ଓଡ଼ିଶା ରାଜନୀତିରେ ଏବେ ଏକ ବଡ଼ ରାଜନୈତିକ ଭୂକମ୍ପ ଦେଖିବାକୁ ମିଳିଛି। କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କେନ୍ଦ୍ର ମନ୍ତ୍ରିମଣ୍ଡଳରୁ ଇସ୍ତଫା ଦେବା ପରେ, ଏହାକୁ ନେଇ ଦିଲ୍ଲୀରୁ ଭୁବନେଶ୍ୱର ପର୍ଯ୍ୟନ୍ତ ଚର୍ଚ୍ଚା ଜୋର୍ ଧରିଛି।
ଓଡ଼ିଶାରେ ବିଜେପିର ସଂଗଠନକୁ ମଜବୁତ୍ କରିବାରେ ଏବଂ ରାଜ୍ୟରେ ଦଳକୁ ପ୍ରଥମ ଥର ପାଇଁ କ୍ଷମତାକୁ ଆଣିବାରେ ଯେଉଁ ନେତାଙ୍କୁ ସବୁଠାରୁ ଗୁରୁତ୍ୱପୂର୍ଣ୍ଣ ବିଚାର କରାଯାଉଥିଲା, ସେହି ଧର୍ମେନ୍ଦ୍ର ପ୍ରଧାନଙ୍କ ଏହି ନିଷ୍ପତ୍ତି ପଛରେ କ’ଣ ରହିଛି କାରଣ?
ଏହି ଇସ୍ତଫା କ’ଣ ଛାତ୍ରମାନଙ୍କ ପାଇଁ ଏକ ଦାୟିତ୍ୱବାନ୍ ନେତାଙ୍କ ‘ତ୍ୟାଗ’, ନା ବିରୋଧୀଙ୍କ ଚାପ ଆଗରେ ସରକାରଙ୍କ ‘ବିଫଳତା’? ଆଉ ସବୁଠାରୁ ବଡ଼ ପ୍ରଶ୍ନ— ଏହାଦ୍ୱାରା ଓଡ଼ିଶା ବିଜେପିର ଆଭ୍ୟନ୍ତରୀଣ ରାଜନୀତି କେଉଁ ମୋଡ଼ ନେବ? ମୋହନ ସରକାରଙ୍କ ପାଇଁ ଏହା ଅସଲ ବିପଦର ଆରମ୍ଭ କି?
ଦିଗ ୧: ଦିଲ୍ଲୀରେ ଓଡ଼ିଶା ବିଜେପିର ଶକ୍ତିଶାଳୀ ସ୍ୱର କ୍ଷୀଣ
ପ୍ରଥମେ ଆସନ୍ତୁ ଆଲୋଚନା କରିବା ପ୍ରଥମ ବଡ଼ ଦିଗ ଉପରେ— ଦିଲ୍ଲୀରେ ଓଡ଼ିଶା ବିଜେପିର ଏକ ଶକ୍ତିଶାଳୀ ସ୍ୱର କ୍ଷୀଣ ହୋଇଯିବ।
ଧର୍ମେନ୍ଦ୍ର ପ୍ରଧାନ କେବଳ ଜଣେ କେନ୍ଦ୍ରମନ୍ତ୍ରୀ ନଥିଲେ, ବରଂ ଓଡ଼ିଶା ବିଜେପି ପାଇଁ ସେ ଥିଲେ ଏକ ମୁଖ୍ୟ ରଣନୀତିକାର, ସଂଗଠନର ମୁଖ୍ୟ ଆଙ୍କର୍ ଏବଂ କେନ୍ଦ୍ରୀୟ ନେତୃତ୍ୱଙ୍କ ସହ ରାଜ୍ୟ ନେତୃତ୍ୱକୁ ଯୋଡ଼ୁଥିବା ସବୁଠାରୁ ମଜବୁତ୍ ସେତୁ।
