ଓଡ଼ିଶା ରାଜନୀତିର ମାନଚିତ୍ରରେ ଏକ ଭୂକମ୍ପ ଆସିବାକୁ ଯାଉଛି । ଏମିତି ଏକ ଖବର ଯାହା ଶଙ୍ଖ ଭବନଠାରୁ ଆରମ୍ଭ କରି ପଦ୍ମ ଶିବିର ପର୍ଯ୍ୟନ୍ତ ସବୁଠି ହଇଚଇ ସୃଷ୍ଟି କରିଛି । ଦୀର୍ଘ ଦୁଇ ବର୍ଷର ନୀରବତା, ଅନେକ ଅଙ୍କକଷା ଏବଂ ପରଦା ପଛର ରହସ୍ୟମୟ ବୁଝାମଣା ପରେ ଏବେ ଓଡ଼ିଶା ରାଜନୀତିକୁ ଆସୁଛନ୍ତି ସୁଜାତା ରାଉତ କାର୍ତ୍ତିକେୟନ । ହଁ, ଆଇଏଏସ୍ ଚାକିରିରୁ ସ୍ୱେଚ୍ଛାକୃତ ଅବସର ନେଇଥିବା ଓଡ଼ିଆ ପରିବାରର ଝିଅ ତଥା ତାମିଲ ଘରର ବୋହୂ ସୁଜାତାଙ୍କ ବିଜେଡି ପ୍ରବେଶ ଏବେ ଶତପ୍ରତିଶତ ସୁନିଶ୍ଚିତ ବୋଲି ଦଳ ନିଜେ ଖୋଲାଖୋଲି ସ୍ୱୀକାର କରିଛି ।
/odishatv/media/media_files/2026/06/08/sujata-karthikeyan-2026-06-08-15-18-02.png)
କିନ୍ତୁ ଟ୍ୱିଷ୍ଟ ଏତିକିରେ ସରିନାହିଁ । ଏହି ହଠାତ୍ ପ୍ରବେଶ ପଛରେ କୌଣସି ସାଧାରଣ ରଣନୀତି ନାହିଁ, ବରଂ ଏହା ପଛରେ ରହିଛି ବିଜେପିର ସବୁଜ ସଂକେତ! କୁହାଯାଉଛି, କଂଗ୍ରେସକୁ ଓଡ଼ିଶା ମାଟିରେ ସମ୍ପୂର୍ଣ୍ଣ ଭାବେ ହଜେଇବା ପାଇଁ ଏବଂ ବିଜେଡିର ଗଡ଼କୁ ସୁରକ୍ଷିତ ରଖିବା ପାଇଁ ବିଜେପିର ଶୀର୍ଷ ନେତୃତ୍ୱ ପକ୍ଷରୁ ଏହି ଅନୁମତି ମିଳିଛି। ଏହା କୌଣସି ପବନରେ ଉଡ଼ାକଥା ନୁହେଁ, ବରଂ ଏମିତି ୪ଟି ବଡ଼ ସାକ୍ଷୀ ଏବଂ ପ୍ରମାଣ ସାମ୍ନାକୁ ଆସିଛି, ଯାହା ଏହି ଦିଲ୍ଲୀ ବୁଝାମଣାର ଗୁମର ଖୋଲି ଦେଉଛି।
ଚାରିଟି ବଡ଼ ପ୍ରମାଣ ସାମ୍ନାକୁ ଆସିଲା ସତ୍ୟ
ଆସନ୍ତୁ ଗୋଟି ଗୋଟି କରି ସେହି ଚାରିଟି ଯାକ ପ୍ରମାଣ ଉପରେ ନଜର ପକାଇବା, ଯାହା ପ୍ରମାଣିତ କରୁଛି ଯେ ସୁଜାତାଙ୍କ ଏଣ୍ଟ୍ରି ଫାଇନାଲ୍ ହୋଇସାରିଛି ଏବଂ ଏହାର ସୂତ୍ର ଦିଲ୍ଲୀ ସହ ଯୋଡ଼ି ହୋଇଛି।
