମିତ କରାଯାଇପାରେ, ଯେଉଁଥିପାଇଁ ତାଙ୍କର ଆଶା ଏକପ୍ରକାର ମଉଳି ଯାଇଛି।
• ଦ୍ୱିତୀୟତଃ, ଓଡ଼ିଶା ରାଜନୀତିର ଜଣେ ଫାୟାରବ୍ରାଣ୍ଡ ନେତ୍ରୀ ଭାବେ ପରିଚିତା ଅପରାଜିତା ଷଡ଼ଙ୍ଗୀ ମୂଳରୁ ହିଁ ଏହି ରେସରେ ଆଗରେ ଥିଲେ। କିନ୍ତୁ ଆଲୋଚନା ରହିଛି ଯେ, ନିଜ ଝିଅର ଏକ ଭୁଲ୍ ପଦକ୍ଷେପ କିମ୍ବା କିଛି ପରିସ୍ଥିତି କାରଣରୁ ସେ କେନ୍ଦ୍ରୀୟ ନେତୃତ୍ୱଙ୍କ ସୁନଜରରୁ କିଛି ମାତ୍ରାରେ ହଟିଯାଇଛନ୍ତି। ଫଳରେ ତାଙ୍କ ସମ୍ଭାବନା ମଧ୍ୟ କ୍ଷୀଣ ହୋଇଯାଇଛି।
ମହିଳା କୋଟା ପରେ ଆସନ୍ତୁ ନଜର ପକାଇବା ଆଦିବାସୀ ଏବଂ କ୍ଷେତ୍ରୀୟ ସମୀକରଣ ଉପରେ। ଦକ୍ଷିଣ ଓଡ଼ିଶାର ନବରଙ୍ଗପୁର ସାଂସଦ ବଳଭଦ୍ର ମାଝୀ ଏବଂ ଉତ୍ତର ଓଡ଼ିଶାର ମୟୂରଭଞ୍ଜ ସାଂସଦ ନବ ଚରଣ ମାଝୀ ଆଦିବାସୀ କୋଟାରୁ କେନ୍ଦ୍ରମନ୍ତ୍ରୀ ହେବା ପାଇଁ ଦୃଢ଼ ଆଶାୟୀ ରହିଛନ୍ତି।
ଅବଶ୍ୟ, ଉତ୍ତର ଓଡ଼ିଶାରୁ ଆଉ ଜଣେ ଅଭିଜ୍ଞ ସାଂସଦ ଅନନ୍ତ ନାୟକ ମଧ୍ୟ ଆଶାୟୀ ଥିଲେ; କିନ୍ତୁ ରାଜନୈତିକ ଗଣିତ କହୁଛି ଯେ, ତାଙ୍କ ନିଜ ଜିଲ୍ଲାରୁ ହିଁ ରାଜ୍ୟର ମୁଖ୍ୟମନ୍ତ୍ରୀ ଆସିଛନ୍ତି ଏବଂ ପଡ଼ିଶା ମୟୂରଭଞ୍ଜରୁ ଦେଶର ମହାମହିମ ରାଷ୍ଟ୍ରପତି ଅଛନ୍ତି, ତେଣୁ ସେହି ଅଞ୍ଚଳରୁ କେନ୍ଦ୍ରମନ୍ତ୍ରୀ ପଦ ମିଳିବା ଆଶା ବହୁତ କ୍ଷୀଣ।
ଏହା ବ୍ୟତୀତ, ପଶ୍ଚିମ ଓଡ଼ିଶାରୁ ପ୍ରଦୀପ ପୁରୋହିତ ଏବଂ ଦକ୍ଷିଣ-ପଶ୍ଚିମ ଓଡ଼ିଶାରୁ ସୁକାନ୍ତ ପାଣିଗ୍ରାହୀ ମଧ୍ୟ ଏହି ରେସରେ ଅଛନ୍ତି ବୋଲି ରାଜନୈତିକ ମହଲରେ ଜୋର୍ସୋର୍ରେ ଚର୍ଚ୍ଚା ଚାଲିଛି। ସେହିପରି ରାଜ୍ୟସଭା ସାଂସଦ ସୁଜିତ୍ କୁମାରଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି। କାରଣ ସେ ପଶ୍ଚିମ ଓଡ଼ିଶାରୁ ହୋଇଥିବାବେଳେ ଅନ୍ୟ ଦଳର ସାଂସଦ ଓ ନେତାମାନଙ୍କୁ ଆଣିବାରେ ଏବଂ ସଂଗଠନକୁ ମଜଭୁତ କରିବାରେ ବଡ଼ ଭୂମିକା ଗ୍ରହଣ କରିଛନ୍ତି।
ସବୁଠାରୁ ବଡ଼ ଏବଂ ଚିନ୍ତାଜନକ କଥା ଯାହାକୁ ନେଇ ଏବେ ସବୁଠାରୁ ଅଧିକ ଆଲୋଚନା ହେଉଛି, ତାହା ହେଲା—ଗତ ମାସରେ ଧର୍ମେନ୍ଦ୍ର ପ୍ରଧାନ କେନ୍ଦ୍ରମନ୍ତ୍ରୀ ପଦରୁ ଇସ୍ତଫା ଦେଇଥିବାବେଳେ, ବର୍ତ୍ତମାନ ଯଦି ଜୁଏଲ ଓରାମ ମଧ୍ୟ ମନ୍ତ୍ରିମଣ୍ଡଳରୁ ବାଦ୍ ପଡ଼ନ୍ତି, ତେବେ କେନ୍ଦ୍ର କ୍ୟାବିନେଟରେ ଓଡ଼ିଶାର ପ୍ରତିନିଧିତ୍ୱ ସମ୍ପୂର୍ଣ୍ଣ ଭାବରେ ଶୂନ୍ୟ ହୋଇଯିବ!
ଏହା ଓଡ଼ିଶା ପାଇଁ ଏକ ବଡ଼ ରାଜନୈତିକ ଶୂନ୍ୟତା ସୃଷ୍ଟି କରିପାରେ। କାରଣ ଏତେଗୁଡ଼ାଏ ସାଂସଦ ଜିତିବା ପରେ ଏବଂ କେନ୍ଦ୍ରରେ ବିଜେପି ସରକାର ଥାଉଁଥାଉଁ କ୍ୟାବିନେଟରେ ଓଡ଼ିଶାର ଓଜନ କମିବା କଥାକୁ ଦଳ କଦାପି ଚାହିଁବ ନାହିଁ।
ବର୍ତ୍ତମାନ ଯେଉଁମାନଙ୍କ ନାଁ ଆଶାୟୀ ଭାବେ ଶୁଣାଯାଉଛି, ସେମାନଙ୍କ ମଧ୍ୟରୁ କେବଳ ଅଭିଜ୍ଞ ନେତା ମନମୋହନ ସାମଲଙ୍କୁ ଛାଡ଼ିଦେଲେ, ଅନ୍ୟ କାହା ପାଇଁ କ୍ୟାବିନେଟ୍ ମନ୍ତ୍ରୀ ହେବାର ସମ୍ଭାବନା ବହୁତ କମ୍ ରହିଛି। ଅଧିକାଂଶ ନେତାଙ୍କୁ ରାଷ୍ଟ୍ରମନ୍ତ୍ରୀ ଭାବରେ ଦାୟିତ୍ୱ ମିଳିବାର ସମ୍ଭାବନା ଅଧିକ।
AlsoRead; https://purvapaksa.com/amazing-facts-from-the-supreme-court-and-the-true-picture-of-our-democracy/