ଦିଲ୍ଲୀ ଦରବାରରେ ଓଡ଼ିଶାର ସ୍ୱରକୁ ଦୃଢ଼ ଭାବେ ରଖିବା ଏବଂ କେନ୍ଦ୍ରୀୟ ଯୋଜନାକୁ ଓଡ଼ିଶାରେ କାର୍ଯ୍ୟକାରୀ କରିବାରେ ତାଙ୍କର ଏକ ବଡ଼ ଭୂମିକା ଥିଲା। କିନ୍ତୁ କେନ୍ଦ୍ର କ୍ୟାବିନେଟ୍ରୁ ତାଙ୍କର ଏହି ପ୍ରସ୍ଥାନ ତୁରନ୍ତ ଗୋଟିଏ ବଡ଼ ଶୂନ୍ୟସ୍ଥାନ ସୃଷ୍ଟି କରିଛି।
ସଂକ୍ଷେପରେ କହିବାକୁ ଗଲେ, ଓଡ଼ିଶା ବିଜେପି ଦିଲ୍ଲୀରେ ନିଜର ସବୁଠାରୁ ଶକ୍ତିଶାଳୀ ସ୍ୱରକୁ ହରାଇଛି, ଯାହା ଆଗାମୀ ଦିନରେ ଦଳର ରାଜନୈତିକ ସମନ୍ୱୟ ଏବଂ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବାରେ ପ୍ରଭାବ ପକାଇପାରେ।
ଦିଗ ୨: ବିଜେପିର ଆଭ୍ୟନ୍ତରୀଣ କ୍ଷମତା ସମୀକରଣ ବଦଳିବ
ଦ୍ୱିତୀୟ ବଡ଼ କଥା ହେଉଛି— ଓଡ଼ିଶା ବିଜେପି ଭିତରେ କ୍ଷମତା ସମୀକରଣ ବଦଳିବ।
କେନ୍ଦ୍ର କ୍ୟାବିନେଟ୍ରୁ ଧର୍ମେନ୍ଦ୍ରଙ୍କ ବିଦାୟ ଦଳ ଭିତରେ ଶକ୍ତିର ସନ୍ତୁଳନକୁ ବଦଳାଇ ଦେଇପାରେ। ଏପର୍ଯ୍ୟନ୍ତ ଓଡ଼ିଶା ବିଜେପିର ପ୍ରତ୍ୟେକ ବଡ଼ ନିଷ୍ପତ୍ତିରେ ତାଙ୍କର ପ୍ରତ୍ୟକ୍ଷ କିମ୍ବା ପରୋକ୍ଷ ସମ୍ମତି ରହୁଥିଲା। କିନ୍ତୁ ଏବେ ଦଳର ଅନ୍ୟ ନେତାମାନଙ୍କ ପାଇଁ ଆଗକୁ ଆସିବା ଏବଂ ନିଜର ପ୍ରଭାବ ବିସ୍ତାର କରିବା ପାଇଁ ଏକ ନୂଆ ସୁଯୋଗ ସୃଷ୍ଟି ହୋଇଛି।
ଏହାଦ୍ୱାରା ଦଳୀୟ ନେତୃତ୍ୱ, ସଂଗଠନ ଉପରେ ନିୟନ୍ତ୍ରଣ ଏବଂ ରାଜନୈତିକ ପ୍ରଭାବକୁ ନେଇ ଦଳ ଭିତରେ ନୂଆ ଆଲୋଚନା ଆରମ୍ଭ ହୋଇପାରେ। ତେବେ ଏହି ପରିବର୍ତ୍ତନକୁ ବିଜେପି କେତେ ସହଜରେ ଏବଂ ସୁଚାରୁରୂପେ ପରିଚାଳନା କରୁଛି, ତାହା ଉପରେ ହିଁ ଦଳର ଭବିଷ୍ୟତ ନିର୍ଭର କରିବ।
ଦିଗ ୩: ନାରେଟିଭ୍ର ଲଢ଼େଇ: ତ୍ୟାଗ ନା ବିଫଳତା?