ପ୍ରଥମ ପ୍ରମାଣ: ସବୁଠାରୁ ବଡ଼ ଚିତ୍ର ଦେଖିବାକୁ ମିଳିଛି ସୋସିଆଲ ମିଡିଆରେ। ଆପଣମାନଙ୍କର ମନେଥିବ, ଭୈରବ କାର୍ତ୍ତିକେୟନ ପାଣ୍ଡିଆନଙ୍କର ଏକ ବିରାଟ ବଡ଼ ସୋସିଆଲ ମିଡିଆ ଆର୍ମୀ ଅଛି। ଯେଉଁମାନେ ଦିନରାତି କେବଳ ପାଣ୍ଡିଆନଙ୍କ ଗୁଣଗାନ କରୁଥିଲେ, ତାଙ୍କ ଫଟୋ ସେୟାର କରୁଥିଲେ ଏବଂ ପୋଷ୍ଟର ମାରୁଥିଲେ। ଗତ କିଛି ଦିନ ହେବ ସେହି ସୋସିଆଲ ମିଡିଆ ଆର୍ମୀ ହଠାତ୍ ନିଜର ଟ୍ରାକ୍ ବଦଳାଇ ଦେଇଛନ୍ତି। ସେମାନେ ଏବେ ପାଣ୍ଡିଆନଙ୍କୁ ଛାଡ଼ି ସୁଜାତାଙ୍କ ସମ୍ପର୍କରେ ଲମ୍ବା ଲମ୍ବା ଲେଖା ଲେଖିବା ଆରମ୍ଭ କଲେଣି। ତାଙ୍କର ପ୍ରଶାସନିକ ଦକ୍ଷତା, ମିଶନ ଶକ୍ତିରେ ତାଙ୍କର ଅବଦାନ ଏବଂ ସେ କେମିତି ଓଡ଼ିଶାର ନାରୀ ଶକ୍ତିର ପ୍ରତୀକ, ସେ ନେଇ ଗୁଣଗାନ କରିବା ଆରମ୍ଭ କରିଦେଲେଣି। ଏଥିରୁ ସ୍ପଷ୍ଟ ଜଣାପଡ଼ୁଛି ଯେ ପଛପଟୁ ଆଦେଶ ଆସିସାରିଛି – “ଏବେ ନେତା ବଦଳିଛନ୍ତି, ପ୍ରଚାରର ଚେହେରା ବଦଳାଅ”।
ଦ୍ୱିତୀୟ ପ୍ରମାଣ: ଏହି ସୂଚନା ସେହି ନେତା ଦେଇଛନ୍ତି, ଯାହାଙ୍କୁ ପାଣ୍ଡିଆନଙ୍କର ସବୁଠାରୁ ଏକାନ୍ତ ଅନୁଗତ ଏବଂ କିଛି ମହଲରେ ‘ଗୁମାସ୍ତା’ ବୋଲି କୁହାଯାଏ। ସେ ହେଉଛନ୍ତି ମନ୍ମଥ ରାଉତରାୟ। ମନ୍ମଥ ରାଉତରାୟ ନିଜେ ଗଣମାଧ୍ୟମ ଆଗକୁ ଆସି ଖୋଲାଖୋଲି କହିଛନ୍ତି ଯେ ସୁଜାତାଙ୍କ ବିଜେଡି ପ୍ରବେଶ ସୁନିଶ୍ଚିତ। ଯେତେବେଳେ ପାଣ୍ଡିଆନଙ୍କ ଅତି ବିଶ୍ୱସ୍ତ ନେତା ମିଡିଆରେ ଏଭଳି ବୟାନ ଦିଅନ୍ତି, ସେତେବେଳେ ବୁଝିବାକୁ ବାକି ରହେନାହିଁ ଯେ ଏହା କେବଳ ମନ୍ମଥଙ୍କ ବ୍ୟକ୍ତିଗତ ମତ ନୁହେଁ, ବରଂ ଏହା ସ୍କ୍ରିପ୍ଟେଡ୍। ବିଜେପିରୁ ଗ୍ରୀନ୍ ସିଗନାଲ୍ ମିଳିବା ପରେ ହିଁ ମନ୍ମଥଙ୍କ ମାଧ୍ୟମରେ ଏହି ବାର୍ତ୍ତା ବଜାରକୁ ଛଡ଼ାଯାଇଛି।
