କେନ୍ଦ୍ର ସଡ଼କ ପରିବହନ ଏବଂ ରାଜମାର୍ଗ ମନ୍ତ୍ରୀ ନିତିନ ଗଡ଼କରୀ ଇ୨୦ ପେଟ୍ରୋଲ୍ ବ୍ୟବହାରକୁ ନେଇ ବଜାରରେ ଚାଲିଥିବା ସମସ୍ତ ଆଶଙ୍କା ଓ ବିବାଦ ଉପରେ ଏକ ବଡ଼ ଏବଂ ଗୁରୁତ୍ୱପୂର୍ଣ୍ଣ ସ୍ପଷ୍ଟୀକରଣ ଦେଇଛନ୍ତି। ଏକ ସ୍ୱତନ୍ତ୍ର ସାକ୍ଷାତକାରରେ କେନ୍ଦ୍ରମନ୍ତ୍ରୀ କହିଛନ୍ତି ଯେ, ଇ୨୦ ପେଟ୍ରୋଲ୍ ବ୍ୟବହାର କରିବା ଦ୍ୱାରା ଗାଡ଼ିର ମାଇଲେଜ୍ କମିଯାଉଛି କିମ୍ବା ଇଞ୍ଜିନ୍ ନଷ୍ଟ ହେଉଛି ବୋଲି ଯେଉଁ ସବୁ ଖବର ପ୍ରସାରିତ ହେଉଛି, ତାହା ସମ୍ପୂର୍ଣ୍ଣ ଭାବେ ଗୁଜବ ଏବଂ ଭିତ୍ତିହୀନ। ଦେଶର ବଡ଼ ବଡ଼ ଅଟୋମୋବାଇଲ୍ ବିଶେଷଜ୍ଞ ଏବଂ ଗବେଷଣାଗାରରେ ବୈଷୟିକ ଯାଞ୍ଚ କରାଯିବା ପରେ ହିଁ ଏହି ସ୍ୱତନ୍ତ୍ର ଜାଳେଣିକୁ ବଜାରକୁ ଅଣାଯାଇଛି, ତେଣୁ ଗାଡ଼ି ମାଲିକମାନେ କୌଣସି ପ୍ରକାର ଭୟ ରଖିବା ଆବଶ୍ୟକ ନାହିଁ। ଏହି ନୂତନ ଜାଳେଣି ବ୍ୟବସ୍ଥା ଦେଶର ଅର୍ଥନୀତିକୁ ସୁଦୃଢ଼ କରିବା ସହ ଭାରତର ଅନ୍ନଦାତା ବା ଚାଷୀମାନଙ୍କୁ ସବୁଠାରୁ ଅଧିକ ଆର୍ଥିକ ଲାଭ ପ୍ରଦାନ କରିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି।
ଜାଳେଣି ପ୍ରଦୂଷଣ ହ୍ରାସ ପାଇବ ଏବଂ ବଞ୍ଚିବ ଦେଶର କୋଟି କୋଟି ଟଙ୍କା
ନିତିନ ଗଡ଼କରୀ କହିଛନ୍ତି ଯେ, ଭାରତ ପ୍ରତିବର୍ଷ ବିଦେଶରୁ ଅଶୋଧିତ ତୈଳ ଆମଦାନୀ କରିବା ପାଇଁ ଲକ୍ଷ ଲକ୍ଷ କୋଟି ଟଙ୍କାର ବୈଦେଶିକ ମୁଦ୍ରା ଖର୍ଚ୍ଚ କରିଥାଏ। ପେଟ୍ରୋଲ୍ରେ ୨୦% ଇଥାନଲ୍ ମିଶ୍ରଣ କରିବା ଦ୍ୱାରା ଦେଶର ଆମଦାନୀ ନିର୍ଭରଶୀଳତା ବହୁ ପରିମାଣରେ ହ୍ରାସ ପାଇବ ଏବଂ ଭାରତ ଆତ୍ମନିର୍ଭରଶୀଳତା ଦିଗରେ ଆଗକୁ ବଢ଼ିବ। ଏହା ବ୍ୟତୀତ ପାରମ୍ପରିକ ପେଟ୍ରୋଲ୍ ତୁଳନାରେ ଇ୨୦ ପେଟ୍ରୋଲ୍ ବହୁତ କମ୍ କାର୍ବନ ନିର୍ଗତ କରିଥାଏ, ଯାହା ଫଳରେ ସହରାଞ୍ଚଳରେ ବଢ଼ି ଚାଲିଥିବା ବାୟୁ ପ୍ରଦୂଷଣ ସମସ୍ୟାରୁ ବଡ଼ ମୁକ୍ତି ମିଳିବ। ଏହି ବ୍ୟବସ୍ଥା ଭାରତୀୟ ଅଟୋମୋବାଇଲ୍ କ୍ଷେତ୍ରକୁ ସବୁଜ ଜାଳେଣି ବା ଗ୍ରୀନ୍ ଫ୍ୟୁଏଲ୍ ଆଡ଼କୁ ନେଇଯିବାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସାଜିବ।
ଚାଷୀ ହେବେ ଉର୍ଜାଦାତା: ଗ୍ରାମାଞ୍ଚଳର ବଦଳିବ ଅର୍ଥନୀତି