ବର୍ତ୍ତମାନ ଆସନ୍ତୁ ତୃତୀୟ ଏବଂ ସବୁଠାରୁ ରୋଚକ ଦିଗ ଉପରେ— ରାଜନୈତିକ ‘ନାରେଟିଭ୍’ ବା ଆଖ୍ୟାନର ଲଢ଼େଇ।
ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫାକୁ ନେଇ ଏବେ ଦୁଇଟି ସମ୍ପୂର୍ଣ୍ଣ ଭିନ୍ନ ମତ ସାମ୍ନାକୁ ଆସୁଛି:
• ବିଜେପିର ଦାବିକରୁଛି ଯେ ଏହା ଜଣେ ନେତାଙ୍କ ଦାୟିତ୍ୱବୋଧ ଏବଂ ବଡ଼ ‘ତ୍ୟାଗ’ ଭାବେ ଉପସ୍ଥାପନ କରୁଛି। ଦଳର କହିବା କଥା ହେଉଛି— ନିଜର ବ୍ୟକ୍ତିଗତ ପଦପଦବୀ ଅପେକ୍ଷା ଛାତ୍ରଛାତ୍ରୀ ଏବଂ ଶିକ୍ଷା ବ୍ୟବସ୍ଥାର ସ୍ୱାର୍ଥକୁ ସେ ସବୁଠାରୁ ଉପରେ ରଖିଛନ୍ତି, ସେଥିପାଇଁ ସେ ନିଜେ ଇସ୍ତଫା ଦେଇଛନ୍ତି।
• ବିରୋଧୀଙ୍କ ଆକ୍ରମଣ କରି କହୁଛନ୍ତି ଏହା ସିଧାସଳଖ ‘ପ୍ରଶାସନିକ ବିଫଳତା’ । ବିରୋଧୀଙ୍କ ମତରେ— ବଢ଼ୁଥିବା ଜନଆକ୍ରୋଶ ଏବଂ ରାଜନୈତିକ ଚାପ ଆଗରେ ମୁଣ୍ଡ ନୁଆଁଇ ତାଙ୍କୁ ଇସ୍ତଫା ଦେବାକୁ ପଡ଼ିଛି।
ଆଗାମୀ ଦିନରେ ଏହି ଦୁଇଟି ନାରେଟିଭ୍ ମଧ୍ୟରୁ କାହାକୁ ଓଡ଼ିଶାର ଜନସାଧାରଣ ଅଧିକ ଗ୍ରହଣ କରୁଛନ୍ତି, ତାହା ହିଁ ଓଡ଼ିଶା ରାଜନୀତିର ଦିଗ ନିର୍ଦ୍ଧାରଣ କରିବ।
ଦିଗ ୪: ଧର୍ମେନ୍ଦ୍ରଙ୍କ ଆଗାମୀ ପଦକ୍ଷେପ କ’ଣ?
ଚତୁର୍ଥ ଏବଂ ଶେଷ ପ୍ରଶ୍ନ— ଧର୍ମେନ୍ଦ୍ର ପ୍ରଧାନଙ୍କ ଆଗାମୀ ପଦକ୍ଷେପ କ’ଣ ହେବ?
ଏହି ଇସ୍ତଫାର ଦୀର୍ଘକାଳୀନ ପ୍ରଭାବ ସମ୍ପୂର୍ଣ୍ଣ ଭାବେ ନିର୍ଭର କରେ ଧର୍ମେନ୍ଦ୍ର ପ୍ରଧାନ ଆଗକୁ କ’ଣ କରୁଛନ୍ତି। ଏଠାରେ ଦୁଇଟି ସମ୍ଭାବନା ଦେଖାଦେଉଛି:
1. ଓଡ଼ିଶା ରାଜନୀତିକୁ ପ୍ରତ୍ୟାବର୍ତ୍ତନ: ଯଦି ଧର୍ମେନ୍ଦ୍ର ପ୍ରଧାନ କେନ୍ଦ୍ରୀୟ ରାଜନୀତିରୁ ଧ୍ୟାନ ହଟାଇ ପୂର୍ଣ୍ଣକାଳୀନ ଭାବେ ଓଡ଼ିଶା ରାଜନୀତିରେ ମନୋନିବେଶ କରନ୍ତି କିମ୍ବା ସଂଗଠନରେ କୌଣସି ବଡ଼ ଦାୟିତ୍ୱ ନିଅନ୍ତି, ତେବେ କ୍ୟାବିନେଟ୍ରୁ ବାହାରିବାର ପ୍ରଭାବ ବହୁତ କମ୍ ହୋଇଯିବ। ଏହାଦ୍ୱାରା ସେ ଓଡ଼ିଶା ବିଜେପିରେ ନିଜର ମୁଖ୍ୟ ଭୂମିକା ବଜାୟ ରଖିପାରିବେ।
2. କୋଣଠେସା ହେବାର ଭୟ: କିନ୍ତୁ, ଯଦି ସେ ଧୀରେ ଧୀରେ ଦଳୀୟ ରାଜନୀତିରୁ କୋଣଠେସା ହୁଅନ୍ତି, ତେବେ ଦଳ ଭିତରେ ଥିବା ତାଙ୍କର ସମର୍ଥକମାନେ ନିରାଶ ହୋଇପାରନ୍ତି, ଯାହା ବିଜେପିର ବର୍ତ୍ତମାନର ଶକ୍ତି ସମୀକରଣକୁ ବିଗାଡ଼ି ଦେଇପାରେ।
ଅସଲ ଖେଳ ଏବେ ଆରମ୍ଭ: ମୁଖ୍ୟମନ୍ତ୍ରୀ ମୋହନ ମାଝୀଙ୍କ ପାଇଁ ବଡ଼ ବିପଦ?