ତୃତୀୟ ପ୍ରମାଣ: ରାଜ୍ୟର କୌଣସି ଗୋଟିଏ କିମ୍ବା ଦୁଇଟି ଛୋଟ ପୋର୍ଟାଲ ନୁହେଁ, ବରଂ ଓଡ଼ିଶାର ପ୍ରମୁଖ ମେନଷ୍ଟ୍ରିମ୍ ମିଡିଆ ହାଉସଗୁଡ଼ିକ ମଧ୍ୟ ଏହି ଖବରକୁ ପ୍ରମୁଖତା ସହ ପ୍ରକାଶ କଲେଣି। ଯେତେବେଳେ ସବୁ ବଡ଼ ବଡ଼ ଗଣମାଧ୍ୟମ ଏହି ପ୍ରସଙ୍ଗରେ ଏକାଭଳି ଖବର ପ୍ରକାଶ କରନ୍ତି, ସେତେବେଳେ ରାଜନୈତିକ କରିଡରରେ ହେଉଥିବା ଚର୍ଚ୍ଚା ସତ୍ୟତାର ଅତି ନିକଟତର ବୋଲି ପ୍ରମାଣିତ ହୁଏ।
ଚତୁର୍ଥ ଏବଂ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରମାଣ: ସବୁଠାରୁ ବଡ଼ ଗୁମର ଲୁଚି ରହିଛି ଦିଲ୍ଲୀ ଦରବାରରେ। ନିକଟରେ ବିଜେଡି ସଭାପତି ନବୀନ ପଟ୍ଟନାୟକ ଯେତେବେଳେ ଦିଲ୍ଲୀ ଗସ୍ତରେ ଯାଇଥିଲେ, ସେହି ସମୟରେ ବିଜେପିର କିଛି କ୍ଷମତାଶାଳୀ ଏବଂ ବରିଷ୍ଠ କେନ୍ଦ୍ରୀୟ ନେତାଙ୍କ ସହ ତାଙ୍କର ଗୋପନ ଆଲୋଚନା ହୋଇଥିଲା। ସୂତ୍ର ଅନୁସାରେ, ସେହି ବୈଠକରେ ହିଁ ସୁଜାତାଙ୍କ ନାଁ ଉପରେ ଚୂଡ଼ାନ୍ତ ମୋହର ବାଜିଥିଲା। ବିଜେପି ନେତୃତ୍ୱଙ୍କ ସହ ଆଲୋଚନା କରି ସେମାନଙ୍କ ଅନୁମତି ନେବା ପରେ ହିଁ ନବୀନ ବାବୁ ଭୁବନେଶ୍ୱର ଫେରି ଏହି ରଣନୀତିକୁ ଆଗକୁ ବଢ଼ାଇଛନ୍ତି।
ବିଜେପି କାହିଁକି ଦେଲା ସବୁଜ ସଂକେତ?
ଏବେ ପ୍ରଶ୍ନ ଉଠୁଛି, ଓଡ଼ିଶାରେ ବିଜେପି ନିଜେ ଶାସନ ଗାଦିରେ ଅଛି । ତଥାପି ବିଜେପି କାହିଁକି ବିଜେଡିର ଏହି ନୂଆ ଚେହେରାକୁ ନେଇ ସବୁଜ ସଂକେତ ଦେବ? କାହିଁକି ବିଜେପି ଚାହୁଁଛି ଯେ ସୁଜାତା ଆସନ୍ତୁ ଏବଂ ବିଜେଡି ଗଡ଼କୁ ସମ୍ଭାଳନ୍ତୁ?
