ଓଡ଼ିଶାର ରାଜଧାନୀ ଭୁବନେଶ୍ୱରକୁ ପୂର୍ବ ଭାରତର ଆଇଟି ଏବଂ ପ୍ରଯୁକ୍ତିବିଦ୍ୟା ମହାନଗରୀ ଆକାରରେ ଗଢ଼ିତୋଳିବା ପାଇଁ ରାଜ୍ୟ ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ସହରର ହୃଦପିଣ୍ଡ ତଥା ଅଗ୍ରଣୀ ବାଣିଜ୍ୟିକ ପେଣ୍ଠସ୍ଥଳୀ ଡ଼ମଣା ଛକ ନିକଟରେ ଏକ ବିଶାଳ ଆଇଟି ପାର୍କ ନିର୍ମାଣ ପାଇଁ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିଛନ୍ତି। ଏଥିପାଇଁ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗ ତଥା ଇଡ୍କୋ ପକ୍ଷରୁ ୨୫ ଏକର ପରିମିତ ଜମିରେ ବିଶ୍ୱସ୍ତରୀୟ ଆଇଟି ପାର୍କ ପ୍ରତିଷ୍ଠା ନିମନ୍ତେ ଗ୍ଲୋବାଲ୍ ଟେଣ୍ଡର/ବିଡ୍ ଆହ୍ୱାନ କରାଯାଇଛି।
/odishatv/media/post_attachments/uploadimage/library/16_9/16_9_0/recent_photo_1754207877.jpg)
ଏହି ନୂତନ ଆଇଟି ହବ୍ ଗଢ଼ିଉଠିବା ଦ୍ୱାରା ରାଜ୍ୟରେ ଶହ ଶହ ଆଇଟି କମ୍ପାନୀ ନିଜର ଶାଖା ଖୋଲିବା ସହ ହଜାର ହଜାର ଓଡ଼ିଆ ଯୁବକଯୁବତୀଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ।
ବିଶ୍ୱସ୍ତରୀୟ ଆଇଟି ପାର୍କର ରୂପରେଖ ଓ ସୁବିଧା ସୁଯୋଗ
ସରକାରୀ ସୂତ୍ରରୁ ମିଳିଥିବା ତଥ୍ୟ ଅନୁଯାୟୀ, ଡ଼ମଣା ଛକ ନିକଟରେ ଥିବା ଏହି ୨୫ ଏକର ଜମିରେ ସମସ୍ତ ଅତ୍ୟାଧୁନିକ ମୂଳଭୂତ ସୁବିଧା ସୁଯୋଗ ସହିତ ‘ପ୍ଲଗ୍ ଆଣ୍ଡ୍ ପ୍ଲେ’ ଭିତ୍ତିଭୂମି ବିକଶିତ କରାଯିବ। ଏହି ନୂତନ ଆଇଟି ପାର୍କରେ ନିମ୍ନଲିଖିତ ମୁଖ୍ୟ ବୈଶିଷ୍ଟ୍ୟଗୁଡ଼ିକ ଅନ୍ତର୍ଭୁକ୍ତ ରହିବ:
ଗ୍ରେଡ୍-ଏ ଅଫିସ୍ ସ୍ପେସ୍ : ବହୁରାଷ୍ଟ୍ରୀୟ ଆଇଟି ଏବଂ ଆଇଟିଇଏସ୍ କମ୍ପାନୀଗୁଡ଼ିକ ପାଇଁ ବିଶ୍ୱସ୍ତରୀୟ କାର୍ଯ୍ୟାଳୟ ପରିସର, ଗବେଷଣା ଓ ବିକାଶ କେନ୍ଦ୍ର ଏବଂ ଡାଟା ସେଣ୍ଟର ପ୍ରତିଷ୍ଠା କରାଯିବ।
ଷ୍ଟାର୍ଟଅପ୍ ଏବଂ ଇନୋଭେସନ୍ ହବ୍ : ନୂତନ ଉଦ୍ୟୋଗୀ ଏବଂ ଟେକ୍ନୋଲୋଜି କମ୍ପାନୀଗୁଡ଼ିକ ପାଇଁ କୋ-ୱର୍କିଂ ସ୍ପେସ୍ ଏବଂ ସ୍ୱତନ୍ତ୍ର ଇନକ୍ୟୁବେସନ୍ ସେଣ୍ଟରର ସୁବିଧା ରହିବ।
ନିରବଚ୍ଛିନ୍ନ ସେବା : ୨୪ ଘଣ୍ଟିଆ ବିଦ୍ୟୁତ୍ ସରବରାହ, ହାଇ-ସ୍ପିଡ୍ ଫାଇବର୍ ଇଣ୍ଟରନେଟ୍ କନେକ୍ଟିଭିଟି, ଆଧୁନିକ ସୁରକ୍ଷା ବ୍ୟବସ୍ଥା ଏବଂ ସ୍ୱୟଂଚାଳିତ ପାର୍କିଂ ବ୍ୟବସ୍ଥା।