ଏବେ ଆସନ୍ତୁ ସବୁଠାରୁ ବଡ଼ ଏବଂ ଗୁରୁତ୍ୱପୂର୍ଣ୍ଣ ଆଲୋଚନାକୁ।
କେନ୍ଦ୍ର ମନ୍ତ୍ରୀପରିଷଦରୁ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଯୋଗୁ ଆପାତତଃ ବର୍ତ୍ତମାନ ପାଇଁ ମୋଦୀ ସରକାରଙ୍କ ଉପରୁ ବଡ଼ ବିପଦ ଟଳିଗଲା। ତେବେ ବିଜେପି ଏବଂ ମୋଦୀ ସରକାରଙ୍କ ସକାଶେ ପୁଣି ଥରେ ଜୋସକୁ ଫେରିବା ପାଇଁ ପର୍ଯ୍ୟାପ୍ତ ସମୟ ଅଛି।
ମାତ୍ର ଏବେ ଅସଲ ବିପଦ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ପାଇଁ ଆସୁଛି!
ବିଜେପି କର୍ମୀ, ନେତା ଏବଂ ସାଧାରଣ ଜନତା ଭଲ ଭାବେ ଜାଣିଛନ୍ତି ଯେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭିତରେ ସମ୍ପର୍କ ଅତ୍ୟନ୍ତ ତିକ୍ତ। ଆଡ଼ ନୟନରେ ବି କେହି କାହାକୁ ଦେଖନ୍ତି ନାହିଁ। ସେମାନଙ୍କ ଭିତରେ ସୃଷ୍ଟି ହୋଇଥିବା ତିକ୍ତତା ଦାଣ୍ଡରେ ପଡ଼ି ହାଟରେ ଗଡ଼ି ସାରିଲାଣି।
କିନ୍ତୁ କେନ୍ଦ୍ର ମନ୍ତ୍ରିମଣ୍ଡଳରୁ ଧର୍ମେନ୍ଦ୍ରଙ୍କ ଇସ୍ତଫା ପରେ ମୋହନ ଶିବିର ଚିନ୍ତିତ ହେବାର ଯଥେଷ୍ଟ ଆନୁସଙ୍ଗିକ କାରଣ ଅଛି। ପ୍ରକୃତ ବିପଦ ଏବେଠାରୁ ଆରମ୍ଭ ହେବାକୁ ଯାଉଛି। ଆଜି ଧର୍ମେନ୍ଦ୍ର ପ୍ରଧାନ ଭୁବନେଶ୍ୱରରେ ନିଜର ଶକ୍ତି ପ୍ରଦର୍ଶନ କରି ନିଜର ବିରୋଧୀଙ୍କୁ ବର୍ତ୍ତା ଦେଇସାରିଛନ୍ତି।
ଧର୍ମେନ୍ଦ୍ରଙ୍କ ସୋସିଆଲ ମିଡିଆ ପୋଷ୍ଟର ଲୁଚି ରହିଥିବା ଇସାରା
ଯେଉଁମାନେ ଧର୍ମେନ୍ଦ୍ରଙ୍କ ସାମାଜିକ ଗଣମାଧ୍ୟମ ପୋଷ୍ଟ ଦେଖୁଥିବେ ଏବଂ ତର୍ଜମା କରିଥିବେ, ସେମାନେ ବୁଝିସାରିଥିବେ ଯେ ଅସଲ ବିପଦଟି କ’ଣ?