ଏହା ପଛରେ ରହିଛି ଏକ ବଡ଼ ରାଜନୈତିକ ସମୀକରଣ। ବିଜେପି ଭଲ ଭାବେ ଜାଣିଛି ଯେ ଓଡ଼ିଶାରେ ଯଦି ବିଜେଡି ସମ୍ପୂର୍ଣ୍ଣ ଭାବେ ଦୁର୍ବଳ ହୋଇଯାଏ କିମ୍ବା ଭାଙ୍ଗିଯାଏ, ତେବେ ସେହି ଶୂନ୍ୟସ୍ଥାନକୁ କଂଗ୍ରେସ ପୂରଣ କରିବାକୁ ଚେଷ୍ଟା କରିବ। ଜାତୀୟ ସ୍ତରରେ ବିଜେପିର ସବୁଠୁ ବଡ଼ ଶତ୍ରୁ ହେଉଛି କଂଗ୍ରେସ। ଓଡ଼ିଶାରେ କଂଗ୍ରେସ ଯେମିତି କୌଣସି ପରିସ୍ଥିତିରେ ବି ମୁଣ୍ଡ ଟେକି ନ ପାରେ, ସେଥିପାଇଁ ବିଜେଡିର ଅସ୍ତିତ୍ୱ ରହିବା ଜରୁରୀ। ଅର୍ଥାତ୍ “ଶତ୍ରୁର ଶତ୍ରୁ ମିତ୍ର”। ବିଜେପି ଚାହୁଁଛି ଓଡ଼ିଶାରେ କଂଗ୍ରେସକୁ ସମ୍ପୂର୍ଣ୍ଣ କୋଣଠେସା କରିବା ପାଇଁ ବିଜେଡି ନିଜର ଭୋଟ୍ ବ୍ୟାଙ୍କ ସମ୍ଭାଳି ରଖୁ।
ସେଥିପାଇଁ ସୁଜାତାଙ୍କ ଭଳି ଜଣେ ପ୍ରଶାସନିକ ଅଭିଜ୍ଞତା ଥିବା ଚେହେରାକୁ ଆଗକୁ ଆଣିବା ପାଇଁ ଦିଲ୍ଲୀ ଦରବାରରୁ ଗ୍ରୀନ୍ ସିଗନାଲ୍ ମିଳିଛି। ଚର୍ଚ୍ଚା ତ ଏମିତି ହେଉଛି ଯେ, ସୁଜାତା ବିଜେଡିକୁ ଆସିବା ପରେ ସେ କୌଣସି ସାଧାରଣ କାର୍ଯ୍ୟାଳୟରୁ ନୁହେଁ, ବରଂ ସିଧାସଳଖ ‘ନବୀନ ନିବାସ’ରୁ ହିଁ ନିଜର ସମସ୍ତ ରାଜନୈତିକ କାର୍ଯ୍ୟକଳାପ ପରିଚାଳନା କରିବେ। ଅର୍ଥାତ୍ ନବୀନ ବାବୁଙ୍କ ସବୁଠାରୁ ବିଶ୍ୱସ୍ତ ଏବଂ ଶକ୍ତିଶାଳୀ କେନ୍ଦ୍ର ଭାବେ ସୁଜାତା ଉଭା ହେବାକୁ ଯାଉଛନ୍ତି।
ପୁରୁଖା ନେତାଙ୍କ ସନ୍ଦେହ ; ସନ୍ୟାସୀ ପାଣ୍ଡିଆନଙ୍କ ‘ରିମୋଟ୍ କଣ୍ଟ୍ରୋଲ୍’ ଶାସନ ?
କିନ୍ତୁ କଥା ହେଉଛି, ବାହାରକୁ ସବୁ କିଛି ଯେତେ ସହଜ ଏବଂ ସରଳ ଦେଖାଯାଉଛି, ବିଜେଡି ଭିତରର ଚିତ୍ର କ’ଣ ସତରେ ସେତିକି ଶାନ୍ତ? ବିଜେଡି ମହଲରୁ ଯେଉଁ ଖବର ଆସୁଛି, ତାହା ଦଳ ଭିତରେ ଥିବା ଏକ ବଡ଼ ବିଦ୍ରୋହ ଆଡ଼କୁ ଇସାରା କରୁଛି।
ଦଳର ଯେଉଁ ପୁରୁଖା ଏବଂ ବରିଷ୍ଠ ନେତାମାନେ ଅଛନ୍ତି, ଯେଉଁମାନେ ରକ୍ତ ଝାଳ ଦେଇ ଏହି ଦଳକୁ ଗଢ଼ିଛନ୍ତି, ସେମାନେ ଏବେ ସମ୍ପୂର୍ଣ୍ଣ ଭୟ ଏବଂ ସନ୍ଦେହ ଘେରରେ ଅଛନ୍ତି। ସେମାନଙ୍କ ମନରେ ସବୁଠୁ ବଡ଼ ପ୍ରଶ୍ନ ଉଠୁଛି – ଏହି ସୁଜାତାଙ୍କ ଏଣ୍ଟ୍ରି ପଛରେ ବାସ୍ତବରେ କାହାର ମଗଜ ରହିଛି?