ପରିବେଶ-ଅନୁକୂଳ ଗ୍ରୀନ୍ ବିଲ୍ଡିଂ : ସମ୍ପୂର୍ଣ୍ଣ ସବୁଜ ପରିବେଶକୁ ଦୃଷ୍ଟିରେ ରଖି ଗ୍ରୀନ୍ ବିଲ୍ଡିଂ କନ୍ସେପ୍ଟରେ ସୌରଶକ୍ତି, ବର୍ଷାଜଳ ଅମଳ ଏବଂ ସ୍ୱତନ୍ତ୍ର ବୋଜ୍ୟବସ୍ତୁ ପରିଚାଳନା ବ୍ୟବସ୍ଥା କରାଯିବ।
ପାର୍ଟିଫୋର୍ମ ଓ କନେକ୍ଟିଭିଟିର ସୁବିଧା
ଡ଼ମଣା ଛକ ଅଞ୍ଚଳ ଭୁବନେଶ୍ୱରର ସବୁଠାରୁ ପ୍ରମୁଖ ଓ ସଂଯୋଗୀକୃତ ସ୍ଥାନ ହୋଇଥିବାରୁ ଏହା ଆଇଟି କମ୍ପାନୀଗୁଡ଼ିକର ପ୍ରଥମ ପସନ୍ଦ ପାଲଟିଛି। ଏହି ପାର୍କ ନିକଟରେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର, ପଟିଆ ଏବଂ ଇନ୍ଫୋସିଟି-୧ ଭଳି ଗୁରୁତ୍ୱପୂର୍ଣ୍ଣ ସ୍ଥାନ ରହିଛି। ଏହାସହିତ ଭୁବନେଶ୍ୱର ମେଟ୍ରୋ ପ୍ରକଳ୍ପର ରୁଟ୍ ମଧ୍ୟ ଏହି ଆଇଟି ପାର୍କ ଦେଇ ଗତି କରୁଥିବାରୁ ଗମନାଗମନ କ୍ଷେତ୍ରରେ କର୍ମଚାରୀମାନଙ୍କ ପାଇଁ ଅତ୍ୟନ୍ତ ସୁବିଧାଜନକ ହେବ।
ନିଯୁକ୍ତି ଓ ଆର୍ଥିକ ଅଭିବୃଦ୍ଧି
ରାଜ୍ୟ ସରକାର ନିକଟରେ ଆଇଟି ଏବଂ ସେମିକଣ୍ଡକ୍ଟର ନୀତି କାର୍ଯ୍ୟକାରୀ କରିବା ପରେ ଟିସିଏସ୍ , ୱିପ୍ରୋ , ଇନ୍ଫୋସିସ୍ , ଟେକ୍ ମହିନ୍ଦ୍ରା ଏବଂ କୋଗ୍ନିଜାଣ୍ଟ ଭଳି ଦେଶପ୍ରଦେଶର ବଡ଼ ବଡ଼ କମ୍ପାନୀ ସହ ନୂଆ ନୂଆ ଆଇଟି କମ୍ପାନୀମାନେ ଓଡ଼ିଶାରେ ନିଜର କାର୍ଯ୍ୟାଳୟ ପ୍ରତିଷ୍ଠା କରୁଛନ୍ତି।
/odishatv/media/post_attachments/uploadimage/library/16_9/16_9_0/recent_photo_1737625702.jpg)
ଡ଼ମଣାସ୍ଥିତ ଏହି ନୂତନ ୨୫ ଏକର ଆଇଟି ପାର୍କ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବା ପରେ ପ୍ରାୟ ୨୦,୦୦୦ରୁ ଅଧିକ ଆଇଟି ପ୍ରଫେସନାଲଙ୍କ ପାଇଁ ପ୍ରତ୍ୟକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ। ଏହାସହ ସ୍ଥାନୀୟ ବ୍ୟବସାୟ, ପରିବହନ, ହୋଟେଲ ଏବଂ ହାଉସିଂ କ୍ଷେତ୍ରରେ ବିଶାଳ ଆର୍ଥିକ ଅଭିବୃଦ୍ଧି ଘଟିବ।
ଆଇଟି ବିଭାଗର ଆଶା
ରାଜ୍ୟ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ବିଭାଗର ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ, ଟେଣ୍ଡର ପ୍ରକ୍ରିୟା ଶେଷ ହେବା ପରେ ଖୁବ୍ଶୀଘ୍ର ଜମି ଆବଣ୍ଟନ ଏବଂ ନିର୍ମାଣ କାର୍ଯ୍ୟ ଆରମ୍ଭ କରାଯିବ। ନିର୍ଦ୍ଧାରିତ ସମୟସୀମା ମଧ୍ୟରେ ଏହି ପ୍ରକଳ୍ପକୁ ଶେଷ କରିବା ପାଇଁ ସରକାର ଲକ୍ଷ୍ୟ ରଖିଛନ୍ତି। ଏହି ନୂତନ ଆଇଟି ହବ୍ ସାକାର ହେଲେ ଭୁବନେଶ୍ୱର ଭାରତର ସ୍ମାର୍ଟ ଆଇଟି ସିଟି ମାନଚିତ୍ରରେ ନିଜର ପ୍ରଭୁତ୍ୱକୁ ଆହୁରି ମଜବୁତ୍ କରିପାରିବ।