ଧର୍ମେନ୍ଦ୍ର ପ୍ରଧାନଙ୍କର ସେହି ପୋଷ୍ଟର ଶେଷ ଦୁଇଧାଡ଼ି ରାଜନୈତିକ ଦୃଷ୍ଟିକୋଣରୁ ଅତ୍ୟନ୍ତ ମହତ୍ତ୍ୱପୂର୍ଣ୍ଣ। ଧର୍ମେନ୍ଦ୍ର ହିନ୍ଦୀରେ ଲେଖୁଛନ୍ତି:
“ପ୍ରଭୁ ଜଗନ୍ନାଥ ଜୀ କେ ଆଶୀର୍ବାଦ ସେ ମେଁ ଭବିଷ୍ୟ ମେଁ ଭି ଭାରତ ମାତା, ଓଡ଼ିଶା କୀ ଜନତା ତଥା ଦେଶ କେ ଯୁବାଓଁ କୀ ଆକାଂକ୍ଷାଓଁ କେ ପୂର୍ତ୍ତି କେ ଲିଏ ହର୍ ସମ୍ଭବ ରୂପ ମେଁ ସ୍ୱୟଂ କୋ ସମର୍ପିତ ରଖୁଙ୍ଗା।”
ଏହିଥିରେ ହିଁ ଛପି ରହିଛି ଧର୍ମେନ୍ଦ୍ରଙ୍କ ବଡ଼ ରାଜନୈତିକ ଇସାରା!
ଆଗରୁ ସେ କେବଳ ସମ୍ବଲପୁର ସାଂସଦ ଥିଲେ। ନିଜ ବିଭାଗ ପ୍ରତି ଅବହେଳା କରୁଥିଲେ ବୋଲି ଚର୍ଚ୍ଚା ହେଉଥିଲା ଏବଂ ଅନ୍ୟପଟେ ଚର୍ଚ୍ଚା ବି ହେଉଥିଲା ଯେ, ମୋହନ ସରକାରଙ୍କୁ କେନ୍ଦ୍ରମନ୍ତ୍ରୀ ଅସ୍ଥିର କରୁଛନ୍ତି।
କିନ୍ତୁ ଏବେ କେନ୍ଦ୍ରରେ ତାଙ୍କର କୌଣସି ବିଭାଗୀୟ ଭୂମିକା ନାହିଁ। ସେ ସମ୍ପୂର୍ଣ୍ଣ ମୁକ୍ତ! ସେ ଓଡ଼ିଶାବାସୀଙ୍କ ପ୍ରତି ସମ୍ପୂର୍ଣ୍ଣ ସମର୍ପଣର ପ୍ରତିଶ୍ରୁତି ଦେଇଛନ୍ତି।
ସଂଖ୍ୟାଗରିଷ୍ଠ ବିଜେପି ବିଧାୟକ ଏବଂ ମନ୍ତ୍ରୀ ଧର୍ମେନ୍ଦ୍ରଙ୍କ ଅନୁଗତ, ଏହା କାହାକୁ ବୁଝାଇବାର ଆବଶ୍ୟକତା ନାହିଁ। ଏହି ପରିସ୍ଥିତିରେ ମୋହନ କିମ୍ବା ମନମୋହନ ସାମଲ ହାଇକମାଣ୍ଡଙ୍କୁ ଫେରାଦ କରିବାର ସୁଯୋଗ ମଧ୍ୟ ନାହିଁ। ପିଏମଓର କୌଣସି ବରିଷ୍ଠ ଅଧିକାରୀ କାହାକୁ କାହା ବିରୋଧରେ ସୁରକ୍ଷା ଦେବେ?
କହିବାକୁ ପଡ଼ିବ ଯେ ଧର୍ମେନ୍ଦ୍ର ଏବେ ସମ୍ପୂର୍ଣ୍ଣ ମୁକ୍ତ ହୋଇସାରିଛନ୍ତି। ସେ ଜଣେ ଚତୁର ରାଜନୈତିକ ଖେଳାଳି, ଏଥିରେ ତିଳେ ହେଲେ ସନ୍ଦେହ ନାହିଁ। ସେ କଦାପି ଓଡ଼ିଶାରେ ଚୁପ୍ ହୋଇ ବସିପାରିବେ ନାହିଁ। ଦିଲ୍ଲୀ ଯିବାର ଆବଶ୍ୟକତା ନାହିଁ— ଖେଳ ଏଇଠି ଓଡ଼ିଶାରେ ହିଁ ହେବ!