/odishatv/media/media_files/2025/11/03/otv-cover-dual-2025-11-03t111318906-2025-11-03-11-13-59.jpg)
ରାଜନୈତିକ ଗଳିରେ ଏବେ ଗୋଟିଏ ଶବ୍ଦ ବହୁତ ଜୋରରେ ଚର୍ଚ୍ଚା ହେଉଛି – ‘ସନ୍ୟାସୀ ପାଣ୍ଡିଆନ’। ନିର୍ବାଚନ ହାରିବା ପରେ ପାଣ୍ଡିଆନ ରାଜନୀତିରୁ ସନ୍ନ୍ୟାସ ନେଇଥିବା ଘୋଷଣା କରିଥିଲେ। କିନ୍ତୁ ପୁରୁଖା ନେତାମାନେ ସନ୍ଦେହ କରୁଛନ୍ତି ଯେ, ଏହା ପାଣ୍ଡିଆନଙ୍କ ଏକ ବଡ଼ ଚାଲ୍। ପାଣ୍ଡିଆନ ନିଜେ ସାମ୍ନାକୁ ନଆସି, ନିଜ ପତ୍ନୀ ସୁଜାତାଙ୍କ ମାଧ୍ୟମରେ ପୁଣି ଥରେ ବିଜେଡିକୁ ପଛପଟୁ ପରିଚାଳନା କରିବାକୁ ଚେଷ୍ଟା କରୁଛନ୍ତି।
ବିଜେଡି ଭିତରୁ ଆସୁଥିବା ବଡ଼ ଅଭିଯୋଗ ହେଲା ସୁଜାତା ତ କେବଳ ଏକ ଚେହେରା ହେବେ, କିନ୍ତୁ ପ୍ରକୃତ ରିମୋଟ୍ କଣ୍ଟ୍ରୋଲ୍ ସେହି ପାଣ୍ଡିଆନଙ୍କ ହାତରେ ହିଁ ରହିବ। ପୁରୁଖା ନେତାମାନଙ୍କ ଭୟ ହେଉଛି, ଯଦି ସୁଜାତା ନବୀନ ନିବାସରୁ ଶାସନ ଚଲାଇବେ, ତେବେ ପୁଣି ଥରେ ସେହି ପୁରୁଣା ଅଧ୍ୟାୟ ଆରମ୍ଭ ହେବ। ପାଣ୍ଡିଆନ ନିଜ ପତ୍ନୀଙ୍କ ସାହାରାରେ ଦଳର ସମସ୍ତ ବରିଷ୍ଠ ଓ ଓଡ଼ିଆ ନେତାମାନଙ୍କୁ ଗୋଟି ଗୋଟି କରି ବିଦା କରିଦେବେ ଏବଂ ସମ୍ପୂର୍ଣ୍ଣ ଦଳକୁ ନିଜ ମୁଠାକୁ ନେଇଯିବେ। ୨୦୨୪ରେ ଯେଉଁ ଭୁଲ୍ ପାଇଁ ଦଳ କ୍ଷମତା ହରାଇଲା, ସେହି ସମାନ ଭୁଲ୍କୁ ପୁଣି ଥରେ ଦୋହରାଯାଉଛି ବୋଲି ଦଳ ଭିତରେ ଅସନ୍ତୋଷର ନିଆଁ କୁହୁଳିବାରେ ଲାଗିଛି।
ଆଗାମୀ ଦିନର ବଡ଼ ଆହ୍ୱାନ