କେନ୍ଦ୍ରମନ୍ତ୍ରୀ ଗଡ଼କରୀ ଇଥାନଲ୍ ଉତ୍ପାଦନ ଦ୍ୱାରା କୃଷି କ୍ଷେତ୍ରରେ ଆସିବାକୁ ଥିବା କ୍ରାନ୍ତିକାରୀ ପରିବର୍ତ୍ତନ ଉପରେ ବିଶେଷ ଆଲୋକପାତ କରିଛନ୍ତି। ସେ କହିଛନ୍ତି ଯେ, ଇଥାନଲ୍ ମୁଖ୍ୟତଃ ଆଖୁ ରସ, ମାଣ୍ଡିଆ, ଖରାପ ହୋଇଯାଇଥିବା ଧାନ, ମକା ଏବଂ କୃଷି ବର୍ଜ୍ୟବସ୍ତୁରୁ ପ୍ରସ୍ତୁତ କରାଯାଇଥାଏ। ପୂର୍ବରୁ ଚାଷୀମାନେ କେବଳ ଖାଦ୍ୟଦାତା ଥିଲେ, କିନ୍ତୁ ଏବେ ଏହି ଟେକ୍ନୋଲୋଜି ବଳରେ ସେମାନେ ‘ଉର୍ଜାଦାତା’ରେ ପରିଣତ ହେଉଛନ୍ତି।
ଇଥାନଲ୍ର ଚାହିଦା ବଜାରରେ ଦିନକୁ ଦିନ ବୃଦ୍ଧି ପାଉଥିବାରୁ ଚାଷୀମାନଙ୍କୁ ସେମାନଙ୍କ ଫସଲର ଉଚିତ ମୂଲ୍ୟ ତୁରନ୍ତ ମିଳିପାରିବ। ଦେଶର ବିଭିନ୍ନ ସ୍ଥାନରେ ଶତାଧିକ ନୂଆ ଇଥାନଲ୍ ପ୍ଲାଣ୍ଟ ସ୍ଥାପନ କରାଯାଉଛି, ଯାହା ଗ୍ରାମାଞ୍ଚଳର ଯୁବପିଢ଼ିଙ୍କ ପାଇଁ ବ୍ୟାପକ ରୋଜଗାରର ସୁଯୋଗ ସୃଷ୍ଟି କରୁଛି। ଚାଷୀଙ୍କ ରୋଜଗାର ବଢ଼ିଲେ ଦେଶର ଗ୍ରାମୀଣ ଅର୍ଥନୀତି ସମ୍ପୂର୍ଣ୍ଣ ଭାବେ ବଦଳିଯିବ ବୋଲି ସେ ପ୍ରକାଶ କରିଛନ୍ତି।
)
ଅଟୋମୋବାଇଲ୍ କମ୍ପାନୀଗୁଡ଼ିକ ପ୍ରସ୍ତୁତ କରୁଛନ୍ତି ଅନୁକୂଳ ଇଞ୍ଜିନ୍
ବଜାରରେ ଗାଡ଼ି ଖରାପ ହେବା ଚିନ୍ତାକୁ ନେଇ ଗଡ଼କରୀ କହିଛନ୍ତି ଯେ, ସରକାର ସମସ୍ତ ପ୍ରମୁଖ ଗାଡ଼ି ନିର୍ମାତା କମ୍ପାନୀ ମାନଙ୍କ ସହ ନିରନ୍ତର ଆଲୋଚନା କରିଛନ୍ତି। ବର୍ତ୍ତମାନ ବଜାରକୁ ଆସୁଥିବା ପ୍ରାୟ ସମସ୍ତ ନୂଆ ଦୁଇଚକିଆ ଓ ଚାରିଚକିଆ ଗାଡ଼ିଗୁଡ଼ିକର ଇଞ୍ଜିନ୍ ଇ୨୦ ଅନୁକୂଳ ଭାବେ ହିଁ ନିର୍ମାଣ କରାଯାଉଛି। ପୁରୁଣା ଗାଡ଼ିଗୁଡ଼ିକରେ ମଧ୍ୟ ଏହି ପେଟ୍ରୋଲ୍ ବ୍ୟବହାର କଲେ କୌଣସି ବଡ଼ ବୈଷୟିକ ତ୍ରୁଟି ଦେଖାଯିବ ନାହିଁ ବୋଲି ବୈଜ୍ଞାନିକମାନେ ସ୍ପଷ୍ଟ କରିଛନ୍ତି। କେତେକ ନ୍ୟସ୍ତସ୍ୱାର୍ଥ ଗୋଷ୍ଠୀ ଏହି ବ୍ୟବସ୍ଥା ବିରୋଧରେ କ୍ରମାଗତ ଭାବେ କୁପ୍ରଚାର ଚଳାଇଛନ୍ତି, ଯାହାକୁ ଗ୍ରାହକମାନେ ବିଶ୍ୱାସ ନକରିବାକୁ ସେ ଅନୁରୋଧ କରିଛନ୍ତି। ସରକାରଙ୍କ ଏହି ଦୃଢ଼ ନୀତି ଆଗାମୀ ଦିନରେ ଭାରତୀୟ ଜାଳେଣି ମାର୍ଗକୁ ସମ୍ପୂର୍ଣ୍ଣ ଭାବେ ପ୍ରଦୂଷଣମୁକ୍ତ ଏବଂ କୃଷକ-ଅନୁକୂଳ କରିବ ବୋଲି ଆଶା କରାଯାଉଛି।