ମୋହନ ସରକାରଙ୍କ ଦୁର୍ବଳତା ଓ ଆଗାମୀ ସଙ୍କଟ
କିନ୍ତୁ ପ୍ରଶ୍ନ ଉଠୁଛି— ଏହି ଖେଳର ମୁକାବିଲା ମୁଖ୍ୟମନ୍ତ୍ରୀ ମୋହନ ମାଝୀ କରିପାରିବେ ତ?
ଉତ୍ତର ହେଉଛି,
ଏହାର ମୁକାବିଲା ମୋହନ କରିପାରିବେ ନାହିଁ! କାରଣ ଏକାଧିକ:
୧. ଲୋକପ୍ରିୟତା ହ୍ରାସ: ମୋହନ ସରକାରଙ୍କର ଲୋକପ୍ରିୟତା ଗତ କିଛି ମାସ ମଧ୍ୟରେ ଯଥେଷ୍ଟ ହ୍ରାସ ପାଇଛି।
୨. ନେତୃତ୍ୱର ଅଭାବ: ଦଳର ନେତୃତ୍ଵ ଭାବେ କୌଣସି ନିର୍ବାଚନ ମୋହନ ନିଜ ଶକ୍ତି ଓ ଲୋକପ୍ରିୟତାକୁ ନେଇ ଦଳକୁ ଜିତାଇପାରିବେ ନାହିଁ।
୩. ପ୍ରଶାସନିକ ସ୍ଥାଣୁତା: ମୁଖ୍ୟମନ୍ତ୍ରୀ ମାନନ୍ତୁ କି ନ ମାନନ୍ତୁ, ଏକ ଧାରଣା ଲୋକଙ୍କ ଭିତରକୁ ଯାଇସାରିଛି ଯେ ସରକାର କିଛି କରୁନାହାଁନ୍ତି।
୪. ଦଳୀୟ ଅସନ୍ତୋଷ: ଜୁଲାଇ ମାସ ବି ସରିବାକୁ ବସିଲାଣି, କିନ୍ତୁ ଆଜି ପର୍ଯ୍ୟନ୍ତ ନିଗମ ଓ ବୋର୍ଡଗୁଡ଼ିକରେ ନିଯୁକ୍ତି ହୋଇପାରିଲା ନାହିଁ। ନେତା ଓ କର୍ମୀଙ୍କ ମଧ୍ୟରେ କ୍ଷୋଭ ବଢ଼ିବାରେ ଲାଗିଛି।
ଏହି ସମସ୍ତ ପରିସ୍ଥିତିର ଭରପୁର ଫାଇଦା ଏବେ ନେବେ ଧର୍ମେନ୍ଦ୍ର ପ୍ରଧାନ!
ତେବେ, ଧର୍ମେନ୍ଦ୍ର ପ୍ରଧାନଙ୍କ କେନ୍ଦ୍ର କ୍ୟାବିନେଟ୍ରୁ ଇସ୍ତଫା କେବଳ ଦିଲ୍ଲୀ ରାଜନୀତିର ଘଟଣା ନୁହେଁ, ଏହା ଓଡ଼ିଶା ରାଜନୀତିର ଏକ ବଡ଼ ମୋଡ଼।
ଦଳ ଏହାକୁ କିପରି ସାମ୍ନା କରୁଛି, ଆଉ ଧର୍ମେନ୍ଦ୍ର ନିଜର ନୂଆ ଆଭିମୁଖ୍ୟ କ’ଣ ରଖୁଛନ୍ତି, ତାହା ଉପରେ ସମସ୍ତଙ୍କର ନଜର ରହିବ।
ଧର୍ମେନ୍ଦ୍ର ପ୍ରଧାନଙ୍କ ଏହି ଇସ୍ତଫା ଓଡ଼ିଶା ବିଜେପି ପାଇଁ ଫାଇଦା ହେବ ନା କ୍ଷତି? ମୁଖ୍ୟମନ୍ତ୍ରୀ ମୋହନ ମାଝୀ ନିଜର ଆସନ ସୁରକ୍ଷିତ ରଖିପାରିବେ ତ?
AlsoRead; https://purvapaksa.com/big-conspiracy-of-china-pakistan-cia-on-the-indian-border/