ଓଡ଼ିଶା ରାଜନୀତିର ଏହି ନୂଆ ସମୀକରଣ କେବଳ ବିଜେଡି ନୁହେଁ, ବରଂ ଆଗାମୀ ଦିନରେ ସାରା ରାଜ୍ୟର ରାଜନୈତିକ ଗତିପଥକୁ ବଦଳାଇ ଦେବ। ଯଦି ସୁଜାତା ରାଉତ କାର୍ତ୍ତିକେୟନ ବିଜେଡିର ଗୁରୁତ୍ୱପୂର୍ଣ୍ଣ ପଦବୀକୁ ଆସନ୍ତି, ତେବେ ତାଙ୍କ ସାମ୍ନାରେ ତିନିଟି ବଡ଼ ଆହ୍ୱାନ ରହିବ:
ସୁଜାତାଙ୍କ ସାମ୍ନାରେ ଥିବା ୩ଟି ବଡ଼ ପରୀକ୍ଷା :-
୧.ଓଡ଼ିଆ ଅସ୍ମିତା ଏବଂ ବାହାରିଆ ବିବାଦ: ପାଣ୍ଡିଆନଙ୍କ ସମୟରେ ଉଠିଥିବା ଅଣ-ଓଡ଼ିଆ ବିବାଦରୁ ଦଳକୁ ମୁକ୍ତ କରିବା ଏବଂ ନିଜକୁ ଜଣେ ସଚ୍ଚା ଓଡ଼ିଆ ମହିଳା ଭାବେ ପ୍ରମାଣିତ କରିବା।
୨.ପୁରୁଖା ନେତାଙ୍କ ଅସନ୍ତୋଷ: ଦଳର ବରିଷ୍ଠ ନେତାମାନଙ୍କ ବିଶ୍ୱାସ ଜିତିବା ଏବଂ ଦଳ ଭିତରେ ହେବାକୁ ଥିବା ସମ୍ଭାବ୍ୟ ବିଦ୍ରୋହକୁ ରୋକିବା।
୩.ମିଶନ ଶକ୍ତି ଭୋଟ୍ ବ୍ୟାଙ୍କ: ଓଡ଼ିଶାର ଲକ୍ଷ ଲକ୍ଷ ମିଶନ ଶକ୍ତି ମହିଳାମାନଙ୍କୁ ପୁଣି ଥରେ ବିଜେଡି ସହ ଯୋଡ଼ି ଦଳର ପୁରୁଣା ଗୌରବ ଫେରାଇ ଆଣିବା।
ଏହା ଏକ ଏଭଳି ଚେସ୍ ଖେଳ, ଯେଉଁଠି ଗୋଟି ଚାଳନା କରୁଛି ଦିଲ୍ଲୀ, ମୋହରା ସାଜିଛନ୍ତି ସୁଜାତା ଏବଂ ଦାଉରେ ଅଛି ବିଜେଡିର ପୁରୁଖା ନେତାଙ୍କ ଭବିଷ୍ୟତ। ନବୀନ ପଟ୍ଟନାୟକଙ୍କ ଏହି ନୂଆ ବ୍ରହ୍ମାସ୍ତ୍ର ଦଳକୁ ବଞ୍ଚାଇ ପାରୁଛି ନା ଦଳକୁ ସମ୍ପୂର୍ଣ୍ଣ ଭାବେ ଧ୍ୱଂସ ଆଡ଼କୁ ନେଇଯାଉଛି, ତାହା ହିଁ ସବୁଠାରୁ ବଡ଼ ଦେଖିବାର କଥା।
ଓଡ଼ିଶା ରାଜନୀତିର ଏହି ମେଗା ଏପିସୋଡ୍ ଏବେ ଏକ ରୋଚକ ମୋଡ଼ରେ ପହଞ୍ଚିଛି । ବିଜେପିର ଏହି ସବୁଜ ସଂକେତ ପଛରେ କେଉଁ ବଡ଼ ରହସ୍ୟ ଲୁଚି ରହିଛି, ତାହା ଆଗାମୀ ଦିନରେ ସମ୍ପୂର୍ଣ୍ଣ ସ୍ପଷ୍ଟ ହୋଇଯିବ । କିନ୍ତୁ ଏବେ ସାରା ଓଡ଼ିଶା ଜାଣିବାକୁ ଚାହୁଁଛି, ଏହି ନୂଆ ରଣନୀତି ଉପରେ ଜନତା ଜନାର୍ଦ୍ଦନଙ୍କ ମତ କ’ଣ ?
